Doo U Ú Za Hemen U Lun A Ieren I Mimi Sha Ci U Nyi?
Doo U Ú Za Hemen U Lun A Ieren I Mimi Sha Ci U Nyi?
“TERE, er a mo jighilii sha perapera wam, man shi sha mimi u a lu ken a mo kpaa.”—PS. 7:8.
1, 2. Ka akaa a nyi nahan nga a na i taver Orkristu u tilen sha mimi?
HEN sha akaa atar a a ze hemen ne: Mbakov mba wanye ugen mba ken makeranta mba nahan un tar. Ve soo ér a vihi ishima, nahan a tuhwa ve gayô a nôngo num a ve. Una vihi ishima a ve shin una kar anagh kera? Nom ugen ngu hen ya tswen ngu keren kwagh sha Intanet. Loho ugen maa va due sha kômputa na la, ngu tesen ijiir i eren ijimba. Una za hen ijiir la shin una za ga? Kwase Kristu ngu lamen vea anmgbianev mba kasev mbagenev, ica i gbe ga yô, ve hii u kôson anmgbian u kwase ugen u ken tiônnongo. Nahan una kohol ve vea kôso anmgbian u kwase la shin una gema kwaghôron shono?
2 Er akaa a a ze hemen ne a lu kwagh môm ga nahan kpa, kwagh môm due tseer tseer. Kwagh shon yô, er ve lu Mbakristu yô, gba u ve cii vea nôngo kwagh tsung sha er vea tile sha mimi her yô. Ka wea tsuan kwagh u ú er ken uma wou shin wea kuren mbamgbe ou nahan, u umbur kwagh u mtil sha mimi wou kpa? Ior ka ve shi henen sha kwagh u mluashe ve man u mkpeyol ve man mtaver u uma kua ashighe a dedoo man a bo a ikyaryan ve vea mbagenev shi ka ve hen sha kwagh u ishiôr ve gayô ikyar ve i ken ivese je kpaa. Alaghga se ver ishima sha ambaakaa ne zulee je. Nahan kpa, Yehova ka una tôv ishima yase nahan ngu a nenge a nyi? (Ps. 139:23, 24) Ngu a nenge a perapera wase.
3. Ka ian i nyi Yehova a ne se, man se time sha nyi ken kwaghhenen nee?
3 Yehova u a Ne se “hanma nagh ku dedoo man hanma iwua i vough” la na hanmô wase uiyua atô kposo kposo. (Yak. 1:17) Se sugh un kpishi, gadia a na se uiyua, er iyol man mhen man gbong gbong u iyolough man tahav mbu eren akaa kposo kposo nahan. (1 Kor. 4:7) Nahan kpa, Yehova kighir se ér se eren kwagh sha mimi ga. A na se ian ér se tsua u lun a ieren ne a ishima yase. (Dut. 30:19) Nahan yô, doo u se time se fa kwagh u a lu mtil sha mimi yô. Shi se time sha igbenda itiar i i ne ve ieren ne i lu hange hange yô.
Kanyi i Lu Mtil sha Mimi?
4. Mtil sha mimi wa nyi man nyi kere, man tindi u Yehova wa sha kwagh u nagh ku sha uile la tese se nyi?
4 Ior kpishi fa kwagh u a lu mtil sha mimi jighilii ga. U tesen ikyav yô, mbapativ ka vea taan ave vanger ér ve mba eren kwagh a ior sha mimi yô, ashighe kpishi ve lu kaan ér ve mba bumen a bume ior ga. Ieren la ngi hange hange, kpa ngi di vegher u ieren i mtil sha mimi tsô. Ken Bibilo yô, ishember i mtil sha mimi la wa u eren kwagh u vough man u lun tsev tsev kpa ker. Inja i asember a ken zwa Heberu a a gbe a zough vea “mtil sha mimi” la jighilii yô, ka u lun a ihyogholough iyol ga man mshi shio kua u lun a acôghor iyol ga. I yar tom a ishember ne igen sha kwagh u nagh ku yange i naan Yehova la. Saa ilegh ki i ne un nagh a mi la ki a lu a ihyogholough iyol ga shin ki a lu a mshi shio ve Una lumun nagh kula ye. (Ôr Levitiku 22:19, 20.) Or yange nana per tindi ne sha apera sha u nan nagh sha iwankwagh shin sha kwagh u a lu uange shin u pirin ashe yô, Yehova a na nan ibo.—Mal. 1:6-8.
