Se Ker ‘Mtsegh Wase, sha Mcie u Cian Ter’

BIBILO ôr kwagh u mtsegh u hemban cii u Yehova Aôndo la ér: “Icighan, icighan, icighan, kape TER u akum a Sha A lu la.” (Yes. 6:3; Mpa. 4:8) Asember a ken zwa Heberu man zwa Grika a i gem ér “mtsegh” la tese mlu u wang shin mcivir u wang, u a lu a acôghor sha mi ga yô. Mtsegh u Aôndo la tese mlu na u wang u lun a acôghor ga, u a lu un kwagh u hange hange la.

Nahan doo u se ver ishima ser Yehova, u a lu icighan Aôndo la una soo ér mbacivir un ve lu uicighanmbaiorov sha iyol man sha aeren kua ken jijingi ga he? Bibilo ôr wang ér Yehova soo ér ior nav ve lu uicighanmbaiorov. I kaa a vese ken 1 Peteru 1:16 ér: “Lu nen uicighanmbaiorov, gadia Mo M ngu u Icighan je.” Uumace mba ve yen ne vea fatyô u lun wang er Yehova nahan kpa? Een vea fatyô, kpa a lu vough er Yehova nahan ga. Aluer se mba civir Aôndo sha gbenda u wang shi se ya ikyar a na kôôsôô yô, una nenge ér se mba uicighanmbaiorov.

Kpa, se er nan ve se lu wang ken tar u aeren a u a lu wang ga nee? Ka aeren a nyi i doo u se paleghaa? Ka alam man aeren a nyi i gbe u se dee? De se hen kwagh sha kwagh u Aôndo yange soo ér Mbayuda mba ve mough ken Babilon ve hide ken tar ve ken inyom i 537 C.S.Y. (Cii man Shighe u Yesu) la ve er yô.

‘Icighangbenda Una Lu Her’

Yehova tsengaôron ér a hide a ior nav mba ve lu uikyangen ken Babilon la ken tar ve. I ôr mkaanem ma bunden ga man ken kwaghôron u profeti ne, ér: “Kômgbenda una lu her, á yila un er Icighangbenda.” (Yes. 35:8a) Mkaanem man tese ér Yehova yange bugh gbenda u Mbayuda vea hide ken tar ve yô, shi tôndo zwa u kuran ve shighe u vea lu hiden la kpaa.

Yehova bugh “Icighangbenda” sha ci u mbacivir un nyian sha u duen a ve ken Zegebabilon u a lu tartor u ukwaghaôndo mbaaiev sha tar cii la. Yehova yange due a Mbakristu mba i shigh ve mkurem la ken ikyangenev mbi kwaghaôndo u aiegh kera ken inyom i 1919 la, nahan ve za hemen u wanger mcivir u mimi sha u undun atesen a aiegh. Se mbacivir Yehova nyian se mba ken mlu u wang man mkpeyol, nahan se fatyô u civir un shi lun ken bem a na kua anmgbianev asev kpaa.

 Mbakristu mba i shigh ve mkurem, ve lu “anikyumuile u kpeghee” la man “zegeikpelaior” i i lu “iyôngo igen,” i i lu ngeen seer a seer la mba zan sha icighangbenda la shi mba lôhôn mbagenev ér ve va kohol ve. (Luka 12:32; Mpa. 7:9; Yoh. 10:16) “Icighangbenda” ne ngu sha ci u hanma or u i sar nan u ‘geman iyol i nan nan nagh ku uma a mi, icighannagh ku doon Aôndo’ cii.—Rom. 12:1.

“Or u Nan Lu Wang Ga yô, Nana Kar sha mi Ga”

Ken inyom i 537 C.S.Y. la, yange gba u Mbayuda mba ve hide ken tar ve la vea er kwagh u Yehova kaa ér ve er la keng. Yesaia 35:8b ôr kwagh u mba ve kuma u zan sha “Icighangbenda” la, ér: “Or u nan lu wang ga yô, nana kar sha mi ga; kpa una lu sha ci ve, mbazenden sha mi kua abumeaior je kpaa vea tsume sha mi ga.” Er Mbayuda lu hiden ken Yerusalem sha u za hiden veren mcivir u wang yô, ian lu sha ci u mba yange ve lu a awashima u bo shin uicighanmbaakaav gba ve kwagh ga shin ve lu wang ken jijingi ga la ga. Yange gba u mba ve hide mbara vea za hemen u dondon atindiakaa a wang a Yehova. Kape mba i sar ve u Aôndo a lumun ve nyian kpa vea er vough je la. Saa vea ker ‘mtsegh sha mcie u cian Ter’ la keng. (2 Kor. 7:1) Nahan ka aeren a hôngorough a nyi i gbe u se nyaghaa?

Apostoli Paulu nger ér: “Aeren a iyolough nga ken igbar je, ka idya man hôngor man ijimba i eren.” (Gal. 5:19) Idya i eren wa hanma gbenda u or yaven a kwase u a lu u nan ga shin kwase kpa yaven a or u nan lu nom u nan ga la ker. Ieren i dang wa aeren a ijimbagh ker. Ijimba man ieren i dang zua sha mlu u icighanegh u Yehova la ga. Nahan mba lumun mba ve eren aeren ne ér ve za hemen u lun ken tiônnongo u Kristu ga, nahan ka i dugh ve ken tiônnongo kera. Kape mba ve nyer iyol ken hôngor u vihin kpishi “sha u keren hanma kwagh u hôngorough sha hua” la kpa ka i er a ve je la.—Ef. 4:19.

