Mba Been Makeranta U Bibilo U Watchtower U Gileadi U Sha Kwa 124

Mbaeren Tom U Mishen Mba Er Ikyomon Nahan

MBA eren iniongo i been Makeranta u Bibilo u Watchtower u Gileadi la ken atô u hanma iwer ataratar, man hanma kwa yô ka i lôhô tsombor u Betel u ken Amerika cii. Sha iyange i Maaci 8, 2008 la, mbavannya mba ve due ken ityar kposo kposo je hemba 30 nahan yô, va kohol imôngo vea tsombor u Betel sha u eren iniongo i been Makeranta u Gileadi u sha kwa 124 la. Iorov 6,411 mba ve va iniongo ne yange ve ember vea mbayevmakeranta mbara sha iyange i injaa ne.

Stephen Lett u a lu môm ken Mbahemenev mba Shin Tine la lu orkyôn u iniongo ne, man yange hii iniongo ne sha kwaghôron u a lu a itinekwagh ér, “Yemen Hemen vea Ikyomon ki Yehova ki sha Injakwagh La.” Mpase 9:1-4 kar asande a Mbakristu mba i shigh ve mkurem, mba yange ve hide ve hii u pasen kwagh kpoghuloo ken inyom i 1919 mbara sha ikyum i ikyomon ki ki hii u yan akaa yô. Yange umbur mba been makeranta mbara ér, er ve lu ken “iyôngo igen” nahan kpa, ve kohol imôngo vea ikyum i ikyomon i sha injakwagh ne.—Yoh. 10:16.

Lon Schilling u a lu môm ken Kômatii u Nengen sha Branci u tar u Amerika la maa na kwaghôron u dondon sha u hiihii la, itinekwagh i kwaghôron na la ér “Suen Nen Ayol a En.” Kwaghôron ne har sha ikyav i ken Bibilo i dedoo i Akula man kwase na Priseka, mba ve lu Mbakristu sha derianyom u hiihii la. (Rom. 16:3, 4) Mba been makeranta u Gileadi mban lu noov 28 man kasev vev 28. Yange i umbur ve ér gba u vea seer taver ivese ve ve vea fatyô u zan ikyura ken tom ve u mishen la ye. Hanma kwa u Bibilo ka ia ôron kwagh u Akula yô, i ter kwase na Priseka kpaa. Sha nahan yô, apostoli Paulu man tiônnongo cii nengen ve ér ka kwase man nom. Kape mbamishen mba ve vese ayol a ve nyian kpa i doo u vea eren tom imôngo shi vea civir Aôndo imôngo shi vea nôngon a mbamtaver mba ken ityar i ve lu eren tom mishen ker la imôngo, nahan vea suen ayol a ve je la.—Gen. 2:18.

Guy Pierce u a lu môm ken Mbahemenev mba Shin Tine la na kwaghôron u dondon, sha itinekwagh ér, “Erdoo u Yehova a Mgbegha Ú u Eren a Mbagenev Dedoo.” Anmgbian Pierce pase ér u eren erdoo ka u palegh u eren kwagh u bo tseegh ga. Or u dedoo ka nan eren a mbagenev dedoo. Mdoom ma Yehova Aôndo hemba cii. (Sek. 9:16, 17) Erdoo man dooshima u Aôndo una fatyô u mbgeghan se u eren akaa a doon sha ci u mbagenev. Anmgbian Pierce mase wuese mba been makeranta mbara sha mkaanem man, ér: “Ne mba vanden eren a mbagenev doo doo, man se mba a vangertiôr ser erdoo u Aôndo la una za hemen u mgbeghan ne u eren a mbagenev dedoo ken hanma tom u Yehova Aôndo una va na ne ken hemen cii.”

Michael Burnett, u er tom u mishen kpa hegen a lu môm ken mba tesen ken makeranta u Gileadi la na kwaghôron sha itinekwagh ér, “A Hingir Ne Kwagh u Zeren sha Icur Senen hen Kungwa.” Yange gba u Mbaiserael vea umbur ivande i Yehova er sha u duen a ve ken Igipiti la vough er ka kwagh u “zeren sha icur senen hen kungwa” nahan. (Eks. 13:16) Yange i taver mba been makeranta mbara asema ér ityesen i ve ngohol ken Makeranta u Gileadi  la i lu ve er kwagh u zeren sha icur senen hen kungwa nahan. Anmgbian Burnett pase ve er i lu a inja u hiden a ayol a ve ijime shi lun uma akuma akuma la kwa kimbir kimbir, shi kaa ér aluer zayol va due hen atô u ve mbamishen man mbagenev yô, ve yar tom a akaawan a Bibilo sha u sôron zayol shon.—Mat. 5:23, 24.

