Wase Iyôngo I I Tsum La I De Ngôôr U Hiden Ken Ikyumuile Ga!
Wase Iyôngo I I Tsum La I De Ngôôr U Hiden Ken Ikyumuile Ga!
“Ka hen an je shi sé zaa? Ka We U lu a mkaanem ma uma u tsôron ye.”—YOH. 6:68.
1. Shighe u mbahenen mba Yesu kpishi undu un la, Peteru kaa ér nyi?
ITYESEN i Yesu Kristu igen yange i taver mbahenen nav mbagenev, nahan ve undu un. Nahan a pine mbaapostoli nav ér: “Ne kpaa, ka ne ka yemene?” Peteru gema kaa ér: “Tere, ka hen an je shi sé zaa? Ka We U lu a mkaanem ma uma u tsôron ye.” (Yoh. 6:51-69) Yange ve lu a pe gen u zan ga. Kwaghaôndo u Mbayuda yange lu a “mkaanem ma uma u tsôron” ga, nyian kpa a fatyô u zuan a mkaanem ma uma u tsôron ken Zegebabilon, u a lu tartor u ukwaghaôndo mbaaiev sha tar cii la ga. Or u nan undu ikyumuile i Aôndo man nan soo u eren ishima i Yehova cii, ka shighe u í doo u nana “nder ken mnya,” nana hide ken ikyumuile je ne.—Rom. 13:11.
2. Kanyi i gbe u a er sha kwagh u akaa a mnyer shin a ijirighi?
2 Kwagh u iyôngo i Iserael i yange i saa la gba Yehova ishima. (Ôr Esekiel 34:15, 16.) Nyian kpa, ka saren mbatamen mba ken Kristu u wasen iyôngo i i saa la sha er ia hide ken ikyumuile yô, shi ka tom ve u eren nahan kpaa. Aluer mbatamen kaa a orpasenkwagh ér nana hen kwagh a ma or u hôron tom, u nan soo iwasen, man anmgbian u nan lu henen kwagh a or u hôron tom la va fa ma isholibo i vesen i or u hôron tom la yange nan er yô, doo u nana er nyi? Orpasenkwagh la nana taver anmgbian la ishima nana za ôr mbatamen kwagh shon. Kpa aluer nan er nahan ga yô, orpasenkwagh la nana ôr mbatamen kwagh shami iyol na. Nana de we a wa or u hôron tom la kwagh sha kwagh u ijirôron shin sha kwagh u akaa a myer tsô ga.—Lev. 5:1; Gal. 6:1.
3. Shighe u orgen u lu a iyôngo deri la za zua a iyôngo i i saa la yô, a er nena?
3 Ken kwaghhenen u a kar la, i ôr kwagh u injakwagh i Yesu yange ôr sha kwagh u orgen u lu a iyôngo 100 yô. Zum u iyôngo i môm saa ken ikyumuile yô, a undu i 99 la a za ker iyôngo i i saa la. Zum u orkuran ilev la za zua a iyôngo i i saa la yô, a ember tsung. (Luka 15:4-7) Se kpa, kape or ka nana undu ior mba Aôndo man nana za cin a hide ve se ember je la. Dooshima ngu a mgbegha mbatamen kua mbagenev ken tiônnongo ve za sôr or u hôron tom la, ve taver nan ishima. Ve kpa sar ve er or u hôron tom la ma nan hidi ken tiônnongo sha er Aôndo una kura nan shi una wase nan shi una ver nan doo doo yô. (Dut. 33:27; Ps. 91:14; Anz. 10:22) Nahan aluer ve zua a ian i wasen or u hôron tom ér nana hide ken tiônnongo nahan, vea er nyi?
4. Se fatyô u henen nyi ken Mbagalatia 6:2, 5 naa?
4 Alaghga vea fatyô u taver or ishima ér nana hide ken tiônnongo sha u tesen nan er nan doo Yehova ishima shi a keren kwagh hen a vese u hemban se agee ga yô. Man akaa a Yehova a soo ér se eren yô, ka u henen Bibilo man u zan mbamkombo mba Mbakristu shi pasen loho u dedoo u Tartor. Alaghga vea ôr Mbagalatia 6:2, 5 vea or shon, shi vea pase nan ér Mbakristu mbagenev vea fatyô u wasen mbagenev ikyav, kpa “hanma or nana va tôô ikyav mbi nan iyol i nan” sha ishigh ki Yehova yô. Or môm kpa nana fatyô u civir Aôndo sha mimi sha ci wase ga.
