Ú Hemen Sha U Nan Ior Icivir Kpa?
Ú Hemen Sha U Nan Ior Icivir Kpa?
“Hemen nen sha u nan ior icivir.”—ROM. 12:10.
1. Kanyi ior ve de u eren sha ajiir kpishi?
KEN ityar igen yô, mbayev mba kiriki ka vea lu vea mbaganden yô, ve gure inya sha icivir. Sha nahan yô, ve kera tav ve kar mba ve lu tamen a ve la ga. Shi sha ajiir ne, organden ka nana lamen a wanye man wanye la nana gema ijime a nan yô, i tôô ér wanye la cihi kwagh. Icivir i i tesen sha igbenda wue wue ken aeren a ityôô kposo kposo ne umbur se kwagh u Tindi u Mose la. Tindi ugen ken tindi la yange kaa ér: “Mough tile sha, sha ishigh ki or u menden ivu, civir ishigh ki tamenor.” (Lev. 19:32) Kpa kwagh ka a er i vihi yô, sha ajiir kpishi mba kera ne mbagenev icivir ga. Jighilii yô, icivir ban hanma ijiir cii.
2. Mkaanem ma Aôndo kaa a vese ér se naan unô iciviri?
2 Mkaanem ma Aôndo tese ér doo u se naan mbagenev icivir. Ma kaa ér se civir Yehova man Yesu. (Yoh. 5:23) Shi ma wa se kwagh ér se naan mba hen tsombor wase icivir man mba se civir Aôndo a ve imôngo kua mbagenev mba ve lu ken tiônnongo ga la kpaa. (Rom. 12:10; Ef. 6:1, 2; 1 Pet. 2:17) Ka sha igbenda igen i nyi nahan se civir Yehova? Se na anmgbianev asev mba nomso man mba kasev mba ken Kristu icivir nena? Se time nen sha mbampin mban man mbagenev kpaa.
Civir Yehova man Iti Na
3. Kanyi i lu gbenda môm u injaa u civir Yehova?
3 Gbenda môm u injaa u se civir Yehova yô, ka sha u nan iti na icivir. Gadia se mba nongoior u i dugh u “sha ci u iti Na yô.” (Aer. 15:14) Sha kpôô yô, u yilan se sha iti i Yehova, Aôndo uhembanagee la ka kwagh u civirigh. Profeti Mika kaa ér: “Ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.” (Mika 4:5) Se mba “zenden ken iti i TER” sha u nôngon kpoghuloo eren akaa a nan iti na i i yer se a mi la icivir ayange ayange. Aluer se mba eren sha loho u dedoo u se pasen la ga yô, se lu “tuhwan” iti i Aôndo, shin se lu heen i di er Paulu yange umbur Mbakristu mba ken Roma mbara nahan.—Rom. 2:21-24.
4. U nenge ian i lun orshiada u Yehova la nena?
4 Shi se mba civir Yehova sha tom wase u eren shiada la. Sha ayange a tsuaa la, Yehova lôhô ikyurior i Iserael ér i lu mbashiada nav, kpa ve kanshio u eren tom la. (Yes. 43:1-12) Ashighe kpishi ve gema ijime a Yehova, ve “bam Icighan u Iserael” je kpaa. (Ps. 78:40, 41) Ken masejime yô, Yehova venda ikyurior la. Kpa se wuese ian i se lu a mi nyian i lun mbashiada mba Yehova shi pasen mbagenev iti na la. Se wuese i sha ci u a doo se ishima shi sar se tsung u tseghan iti na kpaa. Se fa mimi sha kwagh u Ter wase u sha la man mbaawashima nav kpaa. Nahan a er nan man se de pasen kwagh naa? Ka se ken ishima er apostoli Paulu kpa lu un ken ishima ve kaa nahan ér: “I kighir mo a kighir je. Aluer me ôr Loho u Dedoo ga yô, kwagh á tserem” nahan kpa?—1 Kor. 9:16.
5. U nan Yehova jighjigh zua vea u civir un nena?
5 Orpasalmi Davidi ngise kaa ér: “Mba ve fe iti You yô, vea suur sha a We, gadia TERE, We, U kende mbakeren We la, dang mayange ga.” (Ps. 9:10) Aluer mimi je se fa Yehova shi se mba civir iti na kua kwagh u i til sha mi la yô, se suur sha a na vough er mbacivir un mbajighjigh mba tsuaa mbara kpa er nahan. Gbenda ugen u nan Yehova icivir yô, ka u suur sha a na shi nan un jighjigh. Nenge er Mkaanem ma Aôndo ma zough u suur sha Yehova vea u nan un icivir yô. Shighe u ikyurior i Iserael u tsuaa la de u suur sha Yehova yô, A pine Mose ér: ‘Ka hanma shighe je man ior mban vea de u lahan Mo? Man ka hanma shighe je man vea nam jighjigh, er M er uivande hen a ve yum nahan nee?’ (Num. 14:11) Nahan kpa aluer se suur sha Yehova ser a kura se shi a wase se u wan ishima zum u se lu yan ican yô, se tese ser se mba civir un.
