‘Hendan A Diabolo’ Er Yesu Kpa Er Nahan
‘Hendan A Diabolo’ Er Yesu Kpa Er Nahan
“Hendan nen a diabolo tsô una yevese ne.”—YAK. 4:7.
1. Ka ahendan a nyi Yesu yange fa er una tagher a mi shin taraa, man lu nyi ia gema a due kere?
YESU KRISTU yange fa er Diabolo una hendan a na yô. Se fa kwagh ne sha ci u kwagh u Aôndo ôr a iyô, i i lu jijingi u ifer u hembanato u yange lam sha ikyev i i̱ la, ér: “Me ver ihyom hen atô wou vea kwase [nongo u Yehova u sha la], man hen atô u vor wou a vor na kpaa, u [Yesu Kristu] ua cagh u ityough, we di kpaa ú cagh u ikishinguhar.” (Gen. 3:14, 15; Mpa. 12:9) Yange gba u a cagh Yesu ikishinguhar sha u wuan un shighe u va shin tar la, kpa lu u una saa shin ku ga, gadia Yehova una nder un una na un iengem sha. Kpa mcagh u a cagh iyô ityough la yô a lu mtim u a tim Diabolo gbem sha won la.—Ôr Aerenakaa 2:31, 32; Mbaheberu 2:14.
2. Yehova yange lu a vangertiôr ér Yesu una hemba ameen a Diabolo la sha ci u nyi?
2 Yehova yange lu a vangertiôr ér shighe u Yesu una va shin tar la, una hendan a Diabolo kpa una er tom na una kure. Er nan ve Yehova lu a imba vangertiôr la nahana? Ka sha ci u yange gba Yesu sha shi lu vea na uicôronmbaashighev imôngo shi nenge er eren kwagh yô, nahan fa er “or u fan tom” man “Waniunda ken akaa a i gbe a cii” ne ungwan tindi shi eren kwagh sha mimi yô. (Anz. 8:22-31; Kol. 1:15) Sha ityôkyaa ne yô, shighe u Yesu va shin tar ne, nahan i na Diabolo ian ér a kar un zan zan i ar ken ku la je kpa, Aôndo lu a vangertiôr ér Wan na u môm môm la una hemba.—Yoh. 3:16.
Yehova Kor Mbatomov Nav
3. Diabolo nengen mbatomov mba Yehova nena?
3 Yesu yange yila Diabolo ér “tor u tar ne,” nahan mase kaan a mbahenen Nav ér a tôv ve a ican vough er lu i tôv un a ican nahan. (Yoh. 12:31; 15:20) Tar u u lu sha ikyev i Satan Diabolo ne kôr Mbakristu mba mimi ihyom sha ci u mba civir Yehova shi mba pasen kwagh u perapera yum. (Mat. 24:9; 1 Yoh. 5:19) Ka asande a mba i shigh ve mkurem, mba vea va tema tor vea Kristu ken Tartor na u sha la je Diabolo a hembe anen ve vanger cii ye. Mbashiada mba Yehova mba ve lu kpishi, ve lu a ishimaverenkeghen i va lun uma gbem sha won ken paradiso shin tar la kpa Satan an ve vanger. Mkaanem ma Aôndo ta se icin ér: “Orihyom wen diabolo ngu zenden er begha u tan kume nahan, keren or u una ya yô.”—1 Pet. 5:8.
4. Kanyi i tese ér ior mba Aôndo mba hendan a Diabolo sha shighe wase nee?
4 Nahan kpa se mba hendan a Diabolo, sha ci u se mba ken nongo u Yehova Aôndo a lu suen u yô. Nenge ase akaa a mimi ne: Ken atô u anyom 100 a a kar ken ijime ne, mbahemenev mba vihin tu mbagenev nôngo ér vea tim Mbashiada mba Yehova kera. Nahan kpa Mbashiada mba Yehova mba ngeen seer a seer tsô, je yô ve zurum u nyôron iorov 7,000,000 ken atôônanongo a hemban 100,000 tar sha won cii. Kpa gema ka mbahemenev mba vihin tu mba yange ve tôv Mbashiada mba Yehova a ican yum la ve tim kera ye!
5. Kwagh u i er ken Yesaia 54:17 la ngu kuren sha mi sha kwagh u ior mba Yehova nena?
5 Aôndo yange tôndo zwa shighe u lu ôron kwagh a ikyurior i Iserael u tsuaa, u yila i ér “kwase” na la ér: “Hanma ityumugh ki i var sha ci u vihin we iyol, ikyôr ia lagh ki ga; hanma zwa u ua mough ua hendan a we sha ijir kpaa, ú hemba u. Kwagh ne ka dyako u mbayev mba TER kua perapera ve u a dugh her a Mo je ne.” (Yes. 54:11, 17) Ior mba Yehova tar sha won cii nenge er ityendezwa la i lu kuren shami ken ayange a “masejime” ne nahan. (2 Tim. 3:1-5, 13) Nahan se za nen hemen u hendan a Diabolo, gadia ikyôr ia lagh ma ityumugh ki una yar tom a mi sha u timin ior mba Aôndo kera la ga, sha ci u Yehova ngu a vese.—Ps. 118:6, 7.
