U Ôron Washika u Mbakorinte Asav-asav
Mkaanem ma Yehova Ma Uma Je
U Ôron Washika u Mbakorinte Asav-asav
MLU u ken jijingi u tiônnongo u ken Korinte yange gba apostoli Paulu ishima kpen kpen. Yange ungwa ér anyiman nga hen atô u anmgbianev mba ken Korinte. Ve de mba eren ijimba kpa mba ken tiônnongo ne her. Shi tiônnongo ne nger Paulu kpa sha u fan mnenge na sha akaa agenegh. Sha nahan yô shighe u Paulu mough zende na u mishen u sha utar za ken Efese ken inyom i 55 la a nger uwashika uhar hen Mbakorinte.
A shi nan kpa, washika na u sha uhar u yange nger shighe u bee u hiihii ica lu a gba ga la lu di u zan hemen a u hiihii la tsô. Er mlu u ken tiônnongo u ken Korinte la man mlu u ijiir la i zough sha ashighe ase ne yô, se kpa washika u Paulu yange nger Mbakorinte la una lu se a iwasen kpen kpen.—Heb. 4:12.
‘KURAN NEN, TILE NEN DÔNG, TAVER NEN IYOL’
Paulu wa kwagh ér: “Ne cii, lu nen zwa môm” (1 Kor. 1:10) Ma ‘imagh ki genegh kposo ki’ Mbakristu vea maa aeren a Orkristu sha mi yô ki ga, ‘saa Yesu Kristu.’ (1 Kor. 3:11-13) Paulu ôr sha kwagh u or u eren idya u ken tiônnongo la ér: “Dugh nen iferor la ken a ven kera.” (1 Kor. 5:13) A kaa ér: “Kpa iyol yô, ngi sha ci u idya ga, kpa ngi sha ci u Ter.”—1 Kor. 6:13.
“Sha kwagh u akaa a [ve] nger la yô,” Paulu wa ve kwagh sha kwagh u ivesegh man kwav. (1 Kor. 7:1) Paulu yange er kwagh u hemen u ken Kristu man kwagh u u eren akaa cii tsembelee, sha inja sha inja ken mbamkombo mba Mbakristu, shi er wener mnder u shin mbakpenev ka kwagh u bunden mayange ga been cii yô, a mase wan ve kwagh ér: “Kuran nen, tile nen dông sha jighjigh u nan. Lu nen nomsombaiorov, taver nen iyol.”—1 Kor. 16:13.
Mbamlumun sha Mbampin mba sha Akaa a ken Ruamabera:
1:21—Sha mimi yô Yehova ngu yiman mba ve ne jighjigh mbara sha “ibumegh ki kwaghôron” naa? Ei, ka nahan ga. Nahan kpa, er “tar u kera fe Aôndo” ga sha ci u kwaghfan u ú la yô, gbenda u Yehova a lu yiman ior a mi la ka ibumegh hen ior i tar ne.—Yoh. 17:25.
5:5—Inja i kwagh u i kaa ér i “na [iferor] sha ikyev i Satan sha u á vihi iyol i nan kera, kpa jijingi u nan yô, a̱ war” la ér nyi? Shighe u ka a dugh orsholibo u nan vende u geman ishima la ken tiônnongo kera yô, nan hide shi nan hingir sha ikyev i tar u Satan. (1 Yohane 5:19) Ka nahan ve a fatyô u ôron kwagh u nan ér i na nan sha ikyev i Satan ye. Ka a dugh orisholibo ken tiônnongo kera yô, i vihi aeren a nan a bo la hen tiônnongo kera, nahan i kura tiônnongo a kera lu a acôghor iyol ga shi jijingi u Aôndo shin tahav nav kpa mbu lu hen tiônnongo la heregh.—2 Tim. 4:22.
7:33, 34—Inja i kwagh u i kaa ér ishima ka i nyian or u nan lu a kwase shin kwase u nan lu a nom sha “akaa a taregh” la ér nyi? Paulu yange lu ôron kwagh u akaa a uma ne a i gbe u kwagh a gba Mbakristu mba ve vese ayol a ve sha mi la. Akaa ne wa kwaghyan man akondo man ya ker, kpa akaa a bo a tar ne a i gbe u Mbakristu vea palegh la yô i wa á ker ga.—1 Yoh. 2:15-17.