‘Hôngor’ ka ishember i i kou asorabo kpishi ker yô. Ishember i ken zwa Grika i i til sha ityough ki hôngor la ka hanma kwagh u a lu wang ga yô, er ieren yase man iliam yase kua mlu wase vea mba ve civir Aôndo ga la nahan. Ishember la i kua aeren a hôngorough a alaghga or nana er kpa a shar nan ijir ga la. * Nahan se fatyô u kaan ser mba ve eren aeren ne mba zan sha icighangbenda kpa?

Tôô wer Orkristu hii u nengen ufoto mbajimbagh ken mnyer. Nahan er isharen i hôngorough ia lu kenden ken nan kure kure yô, a taver nan u lun wang sha ishigh ki Yehova. Alaghga ieren i nan la ia lu a hingir hôngor u vihin tsung ga, kpa nan de u henen sha ‘hanma kwagh u wang, man hanma kwagh u a doo u ungwan kua kwagh u hemban lun a inja man kwagh u kuman iwuese’ cii. (Fil. 4:8) Ufoto mbaijimbagh ka akaa a hôngorough man vea fatyô u vihin mlu wase vea Aôndo. Hanma inja i hôngorough cii, u teren tsô kpaa, i de teren hen a ven ga.—Ef. 5:3.

 Hen ase sha ikyav igen ne. Orkristu hingir u ngirigh ilyeghegh ki nan ki yaven a or la, sha u kenden isharen i yaven a or ken a nan sha apera, man nan eren kwagh ne shighe u nan nenge ufoto mbaijimbagh shin nan nenge ve ga kpaa. Bibilo ôr kwagh sha ieren i ngirigh ilyeghegh ki yaven a or la jighilii ga, nahan kpa ieren ne ia fatyô u hôngor mhen wase. Se hen ser ieren i hôngorough ne ia fatyô u vihin mlu wase vea Yehova nahan nan se lun a acôghor sha ishigh ki Aôndo ga he? Doo u se dondo kwaghwan u apostoli Paulu ne, a kaa ér se “wanger . . . ayol a ase sha hanma kwagh u hôngorough u ken iyol kua ken jijingi cii,” shi se “wua . . . alegh a [ase] a shin tar la kera, ka idya man hôngor man ityoronshima man isharen i bo man hua u eren.”—2 Kor. 7:1; Kol. 3:5.

Tar u Satan a hemen u ne lumun a ieren i hôngorough shi ngu taver ior ishima ér ve er i kpaa. Alaghga a taver se u palegh ieren i hôngorough ne. Kpa gba u Mbakristu vea ‘zenden er atôatyev a zenden sha mhen ve u gbilinigh la nahan ga.’ (Ef. 4:17) Saa se palegh ieren i hôngorough ken myer shin ken igbar ve Yehova una de ér se za sha “Icighangbenda” her ye.

“Begha Una Lu Her Ga”

Aluer se soo ser Yehova Aôndo u a lu icighan la a lumun se yô, gba u se sôr aeren a ase man alam a ase kpaa. Yesaia 35:9 kaa ér: “Begha una lu her ga, ma inyamtswam kpaa ia unde sha mi ga.” Inja na yô, ka “Icighangbenda” je la. I ôr kwagh u ior mba wan tswam shi lamen dang la sha injakwagh er ka inyamkyume nahan. Aôndo una na ve ian ér ve nyôr ken tar u he u perapera la ga. (Yes. 11:6; 65:25) Sha nahan yô, mba ve soo ér Aôndo a lumun ve cii ve de aeren ve a a lu er inyamikyume la nahan ve hingir wang.

Ruamabera wa se kwagh ér: “Dugh nen hanma ishima i yuan man ishima i nyoon man iyugh man u zôhôn genger genger man ityuhwanev ken a ven kera kua hanma inja i dang kpaa.” (Ef. 4:31) I ôr ken Mbakolose 3:8 ér: “Dugh nen akaa ne kera; iyugh man ishima i nyoon man ifer man ityuhwanev man kwaghôron u dang ken zwa wen.” Ishember i “ityuhwanev” i avur a ahar ne a ter ne ka kwaghôron u i ver ishima ér a̱ vihi or gayô a̱ hee nan yô.

Kwaghôron u dang man u vihin ungwan dumbur nyian, kua hen tsombor je kpaa. Mba ve vese ayol a ve ka ve ôr akaa a vihin ikyar ve kpishi shi ve tuhwa nan, shin mbayev vev kpaa. Doo u imba ieren i tuhwan mbagenev la ia lu ken icombor i Mbakristu ga.—1 Kor. 5:11.

U Keren ‘Mtsegh Wase, sha Mcie u Cian Ter La’ Ka Iveren

U civir Yehova Aôndo u wang la ka kwagh u civirigh kpishi. (Yos. 24:19) Paradiso u ken jijingi u Yehova a nyer a vese ker la doo se ishima kpishi. Sha kpôô yô, u lun a ieren i wang sha ishigh ki Yehova la ka gbenda u uma u hemban doon cii.

Shi cuku tsô, paradiso u shin tar u Aôndo a tende zwa la una va. (Yes. 35:1, 2, 5-7) Mba i sar ve u nyôron ken paradiso la shi ve lu civir Aôndo sha mimi la cii vea nyôr ker. (Yes. 65:17, 21) Nahan yô, se za nen hemen u civir Aôndo sha gbenda u wang shi se seer taver ikyar i se ye vea na la kpaa.

[Footnotes]

[Picture on page 26]

Yange gba u Mbayuda vea er nyi ve vea za sha “Icighangbenda”?

[Picture on page 27]

Ufoto mbajimbagh mba vihin mlu wase vea Yehova

[Picture on page 28]

“Dugh nen . . . u zôhôn genger genger man ityuhwanev ken a ven kera”