Lu a Mnenge u Vough, Tsô a Saan We Iyol

“SHI m er kwagh u sha mi ga ve!” Ka kwa me u fetyô u eren kwagh u ú we ishima u eren la ga ve ú er kwagh nahana? Alaghga kwase Kristu u nan lu ngô yô nana ôr kwagh nahan, sha ci u er nan lu veren ishima sha anikyundan u nan la yô, nan kera ngu zuan a ian i veren ishima sha akaa a ken jijingi ga. Alaghga Orkristu ugen nana hen ér nana fatyô u eren kwagh u doon ken tiônnongo sha won ga, sha ci u shighe u nan lu iyev la nan eren kwagh môm sha ishima i mbamaren mba nan sha won ga. Alaghga ishima ia vihi anmgbian u beenyol ugen sha ci u nan kera fetyô u eren ityom i Mbakristu i yange nan eren shighe u nan lu gbong gbong la ga yô. Kwase Kristu ugen, iti na ér Christiane, u mlu u tsombor na yange un u eren Yehova tom er soo u eren la yô kaa ér: “Ka a naan kwaghôron u taver ior ishima ér ve er tom u pania yô mliam ma haam ashe.”

Shighe u i lu se ken ishima nahan yô se er nena? Kanyi i wase Mbakristu mbagenev u nengen mbamlu vev sha gbenda u voughloo? Aluer se mba nengen mbamlu asev sha gbenda u vough yô, ka mbamtsera mba nyi se zua a mini?

Lu a Mnenge u Vough

Apostoli Paulu tese se kwagh u una wase se ve se za hemen u ember yô, a kaa ér: ‘Ember nen ken Ter gbem, shi me kaa mer, ember nen. Ior cii ve̱ fa mnenge u vough wen la doo doo. Ter zulum ve.’ (Fil. 4:4, 5, NW ) Aluer se soo ser i saan se iyol shi se zua a mkom ken mcivir u se civir Aôndo la yô, gba u se lu a mnenge u vough sha mfe wase man mbamlu asev. Aluer se mba nôngon ser se er akaa a ganden se yô se mba keren ishimanyian i gbilinigh. Kpa doo u se kôr ave sha mbamlu asev nahan se de u eren tom u pasen kwagh la kpoghuloo ga.

Mbamlu asev vea lu nan nan kpa Yehova soo ér se civir un a ishima i môm. (Kol. 3:23, 24) Aluer se mba civir Yehova a ishima i môm ga yô se mba kera eren sha iyoltseghan yase la ga. (Rom. 12:1) Kwagh ugen yô, se kera zua a mkom man iember kua averen agen a a lu sha u civir Yehova a ishima i môm la ga.—Anz. 10:22.

Ishember i i gem ken Biblo ér “mnenge u vough” la kua u wan mbagenev ikyo. Inja i i̱ kpôô kpôô ér u norom ikyaa ga. (Yak. 3:17) Shi ishember shon tese u keren ngegh ngegh ga kpaa. Nahan aluer se mba a mnenge u vough yô kwagh ne una wase se se nengen mbamlu asev sha gbenda u vough. Kwagh ne tavera? Mbagenev yô kwagh ne una taver ve shin er alaghga kwagh u mbagenev una gba ve ishima nahan kpaa. U tesen ikyav yô aluer se nenge ma huror wase u ishima ishima vôr sha ci u nan ngu eren akaa a ganden nan yô se nenge ser doo u se wase nana pande akaa a nan we ave kpishi la ga he?—Anz. 11:17.

 Aluer se vese sha ikyev i mbamaren mba kwagh a kom ve ga la yô a taver se kpishi u lun a mnenge u vough sha mbamyen asev. Mbagenev di shighe u ve lu iyev la ve nenge ér gba u vea er tom kpoghuloo cii ve vea doo mbamaren vev ishima ye. Aluer kape se kpa kwagh wase lu ne yô alaghga se nenge ser Yehova wan se ikyo ga. Doo Yehova tsung er se civir un a ishima i môm yô. Mkaanem ma Aôndo taver se ishima ér Yehova fa “er se lu vuulevu yô.” (Ps. 103:14) A fa mbamyen asev shi se doo un ishima, hemban cii yô ka sea civir un sha gbashima shin er se yen nahan kpaa. Aluer se umbur ser Aôndo u se civir la kighir se ga yô, se kera ker u eren kwagh u ganden se agee ken inya ga, kpa se eren un tom er tahav mbu ne se ishô la.—Mika 6:8.

