Lumun Hemen U Yehova
Lumun Hemen U Yehova
“Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.”—1 YOH. 5:3.
1, 2. (a) Hii nan ve ior kpishi nyian ve soo ér mbagenev ve hemen ve ga? (b) Mba ve soo ér orgen nana hemen ve ga la mba sha tseeneke ve mimi kpa? Pase ase yôô.
IOR kpishi nyian mba soon ér orgen nana hemen ve, vea eren kwagh sha ishima i nan ga. Ior mba ve soon ér orgen a hemen ve ga la ka ve shi kaan ér, “or môm nana de ôron mo kwagh u me er ga.” Kpa mimi je or ngu hemen ve gaa? Or ngu hemen ve yum. Ior mban kpishi mba dondon aeren man anza a ior kpishi mba ve ‘hingir inja i môm a tar ne’ yô. (Rom. 12:2) Sha kwagh u apostoli Peteru a er yô, mba “ikpan i hôngorough,” ka sha tseeneke ve ve lu ga. (2 Pet. 2:19) Mba zenden “sha inja i mlu u tar u ainge ne, sha inja i tor u tahav mbu humbev,” ka Satan Diabolo je la.—Ef. 2:2.
2 Orngeren ityakerada ugen kaa sha igbongor ér: “Mayange je m lumun mer mbamaren av shin ma orhemen kwaghaôndo shin ortesen u ken kwaghaôndo u Mbahindu shin Bibilo i tesem kwagh u vough u me er ga.” Sha kpôô yô, alaghga mbagenev vea nzughul a tahav vev nahan vea kera kuma u se ungwa imo ve ga. Kpa, aluer se venda a venda kuaa ser orgen nana de hemen se ga tsô maa kwagh kuree? Aluer se nenge atineakaa a ken ipipaabaver yô se zua a mlumun u vihin kpishi sha mpin ne. Kwagh ka a er i vihi yô, hen shighe u kwagh a hembe gban uumace a hemen ne, ior kpishi nyian mba vendan hemen.
Er Se Nengen Hemen La
3. Mbakristu mba sha derianyom u hiihii mbara tese ér ve gbaa eren hanma kwagh u mbautahav kaa ér ve er cii ga nena?
3 Se Mbakristu se mba nengen hemen er mba ken tar nahan ga. Kpa u ngu wer se mba gbe eren hanma kwagh u i kaa a vese ér se er cii tsô ga. Nahan kpa, ashighe agen a gba u se venda u ungwan imo i mbagenev, vea lu mbautahav je kpaa. Mbakristu mba sha derianyom u hiihii la kpa kape yange ve er je la. U tesen ikyav yô, shighe u zegepristi man mbautahav mbagenev mba ken Mkohol u Mbaajiriv kaa a mbaapostoli ér ve de u pasen kwagh la kpa ve ungwa imo ve ga. Yange ve de u eren kwagh u vough er mbautahav mbara soo nahan ga.—Ôr Aerenakaa 5:27-29.
4. Ka akav a nyi i er ken Ruamabera u ken Zwa Heberu a a tese ér ior mba Aôndo kpishi yange ve er akaa a mbagenev vea er ga?
4 Mbacivir Aôndo mba ve lu cii man shighe u Yesu la kpishi kpa kape ve eren vough je ne. U tesen ikyav yô, Mose yange “rumun u i̱ yila un er wan u Wanfarao ga. . . . Lu un guda u i̱ er a na dang a nongoior u Aôndo imôngo,” shin er lu u una tagher a “iyugh i tor” nahan kpaa. (Heb. 11:24, 25, 27) Yosev yange venda imeen i kwase u Potifar, shin er fa ér ngu a tahav mbu oron iyev shi eren un kwagh u bo nahan kpaa. (Gen. 39:7-9) Daniel kpa yange “vande wan ken ishima er una hôngor iyol na sha kwaghyan u tor” ga, shin er taver orvesen u eren tom ken ya u tor u Babilon la u lumun a na nahan kpaa. (Dan. 1:8-14) Akav ne cii tese ér ior mba Aôndo cica cii kange ishima u eren kwagh u vough shin er vea ya ican nahan kpaa. Yange ve ungwan imo i ior sha u vea doo ityough a ve ga. Se kpa se dondo ieren ve la.
5. Hii nan ve Mbakristu ve nengen hemen er mba ken tar nahan ga?
5 U se kangen ishima tilen sha kwagh u mimi la kaha a ibumegh; shi a kaha a ieren i ior ve lu a mi i hendan kwagh a gomoti la. Kpa se tsua a ishima yase cii ser se dondo hemen u Yehova, a lu u ma orumace ga. Shighe u atindi a uumace ka aa hendan a atindi a Aôndo yô, ka taver se u tsuan or u se dondo ga. Se kpa se mba hembe ungwan imo i Aôndo a imo i ior vough er mbaapostoli mba sha derianyom u hiihii mbara nahan.
