Civir Yehova Hegen U Ú Lu Iyev Ne
Civir Yehova Hegen U Ú Lu Iyev Ne
“Lu ken akaa a i tese u, u ne a jighjigh la.”—2 TIM. 3:14.
1. Yehova nengen icivir i agumaior a a lu Mbashiada la nena?
MCIVIR u agumaior a civir Yehova sha mimi la ngu un kwagh u vesen, sha nahan yô a ôr kwaghôron u profeti sha kwagh ve. Orpasalmi wa icam ér: “Ior Ou vea na nagh sha ayol a ve sha asema a dedoo je sha iyange i ikyumutya You, a uicighanmbaakondov iyol, sha mve u use; er avure a lu nahan kape ikyaior You ia va la.” (Ps. 110:3) Ikyaior i i lu civir Yehova sha mimi la doo un ishima kpishi.
2. Tar ne ngu meen agumaior sha kwagh u mlu ve u ken hemen la nena?
2 Ne agumaior a ken tiônnongo u Kristu, ne tsegha ayol a en sha ci u Yehova vee? Alaghga a taver igyumior kpishi u civir Aôndo. Ashighe agen, mbakpengav man atica kua mba hen tsombor vea wa agumaior kwagh ér a zenda uyôughyôughmbaakaav ityô. Mbagenev ka ve puu igyumior i í soo u civir Aôndo yô. Jighilii yô, kwagh môm u a hembe u agumaior civir Aôndo u mimi je kpa ngu ga. (Ps. 27:4) Nahan doo u se time sha mbampin mba utar mban: Doo u ú civir Aôndo sha ci u nyi? Kanyi ia wase ú u za hemen u eren sha iyol i u tsegh sha ci u Aôndo la shin er mbagenev vea hendan a we nahan kpaa? Ka a aan a injaa a civir Aôndo a nyi aa fatyô u bughun sha ci wouwe?
Ka Kwagh u Injaa u Agumaior Civir Yehova
3. Doo u akaa a Yehova a gbe ne aa bende a vese nena?
3 Doo u u civir Aôndo u mimi man u uma sha ci u nyi? Mpase 4:11 pase se ityôkyaa i vesen ér: “We, Ter Aôndo wase, U kuma u ngohol iengem man icivir man agee gadia U gba akaa cii man ka sha ishima You kpaa a lu, shi i gbe a kpaa ye.” Hanma kwagh u a lu shin tar cii ka Yehova a gbe ye. A gba tar doo kpen kpen! A gba ikyôn man uimondon kua ishôso man utyeku kua iwo man ukungômbamngerev. I ôr ken Pasalmi 104:24 ér, “tar iv a akaa a [Aôndo a] gbe la.” Se wuese kpishi er Yehova a ne se iyol man mhen u a wasen se u ember uma sha tar nahan, kua akaa a dedoo a a lu sha mi la cii. Se nenge ser doo u se civir Yehova sha akaa a dedoo a a gbe sha ci wase ne ga he?
4, 5. Ka akaa a nyi Yehova yange er ve mgbegha Yosua u kporom hen a naa?
4 Se zua a ityôkyaa igen i i gbe u se civir Yehova la ken mkaanem ma Yosua, orhemen u Iserael yange ôr la. Shighe u zurum u Yosua una kpe la, a kaa a ior mba Aôndo ér: “Ne kpaa ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.” Yosua yange ôr kwagh nahan sha ci u nyi?—Yos. 23:14.