“Akaa a Nyian Ishima a Uma” Na yô Nan Hingir u Hôron Tom Shinii?
5, 6. (a) Doo u se kegh ato shighe u Mbakristu mba ve hingir u hôron tom ve lu lamen la sha ci u nyi? (b) Ú wase mba ve hingir u hôron tom mbara vea nenge er mlu ve a vihi sha ci u ve de u zan mbamkombo nena?
5 Shighe u anmgbianev asev mba ve hingir u hôron tom mbara ve lu lamen yô, doo u mbatamen man mbapasenkwagh mba ve vighe tsembelee vea kegh ato a ve zulee, ka nahan man vea fa kwagh u vea er sha u wasen anmgbianev mban ye. Alaghga u ngu ortamen, nahan u za sôr nom vea kwase u nan, mba ve hingir u hôron tom shi ve kera ve mbamkombo ga, sha ci u “akaa a nyian ishima a uma” yange ve yô. (Luka 21:34) Alaghga tsô ka ican i ker ve ye, gayô ka tom u hen tsombor u ne ve ve hingir u hôron tom ye. Nahan alaghga vea kaa ér ve soo u memen kpuaa man vea hide a hii u eren ityom i Mbakristu taveraa ye, kpa u fatyô u kaan a ve wer, aluer ve de u eren ityom i Mbakristu yô, kwagh la una sôr zayol vega. (Ôr Anzaakaa 18:1.) Alaghga u pine ve sha kwaghfan nahan wer: “Ne hemba zuan a msaanyol hegen u ne de u zan mbamkombo ne he? Hemba kpen tsombor wen iyol hegen zee? Shi ne mba zough a iember i or ka nana suur sha Yehova ve nan zua a mi la kpa?”—Neh. 8:10.
6 Aluer mba ve hingir u hôron tom mbara gbidye kwar sha mbampin mban yô, vea mase kaven er ve de u zan mbamkombo ve ve gbe ijime ken jijingi shi iember ve kpa i pande yô. (Mat. 5:3; Heb. 10:24, 25) Alaghga u fatyô u wasen ve vea nenge er ve de u pasen kwagh ve i kera saan ve iyol ga yô. (Mat. 28:19, 20) Nahan doo u mba ve hingir u hôron tom mbara vea er kwagh sha kwaghfan nena?
7. Se fatyô u taver mba ve tsum ve undu ikyumuile mbara asema ser ve er nyi?
7 Yesu yange kaa ér: “Ver nen ishima sha ayol a en, asema a en a̱ de yoho sha hua u sha kwaghyan man sha ihyundugh man sha akaa a nyian ishima a uma ne ga, . . . kuran nen shi eren nen msen hanma shighe cii, sha er né kuma u waren akaa a á va er la cii” yô. (Luka 21:34-36) Ne fatyô u taver mba ve tsum ve undu ikyumuile, kpa ve soo u hiden zuan a iember i yange ve lu a mi mbara cii ishima ner ve er msen ve sôn Aôndo a na ve icighan jijingi shi a wase ve, shi ve kpa ve er sha kwagh u ve sen la.—Luka 11:13.
Ve Nôngo Gbev Shinii?
8, 9. Ortamen nana wase or u hôron tom nana nenge er i doo u nana hide ken tiônnongo nena?
8 Er uumace ve yen yô, ashighe agen zayol ka a va hen atô ve, man kwagh ne una fatyô u nan or gbev mbu nôngon. Mbagenev nôngo gbev shighe u ve nenge or u tiônnongo a ne nan icivir nan er kwagh u a zough sha Bibilo ga yô. Aluer or u nan hingir u hôron tom la yange nan nôngo gbev sha imba gbenda ne yô, ortamen u nan ze or u hôron tom inya la nana pase nan ér Yehova ne or môm gbev mbu nôngon ga. Nahan doo u or nana vihi ikyaryan i nan vea Aôndo man ior Nav ga. Hemba doon u nana za hemen u civir Aôndo vangertiôr, gadia “Orjirigh u tar cii” fa kwagh u yange er la, man una sôr zayol shon sha gbenda u hemban doon cii kpaa. (Gen. 18:25; Kol. 3:23-25) Or ka nana kuma nguhar kera nana gba kpa nan saan hen inya ga, ka nan nôngo nan mough sha.
