Yesu Lu Ôron Kwagh u Igyamusu Shinii?

MBA ve ne jighjigh a ityesen i igyamusu yô ka ve ter mkaanem ma Yesu ma i nger ken Marku 9:48 (shin ivur 44 man 46) la. Ken ivur la Yesu ôr kwagh u ijôô ve ia kpe ga, man usu kpaa u pirin mayange ga la. Aluer or pine u inja i kwaghôron la nahan u pase nan wer nyi?

Alaghga orgen nana ôr ivur 44 shin 46 gayô 48 ken Bibilo i nan lu a mi la, sha ci u Ubibilo kpishi ôr kwagh shon môm ken avur ne cii. * Bibilo kaa ér: “Aluer ishe you ia na u gbev mbu nôngon yô, dugh i kera; u ú nyôr sha tartor u Aôndo a ishe i môm yô, ka u guda a u ma u lu a ashe ahar ma i kende u ken gehena, ape ijôô ve ia kpe ga, man usu kpaa u pirin mayange ga la.”—Mar. 9:47, 48.

A lu nan nan kpa, ior mbagenev hen ér mkaanem ma Yesu mara sue ityesen i shighe u or kpe yô ka nan za yaan ican gbem sha won la. U tesen ikyav yô, Bibilo i ken zwa Ishpania i í yer ér Sagrada Biblia, i ken Yunivasiti i Navarre la kaa ér: “Ter wase ôr [mkaanem man] sha u tesen ér a va nande ior ken igyamusu. Shi i pase inja i ‘ijôô ve i ia kpe ga’ la ér ka ijungwen i mba ve lu ken igyamusu vea zungwe gbem sha won la; ‘usu u pirin sha won ga’ la di gema ka ican i vea ya ken igyamusu la.”

Nahan kpa, tôô ase mkaanem ma Yesu mara kar sha ivur i masetyô i takerada u Yesaia la. * Ikyav tese ér Yesu lu ôron kwagh u ivur i masetyô i ken Yesaia ityough 66 la. A shi nan kpa profeti la lu ôron kwagh u duen ken “wongar u Yerusalem zan shin Pev u Hinom (Gehena), ape i nanden ior i naan nagh a mi sha shighe ugen la. (Yer 7:31) Ijiir ne yange i va hingir ijiir i ior mba ken gar la haan ihyôughnough her yô.” (The Jerome Biblical Commentary) Inja i kwagh u i er ken Yesaia 66:24 la tese wang ér lu ior i naan ve atsan hen ijiir ne ga, kpa lu akom a mbakpenev. Kwagh u ijiir la i kaa ér una kpe ga yô ka ijôô, ka ior mba umav shin uma u kpen ga ze ga. Tsô Yesu lu ôron ér nyi jimi?

Ver ishima sha kwagh u ngeren u Mbakatoliko u i yer ér El evangelio de Marcos. Análisis lingüístico y comentario exegético, Tihi u sha Uhar a er sha kwagh u Marku 9:48 yô. Ngeren la kaa ér: “I tôô ivur ne ken Yesaia (66,24). Profeti la tese igbenda ihiar i yange i timin akom a mbakpenev yô, lu sha u hôôn man sha u nanden . . . Mter u i ter ijôô man usu ken ivur la ijiir i môm la seer tesen mtim. . . . I pase igbenda i timin kwagh i ihiar la ér ka mtim u tsôron, inja na yo (‘ijôô ve ia kpe ga man usu ve kpaa á pir u ga’), man kwagh ne tese ér or a fatyô u waren mtim ne mayange ga. Kwaghôron ne tese ér ka ijôô man usu tseegh ve war mtim la ye ka or ga, man akaa a timin kwagh a ahar ne ka a tim hanma kwagh u a zough a mi cii. Sha nahan yô, kwaghôron ne tese ican i tsôron ga, kpa ka mtim u tsôron u mayange je a nder mba i tim ve sha imba gbenda ne shin ku ga la. Nahan yô, [Usu] u i er kwagh u ú la ka ikyav i mtim u tsôron.”

Doo u hanma or u nan fe ér Aôndo u mimi ka dooshima shi kwagh u mimi doo un ishima yô nana kav inja i mkaanem ma Yesu mara er i pase nahan. Yange lu kaan ér mbaaferev vea ya ican i tsôron ga. Kpa lu ôron ér mtim u mbaaferev la una lu u tsôron, a ishimaverenkeghen i mnder u shin ku shio.

[Footnotes]