“Akurashee” A Yehova Nga Karen Ior Cii
“Akurashee” A Yehova Nga Karen Ior Cii
“Akurashee a [Yehova] nga karen ônov mba iorov.”—PS. 11:4.
1. Ka unô ior nahan i hembe doon we u lun ikyua a ve?
U NENGEN ior mba kwagh wou a gbe ve ishima sha mimi la nena? Ka wea pine ve kwagh yô, ve ôr u sha mimi. Shi kwagh ka una gba u a iwasen kpa, ve kegh a kegh iyol u wasen we. Shi kwagh ka una gba u a kwaghwan kpa, ve wa u kwagh sha dooshima. (Ps. 141:5; Gal. 6:1) Ka doon we u lun ikyua a amba a ior la ga he? Kape kwagh wou a gbe Yehova man Wan na ishima vough je la. Er kwagh wou a gbe ior mbagenev ishima nahan kpa, kwagh wou hemba gban Yehova man wan na ishima, shi ve soo u sha ci u mtsera ve ga, kpa ve soo ér u “kôr ave sha uma u a lu uma jim la.”—1 Tim. 6:19; Mpa. 3:19.
2. Kwagh u mbacivir Yehova gba un ishima nan je?
2 Orpasalmi Davidi yange pase er kwagh wase a gbe Yehova ishima tsung yô, ér: “Ashe [a Yehova] nga kenger, akurashee a Na nga karen ônov mba iorov.” (Ps. 11:4) Sha mimi yô, Yehova kenger se a kenger tseegh tsô ga, karen se kpaa. Davidi nger ér: “U kar ishima yam, U va sôrom tugh; . . . U zua a ma kwagh ga.” (Ps. 17:3) Davidi yange fa wang er kwagh na a gbe Yehova ishima tsung yô. Yange fa ér aluer un ngu zeren henen sha akaa a bo yô, ishima ia vihi Yehova a na shi Una kera lumun un ga. U nengen wer Yehova fa hanma kwagh wou vighe vighe er fa kwagh u Davidi nahan kpa?
Yehova Fa Asema Ase
3. Yehova nengen mbamyen asev sha gbenda u vough nena?
3 Kwagh hemba gban Yehova sha or u se lu ken atô la, ka ishima yase je la. (Ps. 19:14; 26:2) Kpa kwagh u doon yô, Yehova veren ishima sha mbamshi asev mba kiriki mbara ga. U tesen ikyav yô, zum u Sara, kwase u Aberaham ôr ortyom ugen u gema iyolna hingir iyol i or va hen a ve la kwagh u mimi ga yô, ortyom shon nenge ér lu cian shi kunya kôr un, nahan kôôm un a kôôm tsô. (Gen. 18:12-15) Tertamen Yobu yange na “ishô iyol na sha ishigh ki Aôndo,” kpa Yehova ver un doo doo, gadia fa er Yobu ya ican kpishi sha ikyev i Satan yô. (Yobu 32:2; 42:12) Shi ishima yange i vihi Yehova a kwasecôghol u ken Sarefati sha mkaanem ma ôr a profeti Eliya zum u wan na kpe la ga. Gadia Aôndo fa er ku u wan na nyoon un tsung yô.—1 Utor 17:8-24.
4, 5. Yehova yange er kwagh a Abimeleki sha mhôôn nena?
4 Er Yehova a karen asema ase yô, mba ve ne un jighjigh ga la kpa eren a ve doo doo. U tesen ikyav yô, nenge kwagh u yange er a Abimeleki, tor u Mbafiliti u ken gar u Gerar la. Abimeleki yange fa ér Sara ka kwase u Aberaham ga, nahan a tôô un hingir kwase na. Kpa Yehova de ér a yav a na ga, gema kaa a na ken mnya ér: “M fa, ka sha ishima i gbar gbar u er nahan ye, Mo kpaa M yange u sha u de kera eren Mo kwaghbo ga; ka nahan man M rumun Mer bende a na ga ye. Hegen yô, hire ase or la a kwase na, gadia ka profeti je; una er msen sha ci wou, ú lu uma.”—Gen. 20:1-7.
5 Yehova yange una soo yô, ma zungwe Abimeleki, or u civir mbaaôndo mbaaiev ne mhôônom ga. Kpa Aôndo nenge ér a er kwagh sha mimi hen shighe ne. Nahan, Yehova er a na doo doo, tese un kwagh u una er ve una de un kwaghbo na, nahan una “lu uma” yô. Ka imba Aôndo u ú soo u civir ne ga he?
