Dondo Ikyav I Yesu Civir Aôndo Sha Gbenda U A Lumun A Mi la

Aôndo ngu lôhôn ior ken “hanma ikyurior man hanma nongo man hanma nongoior man hanma zwa” cii sha dooshima ér ve va civir un. (Mpa. 7:9, 10; 15:3, 4) Mba ve vengese mlehe ne cii mba nengen “mdoom ma TER.” (Ps. 27:4; 90:17) Mba genger amo wuese Aôndo er orpasalmi nahan, kaan ér: “Sé civir, sé ngurum nen, sé gure nen inya sha ishigh ki TER u A gbe se la.”—Ps. 95:6.

Mcivir u a Doo Yehova Ishima Tsung Yô

Er Yesu a lu Wan u Aôndo u môm môm yô, ngu a ian i fan ishima i Ter na man atindiakaa a na. Sha nahan yô, Yesu lu sha ian i dedoo i tesen mbagenev gbenda u vough u vea civir Yehova sha mimi yô. A kaa ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.”—Yoh. 1:14; 14:6.

Yesu ver se ikyav i vough i hiden a iyol ijime ungwan imo i Ter na. A kaa ér: “M gbe eren ma kwagh sha tahav Av iyol Yam ga, kpa M er akaa er Ter A tesem yô.” Shi a seer ér: “M eren akaa a doon Un gbem.” (Yoh. 8:28, 29) Yesu eren akaa a doon Ter na sha nyi gbenda?

Hiihii yô, Yesu yange er Ter na tom a ishima i môm man ka kwagh u a lu u civir Aôndo je la. Yesu yange tese ér un var ken Ter na sha u  ungwan imo Na shi eren ishima Na, shin er ashighe agen i lu un ican nahan kpaa. (Fil. 2:7, 8) Tom u geman ior hingir mbahenen u Yesu eren hanma shighe la kpa lu gbenda ugen u eren kwagh u doon Ter na. Yange er tom ne je yô, mbananjighjigh man mba ve na jighjigh ga cii hingir u yilan un ér Ortesen. (Mat. 22:23, 24; Yoh. 3:2) Heela tseegh ga, Yesu yange a na shighe na man tahav nav cii sha u eren mbagenev tom. Ieren i tangen iyol ga i lu a mi la na yô, luun a shighe u eren akaa na ga, nahan kpa saan un iyol u eren mbagenev tom. (Mat. 14:13, 14; 20:28) Er Yesu luun a ian ga nahan kpa, ver shighe sha er una lamen a Ter na u sha la ken msen hanma shighe yô. (Luka 6:12) Mcivir u Yesu yange una doo Aôndo ishima kpen kpen!

Nôngon u Eren Akaa a Doon Aôndo Ishima

Yehova yange nenge a ieren i Wan na la shi tese ér Un lumun a na kpaa. (Mat. 17:5) Satan Diabolo kpa nenge a jighjigh u Yesu ne. Sha nahan yô, Satan an Yesu vanger. Sha ci u nyi? Lu sha ci u orumace môm lu a vande ungwan imo i Aôndo vindi vindi sha u civir un a ishima i môm sha gbenda u i gbe u ma i civir un la ga. Nahan Diabolo soo ér Yesu a de ne Yehova icivir i i lu i na shi a kom u zuan a mi la ga.—Mpa. 4:11.

Er Satan soo u hôngor a mcivir u Yesu yô, va u va karen un. Tsô Diabolo yem a Yesu “sha gôgôwo u taven tsung, tese Un ityartor i sha won cii kua icivir i i.” A kaa a Na ér: “Akaa ne cii me na U, aluer Wea gure inya, Wea civir mo yô.” Tsô Yesu er nena? Yesu kaa ér: “Yem kera, Satan, gadia i nger er: Civir Ter, Aôndo wou, ka Un tseegh er Un tom ye.” (Mat. 4:8-10) Sha mimi yô, Yesu yange fa ér Satan una tôndozwa u nan se nyi je kpa, u guren inya civir un la ka akombo a civir. Yange lumun u civir or môm ga, saa Yehova tseegh.

Alaghga Satan una kera na se tartor u sha won cii kua iengem i u ér se civir un ga. Kpa ngu nôngon ér una hôngor a mcivir u Mbakristu mba mimi ve lu civir Aôndo la. Diabolo soo ér se civir orgen shin kwaghgen, se de civir Aôndo ga.—2 Kor. 4:4.

