Er Se Hemba Mbamtaver Mba Kwaghpasen U Sha Uya Uya Yô
Er Se Hemba Mbamtaver Mba Kwaghpasen U Sha Uya Uya Yô
“Se lu vangertiôr ken Aôndo wase, se ôr ne Loho u Dedoo u Aôndo, lu sha ahendan kpishi je.”—1 TES. 2:2.
1. Ka mbamtaver mba nyi Yeremia tagher a mi, man nôngo a ve nena?
YEREMIA yange lu or di er se nahan. Shighe u Yehova kaa a na ér una lu “profeti u akuraior” la, a gbidye iwer wener: “Uwu! Tere, AÔNDO! M fa u ôron kwagh dedoo ga, gadia mo m ngu wanye je.” Nahan kpa, er suur sha Yehova yô a lumun u eren tom u profeti la. (Yer. 1:4-10) Er ior soo u ungwan loho u Yeremia ga shi ve naha un tar shi ve venda un shi ve gbidye un nahan kpa, a wa ishima a atsan ne je hemba anyom 40. (Yer. 20:1, 2) Ashighe agen i lu un ape kera eren tom na u profeti la ga. Nahan kpa, za hemen u pasen ikyurior i i̱ soo u ungwan loho na ga la. Sha tahav mbu Yehova yô, Yeremia er kwagh u ma fatyô u eren sha tahav nav tseegh ga yô.—Ôr Yeremia 20:7-9.
2, 3. Mbatomov mba Aôndo mba tagher a mbamtaver nyian mba lun er mba Yeremia tagher a mi la nena?
2 Mbacivir Aôndo nyian kpishi tagher a imba mtaver u Yeremia kpa tagher a mi la. Se mbagenev kpishi shighe u se lu gbidyen kwar u duen kwagh pasen la se lu henen ken ishima yase ser, ‘Mayange me fatyô u pasen kwagh sha uya uya ga.’ Nahan kpa, se mba va fe ser Yehova soo ér se pase loho u dedoo yô se kange ishima nahan se hingir u pasen kwagh. Se mbagenev kpishi se tagher a akaa ken uma wase a ka a na shighe gen i taver se u zan hemen a tom wase u pasen kwagh ne yô. Ka kwagh u heghema u hiin u pasen kwagh sha uya uya shi zan hemen a mi zan zan mkur ga.—Mat. 24:13.
3 Aluer u hen Bibilo vea Mbashiada mba Yehova hegen shighe kar shi u ngu zan mbamkombo kpa taver we u hiin u duen kwaghpasen u sha uya uya la di ye? Shin i er u batisema u hingir Orshiada shi u ngu a gbong gbong iyol, nahan kpa ka taver we u pasen kwagh sha uya uya ye? Fa wer, ior mba mbamlu vev ve lu kposo kposo je kpa mba hemban mbamtaver mba kwaghpasen u sha uya uya la, nahan we kpa sha iwasen i Yehova yô u hemba zayol ne.
Lu a Vangertiôr
4. Kanyi yange i wase apostoli Paulu u pasen loho u dedoo ne vangertiôrô?
4 We kpa u fa er tom u pasen kwagh u i lu eren tar sha won cii ne i lu sha tahav mbu jijingi u Aôndo, i lu sha kwaghfan shin tahav mbu or ga yô. (Sek. 4:6) Kape tom u pasen kwagh u Mbakristu ve eren asange asange la kpa u lu je la. (2 Kor. 4:7) Nenge ikyav i apostoli Paulu ne. Shighe u mbaahendanev er a Paulu man ikyar i tom na dang yô, a nger ér: “Shin er se vande yan ican, i gba eren a vese ken Filipi dang er ne fe nahan, kpa se lu vangertiôr ken Aôndo wase, se ôr ne Loho u Dedoo u Aôndo, lu sha ahendan kpishi je.” (1 Tes. 2:2; Aer. 16:22-24) Alaghga a taver se u henen ser or u pasen kwagh kpoghuloo er Paulu nahan kpa una lu a ashighe a yange i taver un u pasen kwagh yô. Nahan kpa, vough er se nahan yange gba u Paulu una suur sha Yehova sha er una ôr loho u dedoo ne vangertiôr yô. (Ôr Mbaefese 6:18-20.) Se dondo ikyav i Paulu la nena?