5 Er Yosua lu wanye u vese ken Igipiti yô, a shi nan kpa yange ungwa kwagh u ityendezwa i Yehova er ér una na Mbaiserael tar ve la. (Gen. 12:7; 50:24, 25; Eks. 3:8) Heela tseegh ga, Yosua yange nenge er Yehova hii u kuren ityendezwa na la sha u van a atsan Pue sha Mbaigipiti sha er Farao u cighir ishima la una na Mbaiserael ian u duen yô. Shi lu môm ken mba yange i yima ve shin Zegemnger u Nyian shi ve nenge er ifi la kua a Farao kua mbautyaav nav yô. Yosua shi nenge sha ashe na er Yehova yima ikyurior i Iserael shi na ve hanma kwagh u ve soo cii ken zende ve u ken “zegedeserti u cieryol” u Senai la yô. Mô ve kpa kpe ijen shin imura ga. (Dut. 8:3-5, 14-16; Yos. 24:5-7) Yange shighe kom u Mbaiserael vea hemba ikyurior i ageegh i Mbakanaan ityav, vea ya dyako i Tar u Ityendezwa la yô, Yosua nenge er Aôndo u un man Mbaiserael mbagenev ve civir la na ve agee ve hemba ityav mbira yô.—Yos. 10:14, 42.
6. Kanyi ia wase u u lun a isharen i civir Aôndo?
6 Yosua yange fa er Yehova a kure uityendezwa Nav cii yô, sha nahan yô a kaa ér: “Mo a ya wam cii yô, ka TER sé civir Un ye.” (Yos. 24:15) We di ye? Ka wea hen sha uityendezwa mba Yehova mba ve vande kuren la kua mba una va kure ken hemen la nahan ishima ka i mgbegha u u civir un er Yosua nahan kpa?
7. Ka hange hange u eren batisema sha ci u nyi?
7 Ityomavee i Yehova man uityendezwa nav mba kpilighyol mba se fatyô u suur sha mi a ishima i môm la ve mgbegha se u tseghan ayol a ase hen Aôndo, shi eren batisema sha u tesen ser se tsegha ayol a ase sha ci na. Mba ve soo u eren Aôndo tom cii gba u vea er batisema. Yesu u a ver se ikyav la tese kwagh ne wang. Yange za Yohane er un batisema cii ve mase hiin tom na u Mesiya la ye. Yange Yesu er nahan sha ci u nyi? A kaa ér: “M sen Sha, ka sha u Me er ishima Yam ga, kpa ka u eren ishima i u A tindim la.” (Yoh. 6:38) Yesu yange er batisema sha u tesen ér un na iyol na sha u eren ishima i Ter na.—Mat. 3:13-17.
8. Timoteu yange tsua u civir Aôndo sha ci u nyi, man gba u we kpa u er nyi?
8 Shi time ase sha kwagh u gumor Kristu ugen u i yilan un ér Timoteu, u Yehova na un ityom kpishi shi lu sha aan a tom kpa kpishi la. Timoteu yange tsua u civir Aôndo u mimi sha ci u nyi? Bibilo kaa a vese ér ‘i tese un akaa, shi a na jighjigh’ a mi kpaa. (2 Tim. 3:14) Aluer u hen Mkaanem ma Aôndo shi u na jighjigh wer akaa a u hen la ka a mimi yô, we kpa kwagh wou ngu er u Timoteu nahan. Gba u u tsua kwagh u ú er la hegen. Er nan u lam a mbamaren ou sha kwagh u ú soo u eren ne ga? Mbatamen mba ken tiônnongo kpa vea wase u u kav kwagh u Ruamabera a tese ér mba ve soo u eren batisema ve er yô.—Ôr Aerenakaa 8:12.
9. Aluer u er batisema yô, kwagh la una bende a mbagenev nena?
9 Kwagh u injaa u ú er sha u civir Aôndo u mimi yô ka u eren batisema. Aluer u er batisema yô, we kpa u ngu zan sha gôgô gbenda u ú zua a injar i uma u tsôron kua iember i or ka nan zua a mi sha u eren ishima i Aôndo la. (Heb. 12:2, 3) Heela tseegh ga, kwagh la una na a saan tsombor wou u u lu vanden gban ayem a uma ne iyol kua ahuraior a ou a ken tiônnongo u Kristu kpaa. U hemban cii yô, u na a saan Yehova iyol. (Ôr Anzaakaa 23:15.) Mbagenev vea fa er i hii ve u tsough u civir Yehova ga nahan vea lumun a kwagh u u tsough u eren la ga. Vea hendan a we je kpaa. Kpa u fatyô u hemban ahendan ne cii.
