Lu A “Dooshima Wou U Hiihii” La Her
Lu A “Dooshima Wou U Hiihii” La Her
“Kusu kwagh u u lu a mi la gbang gbang.”—MPA. 3:11.
1, 2. Shighe u ú va mase lumun wer akaa a ú lu henen sha kwagh u Yehova la ka mimi la, lu ú ken ishima nena?
Ú UMBUR shighe u yange ú hii henen kwagh u ishimaverenkeghen i dedoo i Yehova a ver sha ci u uumace mba ungwan un la kpa? Aluer yange wea vanden eren kwaghaôndo ugen yô, yange lu u ken ishima nena shighe u i pase u mbaawashima mba Aôndo ken Bibilo shin i ta u iwanger sha atesen a yange taver we u fan laa? Alaghga u mase kaven er yange i tsugh u yô. Kpa hegen u hingir u fan mimi, nahan saan we iyol kpishi. Aluer mbamaren ou mba ve lu Mbakristu mbara tese u mimi yô, u umbur er yange lu u ken ishima hen shighe u ú va mase kaven wer akaa a ve lu tesen we sha kwagh u Yehova la ka mimi la kpa? Man shighe u ú tsua u eren sha akaa a u lu henen la di ye?—Rom. 12:2.
2 Anmgbianev ou mba ken Kristu kpishi vea kaa a we ér yange saan ve iyol kpishi er ve kporom hen Yehova nahan, shi ve wuese kpishi er a urugh ve, a ve a ve hen a na nahan. (Yoh. 6:44) Msaanyol ve la yange mgbegha ve u eren ityom i Mbakristu. Yange saan ve iyol tsung, nahan ve soo u pasen hanma or cii kwagh u a ne ve msaanyol la. We kpa kape yange lu u laa?
3. Mlu u Mbakristu mba ken Efese yange lu nena hen shighe u Yesu tindi ve a loho laa?
3 Shighe u Yesu lu ôron kwagh a tiônnongo u Kristu u ken Efese u sha derianyom u hiihii la, a ôr kwagh u “dooshima [ve] u hiihii” la. Mbakristu mba ken Efese yange ve lu a aeren a dedoo kpishi, kpa shighe kar yô ve undu dooshima u ve hii lun a mi sha Yehova la. Nahan Yesu kaa a ve ér: “M fa aeren a ou man tom wou u sha ican kua ishima i taver you, man shi er u fetyô u rumun aferaior ga, kpa u kar mba ve yer ayol a ve er mbaapostoli, kpa i lu nahan ga la, u nenge ka mbaaiev. U ngu a ishima i taver, u rumun ican sha ci u iti Yam kpaa, u vôr ga. Kpa kwagh shim a we, ka er u undu dooshima wou u hiihii la yô.”—Mpa. 2:2-4.
4. Kwagh u Yesu ôr a Mbakristu mba ken Efese la ngu a inja nyian sha ci u nyi?
4 Kwaghwan u Yesu wa Mbakristu mba ken Efese man atôônanongo agen a yange ôr kwagh ve ken takerada u Mpase la lu a inja kpishi, gadia imba kwagh la za hemen hen atô u Mbakristu mba i shigh ve mkurem mbara, hii ken inyom i 1914 zan zan nyian ne. (Mpa. 1:10) Hegen je kpa adooga Mbakristu mbagenev vea undu “dooshima [ve] u hiihii” sha Yehova man mimi u Mbakristu la. Sha nahan yô, de se nenge er aluer u ngu umbur msaanyol u ú zough a mi la shi gbidyen kwar sha mi ve u za hemen u taver dooshima wou man gbashima u yange u hii lun a mi sha Aôndo man mimi la yô.
Lu Nyi i Wase Ú u Kaven Mimi?
5, 6. (a) Gba u hanma Orkristu nana er nyi? (b) Kanyi i ne ve u lumun wer kwagh u Mbashiada mba Yehova ve tesen la ka mimi? (c) Or nana taver dooshima u yange nan hii lun a mi la nena?
