Yehova Kor Se Sha Ci U Mkpeyol Wase

“Ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.”—2 KRON. 16:9.

1. Yehova karen se sha ci u nyi?

 YEHOVA ka Ter u vough. A fa hanma kwagh cii kua “mhen” wase kpaa. (1 Kron. 28:9) Nahan kpa tôvon se ér una kôr se a isholibo ga. (Ps. 11:4; 130:3) Kpa, kor se sha dooshima sha er kwagh môm una vihi mlu wase vea na shin ishimaveren i se lu a mi i va zuan a uma u tsôron la ga yô.—Ps. 25:8-10, 12, 13.

2. Yehova pasen agee a na hen unô?

² Yehova hemba tahav cii shi nengen akaa cii. Sha ityôkyaa ne yô, una fatyô u yiman ior nav mbajighjigh hanma shighe u ve yer un cii, shi una sue ve zum u ve tagher a ameen kpaa. Takerada u 2 Kroniku 16:9 kaa ér: “Ashe a TER nga jingen sha akaa a sha won cii, sha u Una pase agee Na hen mba asema a ve a lu [jighilaa] her a Na yô.” Fa wer, Yehova pasen agee na hen mba ve civir un a ishima i jighilaa yô, ka ishima i wang i i eren kwagh u vough je la. Pasen agee a na hen mbacughugh shin mbaatsereghev ga.—Yos. 7:1, 20, 21, 25; Anz. 1:23-33.

Zenden Vea Aôndo

3, 4. Inja i u “zenden vea Aôndo” yô ér nyi, man ka akav a nyi a seer tesen kwagh nee?

³ Taver ior kpishi u nan jighjigh ér Aôndo u a  gbe sha man tar u u kehe kpishi ne una lumun ér uumace ve zende vea na. Nahan kpa, ka kwagh u Yehova a soo ér se er vough je la. Sha ayange a tsuaa la Enoki man Noa ve ‘zende vea Aôndo.’ (Gen. 5:24; 6:9) Mose yange “taver ishima er ngu nengen a u i nengen a Na ga la nahan.” (Heb. 11:27) Tor Davidi yange zende vea Ter na u sha la a iyol hiden a mi ijime. A kaa ér: “Er [Yehova] A lum ken uwegh ku yanegh yô, me tenger ga.”—Ps. 16:8.

⁴ U ngu wer se fatyô u kôron Yehova sha uwe zenden vea na kpôô kpôô ga. Kpa se fatyô u zenden vea na sha ikyav. Se er kwagh ne nena? Orpasalmi Asav nger wener: “M ngu a We gbem, U kôrom sha uwegh agh ku yanegh. Ú hemen mo sha mhen Wou.” (Ps. 73:23, 24) Jighilii yô, se mba zenden vea Yehova zum u se dondo akaawan a na a a lu ken Mkaanem nam ma a ne se sha ikyev i “wanakiriki u jighjigh man u fan kwagh” la.—Mat. 24:45; 2 Tim. 3:16.

5. Yehova kor ior nav mbajighjigh er ter u lun a dooshima nahan nena, man doo u se nenge un nena?

⁵ Mba ve zenden vea Yehova la ve doo un ishima kpishi, nahan nengen sha a ve er ter u lun a dooshima nahan. We ve ikyo shi kor ve shi tesen ve kpaa. Aôndo kaa ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.” (Ps. 32:8) Pine ase iyol you wer: ‘M nenge a iyol yam er m lu zenden vea Yehova ikyooso ikyooso, m lu keghen ato sha kwaghfan na, fan ken ishima mer ngu kuran mo sha dooshima nahan kpa? Er m fe mer ngu ikyua a mo nahan kwagh la bende a mbamhen av man iliam yam kua aeren a am kpa? Man ka mea er kwaghbo nahan, m nenge Yehova mer ka Aôndo u lun a dooshima shi zungwen mhôônom, u a soo u wasen mba ve gem asema sha mimi ve hidi hen a na la kpa?’—Ps. 51:17.

6. Yehova hemba ormaren wase kpôô kpôô sha nyi gbenda?

⁶ Ashighe agen yô, cii man se er ma kwaghbo yô, Yehova una yima se. U tesen ikyav yô, alaghga una nenge ishima yase i i we atseregh kpishi ne ia hii u tômon kwagh u a lu vough ga yô. (Yer. 17:9) Kwagh ka una lu nahan yô, a er kwagh fele je i hemba er mbamaren asev kpôô kpôô ma ve er la, sha ci u “akurashee a Na” nga a tahav mbu nengen a mlu wase u kimi shi karen mbamhen asev mba ken atô kpaa. (Ps. 11:4; 139:4; Yer. 17:10) Time ase sha kwagh u Aôndo yange er sha kwagh ugen u er Baruki, akawe u Yeremia man ijende na i ishima ishima la.

