Tile Sha Mimi A Ishima I Môm
Tile Sha Mimi A Ishima I Môm
“Me zende ken mimi Wou; sôr ishima yam i̱ hingir i môm sha u cian iti You.”—PS. 86:11.
1, 2. (a) Pasalmi 86:2, 11 una wase se se civir Yehova sha mimi shighe u i lu karen jighjigh u nan wase la nena? (b) Ka hanma shighe nahan i doo u se hii u civir Yehova a ishima yase i mômô?
MBAKRISTU mba yange ve tile sha mimi shighe u i lu tôvon ve a ican shin i wuhe ve sha ci u jighjigh ve mbara va gba ken imeen i uyôughyôughmbaakaav sha ci u nyi? Mlumun u sha mpin ne har sha mlu u ishima yase, ka injaor i se lu jim jim je la. Pasalmi u sha 86 la zua u civir Aôndo sha mimi vea u lun ishima i môm, ka u civir Aôndo a ishima i môm je la. Orngeren pasalmi Davidi yange er msen ér: “Kura uma wam, gadia m ngu or u cian Aôndo je; We Aôndo wam, yima wanakiriki Wou u a suur sha a We yô.” Davidi shi er msen ér: “TERE, tesem gbenda Wou, sha u me zende ken mimi Wou; sôr ishima yam i̱ hingir i môm sha u cian iti You.”—Ps. 86:2, 11.
2 Aluer se suur sha Yehova a ishima yase cii ga yô, mbamgbe mbagen kua akaa a doon se ishima agen aa yange se u civir Aôndo u mimi a ishima i môm ga. Asaren a ase nga vough er ubom mba i yeren shin inya, i yer ér land mines, mba i we sha gbenda u se lu zan sha mi la nahan. Aluer sea civir Yehova sha mimi shighe u se lu yan ican je kpa, se fatyô u gban ken to shin uhôn mba Satan. Nahan yô, hemba doon u se civir Yehova a ishima yase i môm hegen, cii ve se mase tagher a ameen ye. Bibilo kaa ér: “Hemba kuran ishima you a akaa a u kor a cii.” (Anz. 4:23) Se fatyô u henen akaa a injaa sha kwagh u yange er profeti u ken Yuda, u Yehova tindi un hen Yerobiam, Tor u Iserael la.
“Me Na U Injar”
3. Yerobiam yange er nena shighe profeti u Aôndo ôr un loho u jirigh laa?
3 Nenge ase yô, or u Aôndo sember ôron Tor Yerobiam, u ver mcivir u wanbua ken tartor u ikwe pue u ken imbusutarimese la loho u kôron ken ishima tsung. Nahan ishima vihi tor a na kpishi. Tsô a kaa a ior nav ér ve kôr profeti ne. Kpa er Yehova lu a profeti na yô, uwegh ku tor naregh sha profeti ne sha ishimavihin la saa nelôô sha ivande, shi atse a nanden nagh sha mi la kpa pav. Fese nahan Yerobiam gema inja, gba zamber a or u Aôndo la ér: “Sôn ase TER, Aôndo wou, A̱ zungwem mhôônom, er msen sha ci wam er m̱ shi m̱ hide a uwegh agh her yô.” Profeti la er msen, nahan uwegh ku tor hide her.—1 Utor 13:1-6.
4. (a) Iyua i tor kaa ér una na profeti la lu imeen hen profeti la sha ci u nyi? (b) Profeti la di gema kaa ér nyi?
4 Yerobiam maa kaa a or u Aôndo u mimi la ér: “Sé yem hen ya wam imôngo, va ma mngerem, shi me na u injar kpaa.” (1 Utor 13:7) Tsô profeti ne una er nena? Er pase tor loho u jirigh nahan ma lumun erdoo na laa? (Ps. 119:113) Shin er lu inja er tor gema ishima nahan je kpa, profeti la yange ma venda u zan a na ityôô? Yerobiam yange lu zegeor, nahan lu a uiyua kpishi mba nan azende a na. Nahan aluer profeti u Aôndo ne una lu a isharen i inyar ken myer yô, lu imeen i vesen je tor lu meen un ye. Kpa Yehova vande wan profeti na kwagh ér: “De ye bredi ga, shi de me mngerem kpaa ga, mhir kpaa de hir sha gbenda u u ve min la ga.” Nahan profeti la gema kaa a tor ér: “Wea nam vegher ya wou je kpaa me za a we imôngo ga, kwaghyan kpaa me ya ga, mngerem kpaa me ma hen ijiir ne ga.” Profeti la maa due Betel gba yemen sha gbenda ugen. (1 Utor 13:8-10) Kwagh u profeti ne yange tsua u eren la tese se nyi sha kwagh u civir Yehova a ishima yase i môm laa?—Rom. 15:4.
