Ú Nengen Mbagenev Er Yehova A Nengen Ve Nahan Kpa?
Ú Nengen Mbagenev Er Yehova A Nengen Ve Nahan Kpa?
“Mpav a̱ de lu sha iyol ga . . . kpa alegh a̱ waan ayol a a ikyo vough vough cii.”—1 KOR. 12:25.
1. Shighe u ú va ken paradiso u ken jijingi ica lu a gba ga la lu u iyol nena?
SHIGHE u se undu tar u bo ica lu a gba ga se hingir u dondon ior mba Yehova la se nenge er ve lu a dooshima hen atô ve shi ve we ayol a ve ikyo yô, nahan kwagh ne doo se kpishi. Mlu ve ne ngu kposo a mlu u tar u Satan u u ker mbagenev ihyom shi u eren ayôôso la. Hegen ne, se mba ken paradiso u ken jijingi, ape bem man mzough ve dumbur yô.—Yes. 48:17, 18; 60:18; 65:25.
2. (a) Kanyi ia fatyô u benden a gbenda u se nengen mbagenev laa? (b) Man kanyi i gbe u se eree?
2 Shighe karen yô, se hingir u lun a mnenge u kpeegh sha iyol i anmgbianev asev sha ci u mbamyen vev. Mlu u se lu vough ga ne una na yô, a taver se u veren ishima sha aeren a ken jijingi a anmgbianev asev, se hemba veren ishima sha akaa a sha mi ga a ve eren la. Se fatyô u nengen ve er Yehova a nengen ve nahan la ga. Aluer kwagh ngu nahan yô, doo u se gbidye kwar sha gbenda u se nengen mbagenev la, nahan se hide se nengen ve er Yehova a nengen ve nahan.—Eks. 33:13.
Er Yehova a Nengen Anmgbianev Asev La
3. Bibilo kar tiônnongo u Kristu sha nyi?
3 Er i ôr ken 1 Mbakorinte 12:2-26 nahan, apostoli Paulu kar tiônnongo u Kristu u i shigh un mkurem la sha iyol i i lu a “alegh kpishi” yô. Er alegh a iyolough a lu kwagh môm ga nahan kape mba ken tiônnongo kpa ve lu a aeren man tahav mbu eren kwagh kposo kposo je la. Nahan kpa Yehova lumun ve cii. Se cii se doo un ishima shi wuese iniôngon yase kpaa. Shi Paulu kpa wa se mba ken tiônnongo cii kwagh ér se “waan ayol a [ase] ikyo vough vough cii.” Alaghga a taver se u wan ayol a ase ikyo sha ci u aeren a ase nga kwagh môm ga.
4. Doo u se gema gbenda u se nengen anmgbianev asev la sha ci u nyi?
4 Alaghga se soo u veren ishima sha mbamyen mba anmgbianev asev. Aluer se mba eren nahan yô, ka akaa a a doo se ga la tseegh se lu hemban veren ishima sha mi ye. Kpa Yehova yô, nengen aeren a or jimin cii, ngu a fa or shon vindi vindi. Se yô alaghga se hemba veren ishima sha akaa a vihin a anmgbianev asev ve eren la tseegh, kpa Yehova yô nengen aeren a ve a dedoo la kpaa. Aluer se mba nôngon ser se lu er Yehova nahan yô, anmgbianev asev vea seer doon se ishima shi tiônnongo kpa una hemba lun ken mzough cii.—Ef. 4:1-3; 5:1, 2.
5. Doo u gban nan mbagenev ibo gagh ga sha ci u nyi?
5 Yesu yange fa er uumace ve lu a isharen i nan mbagenev ibo gagh yô. Nahan a wa se kwagh ér: “De gbe nan nen or ibo gagh ga, er ne kpaa á na ne ibo gagh ga yô.” (Mat. 7:1) Fa wer ken zwa u yange i hii ngeren mkaanem man yô, Yesu lu kaan ér se de ieren i nan mbagenev ibo la. Yange fa er mbaungwan a na mbara kpishi lu a ieren i nan mbagenev ibo gagh yô. Alaghga tsô se kpa se mba a ieren ne shinii? Sha kpôô yô, se mba nyi ve se gba nan or u Yehova a ver nan sha iantom ibo gagh shin se kaa ser nan kuma u lun ken tiônnongo ga? Alaghga anmgbian nana lu a mbamyen mba nan kpa aluer Yehova lumun nan yô ka sha mi u se vendan nana? (Yoh. 6:44) Mimi je se na jighjigh ser Yehova ngu hemen nongo na, nahan aluer gba u a sôr kwagh yô una sôr kwagh shon sha shighe u a soo la vough ga he?—Ôr Mbaromanu 14:1-4.