11:26—Ka “hanma shighe” nahan i gbe u a umbur ku u Yesu, man a eren kwagh ne “zan zan” hanma shighe? Paulu yange lu kaan heen ér i umbur ku u Kristu acin imôngo ga. Kpa yange yar tom a ishember i ken zwa Grika i inja i i̱ i lu “zum u” shin “sha hanma shighe u” la. Sha nahan yô, Paulu lu kaan ér hanma shighe u Mbakristu mba i shigh ve mkurem mbara ve kohol imôngo sha u yan bredi shi man wain u a lu ikyav la kwa môm ken inyom, sha iyange i Nisan 14 yô, “ka ku u Ter je [ve] lu yôôn u ye.” Man vea za hemen u eren kwagh ne “zan zan Una kar van,” inja na yô zan zan una kar feese ve sha kwavaôndo sha u nderen ve shin ku.—1 Tes. 4:14-17.
13:13—Dooshima hemba jighjigh u nan man ishimaverenkeghen sha nyi gbenda? Shighe u ‘kwagh u se lu a ishimaverenkeghen sha mi’ a “akpelan a tan ga” la ka una kure sha mi vough yô, jighjigh u nan man ishimaverenkeghen cii ve kure. (Heb. 11:1) Dooshima hemba jighjigh u nan man ishimaverenkeghen sha ci u un yô been mayange ga.
15:29, NW—Inja i u “eren batisema sha u hingir mbakpenev la” ér nyi? Paulu yange lu kaan heen ér i er mbaumav batisema sha ci u mba i er ve batisema ga tsô ve kpe la ga. Kpa yange lu ôron ér i er Mbakristu mba i shigh ve mkurem mbara batisema sha mnyer u ve nyer ken inja uma i vea civir Aôndo sha mimi zan zan vea kar kpen shi a va nder ve shin ku a na ve uma u ken jijingi sha la.
Ityesen hen Avese:
1:26-31; 3:3-9; 4:7. Ka sea hide a ayol a ase ijime sea taan ihyagh ken Yehova, a lu ken ayol a ase ga yô, se wase u van a mzough ken tiônnongo.
2:3-5. Shighe u Paulu lu pasen kwagh ken gar u Korinte u lu ijiirtamen i kwaghhenen man kwaghfan u Mbagrika la, a shi nan kpa hen wener a taver un u hanger kwaghôron a mba ve lu ungwan a na la. Kpa yange de ér ma myen shin mciem ma lu a mi la ma yange un u eren tom u Aôndo na un la ga. Kape se kpa i doo u se de ser ma mtaver a yange se u pasen loho u dedoo u Tartor u Aôndo ga je la. Kpa se fatyô u lun a vangertiôr ser Yehova una wase se vough er Paulu nahan.
2:16. Aluer se mba a “mhen u Kristu” yô se fa gbenda u yange henen kwagh ken ishima na la, nahan se henen kwagh ken ishima vough er un nahan, shi se fa aeren a na tsembelee shi se dondon ikyav na la kpaa. (1 Pet. 2:21; 4:1) Sha nahan yô, doo u se hen sha kwagh u uma u Yesu man tom na u pasen kwagh la tsembelee se fa.
3:10-15; 4:17. Doo u se gbidye kwar sha gbenda u se eren tom u tesen ior shi geman ve ve hingir mbahenen la. (Mat. 28:19, 20) Aluer se tese ior kwagh tsembelee ga yô, vea fatyô u tilen dông shighe u i kar jighjigh u nan ve ga. Nahan kwagh la una nyoon kpishi je yô a lu inja er myom wase la “ka u sha usu nahan.”
6:18. U̱ “yevese idya” la wa u palegh aeren a por·neiʹa tseegh ga, a wa u palegh u nengen ufoto mba ijimbagh kpa ker kua ieren i hôngorough man u henen akaa a dang man u hian a nomso man kasev dang dang la.—Mat. 5:28; Yak. 3:17.
7:29. Doo u mba ve vese ayol a ve la vea wa ikyo sha er vea ver akaa a gban ve la ken hemen u akaa a Tartor ga yô.
10:8-11. Shighe u Mbaiserael vever Mose man Aron la, ishima vihi Yehova a ve kpishi. Aluer se lumun ser ahon a gban a hingir ikye yase ga yô, se mba eren kwagh sha kwaghfan.
16:2. Aluer se vande wan iyol tsembelee yô, se za hemen u suen tom u Tartor sha inyar, man se eren kwagh ne hanma shighe kpaa.
‘ZA NEN HEMEN U SÔRON MBAMLU ENEV’
Paulu yange kaa a Mbakorinte ér, orsholibo u i tsaha nan ve nan gem ishima la ve ‘de nan kwaghbo la shi ve sur nan ishima kpaa.’ Er washika u hii ngeren ve la na ve ishima i vihin nahan kpa, Paulu ember sha ci u ‘ishima i vihi ve, ve gem ishima yô.’—2 Kor. 2:6, 7; 7:8, 9.