5, 6. (a) Ka ikyav i nyi i tese ér kwagh ka una lu a mshi shio shin una lu jimin yô, a hemba doon se? (b) Ka a ôron kwagh u mtil sha mimi u uumace yô, mba ôron ér ve lu voughlo? Pase a se yôô.
5 Mhen u keren kwagh u lun a mshi shio shin lun jimin shi tôôn kwagh shon ér ka kwagh u injaa la ka kwagh u he ga. U tesen ikyav yô, tôô ase wer, kwase ugen ngu zenden hen kpezegemnger sangen ikwembe i yuhwa-mnger i hee sha kpetar yô. Er ikwembe ne i lu kposo kposo shi i dooashe yô, doo un kpishi, nahan a shiligh a gba kenger i. Kpa ka hanmô ken ikwembe ne una sangee? Ka i i lu a mshi shio, i hembe ga la una kura ye. Kape Aôndo kpa a lu keren ior mba ve lu a ieren i i lu a mshi shio shin i lu jimin je la.—2 Kron. 16:9.
6 Kpa alaghga u lu henen wer, gba u se lu vough ve se fatyô u tilen sha mimi sha ishigh ki Aôndo ye. Er isholibo man myen ve vihi se yô, alaghga se hen ser, se yina vough er ikwembe i i hembe la nahan. Kape ashighe agen ka i lu u laa? Fa wer, Yehova ver ishima ér se lu vough se za bee keng ga. Mayange je keren kwagh hen a vese ka karen ikyaa inya ga. * (Ps. 103:14; Yak. 3:2) Nahan kpa, a soo ér se tile sha mimi hen a na. Nahan yô, mkposo ngu hen atô u mtil sha mimi man mlu u or lun vough laa? Een. Nenge ase ikyav i tesen ne: Gumkwase doo gumor ugen ishima, nahan a soo u vôson un. Gumor la nana lu eren kwagh sha ibume aluer nan ver ishima ér gumkwase la a lu vough yô. Nahan kpa, aluer nan ver ishima ér gumkwase la a soo nan a ishima i môm, inja na yô, a lu a isharen sha a nan tseegh yô, nan ngu eren kwagh sha kwaghfan. Kape Yehova kpa a lu “Aôndo u a soo ér se civir un tseegh” je la. (Eks. 20:5, NW ) A ver ishima ér se lu vough ga, kpa se soo un a ishima yase cii shi se civir un tseegh.
7, 8. (a) Ka ikyav i mtil sha mimi i nyi Yesu a vere? (b) Inja i mtil sha mimi u i er kwagh na ken Bibilo la ér nyi?
7 Alaghga se umbur mlumun u Yesu na sha mpin u i pine un sha kwagh u tindi u a lu u hemban ken atindi cii la. (Ôr Marku 12:28-30.) Yesu yange na di mlumun tseegh maa kwagh bee ga, Aôndo yange doo un ishima tsung. A ver se ikyav i hemban cii i tesen ér Yehova doo un ishima a ishima na cii man a uma na cii man a mfe na cii kua sha agee a na cii. Yange tese ér mba tesen mtil sha mimi sha kwaghôron tseegh ga, kpa mba tesen un sha aeren a a dugh ken ishima i wang la. Nahan aluer se soo u lun ior mba tilen sha mimi yô, gba u se dondo ikyav i Yesu la.—1 Pet. 2:21.