5. Ka kwagh môm u nyi nahan una wase se u pasen kwagh vangertiôrô?
5 Kwagh môm u una wase se u pasen kwagh vangertiôr yô ka msen u eren. Pania u kwase ugen kaa ér: “M er msen sha er me ôr kwagh vangertiôr shi una kôr ior ken ishima yô, kua er me zua a iember ken tom kwaghpasen yô. Gadia tom ne ka u wase ga ka u Yehova, nahan a iwasen na shio yô se fatyô u eren kwagh môm môm ga.” (1 Tes. 5:17) Gba u se cii se sônon jijingi u Aôndo hanma shighe sha er se pase kwagh vangertiôr yô.—Luka 11:9-13.
6, 7. (a) Ka mpase u sha mnenge u nyi yange i na Esekiel, man inja i mpase shon yô ér nyi? (b) Ka akaa a nyi nahan mpase u sha mnenge la a tese mbacivir Aôndo nyiana?
6 Takerada u Esekiel ôr kwaghgen u una wase se u pasen kwagh vangertiôr yô. Yehova yange na Esekiel ihurenruamabera ken mpase u sha mnenge u yange i nger “ukwelegh man mzungu man iwer i gbiren” kimi kua ken ijime yô ér a ya, shi kaa a na ér: “Wan u or, de iyav ou mbu̱ ya, iv gbor wou a ihurenruamabera u M ne u ne.” Inja i mpase u sha mnenge ne ér nyi? Yange gba u Esekiel una fa mkaanem ma gba u una za ôr la vindi vindi. Shi ma a hingir ikye na shi ma a benden a mbamhen nav kpaa. Profeti la kaa ér: “Tsô m ya i; i nyohom ken zwa er iyough nahan.” Yange i doo Esekiel u pasen mkaanem ma Aôndo ken igbar, tom ne nyoho un inja er ngu yan iyough nahan. Shin er gba u una za ôr ior mba toron asema loho ne nahan kpa, u lun ortom u Yehova shi kuren tom na u Aôndo na un la lu un kwagh u civirigh kpen kpen.—Ôr Esekiel 2:8–3:4, 7-9.
7 Mbacivir Aôndo nyian vea fatyô u henen kwagh u injaa ken mpase u sha mnenge ne kpen kpen. Se kpa se mba a loho u taver u pasen ior mba ashighe kpishi ve nengen a iniôngon yase ga yô. Saa se ôron shi se henen Bibilo ve se za hemen u nengen tom wase u Mbakristu ne ser ka tom u civirigh u Aôndo a ne se ye. Aluer se mba henen kwagh hanma shighe ga yô se fatyô u kaven Mkaanem ma Aôndo tsema tsema ga. U fatyô u sôron ashighe man gbenda u u henen kwagh la kpa? Shi u fatyô u gbidyen kwar sha kwagh u ú hen la kwa imôngo kpa?—Ps. 1:2, 3.
U̱ Hiin Kwaghôron ken Bibilo
8. Ka igbenda i nyi i wase mbapasenkwagh u Tartor mbagenev u hiin iliam a ior ken Bibilo shighe u ve dugh kwaghpasen u sha uya uya?
8 Kwagh u a hembe lun mbapasenkwagh kpishi ican shighe u ve lu pasen kwagh sha uya uya yô ka u hiin iliam a orya. Sha mimi yô ka i taver u hiin iliam a ior sha ajiir agen. Ka hembe lun mbapasenkwagh mbagenev ican ga u hiin iliam a orya sha asember kpuaa a i nger ken akwati u a lu shin inya ne maa nan nan trak. Alaghga itinekwagh shin foto u doonashe u a lu sha trak shon la una doo orya la, nahan se fatyô u pasen nan ityôkyaa i mve wase shi pinen nan mpin kpaa. Shin se fatyô u tesen orya la utrak kpishi sha er nana tsua u sha ishima i nan yô. Kpa awashima wase jighilii yô ka u karen a kar ior utrak asev tseegh tsô ga, kpa ka u hiin Bibilo i henen a ior.