A Er Kwagh a Baruki sha Dooshima

7, 8. (a) Baruki lu ana, man lu mhen u bo u nyi alaghga hii u van un ken ishima? (b) Yehova yange er kwagh a Baruki er ter u lun a dooshima nahan nena?

⁷ Baruki lu akawe u fan tom tsema tsema, yange er tom sha jighjigh vea Yeremia sha u pasen ajiraôron a Yehova hen Yuda; tom ne lu u taver kpen kpen. (Yer. 1:18, 19) Kpa sha shighe ugen la, Baruki u alaghga due hen tsombor u lun a kwagh ave la gba keren “akaa a vesen” sha ci na. Alaghga de isharen i zan ikyura shin lun a uyôughyôughmbaakaav la hii u jiren un ken ishima. Er i lu cii kpa, Yehova nenge a mhen u bo u lu wan amishe ken ishima i Baruki la. Yehova maa tindi Yeremia fele za kaa a Baruki ér: “U kaa wer: Aye! Kwagh tserem ve! gadia TER seer ijungwen sha ican yam; m vôr a mkin wam, man m zough a mmem ga!” Shi Aôndo kaa a na ér: “U ngu keren akaa a vesen sha ci wou iyol youwe? De kera keren a ga.”—Yer. 45:1-5.

⁸ Er Yehova ôr kwagh a Baruki sha imo i taver nahan kpa, lu sha ishimavihin ga, lu sha gbenda u tesen ér ngu ter u kwagh u wan u nan a gbe nan ishima tsung yô. A shi nan kpa, Aôndo nenge ér Baruki lu a ishima i bo ga, shin er lu tômon akaa a vesen nahan kpaa. Heela tseegh ga, Yehova shi fa er Yerusalem man Yuda lu ken ayange a ve a masejime yô, nahan soo ér Baruki a gba hen shighe la ga. Sha nahan yô, Aôndo taver or u civir un ne ishima ér a hide a tile sha gbenda, á umbur un ér Un “ngu van a kwagh u bo sha uuma  cii” shi a kaa ér aluer Baruki er kwagh sha kwaghfan yô, una war. (Yer. 45:5) Jighilii yô, Aôndo lu kaan ér: ‘Wa ikyo Baruki. Umbur kwagh u a sôôn eren mbaasorabo mba ken Yuda man Yerusalem ne. Za hemen u eren kwagh sha mimi nahan lu uma! Mo me kura u.’ Mkaanem ma Yehova man yange ma kôr Baruki ken ishima, nahan dondo kwaghwan u Yehova la. Nahan war mtim u anyom kar 17 ve i va tim Yerusalem la.

9. U na mlumun sha mbampin mba i pin ken ikyumhiange la nena?

⁹ Er u lu henen sha kwagh u Baruki ne yô, time ase sha mbampin mban kua avur a ruamabera ne: Gbenda u Aôndo er kwagh a Baruki la tese se nyi sha kwagh u Yehova man a nengen mbacivir un laa? (Ôr Mbaheberu 12:9.) Er se lu ken ashighe a ican nahan kpa, se hen nyi sha kwagh u Aôndo wa Baruki man gbenda u Baruki dondo kwaghwan shon laa? (Ôr Luka 21:34-36.) Mbatamen mba ken Kristu vea dondo ikyav i Yeremia la, sha u wan mbacivir Yehova ikyo er Yehova a eren a ve la nahan nena?—Ôr Mbagalatia 6:1.

Wan Dondo Dooshima u Ter Na

10. I na Yesu tahav mbu eren tom na u lun Ityough ki nongo u Kristu la nena?

¹⁰ Cii man shighe u Mbakristu la yô, Yehova pasen dooshima na sha ikyev i uprofeti nav man sha ikyev i mbacivir un mbajighjigh mbagen. Nyian ne se mba nengen a dooshima la sha gbenda u hemban cii ken Yesu Kristu u a lu Ityough ki nongo u Kristu la. (Ef. 1:22, 23) I ôr kwagh u Yesu ken Mpase ér ka waniyôngo u lun a “ashe . . . ataankarahar, ka ujijingi mba utaankaruhar mba Aôndo mba i tindin ve shin tar cii la.” (Mpa. 5:6) Sha mimi yô, Aôndo na Yesu icighan jijingi na, nahan ngu a mkav u vough. Un kpa nengen a or u se lu ken atô la, ma kwagh môm karen ashe na ga.