9 Ortamen la nana fatyô u pasen or u hôron tom la ér, mbagenev mba yange kwagh shin or nan na ve gbev mbu nôngon yô, mase kaven ér kwagh u yange na ve gbev la ka ankwagh u kiriki je. Alaghga je yô, kwagh u yange na ve gbev mbu nôngon la kpa una kera lu ga kuaa. Aluer or u hôron tom la yange nan nôngo gbev sha ci u i tsaha nan yum yô, doo u nana er msen shi nana hen sha kwagh shon zulee, nahan alaghga nana mase kaven er yange nan lu a ibo yô, nahan yange ma nan de ér tsaha la u na nan gbev mbu nôngon ga.—Ps. 119:165; Heb. 12:5-13.
Yange Taver Nan u Kaven ma Ityesen i ken Bibilo?
10, 11. Se wase or u nan lu a mkav u ma ityesen i Bibilo kposo la u gbidyen kwar sha ityesen shon nena?
10 Mbagenev ka ve undu ikyumuile i Aôndo sha ci u ve lumun a ma ityesen i ken Ruamabera ga yum. “Ityom i [Aôndo] hungul” Mbaiserael mba i due a ve ken Igipiti mbara, “ve kera kegh awashima Na la ga.” (Ps. 106:13) A doo u ú umbur or u hôron tom la wer “wanakiriki u jighjigh man u fan kwagh” ngu nan se kwaghyan u ken jijingi sha shighe vough. (Mat. 24:45) Kape i lu ve or shon yange nan hii fan mimi kpaa je la. Nahan, er nan ve nan taver ishima, nan ze hemen u zenden ken mimi ga?—2 Yoh. 4.
11 Shighe u ortamen nan lu wasen or u nan undu ikyumuile i Aôndo ér nana hide yô, ortamen la nana fatyô u ôron kwagh teren mbahenen mba Yesu mba yange ve venda ityesen na igen, nahan ve undu un la. (Yoh. 6:53, 66) Er ve de u kohol imôngo vea Kristu man mbadondon nav mba jighjigh yô, kera mba a iwuese sha akaa a ken jijingi ga shi kera saan ve iyol kpaa ga. Ma ijiir igen ngi i mba ve de u zan mbamkombo mba Mbakristu mbara vea zua a kwaghyan u injaa u ken jijingi yôô? Mayange ga, sha ci u ma ijiir igen ngi ga!
Yange Nan Er ma Isholibo Shinii?
12, 13. Aluer or u hôron tom yange nan er isholibo i vesen yô, kanyi ia na ve nana zua a iwasene?
12 Mbapasenkwagh mbagenev de u pasen kwagh shi zan mbamkombo sha ci u ve er ma isholibo i vesen. Alaghga vea hen ér, aluer ve pase mbatamen isholibo ve la yô, a dugh ve ken tiônnongo kera. Kpa aluer ve de isholibo ve la shi ve gema ishima sha mimi yô, a dugh ve ken tiônnongo kera ga. (2 Kor. 7:10, 11) A lumun ve ken tiônnongo shi mbatamen vea wase nan sha er nana hide a taver ken mimi yô.
13 Aluer u ngu orpasenkwagh u nan vighe tsema tsema, u mbatamen ve kaa ér u wase or u hôron tom, man or shon nan ôr u ér yange nan er isholibo i vesen nahan, ú er nena? Er se vande ôron nahan, kaa a nan wer nana za pase mbatamen kwagh u nan er la, de we a wa nan kwagh ken Bibilo ga. Aluer nan soo u pasen mbatamen ga kpa we yô u lu tesen wer, kwagh u iti i Yehova gba u ishima kua mkpeyol u tiônnongo u ken jijingi sha u eren kwagh u Aôndo a kaa ér se er shighe u or er isholibo man se va fe kwagh shami la. (Ôr Levitiku 5:1.) Mbatamen fa u wasen hanma or u i sar nan u hiden ken ikyumuile i Aôndo shi eren ishima na la cii. Alaghga a gba u a tsaha or shon sha dooshima. (Heb. 12:7-11) Aluer or shon nan lumun ér nan er Aôndo isholibo nahan nan de isholibo i nan la shi nan gema ishima sha mimi yô, mbatamen vea wase nan nahan Yehova una de nan isholibo i nan la.—Yes. 1:18; 55:7; Yak. 5:13-16.