5 Hanma or u nan tsegh iyol i nan sha ci u Yehova yô yange gba u nana hii ‘karen kwagh u a doo man a kom u rumun un man shi a lu vough la kpa’ nengen. (Rom. 12:1, 2) Kwagh ne wa u henen mimi u ken Bibilo ker. Alaghga kwagh u a ne ve orgen nan lumun ér atesen a Mbashiada mba Yehova ka a mimi la una kaha a orgen. Mbagenev kaa ér kwagh u yange na ve ve gema ishima yô lu iti i Aôndo i ve zua a mi ken Bibilo la shin mimi u ve fa sha kwagh u mlu u mbakpenev la. (Ps. 83:18; Orpa. 9:5, 10) Kwagh ugen u yange mgbegha mbagenev yô lu dooshima u ve nenge a mi hen atô u Mbashiada mba Yehova la. (Yoh. 13:34, 35) Mbagenev di kwagh u doo ve yô lu iwanger i i ta ve sha kwagh u lun ior i tar ne ga la. Gadia ve nenge ér doo u Mbakristu mba mimi vea wa ave sha ayôôso a patii shin ityav mbi ma tar u lu nôngon ga.—Yes. 2:4; Yoh. 6:15; 17:14-16.
6 Kwagh u yange na ve Aôndo hii doon mbagenev kpishi ishima yô lu iwanger i ve zua a mi sha akaa a i ter sha heen kua mimi mbagenev la. Tôô shighe hide hen sha kwagh u yange na ve ú lumun wer kwagh u ú lu henen la ka mimi yô. Hanma or yô mlu u nan ngu kposo a u orgen, nahan kwagh u yange na ve Yehova doo u ishima shi u na uityendezwa nav jighjigh la alaghga una kaha a u mbagenev. Alaghga atôakyaa a yange na ve u lumun mimi la doo u ishima her er shighe u u hii henen a la nahan. Mimi la gema ga. Nahan aluer se mba hiden henen sha atôakyaa la yô mdoo u mimi hii doon se ishima la una hemba taver a taver cii.—Ôr Pasalmi 119:151, 152; 143:5.
Taver ‘Dooshima Wou u Hiihii’ La
7. Doo u se seer taver dooshima u yange se hii lun a mi sha mimi la sha ci u nyi, man se er kwagh ne nena?
7 Hii shighe u ú tsegha iyol you sha ci u Yehova la je alaghga akaa kpishi gema ken uma wou. Mdoo u mimi hii doon we ishima la lu u kwagh u vesen, kpa shighe kar yô gba u ú taver dooshima wou la ve u fatyô u hendan a akaa a karen jighjigh u nan wou la ye. Nahan kpa Yehova wase u shighe u gba u ú seer taver dooshima wou la. (1 Kor. 10:13) Uvande-eren mba u zough a mi ken anyom a keren la kpa ve doo u ishima. Ve wase u u seer taver dooshima u ú hii lun a mi la shi ve na sha er u kar kwagh u a doo man a kom u rumun un man shi a lu vough sha ishima i Aôndo yô.—Yos. 23:14; Ps. 34:8.
8. Yehova yange pase iyol na hen Mose nena, man Mbaiserael hingir u seer fan Aôndo nena?
8 Ikyav i tesen yô, hen ase sha mlu u Mbaiserael shighe u Yehova pase awashima na u duen a ve ken ikpan ken Igipiti kera la. Aôndo yange pase iyol na hen Mose ér: “M ngu er m luun yô.” (Eks. 3:7, 8, 13, 14) Yehova lu ôron ér una hingir hanma kwagh cii sha u yiman ior nav. Mbaiserael yange ve nenge a aeren a Yehova sha igbenda kposo kposo sha akaa a kpilighyol a a er la ér ngu Aôndo Uhembanagee man Orjir man Orhemen man Oryiman man Orutya kua Orkoson ve kpaa.—Eks. 12:12; 13:21; 14:24-31; 16:4; Neh. 9:9-15.