Kwagh a ‘Kuman’ Se
5. Uyôughyôughmbaakaav mba karen mtil sha mimi wase nena?
5 Alaghga a lu inja er uyôughyôughmbaakaav vea fatyô u yangen se u civir Aôndo sha mimi ga nahan, kpa vea fatyô. Se na jighjigh ser Yehova una kure ityendezwa i a er a vese ér una kure mbamgbe asev la kpa? (Mat. 6:33; Heb. 13:5) Aluer se mba a akaa a nan se mkpeyol la ga, man se fatyô u zuan a a ga nahan se fatyô u wan ishima kpa? (Ôr Mbafilipi 4:11-13.) Ka saren se u undun ian i se lu a mi i seer eren tom u Aôndo la yemen za keren kwagh u se soo laa? Se mba veren ian i civir Yehova sha mimi la hiihii ken uma wase kpa? Mbamlumun mba se na sha mbampin mban har sha gbenda u se civir Aôndo la; sea civir un a ishima yase i môm shin a lu nahan ga kpaa. Apostoli Paulu nger ér: “U civir Aôndo man kwagh a kuman we yô, mtsera ngu sha mi vese. Gadia se nyôr ken tar ne a ma kwagh môm ga, u duen yemen a kwagh kpaa se fatyô ga. Kpa aluer sea lu a kwaghyan man akondo yô, i̱ kuma se.”—1 Tim. 6:6-8.
6. Ka “injar” i nyi alaghga a na se, kpa kanyi ia wase se se tsua kwagh u se eree?
6 Ikyav i tesen yô, alaghga or u nan tee se tom nana ver se sha iantom i vesen shi nana seer se inyaregh man mbamtsera mbagenev kpaa. Shin se nenge ser, doo u se za ker tom ken tar ugen shin hen ma veghertar ugen sha er se seer zuan a inyaregh yô. Alaghga sha hiihii la, a lu inja er ka Yehova je a lu veren se nahan. Kpa, hemba doon u se time sha awashima wase cii ve se mase tsuan kwagh u se er ga zee? Nahan doo u se pine ayol a ase ser, “Kwagh u m tsough u eren ne una bende a ikyaryan yam vea Yehova nena?”
7. Doo u se dugh isharen i lun a uyôughyôughmbaakaav la ken asema a ase kera sha ci u nyi?
7 Tar u Satan ngu hemban kenden a isharen i lun a uyôughyôughmbaakaav la sha cii. (Ôr 1 Yohane 2:15, 16.) Awashima u Diabolo yô, ka u hôngor asema a ase. Nahan yô, doo u se ver ishima sha er se dugh hanma isharen i soon uyôughyôughmbaakaav la ken asema a ase kera yô. (Mpa. 3:15-17) Yange taver Yesu u vendan ityartor i sha won cii i Satan na un la ga. (Mat. 4:8-10) Yesu ta se icin ér: “Ver nen ishima, kura nen ayol a en sha hanma hua; gadia ka sha u ngeen a akaa kpishi la man or nana lu a uma ga.” (Luka 12:15) Aluer se mba civir Yehova sha mimi yô se suur sha a na, a lu sha ayol a ase ga.
Tseprofeti ‘Tsugh Un’
8. Yange i kar mtil sha mimi u profeti u Aôndo la nena?
8 Luun er profeti u Aôndo la yange una ze hemen u hiden ken tar na, una hidi ijime ga yô, ma za a na ma doo. Yange mough u yemen ken tar na ica lu a gba ga tsô tagher a imeen igen. Bibilo kaa ér: “Tseprofeti ugen tema lu ken Betel; yô, ônov nav mba nomso va ôr un” akaa a yange za hemen sha mhii u sev mbula cii. Tseprofeti la ongo akaa la cii yô, a kaa a ônov nav ér ve kange un jaki shidi sha er una za kohol profeti u Aôndo la yô. A za ica ga tsô a zua a profeti la lu memen shin itine i zege kon, maa a kaa a na ér: “Sé hide ken ya, va ya kwagh.” Or u Aôndo u mimi la vende yô, tseprofeti la kaa a na ér: “Mo kpaa, m ngu profeti er we nahan; man ortyom ôr kwagh a mo sha imo i TER, er: Hide a na hen ya wou, a̱ va ya kwagh, a̱ ma mngerem kpaa.” Kpa Bibilo kaa ér: “Lu tsughun un a tsugh.”—1 Utor 13:11-18.