11. Ka tom u nyi Kristu a erene, man ieren na a vese ngi kwagh môm a i Ter na nena?

¹¹ Nahan kpa, Yesu ngu shaala ngu kuran se er ka ordasenda nahan ga, di er Yehova kpa a kor se inja er ka ordasenda ga nahan. Karen se sha dooshima. Ititom i Yesu i “Ter u tsôron” la umbur se tom u una er sha u nan mba ve ne un jighjigh la cii uma u tsôron yô. (Yes. 9:6) Heela tseegh ga, er Kristu a lu Ityough ki nongo u Kristu yô, una fatyô u mgbeghan Mbakristu mba ve vie, hemban je yô mbatamen ér ve sur  mba i yen ve iyol la asema shin ve wa ve kwagh kpaa.—1 Tes. 5:14; 2 Tim. 4:1, 2.

12. (a) Uwashika mba Yesu nger atôônanongo a ataankarahar a ken Ashia u Kiriki la pase se nyi sha kwagh naa? (b) Mbatamen mba tesen ér mba nengen ikyumile i Aôndo er Kristu kpa a nengen ve nahan la nena?

¹² Se nenge a ikyo i Kristu a we ikyumile na tsung la ken uwashika mba yange nger mbatamen mba ken atôônanongo a ataankarahar a ken Ashia u Kiriki la. (Mpa. 2:1–3:22) Yesu yange pase ken uwashika mbara ér un fa kwagh u a lu zan hemen ken hanma tiônnongo yô, shi tese er kwagh u mbadondon un a gbe un ishima tsung yô. Man nyian kpa kape i lu je la. Er mpase la a lu kuren sha “iyange i Ter” yô, ngu hemban eren kwagh ne nyian sha gbenda u vesen cii. * (Mpa. 1:10) Ashighe kpishi Kristu ngu a tese dooshima na sha ikyev i mbatamen mba ve lu mbakuran ken tiônnongo la. Una fatyô u mgbeghan ior mba i ne ve lu “uiyua” mban ér ve za sur or ishima shin ve taver nan ishima shin ve wa nan kwagh kpaa. (Ef. 4:8; Aer. 20:28; ôr Yesaia 32:1, 2.) U nengen iniôngon ve ne wer, ka gbenda u Kristu a we u ikyo kpa?

Iwasen sha Shighe Vough

13-15. Aôndo una tsua u ungwan mbamsen asev nena? Tese akav.

¹³ I lu nahan u er msen kpoghuloo wer Aôndo a wase u nahan a ungwa msen wou, á tindi Orkristu u nan civir Aôndo ica i gbe nan va sôr u, nan taver we ishima vee? (Yak. 5:14-16) Gayô alaghga u zua a iwasen la ken kwaghôron u i ne ken mkombo u Mbakristu shin ken ityakerada yase yô. Ashighe kpishi Yehova ngu a ungwa mbamsen asev sha igbenda ne. U tesen ikyav yô, ortamen ugen yange ne kwaghôron ken tiônnongo been yô, anmgbian u kwase ugen u or sember nzughul a na yô va sugh un. Lu ahon anmgbian u kwase ne va u va gban sha kwagh u i er a na la ga, kpa wuese ortamen la sha atôakaa a injaa a ken ruamabera a a ter ken kwaghôron na la. Yange zua sha kwagh u lu zan un iyol la vough, nahan kwaghôron na la sur un ishima kpen kpen. Doo un kpishi er yange un bunde mkombo la ga nahan!

¹⁴ Time sha ikyav i mbakwarev utar mba yange ve fa mimi u Bibilo ken purusu shi ve hingir mbapasenkwagh mba ve lu a er batisema ga ker ne tsô u seer zuan a iwanger sha kwagh u iwasen i or ka nan zua a mi sha msen u eren yô. Er mbakwarev yange ve shi nôngon num yô, i tswer ve cica cii akaa kpishi. Kwagh ne na yô, ve hii u hembanato. Tsô, iyange igen mbakwarev mban zua zwa ér a va naan ve kwaghyan u pepe yô, vea kera hide a agbande a i ne ve kwaghyan a mi la ga. Mbapasenkwagh mba utar mbara maa kera fa kwagh u vea er ga. Aluer ve kohol ve ken ihyembeato ne yô, vea per tindi u Yehova a we ken Mbaromanu 13:1 la. Aluer ve kohol ve ga yô, mbakwarev mbara vea hide a ta num sha a ve.

¹⁵ Er iorov mba utar mban zua a ian i zan idyu ayol ave ga yô, ve cii ve er msen ér Aôndo a na ve kwaghfan. Kpernan pepe yô, ve mase kaven er ve cii ve tsua u eren kwagh gbenda môm yô, ve tsua ér vea za ngohol kwaghyan u pepe la ga. Nahan mbakuran purusu mba hidi mba ve u va ngohol agbande yô, iorov mbautar mban  lu a agbande a nan ga. Doo mbakwarev mban kpishi er Un u a “ongo msen” la wase ve nahan!—Ps. 65:2.