6. Yesu yange kav Ter na sha nyi igbenda?
6 Yesu yange kav Ter na kwagh môm shi ga, yange hemban veren ishima sha akaa a dedoo a mbahenen nav eren la, shi deen ve mbamshi vev kpaa. (Mar. 10:35-45; 14:66-72; Luka 22:31, 32; Yoh. 15:15) Ieren i Yesu zua sha mkaanem ma i nger ken Yohane 3:17 ne, ma kaa ér: “Aôndo tindi Wan Na shin tar ne sha u A̱ va ôr tar ijir ga, kpa ka sha u tar u̱ war sha a Na” yô. Sha mimi yô, se doo Yehova man Yesu ishima tsung man dooshima ve la ka u been mayange ga. Isharen i ve lu a mi ér se zua a uma u tsôron la tese ér se doo ve ishima. (Yobu 14:15) Dooshima ne pase ityôkyaa i Yehova a karen se man gbenda u a nengen se kua gbenda u a eren a vese sha kwagh u a nenge a mi ken a vese la.—Ôr 1 Yohane 4:8, 19.
Karen Se sha Dooshima
7. Yehova karen se sha ci u nyi?
7 Nahan kpa, aluer se hen ser Yehova ka ordasenda u a lu shaala, a lu kenger ér una kôr se a isholibo yô, a lu sha mi ga! Ka Satan a lu senden se ityough shi kaan ér se mba civir Aôndo sha ci u mtsera wase tseegh ye. (Mpa. 12:10) Or ka nana er kwagh a ishima i wang kpa, a kaa ér awashima u nan ka u bo! (Yobu 1:9-11; 2:4, 5) Orpasalmi yange ôr kwagh u Aôndo ér: “Aluer Wea we aferakaa ikyo yô, ka an ma nan til sha, Tere?” (Ps. 130:3) Mlumun u sha mpin ne ér, Or môm ga! (Orpa. 7:20) Kpa Yehova kenger se sha mhôôn, vough er ormaren u ônov mba nan ve doo nan ishima kpishi ve nan soo u kuran ve sha ikyev i kwaghbo nahan. Ashighe kpishi ngu a umbur se er se yen yô, sha er se palegh kwaghbo yô.—Ps. 103:10-14; Mat. 26:41.
8. Yehova tesen ior nav shi tsahan ve nena?
8 Aôndo tesen se dooshima na ken akaa a a we se man tsaha u a ne se ken Mkaanem nam la man ken kwaghyan u ken jijingi u a ne se sha ikyev i “wanakiriki u jighjigh man u fan kwagh” la. (Mat. 24:45; Heb. 12:5, 6) Yehova shi wasen se sha ikyev i tiônnongo u Kristu man ior mba a ne ve lu “uiyua” ken tiônnongo la. (Ef. 4:8) Heela tseegh ga, Yehova shi kenger se sha er una nenge er se lu ngohol tsaha u a ne se sha dooshima la, man sha u keren igbenda i una seer wasen se yô. Pasalmi 32:8 kaa ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.” Nenge er i doo u hanma shighe yô, se ungwan imo i Yehova sha wono! Doo u se za hemen u hiden a ayol a ase ijime hen a na, gadia ngu Ortesen se man Ter wase u dooshima.—Ôr Mateu 18:4.
9. Ka aeren a nyi i doo u se paleghaa, man ka sha ci u nyi?
9 Nahan kpa, mayange se de nen ser iyolgengese man m-ban u jighjigh shin “icugh i isholibo” i ya tor ken a vese ga. (Heb. 3:13; Yak. 4:6) Ashighe kpishi aeren ne ka a hii zum u or lu henen sha akaa a vough ga yô. Alaghga nana hingir u vendan akaawan a ken Ruamabera je kpaa. U hemban vihin je yô, alaghga nana tume ityough ken ieren i nan i bo la je yô, nana hingir orihyom u Aôndo. Nenge er a lu kwagh u vihin kpishi sha wono! (Anz. 1:22-31) Nenge ase ikyav i Kain, waniunda u Adam man Ifa la.
Yehova Nengen Akaa Cii shi Eren Kwagh sha mi Kpaa
10. Yehova yange venda nagh ku Kain sha ci u nyi, man Kain er nena?
10 Shighe u Kain man Abel va a nagh u va nan Yehova la, yange kwagh gba Yehova sha nagh ku ve soo u nan un la tseegh ga, kpa kwagh gba un sha awashima ve kpaa. Sha nahan yô, Aôndo lumun nagh ku Abel na un sha jighjigh la, kpa gema venda ku Kain, ku ku tese m-ban u jighjigh u nan la. (Gen. 4:4, 5; Heb. 11:4) Kain yange ma hen kwagh sha kwagh u za hemen la nahan ma gema inja, kpa er nahan ga, de vihi a vihi ishima a anngô na.—Gen. 4:6.
