Ityendezwa i Hange Hange

M ER ityendezwa i hange hange. De m pase er i hii ve mo ngô ugen ken tar u Ishpania yange m er ityendezwa ne yô.

Bem man mzough yange ve lu hen tsombor u mbamaren av ga. Tsombor wase yange u zungwe kpishi zum u anmgbian wam u nomso u lu anyom anyiin kpe ku u aikyôr u mato yô. Heela tseegh ga, inja i dang i terem la na yô, taver ngôm kpishi u zuan a msaanyol ken ivese. Er mzeyol ne lu hen tsombor nahan kpa, ngôm za hemen u tesen mo man anmgbian wam u vesen aeren a dedoo.

Shighe kar yô, anmgbian wam u vesen la vôso kwase, mo kpa m vôso nom. Ica i gbe ga yô, ngôm gba angev mbu kyansa, ken masejime yô, i wua un. Kpa cii man sar ku yô, yange na se kwagh u lun a inja kpishi.

Huror u ngôm ugen yange lam a na sha kwagh u ishimaveren i Ruamabera i er sha kwagh u mnder u shin ku yô, nahan ngôm lumun ér i henen Bibilo a na. Shighe u zulum u ngôm una kpe yô, ishimaverenkeghen i ken Bibilo la wase un kpishi shi na un msaanyol kpaa.

Er se nenge er Bibilo i lu henen la wase un kpishi yô, mo man anngôm se hii u henen Mkaanem ma Aôndo. Yange m er batisema, m hingir Kwaseshiada u Yehova uwer môm kar cii ve m mar wan wam u kwase, u sha uhar u se ii un iti ér Lucía la ye.

Iyange i m er batisema la lum iyange i vesen kpen kpen. Ityôkyaa i môm i yange saan mo iyol yô, lu sha ci u m tsegha iyol yam sha ci u Yehova mer me civir un gbem sha won. Ityôkyaa igen yô lu sha ci u me pase wan wam u nomso man u kwase akaa a m na jighjigh a mi la.

Nahan kpa, ityôkyaa i sha uhar i yange i nam msaanyol la kera tsa gbem ga. Lucía nyer anyom anyiin yô, hii u vaan iyav mbu nyoon. Er ortwer kar un kwa imôngo yô, a kav ér kwagh mura un sha mtema kehe kuma er ityamegh ki alumbu nahan. Ortwer la kaa ér kyansa mende Lucía shin uya ngi samber fele fele. Lucía ya ican a kyansa ne anyom ataankarahar shi a tsa ken iyouci shighe gôgônan.

Ieren i Tangen Iyol Ga

Lucía taver mo ishima kpishi ken anyom a a lu uange la sha u kuven mo shi susen mo zwa. Gbenda u Lucía wa ishima a angev mbun ne kpa bende a mbatwerev. Yange i doo un u wasen mbatwerev sha u nan mbayev mbagenev mba i kôr ve gambe ikyua ikyua a na la atumba a kôrough a i yer ér yogurt la, man zar ikyôn kua akaa agen kpaa. Nahan mbatwerev na Lucía ikyondo i tweregh kua kwembe u mbatwerev u tesen ér “wasen ve tom.”

Kwase iyouci ugen kaa ér “kwagh u Lucía kôrom ken ishima kpen kpen. Yange taver iyol shi lu wankwase u henen kwagh kpishi, shi kwaghkperan doo un ishima tsung. Lu wankwase u lun sar sar shi eren kwagh er ka igyandenor nahan.”

Mkaanem ma Aôndo yange ma taver Lucía ishima shi ma wase un u eren kwagh vough. (Heb. 4:12) Yange na jighjigh ér ken tar u he yô “ku ua kera lu ga, shin ijungwen shin mliam shin ican kpaa ia kera lu je ga,” er Aôndo a tende zwa ken Mkaanem nam nahan. (Mpa. 21:4) Kwagh u ior mbagenev yange gba un ishima, shi pasen ior loho u ken Bibilo sha hanma ian i i dugh cii. Ishimaverenkeghen i mnder u shin ku i Lucía lu a mi la wase un u wan ishima shi lun sar sar shin er fa ér angev nav mbua bee  ga nahan kpaa. (Yes. 25:8) Lucía lu a aeren ne zan zan iyange i kyansa mase wuan un la.