9, 10. Kanyi ka i na ve or nan hingir u fan Aôndo, man doo u umbur akaa shon sha ci u nyi?
9 Mlu wou kaha a u Mbaiserael mba tsuaa mbara. Nahan kpa, adooga akaa nga a a ne ve we kpa ú nenge wer kwagh wou gba Aôndo ishima yô, nahan kwagh ne taver jighjigh u nan wou. Alaghga Yehova tese sha ma gbenda ér un ngu Orkoson shin Orsurunshima gayô Ortesen. (Ôr Yesaia 30:20b, 21.) Shin alaghga u nenge wer Yehova ungwa msen wou. Adooga ican tser u nahan ma anmgbian na u iwasen. Gayô shighe u ú lu henen kwagh we tseegh la, u zua a ma ivur Bibilo i ia wase u yô.
10 Aluer u ngu ôron mbagenev akaa a doon we ne yô, alaghga aa doo mbagenev er a doo u nahan ga. Sha ci u akaa la lu uivande ga. Kpa we yô u nenge wer nga a inja kpishi je. Sha kpôô yô, Yehova ka a hingir hanma kwagh u i gbe u una wase u sha mi la cii. Hide hen sha anyom a u tse ken mimi la. Ú umbur ashighe agen a yange u nenge wer kwagh wou gba Yehova ishima kpa? Aluer u umbur ashighe la shi u hen sha er lu u ken ishima sha ashighe shon yô, kwagh ne una na Yehova a seer doon we ishima vough er doo u ishima sha ashighe la nahan. Koso akaa ne cii lu a mi ken ishima her. Gbidyen kwar sha akaa shon kpaa. Akaa ne cii tese ér kwagh wou gba Yehova ishima, man or môm kpa nana fatyô u yangen wer u nan jighjigh wer kwagh wou doo Yehova ishima ga.
Hide Hen sha Mlu Wou
11, 12. Kanyi ia na ve mimi una kera doo Orkristu ishima ga, man Yesu wa se kwagh ér nyi?
11 Aluer Aôndo kua mimi kera doo u ishima er lu sha hiihii la ga yô, ngula tese ér kwagh wou kera doo un ishima ga shinii? Ei, Yehova gem kposo ga. (Mal. 3:6; Yak. 1:17) Kwagh wou yange doo un ishima, man hegen kpa kape kwagh wou a doo un ishima je la. Tsô aluer kwagh gema ken ikyar i ú ye vea Yehova la di ye? Alaghga tsô u nenge wer ishima ngi nyian we sha akaa a uma ne shinii? Adooga yange u hemban eren msen sha gbashima shi u hemban henen kwagh shi u hemban gbidyen kwar sha kwagh u ú hen la er u eren hegen ne. Ishima kera tseen we sha tom u pasen kwagh er ngise nahan ga shi u kera fe zan mbamkombo mba tiônnongo ainge er ngise nahan gaa?—2 Kor. 13:5.
12 Alaghga ú hen sha mlu wou kpa u nenge wer kwagh gema sha ikyaryan you vea Aôndo ga, kpa aluer kwagh gema yô, er nan ve kwagh a lu nahana? Adooga tsô akaa a nyianshima er u nengen sha tsombor wou shin u sôron angev ou shin akaa agen na yô u kera umbur er iyange i Yehova i mgbôghom nahan ga shinii? Yesu yange kaa a mbaapostoli nav ér: “Ver nen ishima sha ayol a en, asema a en a̱ de yoho sha hua u sha kwaghyan man sha ihyundugh man sha akaa a nyian ishima a uma ne ga, iyange la i̱ de va bulun ne er kwaghhônon nahan ga; gadia kape ia va bul a bul mba ve tem sha won cii la. Nahan kuran nen shi eren nen msen hanma shighe cii, sha er né kuma u waren akaa a á va er la cii” yô.—Luka 21:34-36.