Mark Noumair u a tesen ken makeranta u Gileadi la na kwaghôron sha itinekwagh i i kaa ér “A Ôr Kwagh Wou Nena?” la. Sha ashighe a tsuaa la ikyurior ia hemba ityav yô, i wa atsam a mhembe. Icam i tesen mhembe ne igen yange i ôr kwagh u ikyurior i Ruben man Dan man Asher ér ka akuraior a soon u eren tom kpishi ga, kpa i gema i wuese ikyurior i Sebulon sha ci u i tangen iyol ga yô. (Mbaj. 5:16-18) Shighe ka una karen yô, anza a Mbakristu a hingir u duen ken igbar vough er ityogholough mbi icam kpa ka mbi due ken igbar nahan. Or ka nana tsee ishima sha tom u Aôndo shi nana dondon gbenda tesen u nongo u Yehova  sha mimi yô, nan lu eren ishima i Yehova shi nan hingir u veren anmgbianev mba nan mba ken Kristu ikyav i dedoo kpaa. Er mbagenev ken tiônnongo ve lu ungwan icam i sha ieren yase i sha injakwagh ne yô, ishima ia mgbegha ve u dondon ieren yase i dedoo la.

Dugh ityesen i Bibilo i mba been makeranta u Gileadi u sha Kwa 124 ve ngohol la kera yô, ve pase kwagh kohol cii kuma ahwa 3,000. Anmgbian Sam Roberson, u a eren tom vea Gbaatom u Nengen sha Imakeranta i Henen Kwagh u Hemen u Aôndo la na kwaghôron sha itinekwagh ne ér, “Dondo Hemen u Icighan Jijingi,” nahan pine mba been makeranta mbara ve ôr un uvande-eren mba ve zough a mi ken tom u pasen kwagh yô, shi ve hide ve tese akav a uvande-eren mba shonov mbagen. Mba ôron uvande-eren mban mba been yô, Patrick LaFranca u a lu môm ken Kômatii u Nengen sha Branci u Amerika la tôv mba ve vande been makeranta u Gileadi, ve lu eren tom mishen ken ityar kposo kposo la. Mba been makeranta mban wuese kwaghwan u injaa u anmgbianev mban wa ve la kpishi.

Anthony Morris u a lu môm ken Mbahemenev mba Shin Tine la na kwaghôron u masetyô sha itinekwagh ér, “Umbur, Akaa a i Nengen a Mi la Ka a Karen Kera.” I wa se kwagh ken Ruamabera ér, se de hemban veren ishima sha ican i se lu hilan yan hegen ne ga kpa se hemba veren ishima sha averen a Yehova a ken hemen la. (2 Kor. 4:16-18) Ibanave man m-ban u ijirôron i mimi man mkighir man angev man ku cii ka akaa a se nengen a mi nyian yô. Mbamishen kpa alaghga vea tagher a akaa a vihin ne. Kpa aluer ve umbur ér akaa ne aa va kar kera yô, kwagh la una wase ve u veren Yehova hiihii ken uuma vev.

Mba been makeranta mbara cii tema sha tsembe u nan kwaghôron la lu ungwan er anmgbian Lett lu ôron mkaanem ma masen kuren iniongo la yô. A wa ve kwagh ér ve de yen ishima ga, a kaa ér: “Aluer Yehova ngu suen se yô, sea tagher a ameen nan nan kpa, aa hemba se ga.” A taver mbamishen mba hev mbara asema ér ve lu er ka ikyomon nahan, ve za hemen u eren Yehova tom sha gbashima man sha mimi shi ve ungwan un gbem sha won.

[Box on page 30]

NGEREN U PASEN KWAGH U MBAYEVMAKERANTA

Ior va makeranta ken ityar: 7

I tindi ior ken ityar: 16

Iyenge i mba van makeranta cii ka: 56

Ve hemba anyom 33

Ve tsa ken mimi hemba anyom 18

Ve er tom u pasen kwagh hanma shighe hemba anyom 13

[Picture on page 31]

Mba Been Makeranta u Bibilo u Watchtower u Gileadi u sha Kwa 124

Ken ati a i nger shin heen ne, i nger namba sha hanma nongo sha adondo adondo, hii sha ishi yem a yem ken ijime, shi hanma nongo yô i nger ati a ior hii ken imese yem ken iyan.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Picture on page 32]

Ka ken Watchtower Educational Center Makeranta u Gileadi u lu ye