6. Kanyi ka i mgbegha se ve se civir Yehova a ishima yase ciilii?
6 Yesu yange tese ér gba u se civir Yehova a ishima yase cii. Yesu ôr mkaanem ma Yehova ma ma er kwagh u ior mba ve civir un sha mimi ga la ér: “Nongoior ne ngu civir Mo sha ityumbujôôgh ve tseegh, kpa ishima ve yô, ngi ica a Mo je.” (Mat. 15:8) Saa Yehova una doo se ishima tsung ve se civir un sha mimi ye. (1 Yoh. 5:3) Shi se mba umbur ityendezwa i Yehova i a kaa ér: “Mba ve civir Mo yô, Mo kpaa me civir ve” la.—1 Sam. 2:30.
Mbakuran mba ken Tiônnongo Mba Ne Mbagenev Icivir
7. (a) Doo u anmgbianev mba ve lu a aan a tom ken tiônnongo vea naan mba ve lu nengen sha ve la icivir sha ci u nyi? (b) Paulu yange naan mba ve civir Aôndo a na imôngo la icivir nena?
7 Apostoli Paulu yange wa mbananjighjigh a na imôngo kwagh ér: “Hemen nen sha u nan ior icivir.” (Rom. 12:10) Gba u anmgbianev mba nomso mba ve lu sha aan a tom ken tiônnongo vea ver ikyav i dedoo, vea “hemen” sha u nan mba ve lu nengen sha a ve la icivir. Aluer mba ve lu a ityom i vesen ken tiônnongo la er nahan yô, vea lu dondon ikyav i Paulu la. (Ôr Mbatesalonika 2:7, 8.) Anmgbianev mba ken atôônanongo a Paulu sôron la cii yange ve fa ér mayange Paulu una kaa ér ve er kwagh u un iyol na una soo u eren ga ze. Paulu yange naan mba ve civir Aôndo a na imôngo la icivir, sha nahan yô ve kpa ve naan un icivir. Se fa keng je ser, shighe u Paulu kaa ér: “M ngu wan ne kwagh mer: Hingir nen mbakaven mo” la, ior kpishi yange vea dondo kwaghwan na la a ishima i gbar gbar sha ci u ikyav na i dedoo la.—1 Kor. 4:16.
8. (a) Ka gbenda môm u injaa u nyi Yesu yange naan mbahenen nav iciviri? (b) Mbakuran vea dondo ikyav i Yesu la nyian nena?
8 Gbenda ugen u orkuran nana na mba nan lu hemen ve la icivir yô, ka sha u pasen ve ityôkyaa i nan kaa ér ve er ma kwagh shin nan lu wan ve kwagh la. Aluer nan er nahan yô, nan ngu dondon ikyav i Yesu la. U tesen ikyav yô, zum u Yesu kaa a mbahenen nav ér ve sôn ter a tindi mbatomov ken sunda na la, a pase ve ityôkyaa. A kaa ér: ‘Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.’ (Mat. 9:37, 38) Shi zum u a kaa a mbahenen nav ér ve “kuran” la kpa pase ve ityôkyaa. A kaa ér: ‘Gadia ne fa iyange i Ter wen Una va la ga.’ (Mat. 24:42) Ashighe kpishi, Yesu yange a ôr mbahenen nav kwagh u vea er tseegh ga, kpa a pase ve ityôkyaa i a kaa ér ve er kwagh shon kpaa. Sha nahan yô, naan ve icivir. Kwagh ne ka ikyav i dedoo i mbakuran mba Kristu vea dondo kpen kpen!
Na Tiônnongo u Yehova Civir shi Dondo Hemen Na Kpaa
9. Aluer se mba nan tiônnongo u Kristu u a lu tar sha won cii la icivir kua mba ve til sha ityough nagh la yô, ka an se lu civirii? Pase ase yôô.