Shighe u Mbagenev Ve Hendan a We Yô
10, 11. (a) Ka mbampin mba nyi ior vea pine u sha mtsough u u tsough u civir Aôndo laa? (b) U hen nyi sha gbenda u Yesu naan ior mlumun sha kwagh u mcivir u mimi laa?
10 Mtsough u ú tsough u civir Yehova la una tsume mba u ze makeranta a ve la kua mba wanndor a we man mba hen tsombor wou kpishi je. Vea pine u er i hii ve u tsough u civir Yehova yô shi vea pine u mbampin sha akaa a u ne jighjigh a mi la kpaa. Nahan u kaa a ve wer nyi? Doo u u hen sha kwagh u u soo u ôron ve la sha er u ôr ve atôakyaa la tsembelee yô. Dondo ikyav i Yesu sha u pasen mbagenev akaa a u ne jighjigh a mi la doo doo.
11 Zum u mbahemenev mba kwaghaôndo u Mbayuda pine Yesu mpin sha kwagh u mnder u shin ku yô, a ôr ve ivur ruamabera i ve ver ishima sha mi ga yô. (Eks. 3:6; Mat. 22:23, 31-33) Shighe u orngeren ugen pine Yesu tindi u a lu u tamen yô, Yesu ôr un avur a Bibilo a a er kwagh u tindi la yô. Mlumun u Yesu na orngeren la doo un kpen kpen. (Lev. 19:18; Dut. 6:5; Mar. 12:28-34) Gbenda u Yesu pasen akaa a ken Ruamabera shi lamen a ior la na yô, “ikpelaior pav ikwe ihiar sha kwagh Na,” nahan mbaihyomov nav kan shio u eren un kwagh u bo. (Yoh. 7:32-46) Shighe u ú lu pasen mbagenev akaa a u ne jighjigh a mi la yô, yar tom a Bibilo shi ôr ve kwagh sha “ishima i legh legh man sha mcie kpaa.” (1 Pet. 3:15) Aluer or pine u mpin u taver yô, ôr nan jighilii wer u fatyô u nan nan mlumun sha mi hegen ga, nahan kaa a nan wer u hide u va ker iwanger sha mi. Aluer Watch Tower Publications Index shin Watchtower Library on CD-ROM ngu ken zwa wou shin ken zwa ugen u u fe yô, time sha itinekwagh shon. Aluer u wa agoyol tsembelee yô, u ‘fa er i doo u ú ôr kwagh a hanma or yô.’—Kol. 4:6.
12. Doo u ú lumun wer tôvacan a na u de u civir Aôndo ga sha ci u nyi?
12 Alaghga ior vea pine u mpin sha kwagh u mcivir u ú civir Aôndo la man sha akaa a u ne jighjigh a mi la tseegh ga, vea pine u akaa agen kpaa. Ityôkyaa yô Satan Diabolo, orihyom u Aôndo ngu hemen tar cii. (Ôr 1 Yohane 5:19.) Ka hanma or cii nana wuese we shin nana lumun a kwagh u u lu eren la ga, shi alaghga u tagher a ahendan je kpaa. Alaghga mbagenev vea ‘lam sha a we dang’ man vea soo u den kpaa ga. (1 Pet. 4:4) Kpa fa wer u ngu tswen ga. Yesu Kristu kpa yange i tôv un a ican. Apostoli Peteru kpa i tôv un a ican, nahan a nger ér: “Ne mbadoon mo ishima, bocan u a ve sha a ven sha u karen ne a kar la, a̱ de kpiligh ne iyol er ka kwagh u cier iyol man a va tser ne ga. Kpa her ape ne nyôr nongo a Kristu ken atsan a Na yô, ember nen.”—1 Pet. 4:12, 13.