9. Ruamabera ôr kwagh u mbatsughunior ér nyi, man ka ve vihi ikyaryan i unô?
9 Se fa awashima u tseprofeti la jighilii ga, kpa yange er aie. Alaghga tseor la vande lun profeti u Yehova u mimi. Kpa hen shighe ne yô, lu eren kwagh sha icugh. Man Ruamabera venda imba ieren ne vindi vindi. (Ôr Anzaakaa 3:32.) Mbatsughunior ka ve vihi ikyaryan ve vea Yehova man i mbagenev kpaa.
“A Hide a [Tseor la]” Imôngo
10. Tseprofeti la yange lôhô profeti u Aôndo ér vea yem ken ya na nahan er nena, man kanyi i due kere?
10 Profeti u ken Yuda la yange ma kav er tseprofeti la lu tsughun un a tsugh yô. Yange ma pine iyol na ér: ‘A er nan ve Yehova una tindi ortyom hen orgen ér nana ôrom kwagh u me eree?’ Profeti ne ma sôn Yehova ér a seer tan un iwanger sha kwagh ne, kpa Bibilo tese ér yange er nahan ga. Kwagh u gema er yô, “a hide a [tseprofeti la], a va ya kwagh hen ya na, shi a ma mngerem kpaa.” Kwagh ne doo Yehova ga. Profeti u i tsugh un ne mough ngur yemen ken Yuda yô, a za zua a begha sha gbenda nahan begha shon wua un. Nenge imba er yange kure tom na u profeti ne vihi sha wono!—1 Utor 13:19-25. *
11. Ka ikyav i dedoo i nyi Ahiya veree?
11 Kpa gema profeti Ahiya u Yehova tindi un ér a za ver Yerobiam tor la yô, za hemen u civir Aôndo sha mimi shighe u bee iyol la je kpaa. Shighe u Ahiya bee iyol shi pir ashe la, Yerobiam tindi kwase na ér a za pine Ahiya kwagh u wan na u gba angev la. Ahiya yange ôr gbar gbar ér, wan u Yerobiam la una kpe. (1 Utor 14:1-18) Môm ken averen a Ahiya zua a mi yô, lu u ngeren Mkaanem ma Aôndo. Yange nger ma nena? Pristi Esera yange yar tom a ngeren mba Ahiya mbara sha u ngeren Bibilo.—2 Kron. 9:29.
12-14. (a) Kwagh u yange er gum profeti u Aôndo ugen la tese se nyi? (b) Tese ikyav er i doo u eren msen shi henen sha kwaghwan u mbatamen ve we se ken Bibilo la yô.
12 Bibilo pase se er i hii ve profeti u Aôndo la pine Yehova ga tsô maa yem gba za yan kwaghyan u tseprofeti la lôhô un la ga. Se fatyô u kaan ser tseprofeti la yange ôr un kwagh u soo u ungwan yô shinii? Kwagh ne tese se nyi? Gba u se na jighjigh shi se fa ser, hanma kwagh u Yehova a we se cii ka u vough man ka u injaa kpaa. Shi gba u se kange ishima se dondo akaawan a na, aluer ka nyi je ia er kpaa.
13 Mbagenev ka a wa ve kwagh yô, ve ungwa kwagh u ve soo u ungwan la tseegh. Ikyav i tesen yô, alaghga a tôô orpasenkwagh tom u adooga ua na nana kera zuan a shighe u lun vea tsombor u nan ga, shi nana kera lu a shighe u eren akaa a ken jijingi kpaa ga yô. Alaghga nana pine ortamen ér nana wase nan mhen. Ortamen la nana kaa a anmgbian shon ér, ka nan iyol i nan nana tsua kwagh u nana er ve nana koso tsombor u nan ye. Ortamen la maa nana pase nan mbamzeyol mba vea yange nan u civir Yehova sha ishima i nan aluer nan lumun u eren tom la yô. Nahan doo u anmgbian la nana umbur kwagh u ortamen la nan hii wan nan la tseegh, shin nana umbur mbamzeyol mba nan ter la kpaa? Gba u anmgbian la nana tsua kwagh u una hemba wasen nan ken jijingi yô.
14 Shi hen ase sha kwagh ne kpaa. Alaghga anmgbian u kwase nana pine ortamen aluer doo u nana undu nom u nan u nan ne jighjigh ga la yô. Ortamen la nana pase anmgbian u kwase la er i lu tom u nan u tsuan u undun nom u nan shin undun ga nahan. Maa nana time sha kwaghwan u Bibilo sha ikyaa shon. (1 Kor. 7:10-16) Anmgbian u kwase ne nana hen sha kwagh u ortamen la a er a nan la shin nan vande tsuan kera ér nana undun nom u nan laa? Hemba doon u nana er msen shi nana hen sha kwaghwan u Bibilo cii ve nana mase tsuan kwagh u nana er ye.