6. Kwaghôron u profeti u Daniel ôr se nyi sha kwagh u mlu u ken hemen u hemen u Diabolo?
6 A va tim hanma vegher u hemen u Satan cii kera ken mkur u botar u a mgbôghom ne. Profeti Daniel yange tsengaôron ér: “Sha ayange a utor mbara [mba ve lu sha shighe wase ne], Aôndo u Sha Una ver tartor ugen [sha] u ua gba mayange ga yô, man shi tahav mbu u kpaa mbua hingir sha ikyev i ma ikyur igen ga, kpa ua hembe ityartor igen [i i lu hegen] ne cii avur avur, ua tim i, kpa u yô, ua lu gbem sha won.” (Dan. 2:44) Hen shighe la, hemen u Satan man hemen u uumace mba ve yen ne cii ua kera lu ga. Hanma vegher u tar u u lu sha ikyev i Diabolo ne cii ua kar kera gbem sha won, nahan Tartor u Aôndo ua hemen sha tar cii a or u hendan a u shio.—Ôr 2 Peteru 3:7, 13.
7. Hii nan ve se fe ser mbacivir Yehova asange asange kpa vea fatyô u hendan a Diabolo?
7 Yehova una za hemen u kuran shi veren nongo na doo doo je ka u tunan ga. (Ôr Pasalmi 125:1, 2.) Kpa se di ye? Bibilo kaa ér, se kpa se fatyô u hendan a Diabolo er Yesu kpa hendan a na nahan. Sha kpôô yô, kwaghôron u profeti u Kristu yange ôr sha ikyev i apostoli Yohane la tese ér, er Satan a lu hendan a mbadondon un nahan kpa, “zegeikpelaior” i i lu a awashima u lun uma gbem sha won shin tar yô ia war mtim u tar ne. Ruamabera tese ér vea genger amo vea kaa ér: “Myom ka u Aôndo wase u A tem sha ikyônough ki torough la man shi Waniyôngo [Yesu Kristu] kpaa.” (Mpa. 7:9-14) I kaa ér mba i shigh ve mkurem mbara hemba Satan, akar a ve a a lu “iyôngo igen” la kpa mba hendan a na. (Yoh. 10:16; Mpa. 12:10, 11) Kpa gba u se nôngo kwagh tsung shi se eren msen sha gbashima ve ‘a yima se sha ikyev i orbo’ ye.—Mat. 6:13.
Ikyav i Vough i Hendan a Diabolo
8. Ken ameen a i nger ken Bibilo la, ka sha nyi Diabolo yange hii meen Yesu, nahan kpa Kristu di gema er nena?
8 Diabolo yange nôngo ér una vihi mtil sha mimi u Yesu. Satan yange mee Yesu ken taaikyôngo sha er una nôngo yô A hemba Yehova ato yô. Nahan kpa, Yesu gema ver ikyav i vough i hendan a Satan. Shighe u Yesu hôr kwaghyan ayange 40 man aime 40 la, alaghga ijen yange ia kôr un. Nahan Satan kaa a na ér: “Aluer Wea lu Wan u Aôndo je yô, kaa awen ne a̱ hingir bredi.” Kpa Yesu venda u yaren tom a tahav mbu Aôndo na un la sha u kuren gbayol na. Nahan Yesu gema kaa ér: “I nger er: Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.”—Mat. 4:1-4; Dut. 8:3.
9. Doo u se hendan a mtsera u Diabolo a ye sha asaren ase a yolough a sha gbaaôndo la sha ci u nyi?
9 Kape nyian kpa Diabolo a ye mtsera sha asaren a yolough a sha gbaaôndo a mbacivir Yehova je la. Nahan yô, ka hange hange u se taver ishima se hendan a imeen i eren idya ken tar u bo u ijimba i ngee yum ne. Mkaanem ma Aôndo kaa ér: “Ne kera fa er mbaaferev vea ya dyako u tartor u Aôndo ga zee? I̱ de tsughun ne ga, mbadyarev shin mbasôronakombo shin mbavihin ivaa sha idya shin nomso mba ve yaven a ayol a ve . . . vea ya dyako u tartor u Aôndo je ga.” (1 Kor. 6:9, 10) Kwagh ne tese wang ér ior mba ve eren aeren a ijimbagh, man ve vende u geman asema cii vea nyôr ken tar u he u Aôndo la ga.