6. Yehova nengen mba ve civir un la nena?
6 Kwagh ugen u a kpilighyol sha kwagh u Yehova yô, ngu a tahav mbu fan kwagh u hanma Orkristu nana va lu shighe u nana va hingir orumace u vough ken tar u he la. Shi a fa iniôngon i hanma Orkristu yange nan nôngo sha u eren sha akaa a nan hen ken Bibilo la. Nahan kwagh gba un u veren ishima sha hanma kwagh u sha mi ga u se er la ga. I ôr ken Pasalmi 103:12 ér: “Er ica i ityoughkitaregh a ityôtar nahan, kape ngu A pav akaabo ase a vese la.” Doo u hanma wase nana wuese Aôndo sha gbenda u a nengen se la.—Ps. 130:3.
7. Se hen nyi sha gbenda u Yehova nengen Davidi laa?
7 I ôr akaa ken Ruamabera, a a tese ér Yehova ngu a tahav mbu fan aeren a dedoo ken hanma or yô. Aôndo ôr kwagh u Davidi ér, “wanakiriki Wam Davidi . . . u a wa ikyo sha atindi a Am, a dondom a ishima na cii, lu eren kwagh u a lu vough tseegh sha ashe Am yô.” (1 Utor 14:8) Nahan kpa, se fa er Davidi yange er akaabo yô. Kpa Yehova tsua u veren ishima sha aeren a na a dedoo la, gadia a nenge ér ishima i Davidi ngi wang.—1 Kron. 29:17.
Nengen Anmgbianev Ou Er Yehova a Nengen Ve Nahan
8, 9. (a) Se fatyô u lun er Yehova nahan sha nyi igbenda? (b) Se tese ikyav i kwagh ne nena, man kwagh ne tese se nyi kwagha?
8 Yehova fa asema a ase, kpa se yô, se fa asema a mbagenev ga. Kwagh ne tseegh kpa ka ityôkyaa i dedoo i se de u ôron mbagenev ijir yô. Ka akaa a a lu or ken ishima cii se fe ga. Doo u se dondo Yehova nahan se de u veren ishima sha akaa a sha mi ga a mbagenev ve eren la, gadia aa va kera lu ga. Aluer se nôngo se dondo un sha imba gbenda ne nahan a doo ga he? Aluer se er nahan yô, se lu ken mzough a anmgbianev asev mba nomso man mbakasev.—Ef. 4:23, 24.
9 U tesen ikyav yô, hen ase kwagh u iyou i i lu saan ishe, haav mbu i̱ mbu lu vihin shi uwindou kpa ve lu vihin kua ihinda i i̱ la. Ior kpishi vea nenge a iyou la yô vea kaa ér i hembe i̱ kera, gadia i̱ kera doo u nengen sha ashe ga. Kpa alaghga orgen di nana nenge iyou la sha gbenda ugen kposo. Alaghga nana nenge ér i maa iyou la taver, shi a fatyô u sôron haav man akaa agen a a vihi sha iyou shon la. Nahan á yam iyou shon a sôr akaa a a vihi sha mi la shi a sôr i̱ i̱ hide i̱ doo sha ashe. Er nan sôr iyou la tsembelee yô, mbakaren gbenda gba wuese er iyou la i doo yô. Se fatyô u eren kwagh er or u a ser iyou i a yam la nahan kpa? Se fatyô u nengen a aeren a dedoo a anmgbianev asev la, nahan nengen er ve lu sha ian i seer zan ikyura ken jijingi nahan kera haren ishima sha mbamyen vev mbara ga kpa? Aluer se er nahan yô, aeren a dedoo a anmgbianev asev ve lu a mi la aa na yô vea doo se ishima vough er ve doo Yehova ishima nahan.—Ôr Mbaheberu 6:10.
10. Kwaghwan u ken Mbafilipi 2:3, 4 la una wase se nena?
10 Apostoli Paulu wa se kwagh u una wase se u lun imôngo a mbagenev ken tiônnongo yô. A wa Mbakristu kwagh ér: “De eren nen kwagh sha u wan ayol a en ikyo tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen er orgen hemba nan yô. Hanma or nana de kera waan akaa a nan iyol i nan ikyo tseegh ga, kpa nana wa akaa a mbagenev ikyo kpaa.” (Fil. 2:3, 4) Iyol hiden a mi ijime ia wase se se nengen mbagenev sha gbenda u vough. Aluer se mba wan kwagh u mbagenev ikyo shi se mba keren kwagh u doon ken a ve yô, se nengen anmgbianev asev er Yehova kpa a nengen ve nahan.