13. Yakobu kar Mkaanem ma Aôndo sha nyi?
13 Orngeren Bibilo Yakobu yange wa Mbakristu kwagh ér ve henen sha mbamlu vev sha mimi sha iwasen i Mkaanem ma Aôndo. Yakobu nger ér: “Hingir nen mbaeren a er sha kwaghôron la, i̱ de lu mbaungwan a ungwa tseegh, tsughun ayol a en ga. Gadia aluer ma or ngu ungwan kwaghôron la, kpa nan ngu eren sha mi ga yô, nan ngu inja er or u nan nenge ishigh ki nan ki marami la ken ijingi nahan. Gadia ka nan nenge iyol i nan, kpa nan yemen kera yô, fese je i hungur nan er nan lu yô. Kpa or u nan kenger sha tindi u vough u a pasen se a toho la shi nan veren ishima yô, á saan nan iyol ken aeren a nan cii, gadia u ungwan kwagh yô, nan ngu or u kwagh hungur nan fefa ga, kpa nan ngu or u eren tom je.”—Yak. 1:22-25.
14, 15. (a) Bibilo ia wase u u seer taver ikyaryan you vea Yehova nena? (b) Ka mbampin mba nyi nahan i doo u ú hen sha mini?
14 Or ka nan nenge ijingi ér nana sôr iyol i nan tsembelee. U tesen ikyav yô, aluer or nenge ér nan ta taya doo ga yô, nana sôr. Shi aluer kwase nenge ér ice i nan ngi sha ityou nzegha nzegha yô, nana sôr i̱. Kape Ruamabera kpa a wasen se u sôron aeren a ase je la. Nahan shighe u se lu karen aeren a ase sha akaa a Bibilo i̱ er yô, se mba eren tom a i̱ er ka ijingi nahan. Kpa aluer or nenge ijingi man nan nenge a kwagh u ma nan ser kpa nan sôr ga yô, nana wase iyol i nan ga. Doo u se eren sha akaa a se hen ken “tindi u vough” u Aôndo la nahan se hingir “mbaeren a er sha kwaghôron” la sha er se eren kwagh sha kwaghfan yô. Sha nahan yô, or u nan nenge ér dooshima u yange nan hii lun a mi sha Yehova kua mimi la pande yô, nana̱ pine iyol i nan mbampin mban: ‘Ka mbamzeyol mba nyi m lu tagher a mi, man m ngu eren nyi sha mini? Shighe u m vande tagher a mi la m er nena? Zayol wam jighilii yô ka nyi?’ Shighe u ú pin iyol you mbampin mban man ú nenge wer zayol ngu yô, de tem a tema ga. Zayol una lu yô, er kwagh sha mi fele fele je.—Heb. 12:12, 13.
15 Kwargbidyen sha mbampin mban ua wase ú u eren akaa a a na u seer zan hemen ken jijingi yô. Apostoli Paulu yange wa Timoteu, u lu ikyartom na la kwagh u una wase un u seer fan tom u pasen kwagh yô. Á taver gumor Timoteu ishima ér: “Nôngo sha akaa ne, penda ishima sha mi sha u ior cii vea nenge mzehemen wou yô.” Se kpa doo u se yar tom a Mkaanem ma Aôndo nahan se penda ishima sha akaa a i gbe u se seer zan hemen sha mi la.—1 Tim. 4:15.