10. Mateu 4:5, 6 tese ér ka imeen igen i nyi Satan yange yar tom a mi ér una vihi mtil sha mimi u Yesu?
10 Ruamabera ôr kwagh u môm ken ameen a Yesu tagher a mi ken taaikyôngo la, ér: “Diabolo yem a Na hen icighangar, za ver Un sha ityough ki tempel je, kaa a Na er: Aluer Wea lu Wan u Aôndo je yô, gba ase iyol You shin inya, gadia i nger er: Una wa mbatyomov Nav kwagh sha a We, sha er U̱ de te nguhar sha iwen ga yô.” (Mat. 4:5, 6) Alaghga Satan hen ér Yesu una tese ér un ngu Mesiya sha u tsuen gban shin inya. Kpa jighilii yô, ngula ma lu ieren i shami ga, kpa ma lu ieren i gengeseiyol i Aôndo ma lumun i ga shi ma sue i kpaa ga yô. Kwa ne kpa Yesu shi tile sha mimi na hen Yehova her, nahan a ôr mkaanem ma ken ruamabera sha u hendan a na. A kaa ér: “Yô, i shi i nger er: De karen Ter, Aôndo wou, ga.”—Mat. 4:7; Dut. 6:16.
11. Alaghga Satan una mee se nena, man ka nyi ia due kere?
11 Alaghga Satan una mee se ér se ker icivir sha igbenda kposo kposo. Adooga una mee se ér se eren hwe shi se wuhan iyol er ior i tar ne nahan shin se eren iemberyolough i bo. Kpa aluer se venda kwaghwan u Bibilo se gema se mba dondon aeren a tar ne yô, se fatyô u veren ishima ser mbatyomov ve kura se sha akaabo a se tagher a mi laa? Er Tor Davidi gema ishima sha isholibo i er vea Batesheba la nahan kpa, i kura un sha akaabo a yange due ken ieren na la ga. (2 Sam. 12:9-12) Nahan yô, se kar nen Yehova sha igbenda i bo ga, er u yan ikyar a tar ne nahan.—Ôr Yakobu 4:4; 1 Yohane 2:15-17.
12. Ka imeen i nyi i ter ken Mateu 4:8, 9, man Wan u Aôndo yange er nena?
12 Diabolo shi yange kaa ér una na Yesu tahav a hemen tar ne, man ngun kpa lu imeen igen i yar tom a mi ken taaikyôngo yô. Satan yange tese Yesu ityartor i sha won cii kua icivir i i, tsô a kaa a na ér: “Akaa ne cii me na U, aluer Wea gure inya, Wea civir mo yô.” (Mat. 4:8, 9) Nenge er yange soo u ngohol mcivir u a lu sha ci u Yehova tseegh la shi soo u meen Yesu ér a hemba Aôndo ato la sha wono! Er zer henen sha isharen i ma i lu un ma i civir un la kua hua u wa la cii na yô, ortyom u vande lun jighjigh la hingir u gban ken isholibo, nahan hingir Satan Diabolo, ormee u bo u bo. (Yak. 1:14, 15) Kpa Yesu yô kwagh na lu nahan ga, un yange kange ishima u tilen sha mimi hen Ter na u sha la heregh gbem, nahan a kaa ér: ‘Yem kera, Satan, gadia i nger er: Civir Ter, Aôndo wou, ka Un tseegh er Un tom ye.’ Kwa ne kpa Yesu hendan a Diabolo taveraa. Tar u Satan ne yange u doo Wan u Aôndo ishima ga shi lu kwagh u una civir iferor la kpaa ga!—Mat. 4:10; Dut. 6:13; 10:20.
“Hendan Nen a Diabolo Tsô Una Yevese Ne”
13, 14. (a) Shighe u Diabolo tese Yesu ityartor i sha won cii la, lu nan un nyi? (b) Satan keren u hôngor se nena?
13 Shighe u Diabolo tese Yesu ityartor i sha won cii la, lu nan un tahav mbu ma orumace môm nan lu a vande zuan a mi ga yô. Satan yange hen ér akaa a Yesu nenge a mi la aa doo un, nahan una soo u lun orhemen tar u hemban sha won cii. Diabolo kera kaan ér una na se ityartor i sha won nyian ga, kpa keren u hôngor asema ase sha akaa a se nengen a mi la man a se ongo la kua mbamhen asev kpaa.
