Ú Umbur Kpa?

Iyoukura mba hegh mban doo u u ôron kpa? Aluer ve doo u yô, kar mhen wou aluer u fatyô u nan mlumun sha mbampin mban yô:

• Se lam “zwa u wang,” u u lu mimi sha kwagh u Aôndo man mbaawashima nav la tsembelee nena? (Sef. 3:9)

Cii man se fa u lamen “zwa u wang” ne tsembelee yô, saa se keghen ato a mba ve fe u lamen u la zulee shi se umbur ati a ken Bibilo kua avur agen ken ishima shi se kimbir kwagh u se hen la shi se ôron takerada a duen sha shi se timen sha atindi a shôn shin ikyav i kwagh u mimi shi se seer fan zwa shon shi se veren ashighe jighilii a henen kwagh ve se fatyô u “lamen” zwa u wang ne tsembelee ye.—8/15, peeji 21-25.

• A fatyô u karen ivese sha “kor u i zômon u igbar itiar” nena?

Ishember i “kor u i zômon u igbar itiar” la ka kwaghôron u sha ikyav. (Orpa. 4:12) Shighe u i lu ôron kwagh u kor u igbar itiar ken ivese yô, ka nom man kwase ve lu igbar i ihiar i hiihii, i i gem i kperegh sha gbar u vesen la ye, man gbar shon ka Aôndo. Nahan nom man kwase ka vea lu ken mzough vea Aôndo yô, kwagh ne a wase ve u sôron mzeyol shi a na ve msaanyol kpaa.—9/15, peeji 16.

• Ka “ave a pendan” a nyi i er kwagh u a ken Mbaheberu 6:2?

Ka ave a pendan sha u tsuan mbatamen ga, alaghga ka ave a pendan sha u nan ior iyua i icighan jijingi sha ivande. (Aer. 8:14-17; 19:6)—9/15, peeji 32.

• Mbakuran mba ken tiônnongo vea na mbagenev icivir nena?

Gbenda môm yô, ka u mayange kaan ér ve er kwagh u ve ayol a ve vea soo u eren ga la ga. Shi vea na ve icivir sha u pasen ve ityôkyaa i nan kaa ér ve er ma kwagh shin nan lu wan ve kwagh la.—10/15, peeji 22.

• Kanyi mbatamen mba ken Kristu vea fatyô u henen sha gbenda u mbakuran ilev mba ken Iserael yange ve yaren tom a gbough vev laa?

Orkuranilev ka nan lu a gbough ku gôgônan nan huren ikyumuile a mi. Iyôngo yange ia nyôron ken ityôr shin ia duen kpa, nan ôron i sha gbough ku nan ‘huren’ i a mi la. (Lev. 27:32) Orkuranilev u ken Kristu kpaa, gba u nana fa mlu u ikyumuile i Aôndo a we nan sha ikyev la shi nana ver ishima sha mi kpaa.—11/15, peeji 9.