Er Mbahemenev mba Shin Tine Ve Eren Tom Yô

MBAHEMENEV mba Shin Tine mba Mbashiada mba Yehova ka Mbakristu mba nomso mba ve tsegh ayol a ve shi i shigh ve mkurem ve lu eren Aôndo tom la. Ve tile sha ityough ki wanakiriki u jighjigh man u fankwagh u a lu a tom u koson se ken jijingi shi hemen se shi veren ishima ér Mbashiada mba Yehova ver tom u pasen loho u Tartor ne hiihii ken uma ve sha tar cii la.—Mat. 24:14, 45-47.

Hanma sati yô, Mbahemenev mba Shin Tine ka ve tema mkombo sha iyange i Tomatar. Kwagh ne ka a wase anmgbianev mban u eren kwagh ken mzough. (Ps. 133:1) Shi Mbahemenev mba Shin Tine mba ken ukômatii kposo kposo. Hanma kômatii yô eren tom u u gbe u zough sha tom u pasen loho u dedoo u Tartor la, er i tese shin heen nahan.

◼ KÔMATII U HEMEN UKÔMATII CII: Ka mba ve hemen ukômatii mbagenev mba Mbahemenev mba Shin Tine la ve kohol ve hingir kômatii ne ye kua akawe u un kpa a lu môm ken Mbahemenev mba Shin Tine la. Kômatii ne ka a ver ishima ér ukômatii mbagenev mbara mba eren tom vough vough. Shi nengen sha akaa a a tseren Mbashiada mba Yehova tar sha won cii abu la man tôvacan man uaahe kua akaa agenegh kpaa.

◼ KÔMATII U NENGEN SHA TSOMBOR U BETEL: Anmgbianev mba ve lu ken kômatii ne mba nengen sha mkpeyol u sha iyol man u ken jijingi u tsombor u Betel tar sha won cii shi mba wasen ve kpaa. Kômatii ne shi ka a tsua ior mba i gbe u vea va er tom shin Betel la shi a na mbamlumun sha mbampin mba i pin sha kwagh u tom u Betel la kpaa.

◼ KÔMATII U GBEREN ITYAKERADA: Kômatii ne nengen sha ityakerada i Bibilo i i gberen i samber a mi tar sha won cii la. Shi nengen sha ajiir a i gberen ityakerada la man akaa agen a mbamzough mba Mbashiada mba Yehova ve eren tom a mi la. Kômatii ne shi nengen sha gbenda u u hembe doon u a er kwagh a inyaregh ki ior ve ne sha u suen tom u Tartor tar sha won cii la.

◼ KÔMATII U NENGEN SHA TOMSHIREN: Kômatii ne nengen sha tom u pasen kwagh man akaa a a bende a atôônanongo man upania man mbatamen kua mbakuran mba ningir sha la. Shi nengen sha tom u ngeren Tom Wase ú Tartor shi lôhôn mba van Makeranta u Gileadi man mba van Makeranta u Tsaase Mbashiren Tom shi tindin ve pe vea za er tom la kpaa.

◼ KÔMATII U TESEN: Kômatii ne nengen sha akaaôron a i ne sha mbamkohol mba kiriki man mba vesen kua ken atôônanongo la. Nengen sha atesen a ken Bibilo sha ci u tsombor u Betel man imakeranta er Makeranta u Gileadi man Makeranta u Henen Tom Pania la nahan, kua u eren icer i ungwan man i nengen la cii.

◼ KÔMATII U NENGEN SHA KWAGHNGEREN: Ka tom u kômatii ne u nengen ér i er shi i samber a kwaghyan u ken jijingi la sha ci u anmgbianev man mba ken won cii. Ne mbamlumun sha mbampin mba sha akaa a ken Bibilo shi ka ve nger ngeren u iniumbe man akaaôron kpaa. Kômatii ne shi nengen sha tom u geman kwagh u i eren tar sha won cii la.

Apostoli Paulu kar tiônnongo u mba i shigh ve mkurem la sha iyol i or, shi a pase tom u injaa u hanma ve nan eren yô man er ve suur sha mbagenev shi ve soo ayol a ve shi ve lu ken mzough sha u eren tom u Aôndo yô. (Rom. 12:4, 5; 1 Kor. 12:12-31) Yesu Kristu u a lu ityough vev la ne ve akaa a a wase ve vea lu ken mzough shi vea hemen sha inja man er vea tesen Bibilo sha inja kpaa yô. (Ef. 4:15, 16; Kol. 2:19) Sha nahan yô, Mbahemenev mba Shin Tine mba hemen ken mzough er Yehova a lu hemen ve sha icighan jijingi na la.