6. Doo u se ungwan imo i Yehova hanma shighe sha ci u nyi?
6 Kanyi i wase se u lumun hemen u Aôndo? Se lumun a kwaghwan u a lu ken Anzaakaa 3:5, 6 la. Ijiir la kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” Se na jighjigh ser hanma kwagh u a soo ér se er cii ka sha ci u iwasen yase. (Ôr Duteronomi 10:12, 13.) Jighilii yô, Yehova yange pase iyol na hen Mbaiserael ér: “M tese u kwagh u una lu u a inja yô, M hemen we sha gbenda u ú zenden sha mi la.” Shi a za hemen ér: “Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.” (Yes. 48:17, 18) Se na mkaanem man jighjigh. Shi se na jighjigh ser aluer se mba ungwan imo i Aôndo yô a lu sha ci u iwasen yase.
7. Aluer se fa er i hii ve Aôndo a we ma tindi ken Mkaanem nam ga yô doo u se er nyi?
7 Se lumun hemen u Yehova shi se mba ongo imo na, shin er alaghga se fa ityôkyaa jighilii i i ne ve Bibilo i kaa ér se er akaa agen ga nahan kpaa. Ka se er nahan sha ci u se na Aôndo jighjigh. Shi kwagh ne ka a tese ér se mba a vangertiôr ser Yehova fa hanma kwagh u a doo sha ci wase yô. Heela tseegh ga, m ongo u se ongo imo i Aôndo ne tese ér a doo se ishima, gadia apostoli Yohane kaa ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yoh. 5:3) Nahan kpa vegher ugen u sha kwagh u ungwan imo i Aôndo la kpa ngu u i doo u se fa yô.
Er Tom sha Mkav Wou u ken Ishima La
8. U ‘eren tom sha mkav wase u ken ishima’ la zua sha u lumun hemen u Yehova nena?
8 Bibilo wa se kwagh ér se ‘er tom sha mkav wase u ken ishima la, i̱ hoghor se u paven kwagh u dedoo a kwagh u bo.’ (Heb. 5:14) Kpa u ngu wer se mba ongo imo i Aôndo a u henen sha mi shio ga. Kpa, se soo “u paven kwagh u dedoo a kwagh u bo” er atindiakaa a Yehova a tese nahan. Se soo u dondon kwaghfan u igbenda i Yehova la sha er se kpa se kaa ikyaa i Orpasalmi nahan ser: “Atindiakaa a Ou ngam ken ishima” yô.—Ps. 40:8.
9. Se er nan ve imoshima yase ia wa se kwagh sha igbenda i Yehova, man doo u se er nahan sha ci u nyi?
9 Saa se gbidyen kwar sha kwagh u se er ken Bibilo la ve se kav kwaghfan u atindi a Aôndo er orpasalmi nahan ye. U tesen ikyav yô, shighe u se hen ma kwagh u Yehova a kaa ér se er yô doo u se pine ser: ‘Tindi shin kwaghwan ne ngu a inja sha ci u nyi? Doo u me ungwa un sha ci u nyi? Ka akaabo a nyi a tser mba ve vende u ungwan tindi u Aôndo sha kwagh nee?’ Imoshima yase ka ia nguren wan se kwagh sha igbenda i Yehova yô, i kera taver se u eren ishima i Aôndo ga. Nahan se ‘kav er ishima i Ter i lu yô’ shi se za hemen u ungwan imo na kpaa. (Ef. 5:17) Kpa ka hanma shighe cii i lun se zange u eren kwagh ne ga.
Satan Keren u Lahan Hemen u Aôndo
10. Ka gbenda môm u nyi Satan a lu yaren tom a mi u lahan hemen u Aôndo?
10 Satan laha hemen u Aôndo ica i gba hegen. Se fatyô u nengen a jijingi u eren kwagh sha tseeneke na ne ken igbenda kposo kposo. U tesen ikyav yô, ior kpishi mba kera nengen ér ivese i Aôndo a seer a ver la ka kwagh u civirigh ga. Nomso man kasev mbagenev ka ve lu imôngo a u vôson ayol a ve shio, mbagenev di ve ker gbenda u paven ivese ve. Mba ve eren nahan cii vea lumun a kwagh u kwase u eren anumbe sha televishen ugen yange ôr yô, a kaa ér: “Or shin kwase nana fatyô u eren nom shin kwase môm tseegh ga.” Shi a za hemen ér: “M ngu a fa or shin kwase môm u nan eren kwagh a ikyar u nan sha mimi shin nan soo u eren nahan ga.” Orgen u eren anumbe a sha televishen u kwase ngôôr duen un ga yô kaa ér: “Taver mo kpishi u lumun mer gba u or nana lu vea kwase shin nom môm tseegh gbem shawon.” Nahan doo u se pine ayol a ase ser: ‘M lumun hemen u Yehova sha kwagh u ivesegh kpa, shin gbenda u tar u nengen kwagh u ivesegh la ngu kôôm mo?’