9. U̱ wan iyol i pasen kwagh tsembelee la ngu a inja sha ci u nyi?
9 Hanma gbenda u ú tsough u hiin iliam a ior shighe u ú dugh kwaghpasen u sha uya uya la cii kpa, aluer u vande wan iyol yô a hemba maan we iyol. Pania ugen kaa ér: “Ka mea vande wan iyol i pasen ior kwagh yô i hemba saan mo iyol. Ka i hemba maan mo iyol u pasen ior kwagh u m vande wan agoyol sha mi la.” Pania ugen di kaa ér: “Ka mea vande ôron ityakerada i m soo u nan ior la yô, i hemba sasen mo iyol u nan ve i.” Er i lu a inja u hiden kimbir kwagh u ú we iyol u za ôron la shin ishima nahan kpa, mbagenev nenge ér hemba doon u karen iyol sha kwagh u ve we ishima u za ôron la duen sha. U eren nahan la ngu a wase ve u shiren Yehova tom sha ishima i môm.—Kol. 3:23; 2 Tim. 2:15.
10. A er nan ve mkombo u duen kwaghpasen una lu a inja?
10 Ka a wa iyol tsembelee cii ve a er mkombo u duen kwaghpasen yô, i hemba maan hanma or iyol u pasen kwagh sha uya uya. Aluer ivur i sha iyange ôr kwagh sha tom u pasen kwagh jighilii yô, a fatyô u ôron ivur shon shi lamen sha mi kpaa. Nahan kpa anmgbian u nan lu hemen mkombo u duen kwaghpasen la nana tôô shighe nana lam shin nana tese ikyav i gbenda u taver ga u pasen or kwagh, u u zough sha mlu u hen ningir wen la shin akaa agen a aa wase mbapasenkwagh ken tom ve sha iyange la yô. Kwagh ne una seer wasen mba ve we iyol u duen kwaghpasen la u pasen kwagh tsema tsema. Aluer mbatamen man mbagenev mba ve hemen mkombo u duen kwaghpasen vande wan iyol tsembelee yô, mkombo ne una wase hanma or shi una kure sha shighe vough kpaa.—Rom. 12:8.
Doo u Keghen Ato a Ior
11, 12. Aluer se kegh ato a ior sha mhôôn yô se hemba pasen ve loho u dedoo nena? Tese akav.
11 Ka iyol i wan tsembelee tseegh i wasen se u hiin iliam a ior ken Bibilo ga, mgbe u kwagh u ior gban se ishima la kpa wasen se u pasen ior kwagh. Gbenda môm u se tese ser kwagh u ior gba se ishima yô ka u keghen ato a ve. Ortamen u zenden sha ugen kaa ér: “Ka sea wa ishima shi sea kegh ato a ior yô, ve kpa ve soo u ungwan loho u dedoo, man ka gbenda u dedoo u tesen ser kwagh ve gba se ishima.” Ka sea kegh ato a or sha mimi shi mhôônom ma a kôr se a nan shighe u nan lu ôron se kwagh la yô, kwagh la a na nan hemba keghen ato a loho wase la, er vande-eren u a dondo ne a tese nahan.
12 Kwase ugen nger washika ken ipipaabaver i í yer ér Le Progrès la, ipipaabaver ne ka i ken gar u Saint Étienne ken tar u France. A ôr kwagh u shighe u wan na u kwase u lun iwer itiar yange kpe ica lu a gba ga ve kasev uhar va kuma un uwegh sha hunda yô, ér: “Fese nahan m kav er ve lu Mbashiada mba Yehova yô. M wa ishima mer me zenda ve sha ayom ve yem, kpa m nenge ve a antakerada ugen u ve lu nan ior yô. Antakerada ne ôr er i hii ve Aôndo a ne ican i yan ian yô. Tsô m lumun mer ve tema inya, kpa awashima wam yô lu u me tese ve mer mba shami ga. . . . Mbashiada mban shi a mo hemba ihwa i môm daalaa. Ve kegh ato a mo zulee shi mhôônom kôr ve a mo kpishi, nahan shighe u ve mough u yemen la ishima hemba gban mo shimi, tsô m kaa a ve mer, ve hide ve vam inya kwagen kpaa.” (Rom. 12:15) Shighe kar yô, kwase ne lumun u henen Bibilo. Kwagh u vande-eren ne a tese se yô, ka kwagh u Mbashiada mba Yehova mbara yange ve ôr la kwase la umbur ga, kpa ka gbenda u ve kegh ato a na la.
