Yehova Ongo Mliam Asem
Yehova Ongo Mliam Asem
“Ashe a TER nga sha mbaperapera, A kegh ato sha u ungwan myer ve kpaa.”—PS. 34:15.
1, 2. (a) Ka i lu ior kpishi ken ishima nyian nena? (b) Kpiligh Mbakristu iyol ga sha ci u nyi?
U NGU yan icana? Aluer u ngu yan ican yô, fa wer u ngu tswen ga. Ior kpishi mba nôngon a mbamzeyol mba ve tagher a mi ayange ayange ken tar u bo ne. Taver mbagenev u wan ishima a mbamzeyol mban. Ka i lu ve ken ishima er Davidi kpa lu un ken ishima ve ôr mkaanem man nahan ér: “M ure, kundam iyol tsung, m toghor sha ci u anzughul a ken ishima yam. Ishima ngi tan mo kwe, agee nga yinan mo, iwanger i ashe am kpaa kera ngi ga.”—Ps. 38:8, 10.
2 Kpiligh se Mbakristu iyol er i hii ve ior ve lu yan ican ga. Se fa ser “ican” i ior ve lu tagher a mi ne ka môm ken akaa a Yesu yange tsengaôron ér aa lu ikyav i mve na yô. (Mar. 13:8; Mat. 24:3) Ishember i ken zwa Grika i i gem ér “ican” la tese ican i ka i er kwase shighe u nan lu toghor mar yô. Kwagh ne wase se u fan ican i ior ve lu yan tsung ken “ashighe a ican” ne yô.—2 Tim. 3:1.
Yehova Fa Atsan a Ase
3. Kanyi i lu eren ior mba Aôndo?
3 Mba civir Yehova kpa ican eren ve, shi tar kpa ngu hemban vihin a vihi cii. Er uumace cii ve lu yan ican nahan kpa mbacivir Aôndo shi mba tagher a ‘orihyom ve diabolo,’ u a kange ishima ér una vihi jighjigh wase la. (1 Pet. 5:8) Se kpaa se fatyô u ôron kwagh er Davidi kpa ôr nahan, wener: “Iheen nam ishimavihin je, kondo iyol, agee kera ngam iyol ga; M ker mba mhôônom ma kôr ve a mo, kpa mô lu ga, mbasurun mo ishima kpaa, m zua a min ga.”—Ps. 69:20.
4. Kanyi ka i sur se ishima shighe u se lu yan icana?
4 Kwagh u Davidi ôr la tese ér Davidi lu a ishimaveren ga kuaa shinii? Mayange ga. Ungwa mkaanem ma shi seer ôron ne, a kaa ér: “Gadia TER ongo imo i mbaibanave, man lahan mbakwarev Nav kpaa ga.” (Ps. 69:33) Ashighe agen alaghga ican ia er se je se hingir er ka mbakwarev nahan. Shi a lu inja er mbagenev fa zayol wase ga nahan, man kape i lu kpaa je la. Kpa aluer se fa ser Yehova fa atsan a a tseren se la yô, kwagh ne una sur se ishima er Davidi nahan.—Ps. 34:15.
5. Tor Solomon yange lu a vangertiôr ér nyi?
5 Solomon, wan u Davidi yange ôr kwagh ne shighe u lu tseghan tempel ken Yerusalem la. (Ôr 2 Kroniku 6:29-31.) Yange zamber a Yehova ér a ungwa msen u hanma or u mimi u nan sen un sha “mvihi u nan, man ican i nan” cii a ungwa nan. Aôndo una er nan sha mbamsen mba ior mba ve lu yan ican laa? Solomon yange pase vangertiôr u un lu a mi la ér Aôndo una ungwa mbamsen vev tseegh ga kpa una wase ve kpaa. Sha ci u nyi? Sha ci u a fa “asema a ônov mba iorov.”
6. Se nôngo a mbamzeyol nena, man ka sha ci u nyi?
6 Se kpa se fatyô u sônon Yehova sha ‘mvihi wase man ican yase.’ Mfe u se fe ser Yehova fa atsan a ase shi we se ikyo la a sur se asema. Apostoli Peteru kpa lumun a kwaghôron ne shighe u kaa ér: “Gema nen ishima i nyian yen la cii, haa nen sha a Na, gadia ka Un A lu koson ne ye” la. (1 Pet. 5:7) Kwagh gba Yehova sha akaa a a tseren se la. Yesu pase wanger wanger er Yehova a we se ikyo yô, a kaa ér: “Mba teen mbaatsator uhar sha toro gaa? Nahan kpaa mô ve môm tsô kpaa una gba gban shin inya ga saa Ter wen Una fa. Zan zan ice yen i sha ityou kpaa, i ôr i cii. Nahan yô, de cie nen ga; mbaatsator kpishi kpaa ne hemba ve.”—Mat. 10:29-31.
