Civir Aôndo a ‘Ishima i Môm man Mhen Môm’

MBAYUDA man mba ve nyôr a nyôr nongo u Mbayuda cii yange ve kohol ve lu ungwan kwagh u mbahenen mba Yesu Kristu lu ôron ve la. Lu sha iyange i Iniongo i Pentekosti, mbavannya mban va ken Yerusalem, mbagenev due sha ajiir a icaa, er gar u Roma u lu shin ityôtar la man gar u Parthia u lu sha Ityoughkitaregh la nahan. Ikpelaior ne lu lamen ijô kposo kposo. Nahan kpa, mbahenen mba Yesu mba ve lu lamen a ve la lu Mbagalatia. Tsô kwagh ne nzughul mbavannya mban, nahan ve gba pinen ér: “Er nan man se ongo hanmô ve ôron kwagh ken zwa wase u i mar se a mini?”—Aer. 2:8.

Tsô apostoli Peteru mough sha pase ve er i hii  ve ve lu nengen a imba ivande ne yô. Ikpelaior la lumun loho la fese je. Nahan i er mbahev udubu imôngo batisema. (Aer. 2:41) Shin er tiônnongo la lu ngeen seer fele fele nahan kpa, ve lu ken mzough her. Orngeren Bibilo, Luka kaa ér: “Ikpelaior i i na jighjigh yô, asema a ve man mhen ve hingir kwagh môm.”—Aer. 4:32.

Ior udubu imôngo mba ve er batisema sha iyange i Pentekosti u inyom i 33 la soo u lun ken Yerusalem shighe gôgônan, sha er vea seer zuan a mkav sha kwagh u jighjigh ve u he ne yô. Kpa u ngu wer, shighe u ve lu zan Yerusalem la , ve wa ishima u za tsan ker gbem ga. Sha nahan yô, gba u a er iyua sha u wasen mbahev mban. Mbananjighjigh mbagenev yange ve tee akaa a ve lu a mi la nahan ve va a inyaregh kira ve va na mbaapostoli sha er a wase mba ve lu a kwagh ga mbara yô. (Aer. 2:42-47) Kwagh ne tese dooshima man erdoo kpen kpen!

Mbakristu mba mimi ndera eren erdoo sha dooshima ica i gba hegen. Nyian kpa, tiônnongo u Kristu ngu civir Yehova ken mzough a ‘ishima i môm man mhen môm.’ Mbakristu asange asange ka ve na shighe ve man tahav vev kua inyaregh vev sha u pasen loho u dedoo shi suen Tartor u Aôndo kpaa.—Nenge akwati u a lu a itinekwagh ér “Igbenda i Mbagenev Ve Tsough u Eren Iyua” la.

[Box on page 6]

IGBENDA I MBAGENEV VE TSOUGH U EREN

IYUA I SUEN TOM U PASEN KWAGH U I LU EREN TAR SHA WON CII NE

Mbagenev kpishi ka ve er iyua ne sha u veren inyaregh ki vea kenden shin akwati u eren iyua u i nger sha mi ér “Worldwide Work” (Tom u i Lu Eren Tar sha Won Cii La).

Hanma uwer yô, atôônanongo a Mbashiada mba Yehova nga a tindi a inyaregh kin shin afishi a Mbashiada mba Yehova a a lu ken tar ve la. Or a fatyô u tindin a inyaregh ki nan soo u eren iyua a mi la hen afishi a Mbashiada mba Yehova a hen tar u nan la. Aluer or ngu tindin a takerada u bamegh u i yer ér cheque la yô, nana nger ér i kimbi “Watch Tower.” Or a fatyô u eren iyua sha akaa a hweeman akaa a injaa agen. Aluer or ngu tindin a amba akaa ne yô, nana nger kwagh u tesen ér akaa shon ka iyua.

IGBENDA I EREN IYUA

Dugh u eren iyua sha inyar jighilii kera kpa, igbenda igen ngi i or a fatyô u suen tom u Tartor u i lu eren tar sha won cii ne yô. Igbenda shon yô ka:

Ishiôlansi: Or nana fatyô u ngeren ér i na Watch Tower inyaregh ki ishiôlansi shin penshen u nan.

Bam: Or nana fatyô u ngeren ér shighe u nan kpe yô, i na Watch Tower inyaregh ki nan koso ken bam man jindinyar i nan we ken bam nan zough a mtsera sha mi la er atindi a bamegh a tese la vough shin penshen u nan.

Shia man Mtsera: Or nana fatyô u nan Watch Tower iyua i shia i nan yam vea bam shin kômpeni shin mtsera u nana zua a mi sha anzô a ior ve ngohol hen a nan la.

Inya Shin Ya: Or nana fatyô u nan Watch Tower iyua sha inya shin ya u a fatyô u teen yô. Aluer ka ya u ior ve lu her u or nana lu her zan zan nana kar kpen je kpaa. Kpa a hemba doon aluer u lam a afishi a branci a ken tar wou cii ve u er imba iyua ne yô.

Ngeren u Tesen Kwagh u U Soo Wer i Er Shighe u U Kpe yô man u Nan Orgen Shin ma Nongo Inyaregh Wer Ve Koso: Or nana fatyô u ngeren ér shighe u nan kpe yô, i na Watch Tower akaa a nan lu a mi cii shin inyaregh ki nan. Shin nana fatyô u ngeren ér inyaregh ki nan ne Watch Tower ér a lu nan a mi la a saa a mi shighe u nan kpe yô.

Ishember i “igbenda i eren iyua” ne tese ér aluer gba u or nana er imba iyua ne yô, gba u nana fa igbenda ne vough, nana wa iyol cii ve nana er iyua ne ye.

Aluer u soo u fan seer yô, nger Afishi a Branci a Mbashiada mba Yehova a ken tar u Najeria la sha adereshi u a lu shin heen ne gayô gbidye waya. U fatyô pinen afishi a branci a a nengen sha tar u ú lu ker la kpaa.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: (052) 202020