Mhidi u Wan Ugen Hide la Va a Iember
14. Ôr injakwagh i Yesu i sha kwagh u wan u a undu ter na la ken mkaanem ou.
14 Shighe u or lu wasen ma iyôngo i yange i tsume i undu ikyumuile yô, or u i tsough nan ér nana wase or u hôron tom la nana fatyô u ôron injakwagh i Yesu i í nger ken Luka 15:11 zan zan 24 la. I pase ken injakwagh la ér, gumor la yange vihi inyaregh nagh cica cii sha udangmbaakaav. Kpa ken masejime yô, uma u lu eren la kera doo un ishima ga. Ijen kôr un shi ya kpa sar un shi kange ishima ér una hide a za kohol ter na! Kpa er lu ica je tsô, ter na ta ashe za nenge a na, tsô a yevese a za kuve wan na a gba susen un zwa, nahan saan un iyol tsung. Aluer or u nan tsum la nan hen sha injakwagh ne yô, alaghga ia mgbegha nan u hiden va kohol ikyumuile i Yehova. Er shighe u a tim tar ne a kera vese ga yô, doo u or u nan tsum la nana timbir u ‘hiden ken tiônnongo’ ga.
15. Mbagenev undu tiônnongo sha ci u nyi?
15 Kwagh u ior kpishi mba ve undu tiônnongo nyian ngu er kwagh u wan u a undu ter na la nahan ga. Mbagenev yô, yange ve hii u undun tiônnongo kure kure, vough er tso ka a hii u kuan kure kure zan zan a kua a kar ihyongo nahan. Mbagenev di ka akaa a nyian ishima a uma a ne ve ve te ikyaryan ve vea Yehova kera ye. Kpa mbagenev yô, nôngo gbev sha ma ieren i or u ken tiônnongo, shin ve undu tiônnongo sha ci u ve lumun a ma ityesen i Ruamabera ga. Asande a ior kpuaa ken mba ve undu tiônnongo yô ka isholibo i yange ve er la i ne ve ve undu tiônnongo ye. Nahan kpa, akaawan a i we ken kwaghngeren ne sha atôakyaa ne kposo kposo la, aa wase ne nahan ne fatyô u wasen mba ve tsum ve undu ikyumuile sha ci u atôakyaa a i ter heen ne kua atôakyaa agen la sha er vea hide cii man tsô a kua a kar ihyongo yô.
“Wan Wama, Ka Ya Wou Je Ne!”
16-18. (a) Ortamen ugen yange wase anmgbian ugen u hingir u hôron tom anyom imôngo nena? (b) Kanyi yange i na ve anmgbian ugen hingir u hôron tomo, man yange i wase un nena, man tiônnongo yange ngohol un nena?
16 Ortamen u ken Kristu ugen kaa ér: “Mzough u mbatamen wase ngu a nôngo kwagh kpoghuloo a za sôr mba ve hingir u hôron tom la. M hen kwagh u anmgbian ugen u yange m hen kwagh vea na nahan m wase un hingir u fan mimi yô. Yange hôr tom je nôngo u kuman anyom 25, shi lu yan ican kpishi. Nahan m pase un er aluer a yar tom sha akaawan a ken Bibilo la ve aa wase un yô. Shighe karen yô, a hii u van mbamkombo ken Iyou i Tartor, shi lumun ér i hen Bibilo a na sha er ia wase un una hide a va kohol ikyumuile yô.”
17 Kanyi yange i er ve anmgbian ne hingir u hôron tomo? A kaa ér: “Yange m hii u hemban veren ishima sha akaa a taregh a akaa a ken jijingi. Maa m de u henen kwagh sha tseeneke wam shi m de u duen kwaghpasen shi zan mbamkombo kpaa. Ica i gbe ga yô, m undu tiônnongo u Kristu. Nahan kpa er kwagh wam gba mbatamen ishima sha mimi yô, ve wasem nahan m cin m hide m va kohol tiônnongo.” Anmgbian ne yange lumun u henen Bibilo yô, zayol na la maa gba panden. A kaa ér: “M mase kaven mer, ka er yange m lu zuan a dooshima man hemen u Yehova kua nongo na ga ve m lu yan ican ye.”