Lu sha iyange la m er ityendezwa i hange hange a wan wam ye. Lucía kera lu fantyô u bughun ashe ga. Ter na kôr un uwegh môm mo di m kôr kugenegh. M ôr un ken to mer, “Ishima i de ze u iyol ga, me undu ú ga. Ôôn kure kure. Shighe u u nder shin ku la u lu gbang gbang. Mayange je, u kera gba angev ga, shi me lu vea we kpaa.”

Hegen ne, gba u me nôngo kwagh tsung sha er me lu her shighe u a nder un shin ku la. M fa er a lum zange u keghen shighe la ga yô. Kpa m fa mer aluer m wa ishima m za hemen u suur sha Yehova shi civir un sha mimi yô, me nenge a na shighe u a nder un shin ku la.

Lucía Ver Se Ikyav i Dedoo

Ishimataver i Lucía man iwasen i tiônnongo na un la bende a nomom u lu Orshiada u Yehova ga la. Sha iyange i Lucía kpe la, nomom kaa a mo ér un soo u sôron akaa ken uma na. Usati mba kar kpuaa yô, a kaa a ortamen ugen ken tiônnongo ér a hen Bibilo a na. Ica i gbe ga yô a hingir u zan mbamkombo cii. Sha iwasen i Yehova yô, a de u maan taav, kwagh u vande nôngon ér una de kpa kanshio la.

Zan zan hegen kpa m ngu zungwen ku u Lucía her, kpa m wuese Yehova kpishi sha ikyav i dedoo i Lucía a ver se la. Mo man orya wam ka se taver ayol a ase asema sha ishimaverenkeghen i mnder u shin ku, shi se hen ken ishima yase shighe u a va nder Lucía shin ku la, je yô ka se nenge a Lucía ken ashe a asema a ase er a lu sen gbar gbar nahan ahenge na a piin la.

Ku u wan wam ne bende a kwase ugen u ya na lu ikyua a u wase yô. Wan u kwase ne ugen zaan makeranta vea Lucía imôngo. Wan u kwase ne u lun anyom 11 kpa kpe angev mbu mbu wua Lucía la. Nahan er a ungwa ér Lucía kpe angev mbura yô, kwase ne pine fa ya wase, nahan a due sha iyange i Sati pepe pepe a va hen ya wase, man wura kpa lu noon. Yange soo u fan er m lu wan ishima a ku u Lucía yô, shi kaa ér mo vea na se hii u surun ungôôv mbagenev mba imba kwagh la i er ve yô asema.

Yange m pase un mer ityendezwa i Bibilo nam msurshima u a hembe hanma msurshima u orumace nana nam cii yô. Er m ôr un mkaanem ma Yesu ma i nger ken Yohane 5:28, 29 la yô, a bon ashe sha a mo. Nahan a lumun ér i hen Bibilo a na, ica i gbe ga yô a hingir u lun a “bem u Aôndo u a gande hanma mfe wase cii” la. (Fil. 4:7) Ashighe kpishi mo vea kwase ne ka sea henen Bibilo imôngo yô se de se gba henen er se va kegh mbadoon se ishima gbenda shighe u a nder ve shin ku la yô.

Sha mimi yô, er Lucía a tse kpishi ga nahan kpa, a ver se ikyav i dedoo kpen kpen. Jighjigh u nan u Lucía la wase tsombor wase hingir u civir Aôndo ken mzough, shi a seer taver mo ishima u civir Aôndo sha ishima i môm cii. Hanma or u or u doon nan ishima nan saa ku, u a va nder nan cii gba u nana kure ityendezwa i hange hange i nan er la.

[Picture on page 20]

Paradiso u Lucía a kper yô