Suur sha Iwasen i Yehova
7. Ka iwasen i nyi se lu a vangertiôr ser se zua a mi?
7 Se fatyô u lun a vangertiôr ser sar Yehova u wasen se shighe u se lu ken mzeyol yô, shi ngu a tahav mbu wasen se kpaa. “Aôndo ka ijiir yase i waren ker man agee ase kpaa, ka iwasen i i lu ikyua ikyua ken ican” yô. (Ps. 34:15-18; 46:1) Aôndo wasen se nena? Nenge ase kwagh u i er ken 1 Mbakorinte 10:13 ne, ér: “Aôndo yô, ka u jighjigh, Una rumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.” Alaghga Yehova una ker gbenda u been a ican yase shin una na se agee a se wa ishima a mi yô. Yehova una wase se sha igbenda ne cii.
8. Se zua a iwasen hen Aôndo nena?
8 Se zua a iwasen ne nena? Ungwa kwagh u i we se ér se er ne, ér se ‘gema ishima i nyian yase cii, se haa sha a Na.’ Inja na yô, se de Yehova a nenge sha mbamzeyol asev. Nahan se de u henen sha mbamzeyol asev, se suur sha a na ser a nenge sha mbamgbe asev. (Mat. 6:25-32) Cii man se suur sha Yehova yô gba u se hide a ayol a se ijime se kera suur sha agee a ase shin sha kwaghfan wase ga. Aluer se mba hiden a ayol a ase ijime sha “uwegh ku Aôndo ku ageegh” yô, se mba tesen er se gbe kwagh sha ishigh nagh ga yô. (Ôr 1 Peteru 5:6.) Kwagh ne ka a wase se u wan ishima a hanma kwagh u Aôndo a ne ian ér a er se cii. Alaghga a sar se er Aôndo ma a bee a mzeyol wase ave ave nahan, kpa se na jighjigh ser Yehova fa shighe jighilii u una bee a mzeyol shon man gbenda u una bee a mi kpaa.—Ps. 54:7; Yes. 41:10.
9. Ka mzeyol u nyi yange gba u Davidi una haa sha Yehova?
9 Umbur mkaanem ma Davidi a er ken Pasalmi 55:22 ne, ér: “Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga.” (Ps. 55:22) Davidi yange nger mkaanem man shighe u ican tsule un tsung yô. (Ps. 55:4) Lu shighe u Abesalom wan u Davidi soo u ngohol ikyônough ki torough hen a na sha apera la nger Pasalmi ne ye. Ahitofel, or u wasen Davidi mhen u Davidi hemba suur sha na cii la kpa lu môm ken mba ve zua zwa sha u i hungwa un ikyônough yô. Davidi yevese yem ken Yerusalem sha er una war yô. (2 Sam. 15:12-14) Er Davidi tagher a atsan ne nahan kpa, a za hemen u suur sha Aôndo, man mayange je va ahenge ga.
10. Shighe u se lu ken ican yô, gba u se er nyi?
10 Doo u se pase Yehova mbamzeyol asev ken msen er Davidi kpa er nahan. De se time sha kwagh u apostoli Paulu a taver se ishima ér se er sha kwagh ne yô. (Ôr Mbafilipi 4:6, 7.) Aluer se er imba msen la yô, se zua a nyi? “Bem u Aôndo u a gande hanma mfe wase cii una kura asema a en man mbamhen enev ken Kristu Yesu.”
11. “Bem u Aôndo” la kor asema ase man mbamhen asev nena?
11 Msen una sôr mzeyol wou kpa? Alaghga una fatyô u sôron. Gba u se fa ser Yehova ongo mbamsen asev hanma shighe er se soo la ga. Nahan cii kpa, msen ka a wase se u lun a mnenge u vough sha er mbamzeyol asev vea hemba se ga yô. Shighe u i lu inja er mbamzeyol asev mba hemban se yô “bem u Aôndo” una wase se. Er akum a utya ka a kura gar sha er ior mba vihin kwagh ve de va hemben gar ga nahan kape “bem u Aôndo” kpaa ka a kura asema ase man mbamhen asev je la. Shi una wase se se hemba mciem asev kua mbamhen mba bov shi una wase se nahan se kera er kwagh gaegh shin sha ibume ga.—Ps. 145:18.