18 Tiônnongo yange ngohol anmgbian ne shighe u za cin hide la nena? A kaa ér: “Yange lum vough er wan u undu ter na, u Yesu Kristu ôr kwagh na la nahan. Jighilii yô, anmgbian u kwase u beenyol ugen u yange lu ken tiônnongo shon anyom 30, shi a lu civir Yehova sha mimi her yô kaa a mo ér, ‘Wan wama, ka ya wou je ne!’ Mkaanem mara yange ma kôrom ken ishima kpen kpen. Sha kpôô yô, yange m mase kaven mer ka tiônnongo a lu ijiir i i doo u me lu ye. Nahan m soo u pasen mer, m wuese kpishi er ortamen la kua tiônnongo cii yange tesem dooshima shi er a mo kundu kundu shi wa ishima a mo shi kwagh wam gba ve ishima nahan. Yehova man mbawanndor a anmgbianev mban doo ve ishima, nahan kwagh la wasem u hiden va kohol ikyumuile.”
Taver Ve Ishima Ve De Timbir Ga!
19, 20. Ú taver mba ve hingir u hôron tom mbara asema wer, ve de timbir u hiden va kohol ikyumuile ga nena, man ú tese ve wer Aôndo keren kwagh hen a vese ka ngeen ka karen ikyaa inya ga nena?
19 Se mba ken ayange a masejime, man mkur u tar ne sôôn van. Nahan yô, taver mba ve hingir u hôron tom mbara asema ve zaan mbamkombo mba Mbakristu. Taver ve asema ve de timbir u hiin u zan mbamkombo ga. Umbur ve wer, Satan soo u vihin ikyaryan ve vea Aôndo, nahan a soo ér ve hen ér aluer ve undu mcivir u mimi yô, a hemba kpen ve iyol. Nahan kpa u fatyô u taver ve ishima wer, saa vea lu mbadondon Yesu sha mimi keng ve vea zua a mmem u mimi ye.—Ôr Mateu 11:28-30.
20 Umbur mba ve hingir u hôron tom mbara wer, Aôndo keren kwagh hen a vese ka ngeen ka karen ikyaa inya ga. Shighe u Maria, anngô u Lasaru haa Yesu mkurem ma taver ishe sha ityou, cii ku u Yesu la, a kaa ér: “De nen un; . . . A er kwagh u a fetyô yô.” (Mar. 14:6-8) Yesu yange wuese kwasecôghol u lu icankwase u er iyua i ndahar tsung la. Kwase la kpa yange er kwagh u a fetyô yô. (Luka 21:1-4) Se kpishi se fatyô u zan mbamkombo mba Mbakristu shi eren tom u pasen kwagh u Tartor la kpaa. Yehova una wase mbakpishiv mba yange ve hingir u hôron tom mbara, nahan ve kpa vea fatyô u zan mbamkombo shi pasen kwagh u Tartor kpaa.
21, 22. Ú wase mba ve soo u hiden hen Yehova mbara vea lu a vangertiôr ér nyi?
21 Aluer ka cier or u hôron tom iyol u shi va zuan ishigh a anmgbianev mba nan yô, u fatyô u umbur nan kwagh u iember i yange i ngee shighe u wan u undu ter na za cin hide la. Kape mba ve undu tiônnongo ve za hidi mbara kpa ka ve na i saan mba ken tiônnongo iyol je la. Taver ve asema ve hendan a Diabolo hegen, nahan ve kporom hen Aôndo.—Yak. 4:7, 8.
22 Mba ve soo u hiden hen Yehova cii a ngohol ve saan saan. (Ukwe. 3:40) Cii man ve de u civir Aôndo yô, yange saan ve iyol sha ci u ve lu civir un sha mimi. Averen kpishi nga keghen mba ve timbir u hiden va kohol ikyumuile ga la ken hemen!
Ú Na Mlumun Wer Nyi?
• Ú wase Orkristu u nan nenge gbev, nan hingir u hôron tom la nena?
• Ú hen sha kwagh vea or u nan undu ikyumile i Aôndo sha ci u mnenge u nan lu a mi kposo sha ma ityesen i Bibilo la nena?
• Ú er nan ve u wase or u i cier nan iyol u hiden va kohol tiônnongo la nana de u ciana?
[Study Questions]
[Picture on page 13]
Shighe u anmgbian wase u nan hingir u hôron tom nan lu lamen yô, doo u se kegh ato a nan zulee
[Picture on page 15]
Aluer or u hôron tom nan hen sha injakwagh i Yesu ôr sha kwagh u wan u undu ter na la yô, kwagh ne una wase nan, nana hide a va kohol ikyumile