Kristu Yesu yange ungwa imo i Aôndo sha mimi zan zan kar kpen. Er Yesu tile sha mimi yô, a na Yehova Aôndo icivir i orumace môm kpa nan lu a vande nan Un ga yô. Se Mbakristu mba mimi nyian se mba nôngon tsung sha u dondon jighjigh u Yesu la sha u veren mcivir u Orgban wase hiihii. Jighilii yô, kwagh u hemban doon u se lu a mi yô, ka mlu u dedoo u se lu a mi vea Aôndo la.

Averen a Se Zua a mi Aluer Se mba Civir Aôndo sha Gbenda u A Soo la Yô

Aluer se mba suen “mcieaôndo u wang u a lu a acôghor iyol” sha ishigh ki Aôndo ga la yô, se zua a averen kpishi. (Yak. 1:27) U tesen  ikyav yô, se mba ken ashighe a ior kpishi ve hingir “mbawan ayol a ve ikyo tseegh man mba inyaregh ki doo ve ishima” man “mba kwagh u dedoo a doo ve ga” yô. (2 Tim. 3:1-5) Nahan kpa, ken iyou i Aôndo yô, se mba a ian i lun vea ior mba wang mba ve lu nôngon sha u dondon atindiakaa a Aôndo a wang a ken mcivir na la. Man kwagh ne ka ian i doon kpen kpen.

Shighe u ka sea hôngor ayol a ase a tar ne ga yô se zua a iveren igen, ka se lu a imoshima i wang. Se soo u lun a imoshima i wang sha u dondon atindiakaa a Aôndo a perapera la shi dondon atindi a Shisar a a bende a atindi a Aôndo ga la.—Mar. 12:17; Aer. 5:27-29.

Aluer se mba civir Aôndo sha mimi yô, se zua a iveren igen kpaa. Shighe u ka sea hemba veren ishima u eren ishima i Aôndo a akaa a ase yô, uma wase a hemba lun a inja shi i saan se iyol kpaa. Se mba kera kaan sr: “Se gbaa yan . . . akaa man akaa tsô, gadia kper se mba kpen” ga, kpa se mba a ishimaverenkeghen i va lun uma ken paradiso shin tar.—1 Kor. 15:32.

Takerada u Mpase tese ér shighe ngu van u mba ve lu wang sha ishigh ki Yehova cii vea ‘due ken zegecan’ la kera yô. Shi u kaa ér, “Un u A tem sha ikyônough ki torough la Una samber tenti Na sha a ve.” (Mpa. 7:13-15) Or u nan tem sha ikyônough ki torough la ka Yehova Aôndo, un u a hembe icivir sha won cii la. Nenge er a saan we iyol kpishi aluer a lôhô u ken tenti na, ngu kuran we sha er kwagh u bo môm una er u ga yô. Man hegen je kpa ngu nengen sha a vese shi kuran se kpaa.

Heela tseegh ga, mba ve civir Aôndo sha gbenda u vough cii mba kuran ve ‘zan a ve hen ambor a mngerem ma umam.’ Amboramnger a kundun iyol ne tile sha ityough ki akaa a Yehova a ser a ver sha er se zua a uma u tsôron la. Jighilii yô, “Aôndo Una ese ve mliam sha ashe kera cii” sha ikyev i iwom i Kristu la. (Mpa. 7:17) Uumace cii vea hingir vough, man kwagh ne una lu kwagh u iemberegh kpishi hen mba ve lu a ishimaverenkeghen i lun uma gbem shin tar la. Nyian je kpa, mbatomov mba Aôndo mba civir un sha iember, tesen iwuese sha kwagh u Yehova a er a ve ne shi civir un imôngo vea mba ve lu sha, ve lu wan icam kaan ér: “We Ter, Aôndo, Uhembanagee, ityom You i vese, i kpiligh iyol kpaa. Igbenda You ka jighjigh man shi mimi kpaa, We, Tor u akuraior cii. We, Tere, ka an je nana cia U ga, man shi ka an nana civir iti You kpaa ga? Gadia ka We tseegh U lu wang ye, akuraior cii aa va aa va gure sha ishigh Yough gadia i pase ajir a ôron a Ou a jighjigh la ken igbar ve.”—Mpa. 15:3, 4.

[Picture on page 27]

Kanyi Satan a lu nan se ér se civir unu?