11. Kain yange hingir u lun a ishima i wan atseregh sha ci u nyi, man kwagh la tese se nyi?
11 Yehova nenge ieren i bo i i lu jiren Kain ken ishima la, nahan kaa a na ér luun er Kain una er kwagh u sha mi yô, ma i saan un iyol. Kpa Kain dondo kwaghwan u Orgban se ne ga, nahan wua anngô na. Gbenda u Kain na Aôndo mlumun sha mpin u pine un ér, “anngôu Abel, ngu hana?” la tese er lu a bo ishima yô. Kain kaa ér: “M fa ga, m kor anngômô?” (Gen. 4:7-9) Sha kpôô yô, ishima i wa atseregh, ka i venda kwaghwan u Aôndo je kpaa! (Yer. 17:9) Nahan se hen nen kwagh sha akaa a ior mba i er kwagh ve ken Bibilo la, sha er se venda mbamhen mba bov man asaren a bo shighe u a hii a hii u van se ken ishima la je yô. (Ôr Yakobu 1:14, 15.) Aluer i wa se kwagh ken Ruamabera yô, se wuese nen shi se nenge nen un ser ka ikyav i tesen ér se doo Yehova ishima.
Isholibo i ken Myer i Môm kpa Ngi Ga
12. Yehova eren a orisholibo nena?
12 Alaghga mbagenev vea hen ér aluer or kôr ve a kwaghbo ga yô, vea war mtsaha. (Ps. 19:12) Kpa jighilii yô, isholibo i ken myer i môm ngi ga. Sha ci u “akaa cii nga gbar gbar, i tar a tar a kpaa sha ashe a Wen u kwagh a zough se a Na la.” (Heb. 4:13) Yehova ka Orjir u a karen mbamhen mba ken atô u ishima yase yô, nahan gbenda u a eren kwagh a orsholibo la ka u zua sha ijirôron na i vough la. Ngu “Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je.” Kpa “u tsahan” orsholibo u nan vende u geman ishima shin nan “eren asorabo sha apera” shi nan henen aferakaa la yô, “deen ga.” (Eks. 34:6, 7; Heb. 10:26) Gbenda u Yehova er kwagh a Akan man Anania kua Safira la tese mimi u kwagh ne.
13. Mbamhen mba bov yange ve na Akan hingir u lun a ieren i bo nena?
13 Akan yange per tindi u Aôndo wa jighilii la, nahan za ya ishar ken gar u Yeriko, va yer ken tenti na; a shi nan kpa tsombor na lumun a kwagh u er ne. Mba va fe isholibo i Akan la yô, a tese er un fe ér mimi je un er isholibo i vesen yô, gadia a kaa ér: “M er TER . . . isholibo.” (Yos. 7:20) Akan kpa hingir u lun a ishima i bo er Kain nahan. Kpa Akan yô, lu hua na ve hingir or u wan atseregh ye. Er yange gba u a na Yehova akaa a i ya ishar la yô, lu Aôndo jighilii ii un ye, nahan kwagh ne wua un kua tsombor na cii.—Yos. 7:25.
14, 15. Aôndo yange venda Anania man Safira sha ci u nyi, man kwagh la tese se nyi?
14 Anania vea kwase na Safira yange ve lu ken tiônnongo u Kristu u tsuaa u lu ken Yerusalem la. Pentekosti u ken inyom i 33 la yange karen yô, tiônnongo jimin cii lumun ér vea er iyua sha u wasen mbananjighjigh mbahev mba ve lu ken Yerusalem her la. Yange gba u hanma or nana er iyua sha kwagh u nan nenge i doo nan la. Tsô Anania tee sule pande inyaregh koso, gema ki ki shi la za er iyua a mi; kwase na kpa fa kwagh sha mi. Nahan kpa va kaa ér ka inyaregh ki un tee sule cica cii je un er iyua a mi ye. A shi nan kpa Anania vea kwase na yange ve soo ér tiônnongo a wuese ve. Kpa kwagh u ve er la lu ieren i icughugh. Yehova pase apostoli Peteru kwagh u ve er la sha ivande, nahan a pine Anania ityôkyaa i a tsugh ve yô. Been maa Anania gbidye inya kpe her je. Ica gba ga maa Safira kpa kpe.—Aer. 5:1-11.
15 Anania man Safira yange ve gba ken kwaghbo ne abu sha ci u myen ve ga. Kpa yange ve tema ve hen sha aie u vea er sha u tsughun mbaapostoli yô. Man kwagh u hemban vihin je yô, ve ‘er icighan jijingi u Aôndo aie.’ Kwagh u Yehova er a ve la tese wang ér a wa iyol u kuran tiônnongo na sha ikyev i mbaatsereghev. Sha mimi yô, “u gban sha ikyev i Aôndo u uma [la], ka kwagh u cier iyol” kpen kpen!—Heb. 10:31.