11. Ka mbamgem mba nyi nahan ve bende a atôônanongo agene?
11 Akaa a a lu eren sha tar ainge la na yô ior mbá moughon sha ajiir agen yemen sha ajiir agen seer ngeen a ngee. Ior kpishi mough ken ityar ve yem sha agar a vesen a ityar igen. Ior mba ve mough sha ajiir a ve, ve ve twev hen haregh wase tese isharen i henen Bibilo, nahan ve kohol se u civir Yehova. Ve “due ken hanma ikyurior man hanma nongo man hanma nongoior man hanma zwa kpaa.” (Mpa. 7:9) Kwagh ne na yô, atôônanongo a ase kpishi nga a ior kpishi mba ve dugh sha ajiir kposo kposo yô.
12. Doo u se nengen mbagenev nena, man ashighe agen a taver se u lun a mnenge ne sha ci u nyi?
12 Alaghga a gba u se ver ishima sha gbenda u se nengen mbagenev ken tiônnongo wase la. Kwagh ne umbur se kwaghwan u apostoli Peteru a we se ér se lu a ‘dooshima u mimi hen anmgbianev, se doo ayol a ase ishima tsung’ la. (1 Pet. 1:22) Taver kpishi u tesen dooshima shi eren a mbagenev sha inja, hemban cii yô, hen ijiir i tiônnongo a lu a ior mba ve dugh sha ajiir kposo kposo yô. Alaghga aeren a ityôô a mba ve civir Aôndo a vese la aa kaha a a ase, shi alaghga mbagenev vea hemba zan makeranta a vese, shi vea hemba lun a inyaregh a vese, shi zwa ve ua kaha a u wase kpaa. Ka i taver we u fan mhen u anmgbianev mban man aeren a vee? Kape ve kpaa vea hen kwagh wou ken ishima je la. Nahan kpa, i wa se cii kwagh ér: “Waan nen ior cii ikyo, anmgbianev ve̱ doo ne ishima.”—1 Pet. 2:17.
13. Alaghga a gba u se gema mhen wase sha ci u nyi?
13 Alaghga a gba hange hange u se gema mhen wase sha er se tese anmgbianev asev cii dooshima yô. (Ôr 2 Mbakorinte 6:12, 13.) Ka se kaa ken ishima yase ser, “m nyaghen mbagenev ga, kpa . . .” se gema se ôron mbagenev aeren a sha mi ga a ikyurior igenee? Imba mhen ne tese ér gba u se dugh ihyom i se lu a mi ken ishima la kera. Doo u se pine ayol a ase ser, ‘M ngu nôngon mer me fa kwagh u akuraior agen kpa?’ Mbampin mban vea wase se se seer soon kwagh u anmgbianev asev mba ve dugh sha ajiir kposo kposo la.
14, 15. (a) Tese akav a mba yange ve gema gbenda u ve nengen mbagenev la. (b) Se dondo un nena?
14 Bibilo i ôr se akaa a dedoo a ior mba ve gem mbamhen vev yô, môm ken ve yô, ka apostoli Peteru. Yange Peteru ma tswer u nyôron ken ya u atôatyev sha ci u un ngu Oryuda yum. Nenge ase er yange a lu Peteru ken ishima shighe u i kaa a na ér a za sôr Korneliu, u lu oripusu la ken ya na la sha wono. Peteru yange gema mnenge na sha ci u fa ér sar Aôndo u ior mba ken akuraior cii ve va ken tiônnongo u Kristu. (Aer. 10:9-35) Saulu u va hingir apostoli Paulu la kpa gema mnenge na, nahan de u nyaghen ior. Á kaa ér yange un kôr Mbakristu ihyom je hingir u una ‘tôv nongo u Kristu u Aôndo a ican ngegh, una nôngo u timin u kera je.’ Kpa, er Ter Yesu kôôm Paulu yô, a gema inja, shi a ngohol kwaghwan hen mbagenev mba tôvon ve a ican la kpaa.—Gal. 1:13-20.
15 Se kpaa se fatyô u geman mnenge wase sha iwasen i icighan jijingi u Yehova. Aluer se nenge a ieren i nyaghen mbagenev la ken vese yô, se nôngo se dugh i ken a vese kera, ‘shi se kuran mzough u ken Jijingi sha mkange u bem.’ (Ef. 4:3-6) Bibilo taver se ishima ér se “haa . . . dooshima iyol, ka kwagh u maghen mlu u vough je la.”—Kol. 3:14.
Se Dondo Yehova ken Tom Wase u Pasen Kwagh
16. Ka awashima u nyi Aôndo a lu a mi sha ci u ior ciilii?
16 Apostoli Paulu nger ér, “hen Aôndo yô, msange u sha dooshima ngu je ga.” (Rom. 2:11) Ka awashima u Yehova sha u akuraior cii a civir un. (Ôr 1 Timoteu 2:3, 4.) Nahan, Yehova na ian ér i pase ‘Icôronloho u Dedoo hen mba ve tem shin tar cii man hen hanma ikyurior man hanma nongo man hanma zwa man hanma nongoior.’ (Mpa. 14:6) Yesu kaa ér: “Sule la yô, ka tar.” (Mat. 13:38) Kwagh ne ngu u a inja kua mba hen tsombor wou nena?