11, 12. (a) Ashighe agen a taver agumaior u lumun hemen u Yehova sha ci u nyi? (b) Ôr vande-eren u a tese injar i bo i peren atindi man akaawan a Yehova yô.
11 U ngu gumor ken tiônnongo u Yehova? Aluer ka nahan yô, alaghga Satan una soo ér we u hen wer hemen u Yehova ngu sha ci u iwasen you ga. Alaghga “asaren a sha inja i mbayevikyaior” man mkighir u mbakov una na yô u hen wer atindi a Aôndo taver u kuran. (2 Tim. 2:22) Mayange de lumun wer imba kwagh ne i er u ga. Nôngo nenge er atindiakaa a Aôndo a lu sha ci u iwasen you yô. U tesen ikyav yô, Bibilo wa ne kwagh ér “yevese nen idya.” (1 Kor. 6:18) Sha kwagh ne kpa doo u ú pine iyol you wer: ‘Tindi ne ngu a inja sha ci u nyi? Aluer m kura tindi ne yô una wasem nena?’ Alaghga u fa ior mba ve vende tindi u Aôndo sha kwagh ne man ve sondo injar i bo sha ci u isholibo ve la yô. Saan ve iyol sha mimi kpa? Uma ve ngu guda hemba shighe u ve lu ken ior mba Yehova la kpa? Mimi je ve zua a kwaghmyer u msaanyol u mbacivir Aôndo mbagenev cii ve zough a mi ga yôô?—Ôr Yesaia 65:14.
12 Hen ase sha kwagh u kwase Kristu ugen u i yer un ér Sharon la yange ôr yô, a kaa ér: “Yange m per tindi u Yehova nahan m zua a angev mbu i yer ér AIDS la. Ka m hide m umbur anyom a yange m civir Yehova saan saan la.” Yange va mase kaven ér doo u peren atindi a Yehova ga, shi nenge ér nga a inja kpishi kpaa. Atindi a Yehova nga kor se. Sharon yange ngeren mkaanem man usati mba kar utaankaruhar yô maa kpe. Kwagh u vihin u er Sharon ne tese ér Satan ngu a kwagh u dedoo môm môm u nan mba ve lumun aeren a tar u bo ne ga. Er a lu “ter u aie” yô, ka a er uityendezwa kpishi kpa a kure ve ga vough er yange er ityendezwa a Ifa kpa kure i ga nahan. (Yoh. 8:44) Sha mimi yô, hemba doon u lumun hemen u Yehova.
Palegh Ieren i Eren Kwagh sha Tseeneke La
13. Ka gbenda môm u nyi nahan i doo u se palegh ieren i eren kwagh sha tseeneke laa?
13 Aluer se lumun hemen u Yehova yô a gba u se palegh ieren i eren kwagh sha tseeneke la. Iyol i moron ia fatyô u yangen se u ngohol kwaghwan hen mbagenev. Ikyav i tesen yô, alaghga se venda kwaghwan u mba ve lu hemen ior mba Aôndo la. Aôndo ver gbenda sha er wanakiriki u jighjigh man u fan kwagh una naan se kwaghyan sha ashighe ashighe yô. (Mat. 24:45-47) Nahan doo u se hide a ayol a ase ijime se nenge gbenda ne ser ka gbenda u Yehova a lu nengen sha ior nav sha shighe wase ne yô. Lu er mbaapostoli mba jighjigh mbara nahan. Shighe u mbahenen mba Yesu mbagenev kpishi hide ijime kera za a na ityô ga la, a pine mbaapostoli nav ér: “Ne kpaa, ka ne ka yemene? Shimon Peteru gema kaa a Na er: Tere, ka hen an je shi sé zaa? Ka We U lu a mkaanem ma uma u tsôron ye.”—Yoh. 6:66-68.
14, 15. Doo u se hide a ayol a ase ijime se lumun kwaghwan u ken Bibilo sha ci u nyi?