12. Pase er or nana fatyô u zuan a bemshima yô.
12 Shighe u se lu yan ican nahan se lu a bemshima nena? Hen ase sha kwagh u una seer tan iwanger sha mlu wase ne. Alaghga or nan ngu eren tom sha ikyev i orvesen u vihin tu. Kpa or shon zua a ian i pasen or u nan tee nan tom la er i lu nan ken ishima yô, man or u a tee nan tom ne ka or u fan kwagh, u wan or ikyo kpaa. Or u a tee nan tom la kaa ér nan fa kwagh u a lu zan hemen yô, shi nan pase ér shi cuku nana de orvesen la tom. Kwagh la una doo or u i tee nan tom ne ga he? Er nan ne jighjigh a kwagh la shi nan fe kwagh u a sôôn eren yô, una taver nan ishima nana za hemen u eren tom u nan, aluer gba u nana ya ican sha anshighe u a mase shin kpuaa la je kpaa. Kape Yehova kpa a fe kwagh u a lu tseren se je la, shi a taver se ishima ér shi kpuaa tsô una “dugh tor u tar ne kera.” (Yoh. 12:31) Kwagh la kundu se iyol kpen kpen.
13. Dugh msen kera yô, kanyi igen i gbe u se eree?
13 Nahan kwagh ne tese ér aluer se pase Yehova mbamzeyol asev ken msen yô kwagh bee a bee jee? Ei. Gba u se er kwaghgen kpaa. Gba u se er sha kwagh u se sen la. Shighe u Tor Saulu tindi ior hen ya u Davidi ér ve za wua un la, Davidi er msen ér: “Dughum sha ikyev i mbaihyomov av, Aôndo wam, kende a mo sha hen mba ve mough num a mo la. Dughum sha ikyev i mbaerenafer, yimam sha ikyev i mbahaanawambe.” (Ps. 59:1, 2) Dugh msen u Davidi er la kera yô, yange dondo kwaghwan u kwase na nahan a yevese a war. (1 Sam. 19:11, 12) Se kpa se fatyô u eren msen ser Aôndo a na se kwaghfan sha er se nôngo a ican i i tser se la yô.—Yak. 1:5.
Er Se Zua a Tahav Mbu Wan Ishima Yô
14. Kanyi ia wase se u wan ishima shighe u se lu yan icanaa?
14 Alaghga a bee a ican yase la kera fele ga. Alaghga ia za hemen anshighe naleghaa je. Aluer ka nahan yô, kanyi ia wase se se wa ishima? Hiihii yô, umbur wer aluer se za hemen u civir Yehova sha mimi shighe u se lu yan ican yô se mba tesen mdoo u Yehova a doo se ishima la. (Aer. 14:22) Umbur kwagh u Satan yange wa Yobu iyol la, a kaa ér: “Ka gbilin Yobu a cie Aôndo yee? U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar. Kpa naregh ase uwegh Ough, bende akaa a a lu a mi la cii, tsô una venda U sha ishigh Yough je!” (Yobu 1:9-11) Kpa er Yobu tile sha mimi her yô, tese ér kwagh u Satan ôr la lu aie jighilii. Aluer se kpa se wa ishima a atsan yô, se tese ser Satan ka or u aie. Aluer se wa ishima yô, ishimawan la di ia taver vangertiôr man ishimaverenkeghen yase.—Yak. 1:4.
15. Ka akav a nyi aa fatyô u taver se ishima?
15 Kwagh u sha uhar yô, fa wer ‘anmgbianev ou sha won cii kpaa i ver ve ican shon i môm i môm i u lu yan i ne vough.’ (1 Pet. 5:9) Sha mimi yô, “ma imeen ngi a tser ne ga, saa i hemban or ga la” tseegh. (1 Kor. 10:13) Nahan aluer u ngu henen sha akav a mbagenev ve ver la, kera ka sha ican i ú lu yan la ga yô, ishima a hemba taver we u wan ishima. (1 Tes. 1:5-7; Heb. 12:1) Tôô shighe gbidye kwar sha akav a mba u fe ve we ishima a ican i vihin tsung la. Aluer ú ker ngeren mba sha kwagh u akaa a a er ior kpôô kpôô, mba yange ve wa ishima a imba ican i we kpa ú lu yan la yô, ngeren mbara vea taver we ishima kpen kpen.