Er Mbakristu mba ken Korinte ve “nôngo tsembelee sha hanma kwagh” yô, Paulu taver ve ishima ér ve ‘nôngo tsembelee sha tom u dooshima kpaa.’ Ne mbaahendanev mlumun been cii yô, a wa se cii kwagh ér: “Ember nen, sôr nen mbamlu enev, ungwa nen kwaghwan, lu nen ishima i môm, lu nen bem bem.”—2 Kor. 8:7; 13:11.
Mbamlumun sha Mbampin mba sha Akaa a ken Ruamabera:
2:15, 16—Se “mba ihuma i doon i Kristu” sha nyi gbenda? Se mba ihuma i doon i Kristu sha ci u se mba dondon kwaghwan u Bibilo shi se mba pasen loho u ker la kpaa. Er alaghga ihuma la ia lu mbaaferev kwagh u ndôhôrshima nahan kpa, Yehova man mbaasemaamimi yô ngi ve ihuma i doon.
5:16—Mbakristu mba i shigh ve mkurem mbara “kera fa ma or sha inja i iyolough ga” nena? Ka sha ci u mba nengen a ior sha mlu u ashee ga, inja na yô mba sangen a sange ior sha ci u mba a inyaregh shin sha ci u kwavyolough ve shin tar u ve dugh her la ga. Kwagh u a hembe gban ve kwagh yô ka mlu ve vea mbananjighjigh a ve imôngo ken Kristu la.
11:1, 16; 12:11—Paulu yange hingir Mbakorinte ibumeor shinii? Ei, yange lu ibumeor ga. Alaghga yange mbagenev vea nenge ér ngu or u tan ihyagh shi keren ngegh ngegh sha ci u akaa a yange ôr sha u suen tom na u apostoli la.
12:1-4—Ka an yange i ‘feese nan i yem a nan ken Paradiso’? Er Bibilo i kaa ér orgen yange nan nenge mpase u sha mnenge ne ga shi avur a a dondo ne kpa a pase er Paulu tese wang ér un ngu apostoli yô, se fatyô u kaan ser lu kwagh na iyol na lu ôron ye. A shi nan kpa mpase u sha mnenge u Paulu nenge a mi ne lu paradiso u ken jijingi u tiônnongo u Kristu a lu ker ken “shighe u mkur” ne.—Dan. 12:4.
Ityesen hen Avese:
3:5. Ivur ne kaa ér Yehova ka a na se kuma u lun mba pasen kwagh sha iwasen i Mkaanem nam man icighan jijingi na man nongo na u u lu shin tar la. (Yoh. 16:7; 2 Tim. 3:16, 17) Nahan doo u se henen Bibilo kua ityakerada i i er akaa a ken Bibilo la kpoghuloo shi se eren msen kpa kpoghuloo shi se zaan mbamkombo mba Mbakristu nduuruu shi se waan zwa sha akaaôron a ker la kpaa.—Ps. 1:1-3; Luka 11:10-13; Heb. 10:24, 25.
4:16. Er Yehova a gem “or wase u kimi ne” a hingir hegh “ayange ayange” yô, doo u se ngohol akaa a Yehova a ne se ne nahan se lumun ser iyange i môm tsô i kar se a u timen sha akaa a ken jijingi shio ga.
4:17, 18. Se fatyô u civir Yehova sha mimi shighe u se tagher a mtaver je kpaa, aluer se umbur ser mtaver la ka “ancan u peesa u sha anshighe kpeghee” yô.
5:1-5. Paulu ôr kwagh u ishimaveren i yemen sha i Mbakristu mba i shigh ve mkurem la doo kpen kpen.
10:13. Doo u se pasen kwagh hen haregh u tiônnongo wase tseegh, saa a kaa a vese ér se za pase kwagh ape kwagh a hembe gban sha mbapasen kwagh la ve se za ye.
13:5. Aluer se soo u ‘karen ayol ase’ fan sea “lu ken jighjigh u nan yô,” gba u se karen aeren ase sha kwagh u se hen ken Bibilo la. Aluer se soo u ‘timen ken ayol a ase yô,’ doo u se gbidye kwar sha ikyaryan yase vea Aôndo. Man kwagh ne wa mvie u “mkav u ken ishima” yase la man er se eren ityom i tesen jighjigh u nan la kpa ker. (Heb. 5:14; Yak. 1:22-25) Aluer se dondo kwaghwan u injaa u Paulu ne yô, se za hemen u zenden sha gbenda u mimi.
[Picture on pages 26, 27]
Inja i kwaghôron u i kaa ér “hanma shighe u nea yaan bredi ne man shi nea maan iyongo ne yô” la ér nyi? —1 Kor. 11:26.