13. Doo u a saan Mbakristu iyol shighe u i lu tôvon ve a ican sha ci u nyi?
13 Er u lu wan ishima a tôvacan man ahendan sha ci u ú lu Orkristu yô i saan we iyol. Sha ci u nyi? Sha ci u aluer u ngu eren akaa a tar u soo yô, u ngu eren ishima i Satan, ka ishima i Aôndo ga. Yesu ta se icin ér: “Kwagh á tser ne zum u ior cii vea wuese ne, gadia kape uter vev er a uprofeti mba aiev je la.” (Luka 6:26) Aluer ka tôvon we a ican yô, kwagh la tese ér Satan man tar na soo u ga, sha ci u u ngu civir Yehova. (Ôr Mateu 5:11, 12.) Nahan aluer i ‘hee u sha ci u iti i Kristu yô’ i saan we iyol.—1 Pet. 4:14.
14. Aluer se mba civir Yehova sha mimi man ka tôvon se a ican yô, ka akaa a dedoo a nyi a a due kere?
14 Shighe u i lu tôvon we a ican man u til sha mimi sha ishigh ki Yehova yô, akaa a doon anyiin aa due ken ieren you la. Hiihii yô, ú er shiada sha ci u Aôndo man Wan na. Shi ishima i u we sha jighjigh la ia taver anmgbianev ou mba ken Kristu ishima. Kwagh ne shi una na ior mbagenev mba ve fe Yehova ga la vea hingir u civir un. (Ôr Mbafilipi 1:12-14.) Shi er u lu nengen a agee a Yehova a lu nan we u wan ishima a tôvacan la yô, dooshima wou hen a na una seer taver a taver.
I Bugh “Hunda u Vesen” sha ci Wou
15. Ka “hunda u vesen” u nyi yange u bugh sha ci u apostoli Paulu?
15 Apostoli Paulu ôr kwagh u tom na u pasen kwagh ken Efese ér: “Hunda u vesen man u ageegh bughum.” (1 Kor. 16:8, 9) Hunda ne lu ian i vesen i pasen loho u dedoo ken gar u Efese shi geman ior hingir mbahenen la. Paulu yange yar tom a ian ne nahan wase ior kpishi ve fa Yehova shi ve hingir u civir Un.
16. Asande a mba ishigh ve mkurem mbara yange ve nyôr hen “hunda u [i ver u] ivegher” la ken inyom i 1919 la nena?
16 Ken inyom i 1919 la, Yesu Kristu u a lu ken iengem la ver “hunda ivegher” sha ishigh ki asande a mba i shigh ve mkurem la. (Mpa. 3:8) Yange ve yar tom a aan la ve hii u pasen ior loho u dedoo shi tesen ior mimi u ken Bibilo, ve er tom ne je hemba er ve vanden eren la. Kanyi i dugh ken tom ve laa? Loho u dedoo ve la ar sha akighir a tar, nahan iorov umiliôn utaankaruhar mba a ishimaveren i va zuan a uma u tsôron ken tar u he u Aôndo una va a mi la.
17. Ú nyôr hen ‘hunda u vesen man u ageegh u ú bugh’ sha u eren tom u pasen kwagh ne nena?