Lu a Vangertiôr Wer Mlu Wou u ken Hemen la Una Doo

16. Tom u pasen kwagh tese ér kwagh u mbaasemaamimi gba Yehova ishima nena?

¹⁶ Tom u pasen kwagh u i lu eren tar sha won cii ne kpa ka ikyav igen i tesen ér hanma ijiir i mbaasemaamimi ve lu cii kpa kwagh ve gba Yehova ishima. (Gen. 18:25) Ashighe kpishi Yehova ngu a yar tom a mbatyomov nahan ve hemen ior nav ve za a ve hen mbaasemaamimi mba ve lu sha ajiir a i lu a vande pasen loho u dedoo ne her ga yô. (Mpa. 14:6, 7) U tesen ikyav yô, Aôndo yange tindi ortyom na hemen Filibu, orivangeli u sha derianyom u hiihii la za a na hen ortom u vesen ugen u ken Etiopia za pase un akaa a ken Ruamabera. Lu nyi i due kere? Or la lumun loho u dedoo, er batisema shi hingir ordondon u Yesu kpaa. *—Yoh. 10:14; Aer. 8:26-39.

17. Doo u ishima ia zer nyian se sha kwagh u mlu wase u ken hemen la ga sha ci u nyi?

¹⁷ Er tar ne u lu yemen u za kuusu nahan, “ican” i yange i tsengaôron ér ia va la ia seer zan hemen. (Mat. 24:8) U tesen ikyav yô, alaghga kwaghyan una seer taver ishe, sha ci u ior mba yamen nger shin ura nôô ga nahan iyiav doo ga shin inyaregh za ibyan. Shi alaghga tom kpa ua taver u zuan a mi, nahan a gba u mba ve lu a tom kpa vea seer eren tom ahwa imôngo. Er i lu cii kpa, mba ve ver akaa a Tartor hiihii ken uma ve shi ve ver ishe ve jighilii yô, ityôkyaa ngi i ishima ia nyian ve ga. Ve fa ér ve doo Aôndo ishima man una nenge sha a ve kpaa. (Mat. 6:22-34) U tesen ikyav yô, nenge er Yehova yange nenge sha Yeremia sha shighe u Yerusalem lu ken ashighe a ican ken inyom i 607 C.S.Y. (Cii man Shighe u Yesu) la yô.

18. Yehova yange tese ér Yeremia doo un ishima shighe u i kase Yerusalem sha u nôngon ityav a na la nena?

¹⁸ Shighe u Mbababilon kase Yerusalem sha u nôngon ityav a ve la, i kôr Yeremia i za wuhe ken Tembe u Mbakuran. Nahan zuan a kwaghyan hana? Yange a pase un yô, ma ker kwaghyan iyol na. Kpa gema lu ior mba ve kase un la lu veren ashe a ve ér ve naan un kwaghyan ye, man ior mbara kpishi lu mbaihyomov nav! Nahan kpa, Yeremia suur sha ior ga, lu sha Aôndo u tôndo zwa ér una nengen sha a na la. Yehova yange kure ityendezwa na la kpa? Yange kure yum! Yehova nenge ér Yeremia zuan a ‘kpenbredi ayange ayange, zan zan bredi u ken gar la kar been.’ (Yer. 37:21) Yeremia man Baruki man Ebedimeleki kua mbagenev war ijen man angev kua ku u ior kpishi kpe hen shighe shon la.—Yer. 38:2; 39:15-18.

19. Er se ver ashe a mlu u ken hemen nahan, doo u se kange ishima u eren nyi?

¹⁹ Sha mimi yô, “ashe a Ter . . . nga sha mbaperapera shi veren ato sha zamber ve kpaa.” (1 Pet. 3:12) Doo u er Ter u u sha la a lu kuran we nahan ga he? Er u fe wer ashe na nga sha a we sha ci u mkpeyol wou nahan, kundu u iyol ga he? Nahan yô, kange ishima wer, u za hemen u zenden vea Aôndo, aluer ka nyi je ia er kpaa. Se fatyô u lun a vangertiôr ser Yehova una za hemen u kuran mba ve lu civir un sha mimi la cii sha dooshima.—Ps. 32:8; ôr Yesaia 41:13.

[Footnotes]

Ú Fatyô u Pasen Kpa?

• Se tese ser se mba “zenden vea Aôndo” nena?

• Yehova yange tese ér Baruki doo un ishima nena?

• Er Yesu a lu Ityough ki nongo u Kristu yô, dondon aeren a Ter na nena?

• Ka sha nyi igbenda se tese ser se suur sha Yehova ken ashighe a ican nee?

[Study Questions]

[Pictures on page 9]

Mbatamen mba ken Kristu nyian mba dondon ikyo i wan i Yehova la, vough er Yeremia man Baruki nahan

[Picture on page 10]

Yehova una fatyô u nan iwasen sha shighe vough nena?