Nahan kpa ka i taver ior kpishi u lun a mnenge u vough. Aluer we kpa ka taver we u lun a mnenge u vough yô, hii nan u ker iwasen hen Orkristu u nan lu a mfe kpishi, u nan fe u tsembelee la ga? (Anz. 27:9) U tesen ikyav yô, ú soo u eren tom u pania u kekee? Aluer ka awashima wou ne yô, u tsua kwagh u injaa. Kpa ka taver we u eren kwagh u a sar u nee? Alaghga tsô gba u a wase sha er u pande akaa a u eren la yô. Shin ijende you i ken Kristu la nana fatyô u lamen a we sha er u nenge aluer kape ityom i ú lu a mi hen tsombor kpishi ia na u ian i eren tom u pania u keke shin kape ia na u ian ga kpa u fa yô. Nana wase u sha er u nenge aluer kape u fatyô u eren tom u pania shin gba pe u pande akaa a ú eren la cii ve u fatyô u eren tom u pania kpa u fa. Nom kpa nana fatyô u wasen kwase u nan sha er nana kôr cio u eren kwagh sha tahav mbu nan yô. U tesen ikyav yô, nana fatyô u kaan a kwase u nan ér nana mem sha er nana fatyô u seer shiren tom ken uwer u ua kôr la yô. Aluer nan mem yô, nana lu a gbong gbong iyol her u nana fatyô u eren tom u pasen kwagh ken uwer shon yô, nahan a saan nan iyol.

Ker Akaa a U Fatyô u Eren la Tseegh

Alaghga iyolbeen man angev mbua yange se u eren Yehova tom er se soo la. Aluer u ngu ormaren yô, alaghga u hen wer u fetyô u henen kwagh sha tseeneke wou tsembelee ga shin u fetyô u keghen ato ken mbamkombo mba Mbakristu tsembelee ga sha ci u ka u nengen sha mbayev yô. Kpa, aluer u ngu hemban veren ishima sha myen wou la yô, adooga tsô u kera ver ishima sha kwagh u ú fatyô u eren la ga shinii?

Yange sar Orlevi ugen u eren kwagh u una tsa kpa una fatyô u eren ga yô. Yange er kwagh ne anyom kar hegen udubu imôngo. Hanma inyom yô Orlevi ne lu a ian i eren tom ken tempel usati uhar. Nahan kpa, sar un tsung u lun ken tempel gbem sha won, man lu kwagh u una fatyô u zuan a mi ga yô. (Ps. 84:1-3) Lu nyi i wase orjighjigh ne ve zua a mkomo? Yange mase kaven er sev môm sha ityembe i tempel tseegh kpa i lu zege icivir yô. (Ps. 84:4, 5, 10) Nahan doo u se kpa se ver ishima sha  kwagh u se fatyô u eren la shi se lu a iwuese sha mi kpaa, se kera ver ishima sha mbamyen asev ga.

Nenge ase ikyav i anmgbian u kwase ugen ken tar u Kanada u i yer un ér Nerlande la. Kera fetyô u zenden sha iyol na ga saa sha ikyekye i mbakpenalegh, nahan a hen ér una kera fatyô u pasen kwagh er un soo la ga. Kpa yange gema mnenge na, nahan a za tema hen ijiir teen akaa sha er una pasen ior mba yamen akaa kwagh yô. A kaa ér: “Ka m tema shin ikyekye yam hen ape i ver benci u teman hen iijiir i teen akaa la. Ka mea pasen ior mba ve va tem sha benci la sha u memen mbara kwagh nahan i saan mo iyol kpen kpen.” Er Nerlande a lu eren tom u pasen kwagh sha gbenda u injaa ne yô, a zua a mkom kpishi shi saan un iyol kpaa.

Sôr Akaa ken Uma Wou Er i Doo La

Alaghga tso una lu yemen ken mnger sha ayem, ahumbe kpa aa lu tan sha ikyondo i tsoo. Kpa shighe u or tsoo la una za tagher a ijeverahumbe yô, a gba pe una oghom ikyondo i tsoo. Or tsoo la ngu a tahav sha ijeverahumbe la ga, kpa er a oghom ikyondo i tsoo yô, una fatyô u yemen ken mnger shin tso na her. Kape se kpa se lu a tahav sha akaa a tseren a lun er ijeverahumbe nahan, a se tagher a mi ken uma la ga je la. Kpa se fatyô u sôron uma wase er se fetyô la sha u geman mnenge shin mhen wase. Aluer se umbur mlu wase u he la yô, kwagh la una wase se se za hemen u zuan a mkom man iember ken tom u se eren sha ci u Aôndo la.—Anz. 11:2.