8 Nahan mtil sha mimi u i er kwagh na ken Bibilo la, ka u civir Yehova Aôndo tseegh shi eren ishima na shi lumun a mbaawashima nav kpaa. U tilen sha mimi yô, ka u nôngon ser se er ishima i Yehova Aôndo ayange ayange. Akaa a Yehova Aôndo a nengen ér hemba ngan hange hange cii se kpa se nengen a nahan. De se time sha atôakyaa atar a a ne ve kwagh ne a lu hange hange yô.
1. Mtil sha Mimi Wase man Ikyaa i Mtemtor u Yehova
9. Mtil sha mimi wase asange asange zua sha kwagh u mtemtor u Aôndo nena?
9 Ian i Yehova a lu a mi i hemen la har sha mtil sha mimi wase ga. Hemen na ngu vough shi ka u tsôron shi u tser tar cii. Man aluer akaa a á gbe la aa ôr shin aa er nyi kwagh je kpa kape kwagh a za hemen u lun je la. Nahan kpa, i laha hemen u Aôndo la sha kua shin tar kpaa. Sha nahan yô, gba u a paa hementor u Yehova iyol, a tese akaauma cii aa fa ér ngu sha inja shi ngu vough shi ka u sha dooshima kpaa. Er se lu Mbashiada mba Yehova yô, ka doon se u ôron hanma or u nan soo u ungwan cii kwagh u mtemtor u Aôndo. Nahan kpa, se tese mtil wase sha ikyaa i mtemtor u Aôndo la nena? Se tese ser se soo hemen u Yehova la nena? Se tese sha u tilen sha mimi.
10. Satan wa uumace aie iyol ér nyi sha kwagh u mtil sha mimi, man we di u gema u er nyi?
10 Nenge ase er i gbe ahon sha kwagh u mtil sha mimi wou yô. Satan yange senge wener orumace môm kpa nana ta ikyaa a mtemtor u Aôndo sha mimi ga, wener or môm kpa nana civir Yehova sha ci u a doo nan ishima sha mimi ga. Diabolo kaa a Yehova sha ishigh ki mbatyomov mba ve kohol sha ishigh ki Aôndo la ér: “Kwavyolough sha kwavyolough; mimi je, hanma kwagh u or nan lu a mi cii, nana na sha ci u uma u nan.” (Yobu 2:4) Fa wer, ka orjighjigh Yobu tseegh Satan yange wa un aie iyol ga, lu uumace cii je wa ve aie iyol ye. Ka nahan ve Bibilo i yer Satan ér, “or u senden anmgbianev asev” ye. (Mpa. 12:10) A laha Yehova sha ishenge i a senge ér Mbakristu cii, kua we kpaa, vea za hemen u tilen sha mimi ga la. Satan kaa ér we u undu Yehova sha er u war uma wou yô. Akaa a i we u iyol ne na yô, ka u ken ishima nena? U soo u tesen wer Satan ka or u aie ga zee? Aluer u tile sha mimi yô, u tese wer Satan ka or u aie.
11, 12. (a) Ka akav a nyi a tese ér akaa a se tsough u eren ayange ayange la nga benden a mtil sha mimi wase? (b) U se tilen sha mimi la ka ian i civirigh nena?
