U Fatyô U Pasen Kwagh U Jighjigh U Nan Wou Kpa?

I LU nahan gba hange hange u ú pase mbagenev kwagh u jighjigh wou u nan vee? Hen ase sha kwagh u anmgbian u kwase ugen ken tar u Paraguay, u lun anyom 16 u i yer un ér Susana la. Mbayevmakeranta mba ken klase na mbagenev yange ve kaa ér Mbashiada mba Yehova lumun a “Ikyuryan I Tse” ga, shi ve lumun a Yesu Kristu kua Maria kpaa ga. Shi mbagenev kaa ér Mbashiada mba Yehova ka ior mba ve soon u hiden ijime sha kwagh ga shi ka ve venda twersôron ér guda vea kpe. Luun we nahan yange ma u er nena?

Susana yange er msen hen Yehova man kende uwegh sha. Kpa er shighe zulum u kwaghtesen la una kure yô, a kaa a tica na ér a na un ian una pase klase akaa a un ne jighjigh a mi la. Tica la lumun. Nahan Susana yar tom a antakerada u Mbashiada mba Yehova Ka Unô Ioro? Kanyi Ve Ne Jighjigh a Mini? la ken sati uhar sha u wan iyol i za nan kwaghôron la.

Sha iyange i nan kwaghôron la, Susana pase klase na ape Mbashiada mba Yehova ve zough a iti ve yô. Shi pase ishimaverenkeghen yase sha mlu u ken hemen man er i hii ve se te awambe ga yô. Been yô a na klase ian i pinen mbampin. Mbayevmakeranta kpishi kende ave sha. Yange kpiligh tica la iyol kpishi u ungwan er wanyekwase ne na mbamlumun sha mbampin mbara ken Bibilo yô.

Wanyemakeranta ugen kaa ér, “Iyange igen la m za ken Iyou i Tartor, kpa m nenge a ma eev ker ga.” Nahan tica la soo u fan er i hii ve ieev mbi lu ken Iyou i Tartor ga yô. Susana maa ôr Pasalmi 115:4-8 kua Ekesodu 20:4. Kpiligh tica la iyol tsô a kaa ér, “Hii nan ve ieev mbi dumbur ken ucôôci asev man Bibilo i vende mbi?”

Kwaghôron la za hemen zan zan kuma miniti 40. Susana pin mbayevmakeranta mbara ér vea soo u nengen tser u vidio u i yer ér No Blood—Medicine Meets the Challenge la yô, ve cii ve lumun. Nahan tica la kaa ér kpernan tsô vea za hemen a kwaghôron la. Kpernan mba nengen tser u vidio mba been yô, Susana maa ta iwanger sha kwagh u twersôron a awambe shio u Mbashiada mba Yehova mbagenev ve lumun la. Kwagh ne na yô tica la kaa ér: “M vande fan er igbenda i sôron twer a awambe shio i lu kpishi nahan ga; shi m fa er twersôron a awambe shio u lu a inja nahan kpaa ga. Igbenda i sôron twer a awambe shio ne ngi sha ci u Mbashiada mba Yehova tseeghelee?” Er í pase un ér ngi sha ci u Mbashiada mba Yehova tseegh ga yô, a kaa ér, “Kwagen Mbashiada mba Yehova vea va hen ya wam yô me lam a ve.”

 Susana wa iyol u lamen a klase ken miniti 20, kpa kwaghôron la shi je kuma ahwa atar. Sati karen môm yô, mbayevmakeranta mbagenev kpa na akaaôron a pasen jighjigh u nan ve. Nahan i pine ve mbampin shighe u ve bee akaaôron a ve yô, kpa ve kanshio u nan mbamlumun sha mi. Tica la maa pine ve ér, “Hii nan ve ne fetyô u pasen kwagh u jighjigh u nan wen er Susana u a lu môm ken Mbashiada mba Yehova la a pase nahan ga?”

Tsô ve kaa ér: “Mbashiada mba Yehova mba henen Bibilo, kpa se yô se mba henen i̱ ga.”

Tica la gema kaa a Susana ér: “Ne mba henen Bibilo shi ne mba eren sha kwagh u ne hen la kpaa. Ú kuma iwuese.”

Susana yange ma ungwa ato, kpa er pase klase kwagh u jighjigh u nan na yô, lu dondon wankwase u ken Iserael u i ter iti na ga, u Mbashiria kôr un yem a mi uikyangen la. Yange i yem a wankwase la ken ya u Naaman, kurutya u Mbashiria u lu a bouange iyol la. Wankwase u ken Iserael la kaa a ngô na ér: “Terem ma a lu ase hen profeti u ken Samaria la, nahan ma a bee un imande!” Wankwase la nenge ér gba kpee u una pase kwagh u Aôndo u mimi. Kwagh ne na yô, Ter na Naaman hingir or u civir Yehova.—2 Utor 5:3, 17.

Kape Susana kpa nenge ér gba kpee u una pase kwagh u Yehova man ior nav je la. Shighe u i gba ahon sha kwagh u jighjigh u nan u Susana ve lam sha u pasen kwagh u na jighjigh a mi la, lu kuran tindi u Ruamabera ne, ér: “Tsegha nen Kristu ken asema a en, A̱ lu Ter, waan nen ago iyol veren nen a ver sha u né na imo sha mpin u hanma or u nana pine ne ityôikaa i ishimaverenkeghen i i lu ken a ven la, kpa i̱ lu sha ishima i legh legh man sha mcie kpaa.” (1 Pet. 3:15) Ú wa iyol u kegh a kegh u pasen kwagh u jighjigh u nan wou hanma shighe u i gbe u ú er nahan cii kpa?

[Picture on page 17]

Akaa ne aa wase ú u pasen kwagh u jighjigh u nan wou