Mbampin mba Mbaôron Takerada Ne Ve Pin La

Apostoli Paulu yange kaa ér “Iserael cii vea war.” (Rom. 11:26) Nahan lu kaan ér a va gema Mbayuda cii vea hingir Mbakristuu?

Ei, lu kwagh u Paulu lu ôron la ga. Ikyurior i i lu ônov mba Aberaham la cii yange i venda Yesu u a lu Mesiya la. Shi shighe u Yesu kpe ica lu a gba ga la, ikyav tese wang ér Mbayuda cica cii vea fatyô u geman hingir Mbakristu ga. Nahan kpa kwagh u Paulu kaa ér “Iserael cii vea war” la lu mimi. Sha nyi gbenda?

Yesu yange kaa a mbahemenev mba kwaghaôndo u Mbayuda mba sha ayange a na la ér: “Á ngohol tartor u Aôndo hen a ven kera á na ikyurior i ia ume atam yô.” (Mat. 21:43) Er ikyurior i Iserael jimin cii venda Yesu yô, Yehova hide ver ishima sha ikyurior i he, ka ikyurior i ken jijingi je la. Paulu yila ikyurior ne ér: “Iserael u Aôndo.”—Gal. 6:16.

Avur agen ken Ruamabera u Mbakristu u ken Zwa Grika la tese ér “Iserael u Aôndo” ne ka Mbakristu mba i shigh ve mkurem sha jijingi, ve lu iorov 144,000 la. (Rom. 8:15-17; Mpa. 7:4) Shi Mpase 5:9, 10 pase ér mba ve lu Mbayuda ga kpa vea lu ken Iserael u Aôndo ne, sha ci u ve due ken “hanma nongo man hanma zwa man hanma nongoior man hanma ikyurior.” I tsua nongo u Iseral u Aôndo ne sha er vea “hingir tartor man upristi . . . vea tema tor sha tar” yô. Er Yehova a vende ikyurior i Iserael nahan kpa, ior asange asange ken ikyurior i Iserael vea fatyô u hiden yan ikyar i dedoo vea na. Mbaapostoli man Mbakristu mba sha derianyom u hiihii la kpa kape ve hide ve ya ikyar i dedoo vea Aôndo je la. Er gba u a yam uumace mbagenev sha awambe a Yesu Kristu nahan, kape Mbayuda mbara kpa lu je la.—1 Tim. 2:5, 6; Heb. 2:9; 1 Pet. 1:17-19.

Er Mbayuda mba sha marami kpishi ta ian i va teman tor vea Yesu la kera nahan kpa, ieren ve la bunde awashima u Aôndo ga. Mayange kwagh a fatyô u eren nahan ga, gadia Yehova ôr sha ikyev i profeti na ér: “Kape kwaghôron Wam, u a dugh ken zwa Wam, una lu la, una hide her a Mo gbilin ga, kpa una er kwagh u M we ishima yô, ikyôr ia lagh un sha kwagh u M tindi un u eren yô.”—Yes. 55:11.

Kape awashima u Aôndo u veren iorov 144,000 ve tema tor vea Wan na sha la kpa a kur sha mi vough je la. Bibilo ôr wang ér Aôndo una tsua mba 144,000 mbara cii. Iyenge la ia iv sha mi vough.—Mpa. 14:1-5.

Sha nahan yô, shighe u Paulu kaa ér ‘Iserael cii vea war’ la lu kaan ér a va gema Mbayuda cica cii vea hingir Mbakristu ga. Kpa lu ôron ér awashima u Aôndo u tsuan iorov 144,000 mba vea lu Iserael u ken jijingi mba vea za tema tor vea Wan Na Yesu Kristu sha la una bunde ga. Shighe u Aôndo a ver la una kuman yô, una yima “Iserael cii” vea tema tor shi vea hingir upristi vea hemen ken Tartor u Mesiya.—Ef. 2:8.

[Pictures on page 28]

Mba i shigh ve mkurem la due ken “hanma nongo man hanma zwa man hanma nongoior man hanma ikyurior”