13. Se gema gbenda u se pasen ior loho u dedoo la nena?
13 Ka sea kegh ato a ior shi mhôônom ma a kôr se a ve yô, se na ve ian i pasen se er i hii ve ve soo ér Tartor u va yô. Kwagh ne ka a wase se u pasen ve loho u dedoo. Adooga u nenge er mbapasenkwagh mba ve ze ikyura ken tom ve ve fe u keghen ato tsembelee yô. (Anz. 20:5) Kwagh u ior mba ve zough a ve shighe u ve dugh kwaghpasen la ngu a gba ve ishima sha mimi. Ka ati ve man ajiir a ve lu her la tseegh ve veren ishima ér vea fa ga, kpa ka ve ver ishima sha akaa a a gbe ve ishima la kpaa. Or ka nana pine ve mpin yô, ve ker iwanger sha kwagh shon nahan ve hide ve za ta nan iwanger. Mba gem gbenda u ve pasen ior loho u Tartor la vough er apostoli Paulu kpa eren nahan. (Ôr 1 Mbakorinte 9:19-23.) Ka sea tese ser kwagh u ior gba se ishima sha mimi yô ve kegh ato a loho u dedoo shi ngu a tese kpaa ér se mba dondon “mhôônom ma zungwen tsung ma Aôndo wase la.”—Luka 1:78.
Lu a Mnenge u Vough
14. Se tese aeren a Yehova ken tom wase u pasen kwagh la nena?
14 Yehova tese ér se doo un ishima asange asange, ka nahan ve a ne se ian i tsuan kwagh u se soo la ye. Er a lu Aôndo Uhembanagee nahan kpa kighir or môm ér nana civir un ga, kpa a soo ér ior ve nenge a dooshima na nahan ve civir un, shi veren mba i doo ve u lumun gbendatesen na la doo doo. (Rom. 2:4) Er se lu mbacivir un yô, doo u shighe u se lu pasen ior loho u dedoo yô se pase ve sha gbenda u u kom Aôndo u mhôôn yô. (2 Kor. 5:20, 21; 6:3-6) Kpa saa se lu a mnenge u vough sha ior mba hen haregh wase ve se fatyô u eren kwagh ne ye. Nahan kanyi ia wase se u eren kwagh nee?
15. (a) Yesu kaa a mbaapostoli nav ér ve er nyi shighe u ior vea venda u ungwan loho ve laa? (b) Kanyi ia wase se se hemba veren ishima u keren ior mba injaava?
15 Yesu yange kaa a mbadondon un ér aluer ior vea venda u ungwan loho u ve lu pasen la kpa ve hemba veren ishima u keren ior mba injaav. (Ôr Mateu 10:11-15.) Aluer se tsua akaa a se fatyô u eren yô se kôr cio u eren kwagh ne. Anmgbian ugen tôô iyol na kar sha or u keren akaa a injaa shin inya. Ka a shi kaan ér: “M ver ishima u zuan a zenaria nyian.” Anmgbian ugen di ver ishima u “zuan a or u a saa nan u henen Bibilo sha kwa u hiihii u un pase nan kwagh la ken hanma sati shi hiden za sôron nan fese sha er una maa isharen i nan la yô.” Mbapasenkwagh mbagenev ka ve nôngo u ôron orya ivur Bibilo shighe u ve zough a nan la. Nahan we u tsua u eren nyi ken tom wou u pasen kwagh nee?