11 Kwagh u mtil sha mimi wou la na yô, gba u ú ver ishima sha aeren a ou a ayange ayange kua akaa a i gbe u ú tsua u eren la kpaa. Shi hen ase sha akaa atar a se vande ôron kwagh shami la. Wanye la man nom la kua kwase Kristu la cii vea er nena? Mbakov mba wanye la mba ken makeranta kaa un akaa kpishi ér a̱ vihi ishima, kpa a umbur kwaghwan ne, ér: “Ne mbadoon mo ishima, de oron nen iyev sha kwagh wen ga, kpa na nen iyugh i Aôndo ian, gadia i nger er: Ka Mo Me or iyev ye, ka Mo Me kimbi ye, kape Ter A kaa la.” (Rom. 12:19) Nahan wanye la kar a nagh kera. Nom u a lu keren kwagh sha Intanet la una soo yô, ma a kenger foto u ijimbagh la, kpa a umbur kwaghwan u a lu ken mkaanem ma Yobu ne, ér: “M ya ikyur a ashe am; nahan á er nan man me kenger sha iniunkwasa?” (Yobu 31:1) Or ne kpa venda u kenger ufoto mba ijimbav mbara, a venda ufoto mbara er ka megh nahan. Kwase u a lu lamen vea anmgbianev mba kasev mbagenev mba ve hii u kôson mbagenev la umbur kwaghwan ne, ér: “Hanmô wase nana̱ nôngo u eren kwagh u doon or u nan we ndor a nan la i̱ lu sha gbenda u doon man shi u maan nan a maa kpaa.” (Rom. 15:2) Nahan kpa, ikyôson la ia maa a maa ga, ia vihi a vihi iti i anmgbian na u kwase u ken Kristu la tsô, shi ia doo Ter na u sha la ishima kpaa ga. Nahan á kôr nombor na shi a gema kwaghôron la.
12 Ken akaa ne cii, Mbakristu mbara tsua kwagh u a tese ér mba kaan ér: ‘Yehova ka Orhemen wam, nahan me er kwagh u doon un’ yô. Ka wea tsuan kwagh u ú er nahan, ka saren we u tsuan kwagh u sha ishima i Yehova kpa? Aluer u er nahan yô, u ngu eren sha mkaanem ma doon tsung ma ma lu ken Anzaakaa 27:11 ne, ma kaa ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.” Sha kpôô yô, se mba sha ian i se na sha er a saan Aôndo iyol yô! Nahan doo u se nôngo sha afatyô wase cii se tile sha mimi ga he?
2. Ka sha Mtil sha Mimi Wase la Yehova Una Ôr Se Ijir Ye
13. Mkaanem ma Yobu man ma Davidi tese ér Yehova er se ijir sha mtil sha mimi wase nena?
13 Se nenge er mtil sha mimi wase la a wasen se u tan ikyaa a hemen u Yehova yô. Nahan yô, ka sha mtil sha mimi wase la Aôndo una ôr se ijir ye. Yobu yange fa mimi u kwagh ne doo doo. (Ôr Yobu 31:6.) Yobu fa er Aôndo a karen uumace sha “ikyaren i mimi” yô. Karen se sha atindi a na a perapera la sha er una fa mtil sha mimi wase yô. Davidi kpa yange kaa ér: “TER er akuraior ijir; TERE, er a mo jighilii sha perapera wam, man shi sha mimi u a lu ken a mo kpaa. . . . We u U karen asema man ahi kpaa, Aôndo u perapera.” (Ps. 7:8, 9) Se fa er Aôndo una fatyô u nengen ken atô u or, ken ‘ishima man ahi’ a nan nahan. Kpa doo u se umbur kwagh u a lu keren yô. Yehova er se ijir sha mimi wase, er Davidi a ôr nahan.
14. Hii nan i doo u se hen ser, myen wase man mlu u se lu ken isholibo ne yangen se u tilen sha mimi ga?
14 Tôô ase wer, Yehova Aôndo ngu karen asema a uumace ubiliôn ubiliôn nyian. (1 Kron. 28:9) Ka kwa me ngu a zua a Orkristu u nan til sha mimi? Ka asande kpuaa tsô ngu a zua a mi ye! Nahan kpa, se hen nen ser, er se yen yô, se fatyô u tilen sha mimi ga ze. Er se yen nahan kpa, doo u se lu a vangertiôr er Davidi man Yobu nahan ser, Yehova una nenge er se til sha mimi yô. Umbur wer, aluer or ngu vough tsô maa tese ér nana tile sha mimi hen Aôndo ga. Ka iorov mba lun vough utar tseegh yange ve lu uma shin tar ne ye, kpa mba uhar kan shio u tilen sha mimi, ka Adam man Ifa je la. Nahan kpa, ior umiliôn imôngo mba ve yen ne kôr cio u tilen sha mimi. We kpa u fatyô u tilen sha mimi.