17. Se wase mba ve dugh sha ajiir kposo kposo la nena?
17 Ka hanma or cii nana fatyô u yemen sha ajiir a icaa za pasen mbagenev loho u Tartor ga. Nahan kpa, alaghga se lu sha ian i pasen ior mba ve dugh sha ajiir kposo kposo, mba ve lu hen haregh wase la loho u dedoo. Se mba keren aan a se pase hanma or cii kwagh, saa mba se vanden pasen ve kwagh anyom anyom la tseegh ga kpa? Kange ishima wer u za a loho ne hen mba i lu a vande pasen ve kwagh kpoghuloo ga la.—Rom. 15:20, 21.
18. Yesu yange tese ér kwagh u mbagenev gba un ishima nena?
18 Yange sar Yesu tsung u wasen mbagenev. Yange pasen kwagh hen ijiir i môm tseegh ga. Ivur igen kaa ér Yesu “zende ken agar a vesen kua ken angarev mba kiriki la cii.” Nengen “a ikpelaior yô, mhôônom kôr Un a ve tsung” nahan sar un u wasen ve.—Mat. 9:35-37.
19, 20. Se tese ser kwagh u mbagenev gba se ishima er Yehova man Yesu kpa kwagh u ior mba ve dugh sha ajiir wue wue a gbe ve ishima nahan nena?
19 We kpa, u fatyô u tesen wer kwagh u mbagenev gba u ishima nena? Mbagenev ka ve pase kwagh sha ajiir agen a hen haregh ve, a i fe pasen kwagh her ga yô. Ajiir ne kua ajiir a i eren kpenga her man ajiir a memen man ajiir a ior ve nyôron mato kua uyaav mba ior ve gbe nyôron her dang ga la. Mbagenev hen zwa ugen sha er vea pase ma kweior ugen, u u lu hen haregh ve la kwagh, shin vea pase ma nongoior u yange i fatyô u pasen ve kwagh kpoghuloo ga la. Aluer se hen u sughun ambaaior ne ken zwa ve yô, kwagh ne una tese ér kwagh wase gba ve ishima. Sea fatyô u henen zwa ugen ga kpa, se taver mba ve lu henen u la ishima. Kpa doo u se hide mbagenev a ishima ijime shin se hen ser ka kwagh ugen kposo a ne ve ve yem u pasen kwagh ken tar ugen ga. Hanma or cii kwagh u nan gba Yehova ishima, shi doo u se nengen mbagenev er un kpa a nengen ve nahan.—Kol. 3:10, 11.
20 Aluer se mba nengen mbagenev er Aôndo kpa a nengen ve nahan yô, se pase hanma or cii kwagh, aluer mlu u nan una lu kposo a u wase kpaa. Alaghga mbagenev vea lu a ijiir i tsan ga, shin vea huan akondo a injaa ga, shin vea eren ijimba. Mbagenev vea er a vese dang kpa, se lam sha tar ve shin zwa ve dang ga. Ior mbagenev yange ve nzughul a Paulu kpa de ér kwagh ne a yange un u pasen ve kwagh ga. (Aer. 14:5-7, 19-22) Yange na jighjigh ér mbagenev ken ve vea kegh ato a loho na la.
21. Aluer se mba nengen mbagenev er Yehova kpa a nengen ve nahan yô, kwagh ne una wase se nena?
21 Hegen ne, se fa dedoo ser gba u se nengen anmgbianev mba se lu tiônnongo môm a ve la man mzough u anmgbianev tar sha won cii la kua mba se pasen ve kwagh la cii er Yehova a nengen ve nahan. Aluer se za hemen u nengen mbagenev er Yehova kpa a nengen ve la yô, kwagh ne una na se lu ken bem man ken mzough a ve. Shi se hemba lun sha ian i se wase mbagenev ve fa er Yehova, u a “te ken atiator sha dooshima ga,” kpa a tesen ér kwagh u ior cii gba un ishima la “ve lu tom u ave Na” yô.—Yobu 34:19.
Ú Fatyô u Nan Mlumun Kpa?
• Ka mnenge u nyi i doo u se nengen anmgbianev asev ga?
• Se nengen anmgbianev asev er Yehova kpa a nengen ve nahan nena?
• Gbenda u i gbe u se nengen anmgbianev asev mba ve dugh sha ajiir wue wue la tese se nyi?
• Se dondo Yehova sha u nengen mbagenev shighe u se dugh kwaghpasen la nena?
[Study Questions]
[Picture on page 26]
Ú fa kwagh u ior mba ve dugh sha ajiir agen la nena?
[Pictures on page 28]
Ú pase ior kpishi loho u dedoo nena?