Eren Kwagh sha Mimi Hanma Shighe Cii
16. (a) Satan ngu nôngon ér una hôngor ior mba Aôndo nena? (b) Ka igbenda i nyi nahan Diabolo a hôngor ior a mi hen ijiir you we?
16 Satan ngu nôngon sha afatyô na cii ér una hôngor se nahan Yehova a̱ venda se. (Mpa. 12:12, 17) Tar u ieren i yavaor man ipila i dumbur ker ne tese awashima u Diabolo u ifer ne wang. Ka kera taver u nengen ufoto mba ijimbagh sha kômputa shin sha akaa a tesen foto agen ainge ga. Mayange se gba nen ken ameen a Satan ne ga. Kpa se gema se lu nen a ieren i ngise orpasalmi Davidi kpa lu a mi ve nger mkaanem man la. A nger ér: “Me ver ishima sha gbenda u u lu a acôghor a wan iyol ga yô. . . . Me zende a ishima i lun a acôghor a wan iyol ga ken iyou yam.”—Ps. 101:2.
17. (a) Yehova pasen asorabo a or er la ken igbar sha ci u nyi? (b) Doo u se kange ishima u eren nyi?
17 Yehova kera pasen asorabo a vesen man icugh sha ivande nyian er yange eren sha ashighe a tsuaa la nahan ga. Nahan kpa, nengen hanma kwagh cii man una pase hanma kwagh ken igbar sha shighe na man sha gbenda u a nenge i doo un la. Paulu kaa ér: “Ior mbagenev yô, asorabo a ve nga ken igbar je nga hemen ve u zan ken ijir, kpa mbagenev di yô, asorabo a ve gema dondo ve ijime.” (1 Tim. 5:24) Ka dooshima ka a mgbegha Yehova ve a pase asorabo a or ken igbar ye. Tiônnongo doo un ishima shi a soo u kuran mlu u wang u ker la. Kpa zungu mba ve er isholibo kpa ve gem ishima sha mimi la mhôônom. (Anz. 28:13) Nahan se civir nen Aôndo a ishima i môm shi se palegh nen akaa a aa hôngor se la.
Lu a Ishima i Gbar Gbar
18. Tor Davidi yange soo ér wan na a nenge Aôndo nena?
18 Tor Davidi yange kaa a wan na Solomon ér: “Fa Aôndo u teru, civir Un a ishima i môm man ishima i gbar gbar kpaa; gadia TER tev asema cii, man A kav hanma mhen cii.” (1 Kron. 28:9) Davidi yange soo ér wan na Solomon a na Aôndo jighjigh tseegh tsô ga, kpa soo ér a fa er kwagh u ior mba Yehova a gbe Un ishima tsung yô. Er kwagh u mbacivir Yehova a gbe un ishima kpishi nahan, doo u ga he?
19, 20. Pasalmi 19:7-11 tese ér kanyi yange i wase Davidi ve kporom ikyua a Aôndo, man se dondo ikyav na la nena?
19 Yehova fa ér mbaasemaamimi vea va hen a na shi vea fa aeren na a dedoo la nahan vea var a na. Sha nahan yô, Yehova soo ér se fa un shi se fa aeren na a dedoo la kpaa. Se er kwagh ne nena? Se er kwagh ne sha u henen Mkaanem nam shi zuan a averen a na.—Anz. 10:22; Yoh. 14:9.
20 Ú er Mkaanem ma Aôndo ayange ayange a iwuese shi u eren msen wer a wase u u dondo ma kpa? U nenge er i doo u dondon akaawan a ken Bibilo kpa? (Ôr Pasalmi 19:7-11.) Aluer u ngu eren nahan yô, jighjigh u ú ne Yehova man mdoo u a doo u ishima la una seer taver. Un di una gema a kporom hen a we, una zenden vea we ikyooso ikyooso. (Yes. 42:6; Yak. 4:8) Sha mimi yô, Yehova una tese u ér u doo un ishima sha u veren we doo doo shi kuran we er u lu zenden sha gbenda u hogholoo u zan ken uma ne yô.—Ps. 91:1, 2; Mat. 7:13, 14.
U Na Mlumun Wer Nyi?
• Yehova karen se sha ci u nyi?
• Kanyi ka i na ve mbagenev ve hingir mbaihyomov mba Aôndo?
• Se tese ser Yehova ngu kpôô kpôô hen a vese nena?
• Se civir Aôndo a ishima i gbar gbar nena?
[Study Questions]
[Picture on page 4]
Yehova kenger se er ormaren u ônov mba nan ve doo nan ishima nahan nena?
[Picture on page 5]
Ieren i Anania la tese se nyi?
[Picture on page 6]
Kanyi ia wase se ve se za hemen u civir Yehova a ishima i mômô?