17 Nyian kpa ‘hunda u vesen man u ageegh bugh’ sha ci u hanma or u nan civir Yehova cii sha er nana er tom u pasen kwagh yô. Saan mba ve lu nyôron hen hunda ne iyol kpishi shi mba zuan a mkom kpaa, gadia mba eren tom u pasen kwagh ne kpoghuloo. Doo ne igyumior kpishi er ne lu a ian i vesen i wasen mbagenev ve ‘na Loho u Dedoo jighjigh’ gaa? (Mar. 1:14, 15) Er i lu nahan u er mhen u tôôn pania u keke shin ishuen pania vee? Aan agen aa bugh sha ci wen yô, ne fatyô u eren tom u maan Ayou a Tartor shin eren tom Betel shin ikpur pania shin tom mishen. Shighe kera vese ga tsô, a tim tar u Satan ne kera, nahan hanma iyange yô hingir torough torough u eren tom a aan ne. U nyôr hen “hunda u [i ver u] ivegher” ne er shighe a shi her ne vee?
“Bende, Nenge Nen, TER Ka u Doon Je”
18, 19. (a) Lu nyi i wase Davidi ve isharen na i civir Yehova la seer taveraa? (b) Kanyi i tese ér Davidi vaa afanyô u civir Aôndo ga?
18 Orpasalmi lôhô ior ér ve ‘bende ve nenge, Ter ka u doon’ je. (Ps. 34:8) Shighe u Tor Davidi lu iyev la, Yehova yima un sha ikyev i inyamkyume. Aôndo shi na un agee a nôngo ityav a Goliati shi yima un sha ikyev i mbamzeyol mbagenev kpaa. (1 Sam. 17:32-51; Ps. 18:0-50) Davidi yange nger kwagh sha erdoo u Aôndo u a hembe cii la ér: “TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa; kwagh u á kar un sha a We yô, kera ngu ga.”—Ps. 40:5.
19 Yehova yange seer doon Davidi ishima nahan soo u civir Un a ishima na cii. (Ôr Pasalmi 40:8-10.) Er Davidi civir Aôndo u mimi anyom kar imôngo nahan kpa, a vaa afanyô ga. Kwagh u yange hemba doon Davidi ishima shi na un msaanyol cii yô, lu u un civir Aôndo. Nahan Davidi wa icam shighe u beeyol la ér: “Ka We je U lu ishimaverenkeghen yam ye, Terem, AÔNDO ka sha a We m suur ye, hii er m lu iyev la je. Een, zan zan shighe u m bee iyol, m mende ivu kpaa, de undun mo ga.” (Ps. 71:5, 18) Er Davidi beeyol nahan kpa, a za hemen u suur sha Yehova shi mlu na vea Yehova seer taver a taver.
20. Hemba doon u civir Aôndo a uma wou sha ci u nyi?
20 Uma u Yosua man u Davidi kua u Timoteu tese ér kwagh môm hemba u civir Yehova ga. Injar i se civir Yehova ‘a ishima yase cii kua uma wase cii’ ve se zua a mi la i hemba injar i se er tom u uke ve se zua a mi la ica je. (Yos. 22:5) Wea lu a tsegha iyol you sha ci u Yehova ken msen ga yô, pine iyol you wer, ‘Kanyi jim i lu yangen mo u hingir Orshiada u Yehova?’ Wea vande lun or u nan er batisema, nan civir Yehova kera yô, ú soo u eren kwagh u una hemba nan we msaanyol ken uma la kpa? Yô, ker igbenda i u seer civir Aôndo shi u seer vesen ken jijingi yô. Kwaghngeren u a dondo la una tese ú er ú dondo ikyav i apostoli Paulu la ve u seer vesen ken jijingi yô.
Ú Na Mlumun Wer Nyi?
• Ôr atôakaa ahar a a ne ve i doo u se civir Aôndo yô.
• Lu nyi i wase Timoteu ve tsua u civir Aôndo?
• Doo u ú tile sha mimi shighe u ú tagher a tôvacan sha ci u nyi?
• Ka aan a civir Aôndo a nyi nahan alaghga aa bugh sha ci wouwe?
[Study Questions]
[Picture on page 18]
Kwagh môm hemba u civir Yehova ga
[Picture on page 19]
Ú fatyô u nan or mlumun sha kwagh u jighjigh wou kpa?