9 Gbenda ugen u se na Yehova icivir yô, ka u nan tiônnongo u Mbakristu u a lu tar sha won cii la icivir kua mba ve til sha ityough nagh la kpaa. Aluer se dondo kwaghwan u ken Ruamabera u nongo u wanakiriki u jighjigh man u fan kwagh ve we se la yô, se mba tesen icivir sha mserakaa u Yehova. Ken tiônnongo u sha derianyom u hiihii la, apostoli Yohane nenge ér doo u lahan mba i tsough ve ér ve lu mbakuran ken tiônnongo la ga. (Ôr 3 Yohane 9:9-11.) Mkaanem ma Yohane mara tese ér lu mbakuran mbara tseegh ve lahan ga, ve lahan ityesen ve man kwaghwan ve kpaa. Kpa kwagh u doon yô, Mbakristu kpishi lu nahala ga. Shighe u mbaapostoli lu uma la, mzough u anmgbianev jimin cii naan mba ve hemen la icivir.—Fil. 2:12.
10, 11. Ruamabera tese ér ka a inja u nan mbagenev tahav mbu hemen ken tiônnongo u Kristu nena?
10 Mbagenev hen ér Yesu yange kaa a mbahenen nav ér “ne cii ne mba anmgbianev,” nahan ityôkyaa ngi i mbagenev vea lu mbahemen ken tiônnongo u Kristu ga. (Mat. 23:8) Nahan kpa akav a ior mba yange Aôndo na ve tahav ér ve hemen la nga ken Ruamabera u ken zwa Heberu man u ken zwa Grika la kpishi. Ngeren u a er kwagh u uter mbatamen man mbaajiriv kua ator a Mbaheberu mba tsuaa la tese wang ér Yehova ne akaawan sha ikyev i uumace mba ve til sha ityough nagh la. Ior mbara yange vea naan ior mba Yehova a tsough ve la icivir ga yô, a tsaha ve.—2 Utor 1:2-17; 2:19, 23, 24.
11 Sha derianyom u hiihii la kpa, Mbakristu lumun hemen u mbaapostoli. (Aer. 2:42) U tesen ikyav yô, Paulu yange waan anmgbianev kwagh. (1 Kor. 16:1; 1 Tes. 4:2) Shi un iyol na kpa dondon hemen u mba ve lu ityough sha a na la. (Aer. 15:22; Gal. 2:9, 10) Sha kpôô yô, Paulu lu a mnenge u vough sha kwagh u tahav mbu ken nongo u Kristu la.
12. Ka akav ahar a ken Bibilo a nyi a tese se kwagh u nan mbautahav iciviri?
12 Kwagh ne tese se akaa ahar. Kwagh u hiihii yô, Ruamabera na “wanakiriki u jighjigh man u fan kwagh” man Mbahemenev nav mba Shin Tine ian ér ve tsua ior ve lu mbakuran ken tiônnongo, shi ve ver mbagenev mba vea lu ityough sha mbakuran mban yô. (Mat. 24:45-47; 1 Pet. 5:1-3) Kwagh u sha uhar yô, doo u se cii kua mbakuran mba i tsough ve la cii se naan mba ve lu a tahav sha a vese la icivir. Ka sha igbenda igen i nyi nahan se fatyô u nan mba ve lu hemen ken nongo u Kristu la iciviri?
Na Mbakuran mba Ningir Sha Icivir
13. Se na mba ve til sha ityough ki nongo u Kristu sha ayange ne icivir nena?
13 Paulu kaa ér: “Se mba zamber a ven, anmgbianev ser, rumun nen mbara mba ve eren tom her a ven sha gbashima mba ve hemen ne ken Ter shi ve we ne kwagh kpaa la. Waan nen ve ikyo kpishi je sha dooshima sha ci u tom ve la. Lu nen bem bem ayol a en.” (1 Tes. 5:12, 13) Sha kpôô yô, a fatyô u kaan ér mbakuran mba ningir sha kpa mba “eren tom . . . sha gbashima.” Sha nahan yô, se “waan nen ve ikyo kpishi je.” Gbenda môm u se er kwagh ne yô, ka u dondon kwaghwan ve a ishima i môm. Zum u imba orkuran la nan we se kwagh u a dugh hen nongo u wanakiriki u jighjigh yô, “kwaghfan u a dugh Sha” la una wase se se “norom ikyaa ga.”—Yak. 3:17.