3. Mtil sha Mimi Ngu Hange Hange sha u Lun a Ishimaverenkeghen
15. Davidi yange tese ér mtil sha mimi ngu hange hange sha u lun a ishimaverenkeghen nena?
15 Er i lu sha mtil sha mimi wase la Yehova a er se ijir yô, mtil sha mimi ngu hange hange sha u lun a ishimaverenkeghen. Davidi yange fa mimi u kwagh ne. (Ôr Pasalmi 41:12.) Ishimaveren i Davidi lu a mi ér Aôndo una va ver ishima sha a na gbem sha won la i doo un kpishi. Davidi ver ishima u va lun uma gbem sha won, er Mbakristu mba mimi nyian nahan, sha er una za hemen u civir Yehova Aôndo shi kporom hen a na yô. Nahan a nenge ér aluer un soo u zuan a ishimaverenkeghen na la yô, saa una za hemen u tilen sha mimi hen Aôndo. Kape se kpa ka sea tile sha mimi hen Yehova ve a za hemen u suen shi tesen shi kuran shi veren se doo doo je la.
16, 17. (a) U kange ishima wer u tile sha mimi hanma shighe cii sha ci u nyi? (b) Kwaghhenen u a dondo ne una time sha mbampin mba nyi?
16 Saa se lu a ishimaverenkeghen ve a saan se iyol hegen ye. Ka i̱ na se iember i ia wase se u wan ishima sha ashighe a ican yô. Ishimaverenkeghen kor mhen wase kpaa. Bibilo tôô ishimaverenkeghen kar sha agunduutya. (1 Tes. 5:8) Er agunduutya ngu a kura ityough ki orshoja ken uitya nahan, kape ishimaverenkeghen kpa ngi i kura ishima sha mbamhen mba bov mba Satan a lu samber a mi ken tar u tse u u sôôn kuren ne je la. Jighilii yô, ka sea lu a ishimaverenkeghen ga yô, uma wase a kera lu a inja ga. Nahan yô, doo u se time sha mlu wase sha mimi, sea lu tilen sha mimi shin sea lu tilen ga kpa se fa, shi sea lu a ishimaverenkeghen i i̱ zough sha mtil sha mimi wase la kpa se fa. Shi umbur kpaa wer, aluer u tile sha mimi yô, u ngu tan ikyaa a mtemtor u Yehova shi u ngu kuran ishimaverenkeghen you kpaa. Nahan yô, mayange de gbihin mtil sha mimi wou ga!
17 Er mtil sha mimi a lu kwagh u hange hange yô, doo u se seer timen sha mbampin mbagenev. Se fatyô u maan mtil sha mimi wase nena? Se kura un nena? Man aluer or nan kera tile sha mimi ga nahan, doo u nana er nyi? Se time sha mbampin mban ken kwaghhenen u a dondo ne.
[Footnotes]
^ Yesu yange kaa ér: “Nahan yô, lu nen vough er Ter wen u Sha A lu vough nahan.” (Mat. 5:48) A shi nan kpa yange fa er uumace mba ve yen ne je kpa vea fatyô u lun a mshi shio shin lun vough er i doo u vea lu la yô. Se fatyô u kuran tindi u a kaa ér mbagenev ve doo se ishima kpishi la, sha nahan yô se lu eren kwagh u doon Aôndo ishima. Nahan kpa, Yehova yô ngu vough je mshi ngu ga. Ka a ôron kwagh u “mtil sha mimi” na yô, ka mlu na u vough je i lu ôron ye.—Ps. 18:30.
Ú Na Mlumun Wer Nyi?
• Kanyi i lu mtil sha mimi?
• Mtil sha mimi bende a ikyaa i or u nan kom u hemen sha won cii la nena?
• Mtil sha mimi ngu hange hange sha u lun a ishimaverenkeghen nena?
[Study Questions]
[Pictures on page 5]
Se mba tagher a akaa a karen mtil sha mimi wase ayange ayange