16. Shighe u ú tim ken Bibilo ve u lu pinen iyol you mbampin yô, ka kwagbo u nyi i doo u umburuu?
16 Aluer u gbidye kwar sha mbampin mban sha mimi yô, vea wase u u fa ajiir a ú lu gban ijime la. Kwagh ne una na mbagenev ishimayinan, kpa we yô mayange je a de ne ú ishimayinan ga. Gadia awashima u se gbidyen kwar sha mbampin mbara jighilii yô, ka u se fan ajiir a i gbe u se sôr yô. Er Mbakristu ve yen yô, Satan soo ér ve hen ér ve gba kwagh ga. Mbagenev kaa ér kwagh gba Aôndo sha iniôngon yase i civir un la ga. (Yobu 15:15, 16; 22:3) Ka aie u Yesu yange venda inyigh i môm je ne; gadia kwagh u hanma or doo Aôndo ishima. (Ôr Mateu 10:29-31.) Er u fe wer u yina yô, hide a iyol you ijime taver ishima sôn Yehova a wase u sha er u sôr ape u lu gban ijime la yô. (2 Kor. 12:7-10) Aluer angev shin iyolbeen shin akaa agen yange ú u eren Aôndo tom er ma u er la je yô, er akaa a aa seer taver we ishima yô, mayange de yen ishima shin undun dooshima wou u hiihii la ga.
Akaa Nga Kpishi a I Doo u Se Wuese Yô
17, 18. Ka mbamtsera mba nyi u zua a mi sha u seer taver dooshima wou u hiihii laa?
17 Aluer u za hemen u seer taver dooshima u yange u lu a mi hiihii la yô, u zua a averen kpishi. Nahan ú seer zuan a mfe u Aôndo shi u seer lun a iwuese sha hemen na u sha dooshima la. (Ôr Anzaakaa 2:1-9; 3:5, 6.) Orpasalmi nger ér: “U wan [atindiakaa a Yehova] ikyo yô, ka zegeinjar.” Shi a kaa ér: “Mpase u TER ka u jighjigh, ka a na orlanenkwagh nan hingir orfankwagh.” Heela tseegh ga, “mba i saan ve iyol yô, ka mba gbenda ve u lu vough, ve zenden sha tindi u TER la.”—Ps. 19:7, 11; 119:1.
18 We kpa ú lumun wer ú zua a akaa a doon kpishi a ú lu a iwuese sha mi yô. Ú fa inja i akaa a a lu zan hemen shin tar la. Ú ngu zuan a iwasen sha akaa a ken jijingi a Aôndo a lu nan ior nav nyian la. Shi doo u kpishi er Yehova a urugh we a ve a we ken tiônnongo na u a lu tar sha won cii la man er a ne u ian i lun Orshiada na nahan. Wuese averen a u zough a mi ne. Aluer u ngu ngeren averen ne shin takerada yô aa ngee kpen kpen. Ú henen sha averen ne hanma shighe yô aa wase ú u dondon kwaghwan ne, ér: “Kusu kwagh u u lu a mi la gbang gbang.”—Mpa. 3:11.
19. Dugh u we henen sha kwagh u ikyaryan you vea Aôndo kera yô, kanyi igen kpa i gbe u ú eree?
19 U henen sha mzehemen wou ken jighjigh u nan la ka di gbenda môm u ua wase ú u kusun kwagh u ú lu a mi la gbang gbang tsô. Iyoukura ndera wasen se u veren ishima sha akaa a injaa a aa wase se u seer taver ikyaryan yase vea Aôndo yô. Akaa shon yô ka msen u eren man u zan mbamkombo mba Mbakristu shi wan zwa sha akaa a i lu ôron la kua u eren tom u pasen loho u dedoo u Tartor la sha gbashima. Akaa ne aa wase ú u seer taver dooshima wou u hiihii la.—Ef. 5:10; 1 Pet. 3:15; Yuda 20, 21.
Ú Na Mlumun Wer Nyi?
• Akaa a yange na ve Yehova doo u ishima la aa fatyô u taver we ishima nyian nena?
• Aluer u ngu umbur msaanyol u ú zough a mi la shi gbidyen kwar sha mi yô una wase u nena?
• Doo u ú hide u hen sha mdoo u Aôndo a doo u ishima la sha ci u nyi?
[Study Questions]
[Picture on page 23]
Kanyi yange i na ve mimi doo u ishima?
[Picture on page 25]
Ú nenge a akaa ken uma wou a i gbe u ú sôr yôô?