14 Se tese ser se lumun hemen u Yehova aluer se lumun kwaghwan u ken Mkaanem nam yô. Ikyav i tesen yô, wanakiriki u jighjigh man u fan kwagh ka a shi wan se kwagh ér ‘se lu per geng ge geng.’ (1 Tes. 5:6) Kwaghwan ne ngu a inja kpishi ken ayange a masejime a ior kpishi ve “hingir mbawan ayol a ve ikyo tseegh man mba inyaregh ki doo ve ishima” ne. (2 Tim. 3:1, 2) Imba ieren ne ia fatyô u benden a vesee? Een. Aluer se hemba veren ishima sha akaa a taregh shin inyaregh ki keren hemba gban se kwagh yô se hingir u gban mnyam ken jijingi. (Luka 12:16-21) Nahan yô, hemba doon u dondon kwaghwan u Bibilo kpa palegh ieren i wan ayol a ase ikyo tseegh i i dumbur ken tar u Satan ne.—1 Yoh. 2:16.
15 Ka mbatamen mba ken atôônanongo a ase ve pasen se akaawan a wanakiriki u jighjigh man u fan kwagh a ne la ye. Bibilo kaa a vese ér: “Ungwan nen imo i mbahemenev enev, hide nen a ayol a en ijime hen ve gadia mba kuran uuma enev er ka ior mba vea za pase kwagh u ve er la keng nahan. Ve̱ er nahan saan saan i̱ de lu sha ishima i vihin ga, gayô, á lu ne a inja ga.” (Heb. 13:17) Kwagh ne tese ér mbatamen mba ken tiônnongo mba eren kwagh u vough hanma shighe? Mayange ga. Aôndo hembe nengen a mbamyen vev a vese. Kpa a soo ér se ungwan imo ve. Aluer se mba ungwan imo i mbatamen mba ve yen ne yô se mba tesen ser se lumun hemen u Yehova.
Mluainja u Hiden a Iyol Ijime
16. Se na Yesu icivir sha er a lu Ityough ki tiônnongo u Kristu nena?
16 Hanma shighe yô gba u se fa ser ka Yesu a lu Ityough ki tiônnongo ye. (Kol. 1:18) Ka ityôkyaa i môm i i doo u se hide a ayol a ase ijime se lumun hemen u mbatamen mba ken tiônnongo, se ‘waan ve ikyo kpishi je’ la. (1 Tes. 5:12, 13) Mbatamen mba ken tiônnongo kpa vea tese ér ve lumun hemen u Yesu sha u tesen tiônnongo mkaanem ma Aôndo, a lu mbamhen vev ga. Mba “karen akaa a i nger la ken inya” sha u tesen mbamhen vev ga.—1 Kor. 4:6.
17. Ieren i gengese iyol la ka kwaghbo sha ci u nyi?
17 Gba u hanma or ken tiônnongo cii nana palegh kwaghbo u a lu sha u or keren icivir i nan la. (Anz. 25:27) A shi nan kpa, orhenen ugen u apostoli Yohane zua a na yô gba ken kwaghbo ne. Yohane nger ér: “Diotrefe, u tamen a doo un ken a ven yum la, a rumun se ga. Nahan yô, aluer me va yô, me nder kwagh ne, me ôr un akaa a a lu eren la. A lam sha a vese vihi kpishi.” (3 Yoh. 9, 10) Se nyian kpa se fatyô u henen kwagh sha kwagh ne. Doo u se dugh nyityô isharen i gengese iyol ken a vese kera. Bibilo kaa a vese ér: “Ken ijime i iyolgengese yô, ka mtim, ken ijime i iceen ka mgbe.” Mba ve lumun hemen u Aôndo yô ka ve palegh u gban ken imeen i iyolgengese, sha ci u aluer ve er nahan ga yô vea ya kunya.—Anz. 11:2; 16:18.
18. Kanyi ia wase se se lumun hemen u Yehova?
18 Nahan yô, venda jijingi u tar u lu a mi u keren tseeneke la, kpa gema lumun hemen u Yehova. Henen sha ian i vesen i ú lu a mi u civir Yehova ne sha ashighe ashighe. Er u lu môm ken mbacivir Aôndo ne tese ér á urugh we sha icighan jijingi na. (Yoh. 6:44) Mayange de te ikyar i ú ye vea Aôndo la kera ga. Nôngo sha afatyô wou cii tese wer ú venda ieren i keren tseeneke la kpa u gema u lumun hemen u Yehova.
Baver We Kpa?
• U̱ lumun hemen u Yehova la wa nyi man nyi kere?
• U̱ eren tom sha mkav wase u ken ishima la zua sha u lumun hemen u Yehova nena?
• Ka sha igbenda i nyi nahan Satan a keren u lahan hemen u Aôndo?
• Iyol hiden a mi ijime ngi a inja sha u lumun hemen u Yehova sha ci u nyi?
[Study Questions]
[Picture on page 18]
“Ka u sé hemba ungwan imo i Aôndo keng a imo i ior”
[Picture on page 20]
Hemba doon u lumun hemen u Aôndo hanma shighe cii