16. Ka atôakyaa a nyi se lu a mi a pasen ior kwagh a uwer gban shio?
16 Ka m-ongo u ior mba hen ajiir a ase ve ongo loho u dedoo la tseegh a tesen ér kwaghpasen u sha uya uya la ngu zan hemen ga. Sha mimi yô, tom wase u pasen kwagh ne ngu wasen mbaasemaamimi u zuan a myom tseegh ga, ngu kuren akaa a injaa agen kpaa. Tom u pasen kwagh u Mbakristu ne ngu ne se ian i tesen ser Yehova doo se ishima. (1 Yoh. 5:3) Shi ngu wasen se u kera lun a ibo sha awambe a ior ga. (Aer. 20:26, 27) Shi ngu te mbafanaôndoga icin ér “shighe [u Aôndo] u ôron ijir kuma ve.” (Mpa. 14:6, 7) U hemban cii yô, se mba wuese iti i Yehova tar sha won cii sha loho u dedoo u se pasen ne. (Ps. 113:3) Sha nahan yô, aluer ior ver ato a loho wase shin vea ver ga kpa, se za nen hemen u pasen loho u dedoo u Tartor ne. Sha kpôô yô, iniôngon yase i pasen ior loho u dedoo ne doo Yehova kpen kpen.—Rom. 10:13-15.
17. Ica a gba ga tsô ior cii vea fa nyi?
17 Ior kpishi nyian kwagh gba ve sha tom wase u pasen kwagh ne ga, kpa ica a gba ga tsô vea nenge er u lu a inja yô. (Mat. 24:37-39) Yehova yange taver Esekiel ishima ér shighe u ajiraôron a á lu pasen la aa kure sha mi vough yô, ya u Iserael u hendankwagh la una “fa er yan profeti lu ve her atô je yô.” (Esek. 2:5) Kape nyian kpa shighe u Aôndo una ôr tar ne ijir la ior vea mase kaven ér loho u Mbashiada mba Yehova ve pasen ken igbar man sha uya uya la ka hen Yehova Aôndo u mimi tswen u dugh ye, shi vea fa er Mbashiada mba Yehova ve til sha ityough nagh yô. Sha mimi yô, myer u i yer se sha iti na shi se pasen loho na ken ayange a masejime ne ka kwagh u civirigh kpen kpen. Man sha tahav nav yô, se za nen hemen u hemban mbamtaver mba ve lu sha u pasen kwagh sha uya uya la.
Ú Na Mlumun Wer Nyi?
• Se er nan ve se lu a vangertiôr se pase loho u dedoo?
• Se er nan ve se hii Bibilo i henen a ior shighe u se dugh kwaghpasen u sha uya uya laa?
• Se tese ser kwagh u ior gba se ishima sha mimi nena?
• Kanyi ia wase se u nengen ior mba hen haregh wase sha gbenda u voughloo?
[Study Questions]
[Box/Picture on page 9]
Gbenda Môm u Hiin Iliam a Ior ken Bibilo
Er ú hii iliam a or yô:
◼ Ú sughun orya yô, ú fatyô u nan nan trak maa kaan a nan wer, “M va heen nyian mer me va ôrou kwagh u doon sha itinekwagh ne.”
◼ Shin ú naan nan trak yô maa kaa wer, “M soo u fan mnenge wou sha itinekwagh ne, ka nahan ve m ve heen nyian ye.”
Aluer orya nan ngohol trak yô:
◼ De kera timbir kpishi ga maa pine orya la mnenge u nan sha kwagh u itinekwagh i trak la a lu ôron la.
◼ Kegh ato zulee sha er u ungwa mnenge u orya la sha itinekwagh la yô. Sugh nan kigh kigh sha kwaghôron u nan la shi ter kwaghôron u nan la shighe u u lu lamen la kpaa.
Er ú za hemen a iliam shon yô:
◼ Ôr shi lam sha ivur Bibilo i môm shin ahar, kpa lamen sha akaa a a gbe a bende a or shon yô.
◼ Aluer or tese isharen i henen Bibilo yô, na nan takerada shi tese nan er ka se yar tom a ú sha u henen Bibilo a ior yô. Sôr ian ver sha er ú hide ú va hen Bibilo a nan yô.