16. Ka sea tagher a atsan kposo kposo nahan Aôndo a taver se ishima nena?
16 Kwagh u sha utar yô, umbur wer Yehova ka “Ter u A lu a mhôônom ma zungwen man ka Aôndo u A lu a ishimasurun cii. Un u A surun se asema sha atsan a ase cii, sha er se kpaa sé fatyô u surun mba ve lu ken hanma ican la ishima sha ishimasurun i se ayol a ase kpaa Aôndo A sur se asema a mi la.” (2 Kor. 1:3, 4) Ka inja er Aôndo ngu vea vese ngu taver se ishima shi nan se agee nahan, man ka ken ican i se lu yan hegen la tseegh ga kpa ka ken ‘atsan a ase cii.’ Kwagh ne ka a gema a wase se se fatyô u surun mba ve lu ken ‘hanma ican la ishima.’ Paulu yange nenge er mkaanem man ma lu mimi yô.—2 Kor. 4:8, 9; 11:23-27.
17. Bibilo ia wase se u wan ishima a atsan nena?
17 Kwagh u sha unyiin yô, se mba a Mkaanem ma Aôndo ma ma lu “a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a agoyol sha ci u hanma tom u dedoo” la. (2 Tim. 3:16, 17) Kpa Mkaanem ma Aôndo ma ne sha er se “kuma” shi se “lu a agoyol sha ci u hanma tom u dedoo” tseegh ga, ma wasen se u wan ishima a ican kpaa. Inja i ishember i ken zwa Grika i í gem ér “lu a agoyol” la ka u “wan iyol sha kwagh keghen a kegh.” Alaghga yange í yar tom a ishember ne shighe u a ôron kwagh u tso u i we ikyav mbi i gbe u a za zende a mi la cii shi mi la, gayô mashin u a eren hanma kwagh u i soo u eren a mi la cii. Kape Yehova kpa a ne se Mkaanem nam sha er maa wase se u hemban nyityô ican i se tagher a mi cii je la. Nahan yô, se fatyô u kaan ser: “Aluer Aôndo de ér ican i tserem yô, me fatyô u wan ishima a ican shon.”
A Va Dugh Se ken Atsan a Ase Cii
18. Kanyi se umbur ve ia wase se u wan ishima a icanaa?
18 Kwagh u sha utaan yô, gba u ú umbur hanma shighe wer ica a gba ga tsô Yehova una dugh uumace ken atsan a a tseren ve la cii. (Ps. 34:19; 37:9-11; 2 Pet. 2:9) Shighe u Aôndo una kure uityendezwa nav la, una dugh se ken atsan a ase tseegh ga, kpa una na se uma u tsôron sha vea Yesu gayô ken paradiso shin tar.
19. Or nana fatyô u wan ishima, civir Aôndo sha jighjigh nena?
19 Nahan se za nen henen u wan ishima a mbamzeyol mba se lu tagher a mi ken tar u bo ne zan zan shighe la una kar kuman. Se mba veren ashe gbenda a shighe u mbamzeyol mban vea kera lu sha won ga la. (Ps. 55:6-8) Doo u se fa ser aluer se wa ishima se mba civir Aôndo sha mimi yô, se tese ser Diabolo ka or u aie. Sha nahan yô, se zua nen a agee sha mbamsen asev mba eren man hen anmgbianev asev, se fa nen ser anmgbianev asev kpaa mba yan atsan er se nahan. Eren tom a Mkaanem ma Aôndo sha er u lu or u nan we agoyol shi nan kom yô. Mayange je, de lumun wer jighjigh u ú ne “Aôndo u A lu a ishimasurun cii,” u a we se ikyo la a tenger ga. Umbur wer, “ashe a TER nga sha mbaperapera, A kegh ato sha u ungwan myer ve kpaa.”—Ps. 34:15.
Ú Fatyô u Nan Mlumun Kpa?
• Davidi yange tagher a atsan nahan, lu un ken ishima nena?
• Ka vangertiôr u nyi Tor Solomon lu a mini?
• Kanyi ia wase se u wan ishima a kwagh u Yehova a ne ian ér a er se laa?
[Study Questions]
[Picture on page 13]
Solomon lu a vangertiôr ér Yehova una yima ior Nav mba ve lu ken ican la
[Picture on page 15]
Davidi yange er msen haa mbamzeyol nav sha Yehova, shi er tom sha msen la kpaa