Nenge ase ikyav ne. Aluer tahav yina se iyol yô, a hemba doon u se palegh u eren akaa a aa na se vôr kpishi la atetan, sha er se fatyô u zan mkombo u Mbakristu aikighe yô. Kwagh ne una wase se u zuan a mtsera sha u kohol vea Mbakristu mbagenev imôngo. Shin aluer ngô u wan u nan a lu dedoo ga, nahan i lu u nana fatyô u duen kwaghpasen u sha uya uya ga yô, nana fatyô u lôhôn ma anmgbian u kwase ér nana za kohol nan hen ya u nan sha er vea pase kwagh sha telefon er wan u nan a lu yaven la.

Aluer mlu wou la na u ian i wan iyol sha hanma kwagh u a lu henen ken mkombo u tiônnongo cii man u za ga di ye? U fatyô u wan iyol sha mbamkombo er u fetyô la cii. Aluer se sôr akaa a se eren la se ver vough vough yô, se zua a shighe u eren akaa a se we ishima la nahan lun saan saan.

 Kpa a gba u se kange ishima shi se nôngo kwagh tsung ve se fatyô u sôron akaa a se soo u eren la ye. Yange gba u orgen ken tar u France, mba yer un ér Serge vea kwase na Agnès vea gema mbaawashima vev. Serge kaa ér: “Shighe u se va masen fan ser kwase wam Agnès ngu iyav yô, awashima wase u eren tom mishen la cii saa ishe.” Serge pase er un vea kwase na ve ver ishima u eren kwagh ugen hegen er un hingir ter u ônov mba kasev uhar mba lun saan saan yô. Á kaa ér: “Er se kera lu sha ian i eren tom u mishen ken tar ugen ga yô, se tsua u eren ‘tom u mbamishen’ ken tar wase. Se mba eren tom vea annongo u lamen zwa ugen.” Ve zua a mtsera sha u kuren awashima ve u he ne kpa? Serge kaa ér: “Se kav ser se mba tiônnongo a inja kpishi.”

Odile ka kwase Kristu u ken tar u France, a hemba anyom 70, shi ngu a angev mbu sha akuhe mbu i yer ér osteoarthritis mbula, nahan fetyô u tilen sha gbem ga. Ishima yange i yina un sha ci u nenge wener angev nav yange un u pasen kwagh sha uya uya yum. Nahan kpa a gba uwer u pasen kwagh ga. Tsô a gema gbenda u a pasen kwagh la nahan a hingir u pasen kwagh sha telefon. A kaa ér: “Kwaghpasen u sha telefon taver ga shi a doo kpaa.” Gbenda u pasen kwagh ne na yô ishima hide taver un u pasen kwagh sha gbashima.

Zua a Averen sha u Eren Kwagh u A Kom sha Tahav Ou Yô

Aluer se mba a mnenge u vough sha kwagh u se fatyô u eren yô, se kera ure ga. Aluer se tsua akaa a se er la akuma akuma yô, er se fatyô u eren hanma kwagh cii ga nahan kpa, se zua a mkom. Ka sea er nahan yô i saan se iyol, shin er kwagh u ka se fatyô u eren la a vese ga nahan kpaa.—Gal. 6:4.

Se hemba wan Mbakristu mbagenev ikyo aluer se mba a mnenge u vough sha kwagh u se fatyô u eren la yô. Shi se lu a iwuese sha kwagh u ve ker cio u eren sha ci wase la kpaa, sha ci u se fe mbamyen vev yô. Ka sea tesen iwuese sha iwasen i se zough a mi la yô, se tese ser se mba ken mzough shi se fa mlu u anmgbianev asev kpaa. (1 Pet. 3:8) Umbur wer, Yehova u a lu Ter wase u sha la keren kwagh u ngeen ganden hen a vese ga. Shi ka sea lu a mnenge u vough shi sea tsua akaa a se er akuma akuma yô, se hemba zuan a mkom man iember ken mcivir wase.

[Blurb on page 29]

Gba u se lu a mnenge u vough sha kwagh u se fatyô u eren er tahav asev mbu kom la ve se zua a iember man mkom ken mcivir u se civir Aôndo la ye

[Picture on page 30]

Nerlande zua a iember ken kwagh u a fetyô u eren ken tom u pasen kwagh la

[Picture on page 31]

Hen fa u “oghom ikyondo i tsoo”

[Credit Line]

© Wave Royalty Free/age fotostock

[Picture on page 32]

Serge vea Agnès zua a mkom sha u tsuan kwagh ugen u vea er yô