Hiden a Iyol You Ijime
15. Se hen nyi sha kwaghbo u profeti u Aôndo laa?
15 Se hen nyi igen sha kwagh u yange er profeti u ken Yuda laa? Anzaakaa 3:5 kaa ér: “Suur sha TER a ishima you cii, de yier sha mkav wou ga.” Profeti u ken Yuda ne yange kera suur sha Yehova er vanden eren nahan la ga, sha ci u hen shighe ne yô, suur sha mhen na. Kwagh ne vihi iti na i dedoo vea Aôndo, shi wua un kpaa. Kwagh u yange er profeti la tese ér doo u hiden a iyol ijime shi civir Yehova a ishima i mimi.
16, 17. Kanyi ia wase se ve se za hemen u civir Yehova a ishima i mômô?
16 Asaren a bo a ken ishima yase la ka a soo u tsumen a vese. “Ishima i wa atseregh je hemba hanma kwagh cii, i vihi je gande.” (Yer. 17:9) Aluer se soo u zan hemen u civir Yehova a ishima i mimi yô, gba u se nôngo tsung se dugh tseor ken vese kera, kua isharen i kenden a iyol yase sha man i suur sha ayol a ase la kpaa. Se eren nahan cii yô, se haa orhe iyol, “u i gbe un sha inja i Aôndo ken perapera u mimi man mtsegh u mimi” la.—Ôr Mbaefese 4:22-24.
17 Anzaakaa 11:2 kaa ér: “Kwaghfan ngu hen mbahiden a iyol ijime la.” Ka sea hide a ayol a ase ijime sea suur sha Yehova yô, kwagh ne a wase se se palegh u eren isholibo i vesen. Ikyav i tesen yô, shighe u ishima i yen se yô, se mba kera fetyô u tsuan kwagh u vough u se er ga. (Anz. 24:10) Alaghga uwer ua gba se u eren ityom i civir Aôndo igen, nahan se hingir u henen ser se civir Yehova ken anyom a karen la kpishi, nahan hegen yô mbagen kpa ve civir un. Shin adooga se hen ser, doo u se “ember uma” er mbagenev kpa ve lu ember nahan. Kpa aluer se mba ‘nôngon tsung’ shi se mba “eren . . . tom u Ter ngegh” hanma shighe yô, kwagh la una kura asema a ase.—Luka 13:24; 1 Kor. 15:58.
18. Shighe u se fe kwagh u se er jighilii ga yô, doo u se er nyi?
18 Alaghga a gba u se tsua kwagh u taver ashighe agen, man adooga se fa kwagh u vough u i gbe u se tsua la jighilii ga. Nahan ishima ia hemba lun se u eren kwagh u se hen ser ka u vough la ga he? Shighe u kwagh a lu nahan cii yô, doo u se ker iwasen hen Yehova. Yakobu 1:5 kaa ér: “Aluer kwaghfan una yina mô wen yô, nana̱ sôn Aôndo u ka A na ior cii wuee” la. Ter wase u sha la, una na se icighan jijingi sha er se er kwagh u a lu u vough la yô.—Ôr Luka 11:9, 13.
Kange Ishima Wer Ú Tile sha Mimi
19, 20. Se kange ishima ser se er nyi?
19 Ashighe a ican a yange dondo shighe u Solomon undu mcivir u mimi la yange lu ashighe a karen mtil sha mimi u mbatomov mba Aôndo kpen kpen. Jighilii yô, mbagenev kpishi yange ve nyiman jighjigh ve sha igbenda kposo kposo. Nahan cii kpa, mbagenev tile dông ve lu civir Yehova sha mimi her.
20 Se mba tagher a akaa a karen mtil sha mimi wase ayange ayange. Man se kpa se fatyô u tesen jighjigh wase. Se za nen hemen u civir Yehova a ishima yase i môm shi se sôr ishima yase nahan se lu a vangertiôr ser una za hemen u veren mba ve lu civir un sha mimi la.—2 Sam. 22:26.
[Footnote]
^ Yehova yange una wua tseprofeti la kpa Bibilo ôr se ga.
Ú Na Mlumun Wer Nyi?
• Doo u se dugh isharen i lun a uyôughyôughmbaakaav ken ishima yase kera sha ci u nyi?
• Kanyi ia wase se ve se civir Yehova sha mimi?
• Iyol hiden a mi ijime ia wase se u civir Aôndo a ishima i mimi nena?
[Study Questions]
[Pictures on page 9]
Ka taver we u hendan a ameenee?
[Pictures on page 10]
Shighe u i we u kwagh ken Bibilo yô, u fatyô u eren msen sha er u dondo kwaghwan la kpa?