14. Tiônnongo ne mbakuran mba ningir sha icivir nena, man kanyi ka i due kere?
14 Aluer i kaa ér se er kwagh sha gbenda ugen kposo a u se vanden eren la nahan se er nena? Ashighe agen ka i gba u se tese icivir sha u palegh isharen i vendan kwaghwan sha u kaan ser, “Se mba eren kwagh heen nahan ga” shin “Kwagh la una fatyô u wasen sha ajiir agen, kpa una fatyô u wasen tiônnongo wase ga” la. Kpa hemba doon u se nôngo se dondo kwaghwan shon. Aluer se mba umbur hanma shighe cii ser tiônnongo ne ka u Yehova shi Yesu ngu Ityough ki tiônnongo yô, kwagh la una wase se u dondon kwaghwan. Tiônnongo ka una ngohol kwaghwan u ma orkuran u ningir sha a iember una er sha mi yô, kwagh la a tese ér ve na un icivir sha mimi. Apostoli Paulu yange wuese anmgbianev mba ken Korinte sha ikyo i ve wa sha akaawan a ortamen Titu u va sôr ve wa ve la. (2 Kor. 7:13-16) Nyian kpa, aluer se dondo akaa a mbakuran mba ningir sha ve we se la a ishima i môm yô, se seer zuan a iember ken tom wase u pasen kwagh la.—Ôr 2 Mbakorinte 13:11.
“Waan Nen Ior Cii Ikyo”
15. Ka sha igbenda igen i nyi se na mba se civir Aôndo a ve imôngo la iciviri?
15 Paulu nger ér: “De zehe a organden ga kpa wa a wa nan kwagh er ka ter nahan; er a mbayevikyaior kpaa er ka anmgbianev nahan, kasev mba ganden kpaa er ka ungô nahan; mbayevkasev kpaa er ka anmgbianev mba kasev nahan sha mlu u wang cii. Wa kasev mba côgholov ikyo mba ve lu kasev mba côgholov mimi yô.” (1 Tim. 5:1-3) Sha mimi yô, Mkaanem ma Aôndo wa se kwagh ér se naan hanma or u ken tiônnongo u Kristu cii icivir. Nahan kpa aluer iyongo zua u vea ma anmgbian u nomso shin u kwase ken tiônnongo di ye? Kwagh la una yange u u nan anmgbian u ken Kristu ne icivirii? Shin u gema mhen wou, nahan u hemba veren ishima sha aeren a dedoo a anmgbian wou laa? Doo u mba ve lu hemen ken tiônnongo la vea hemba nan anmgbianev icivir cii, mayange vea “eren tahav. . . sha ikyumuile” ga. (1 Pet. 5:3) Sha kpôô yô, aan nga kpishi a se na mbagenev icivir ken tiônnongo u Kristu, u i fe un sha dooshima u mimi la.—Ôr Yohane 13:34, 35.
16, 17. (a) Doo u se naan mba se pasen ve kwagh la icivir kua mba ve hendan a vese la icivir sha ci u nyi? (b) Se ‘waan ior cii ikyo’ nena?
16 Nahan kpa ka mba ken tiônnongo u Kristu tseegh se ne ve icivir ga. Paulu yange nger Mbakristu mba sha ayange a na la ér: “Nahan er se lu a ian yô, se eren nen akaa a doon a ior cii.” (Gal. 6:10) Ashighe agen or u se eren tom ijiir i môm vea nan shin u se ze makeranta imôngo vea nan ka nana er a vese dang yô, i taver se u dondon kwaghwan ne kpen kpen. Shighe u kwagh a lu nahan yô, doo u se umbur mkaanem man, ma kaa ér: “Ishima i̱ de vihin we sha ci u mbaerenakaabo ga.” (Ps. 37:1) Aluer se dondo kwaghwan la yô, una wase se u eren a ior sha icivir, kua mba ve hendan a vese la je kpaa. Heela tseegh ga, zum u se dugh kwaghpasen kpa, doo u se hide a iyol ijime, aluer se er nahan yô, kwagh ne una wase se se na ior mlumun “sha ishima i legh legh man sha icivir kpaa.” (1 Pet. 3:15; NW ) Mluashe wase man iyolwuhan yase kpa ia fatyô u tesen ér se na ior mba se lu pasen ve kwagh la icivir.
17 Sea eren kwagh a mba se civir Aôndo a ve imôngo la shin mba ve lu ken tiônnongo a vese imôngo ga la kpa, doo u se nôngo kpoghuloo se dondo kwaghwan ne, a kaa ér: “Waan nen ior cii ikyo, anmgbianev ve̱ doo ne ishima, cian nen Aôndo, waan nen tor ikyo.”—1 Pet. 2:17.
Ú Na Mlumun Wer Nyi?
U na Yehova icivir nena?
• U na mbatamen man mbakuran mba ningir sha icivir nena?
• U na hanma or u ken tiônnongo icivir nena?
• U na ior mba u pasen ve kwagh la icivir nena?
[Study Questions]
[Picture on page 23]
Mbakristu mba sha derianyom u hiihii la yange ve dondon hemen u Mbahemenev mba Shin Tine
[Picture on page 24]
Mbatamen mba ken ityar cii mba ne mbakuran mba ningir sha mba Mbahemenev mba Shin Tine ve ver ve la icivir