14 Tar ne ngu sha ikyev i Diabolo. Nahan abaver a ken tar ne kpa nga sha ikyev na. Sha ityôkyaa ne yô, kpiligh se iyol er akaa a i tesen sha televishen man ityogholough mbi ken tar ne kua ngeren mba ken tar ne cii ve iv a ijimba man tswam nahan la ga. Tar ne ka u yôôn akaa sha er ior ve yam á yô, nahan ka i yôô akaa ne sha gbenda u ior vea soo u yamen á shin vea soo ga kpa vea yam yô. Nahan Diabolo meen se sha uyôughyôughmbaakaav mba vea kôr ashe ase man ato ase kua mbamhen asev la. Kpa ka sea venda u nengen shin ungwan shin ôron akaa a Ruamabera a vende yô, se lu kaan ser: “Yem kera, Satan.” Ka sea er nahan yô se lu dondon ikyav i Yesu la sha u hendan a tar u Satan u u hôngor ne taveraa. Er se taver ishima se tesen ser se mba Mbashiada mba Yehova man mbadondon mba Kristu sha ijiirtom man ken makeranta man hen haregh wase kua hen tsombor wase yô, ngula kpa ka ikyav i tesen ér se mba ior i tar u Satan ne ga.—Ôr Marku 8:38.
15. Hii nan ve i doo u se veren ishima hanma shighe sha er se fatyô u hendan a Satana?
15 Diabolo yange nôngo kwa u sha utar la ér una na Yesu a gbihi mtil sha mimi na hen Aôndo kera kpa fetyô ga yô, “diabolo mough hen Na kera.” (Mat. 4:11) Kpa Satan yange wa ishima ér una de u meen Yesu ga, sha ci u i kaa a vese ér: “Zum u diabolo bee ameen cii yô, a mough hen a Na kera er saa shighe ugen.” (Luka 4:13) Nahan aluer se kôr cio u hendan a Diabolo yô, doo u se sugh Yehova. Kpa doo u se za hemen u keren iwasen i Aôndo, sha ci u Diabolo una hide sha u va meen se sha shighe u i doo un la, kpa a lu shighe u se ver ishima ga yô. Nahan yô, doo u se ver ishima hanma shighe se civir Yehova, shin er se tagher a ameen nahan kpaa.
16. Ka tahav mbu hemban cii mbu nyi Yehova a ne se, man doo u se sônon ser i na se mbu sha ci u nyi?
16 Doo u se sônon Aôndo hanma shighe ser a na se icighan jijingi na, u a lu tahav mbu hemban sha won cii la sha er una wase se se hendan a a Diabolo yô. Icighan jijingi ne una wase se u eren kwagh u ma se fetyô u eren sha tahav asev tseegh ga yô. Yesu yange kaa a mbadondon nav ér a na ve jijingi u Aôndo, a kaa ér: “Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:13) Nahan yô, se za nen hemen u sônon Yehova a na se icighan jijingi na. Er tahav mbu hemban sha won cii mbun mbu lu suen se yô, se fatyô u hendan a Diabolo. Dugh msen u eren sha gbashima hanma shighe la sha je kpa, doo u se huwa ikyav mbi utyaav mbi ken jijingi mbi Aôndo a ne se la cii iyol, sha er ‘se fatyô u tilen dông hendan a ayom a diabolo yô.’—Ef. 6:11-18.
17. Ka iember i nyi yange i wase Yesu u hendan a Diabolo?
17 Kwagh ugen kpa ngu u yange wase Yesu ve hendan a Diabolo yô, man se kpa una fatyô u wasen se. Bibilo kaa ér: “A taver ishima a kon u mtsaha, A kera wa kunya ikyo ga sha ci u iember i i ver Un sha ishi la, A za tema sha uwegh ku yanegh ku ikyônough ki Aôndo ki torough.” (Heb. 12:2) Se kpa se fatyô u zuan a imba iember la sha u kenden a mtemtor u Yehova sha shi nan icighanti na icivir man u veren ishima sha iyua i uma u tsôron la hanma shighe. Shighe u a tim Satan man ityom na cii gbem sha won, nahan “mbaasemaleghlegh vea ya dyako u tar, á saan ve iyol sha mngee u bem” la, a saan se iyol je a zua ga! (Ps. 37:11) Nahan yô, za hemen u hendan a Diabolo er Yesu kpa er nahan.—Ôr Yakobu 4:7, 8.
Ú Na Mlumun Wer Nyi?
• Kanyi i tese ér Yehova kor ior nava?
• Yesu ver ikyav i nyi i hendan a Satana?
• Ú hendan a Diabolo sha nyi igbenda?
[Study Questions]
[Picture on page 29]
U yan ikyar a tar ne una na se lu ihyom a Aôndo
[Picture on page 31]
Yesu venda m-ne u Satan na un ityartor i sha won cii la