U Ôron Uwashika mba Yohane man u Yuda Asav-asav
Mkaanem ma Yehova Ma Uma Je
U Ôron Uwashika mba Yohane man u Yuda Asav-asav
A SHI nan kpa apostoli Yohane nger uwashika nav mba utar mba ve lu ken mkur u icighan Ruamabera la ken gar u Efese, ken inyom i 98 la. Uwashika mba uhar mba Yohane hii ngeren la taver Mbakristu ishima ér ve za hemen u zenden ken iwanger shi ve hendan a mba vendan mimi mba ve lu ngeen seer a seer la. Ken washika na u sha utar la, Yohane taver Mbakristu asema ér ve zenden ken mimi tseegh ga, kpa ve lu ken mzough kpaa.
Yuda, u lu anmgbian u Yesu u sha ngô la yange nger Mbakristu washika ta ve icin sha kwagh u aferaior a a nyôr ken tiônnongo la shi ôr ve kwagh u vea er ve vea palegh aeren a bo ne yô. A shi nan kpa, nger washika ne ken Palesetina ken inyom i 65 la. Aluer se mba ôron uwashika mba utar mba Yohane la man u Yuda la yô, vea wase se u tilen dông ken jighjigh wase shin er se lu tagher a akaa a zan se iyol nahan kpaa.—Heb. 4:12.
ZA HEMEN U ZENDEN KEN IWANGER MAN KEN DOOSHIMA MAN SHA JIGHJIGH U NAN
Yohane nger washika na u hiihii la sha ci u mba i shigh ve mkurem ve lu sha ci u Kristu mbara. Yange nger washika ne wa Mbakristu kwagh u una wase ve u palegh mbavendan mimi, geman tilen dông sha kwagh u mimi man u perapera yô. A ôr mluainja u zenden ken iwanger man sha dooshima man sha jighjigh u nan la var var.
Yohane nger ér: “Aluer se zenden ken iwanger er [Aôndo] A lu ken iwanger nahan yô, sé zua ayol a ase.” Aôndo ka imbor i dooshima, sha nahan yô, apostoli Yohane nger ér: “Se doo nen ayol a ase.” “Dooshima u Aôndo” ngu a mgbegha se u “kuran atindi a Na,” shi se mba hemban tar sha “jighjigh” u se ne Yehova Aôndo man Mkaanem nam man Wan na la.—1 Yoh. 1:7; 4:7; 5:3, 4.
Mbamlumun sha Mbampin mba sha Akaa a ken Ruamabera:
2:2; 4:10—Yesu ngu “iwom” nena? Inja i iwom yô, ka u “wamen.” Yesu na iwom sha asorabo ase sha u wamen se shin nan kwagh u i gbe u a na sha er a ôr ijir i vough yô. Aôndo una fatyô u zungwen se mhôônom sha ci u iwom i Yesu a ne la, shi mba ve ne Yesu jighjigh cii una fatyô u den ve a asorabo a ve.—Yoh. 3:16; Rom. 6:23.
2:7, 8—Ka tindi u “tse” man u “he” u nyi Yohane a lu ôron kwagh na heenee? Ka tindi u dooshima u tangen iyol ga u anmgbianev la Yohane a lu ôron kwagh na heen ye. (Yoh. 13:34) A yila tindi ne ér ka tindi u “tse” sha ci u Yesu yange na tindi ne anyom kar hemba 60 cii ve Yohane nger washika na u hiihii la ye. Sha nahan yô, shighe u mbananjighjigh hingir Mbakristu la je ve hii u ungwan kwagh u tindi ne. Tindi ne shi ka u “he” sha ci u a hemba di u ‘soon or u wanndor a vese er iyol yase’ nahan la, kpa a kua u tesen dooshima u tangen iyol ga la ker.—Lev. 19:18; Yoh. 15:12, 13.
3:2—Kanyi i lu “a pase” Mbakristu mba i shigh ve mkurem la ga, man ka ana vea ‘nenge a Nan er nan lu yôô’? Kwagh u i lu a pase ve ga yô, ka er vea lu shighe u a nder ve vea yem sha ken iyol i jijingi la. (Fil. 3:20, 21) Nahan kpa, ve fa ér “zum u á va pase [Aôndo] yô, [vea] lu er Un nahan, gadia [vea] nenge a Na er A lu yô,” inja na yô, ka “jijingi” je la.—2 Kor. 3:17, 18.
5:5-8—Mngerem man awambe man jijingi mba eren shiada ér “Yesu ka Wan u Aôndo” nena? Mngerem yange ma er shiada sha ci u shighe u i er Yesu batisema shin mnger la Yehova iyol na er shiada ér ngun ka Wan na u ishima ishima je ne. (Mat. 3:17) Awambe shin uma u Yesu a ne i “hingir ipaa sha ci u ior cii” la tese ér Yesu ka Wan u Aôndo. (1 Tim. 2:5, 6) Shighe u i er Yesu batisema la jijingi sen sha ana u tesen ér ka Wan u Aôndo shi na un tahav mbu “zenden, eren ityom i dedoo, waren mba diabolo eren ve ican la cii.”—Yoh. 1:29-34; Aer. 10:38.
Ityesen hen Avese:
2:9-11; 3:15. Aluer Orkristu de ma kwagh shin ma or nan vihi dooshima u nan lu a mi sha anmgbianev la yô, nan ngu zenden ken ime i ken jijingi, nan fa pe nan lu zan ga.
ZA HEMEN U “ZENDEN KEN MIMI”
Yohane hii washika na u sha uhar la sha mkaanem man ér: “Ortamen ne ngu sughun icuwan shagbakwase man shi ônov nav kpaa.” Yange ember kpishi, gadia a “kohol mbagenev ken ônov [nav], mba zenden ken mimi.”—2 Yoh. 1, 4.
Yohane taver ior asema ér ve lu a dooshima been yô, a nger ér: “Dooshima yô, ka un ne: ka u se̱ zenden sha atindi a Na.” Heela tseegh ga, shi ta icin sha kwagh u ‘orcugh man Antikristu’ kpaa.—2 Yoh. 5-7.
Mbamlumun sha Mbampin mba sha Akaa a ken Ruamabera:
1, 13—“Shagbakwase” la ka ana? Alaghga Yohane lu ôron kwagh u kwase ugen u i yilan un ér Kyria la, man inja i ishember ne ken zwa Grika ér “shagbakwase.” Gayô lu ôron kwagh a tiônnongo ugen ve yar tom a ishember la ér mbatôvon Mbakristu a ican ve de fe ga ye. Aluer ka nahan yô, mbayev nav mbara ka mba ve lu ken tiônnongo la man “ônov mba . . . anngô [na] u kwase” la di ka mba ken tiônnongo ugen.
7—Ka “mve” u Yesu u nyi Yohane a lu ôron heenee, man mbaicughuv “mba pasen” mve na ga nena? “Mve” u Yesu ne ka mve na u ken hemen u ior vea nenge a na ga la ga. Kpa ka mve u una va ken iyol i or shi a shighe un mkurem una hingir Kristu la. (1 Yoh. 4:2) Mbaicughuv na jighjigh ér Yesu una va ken iyol i or ga. Ka ve nyiman ér Yesu ngu ga shi ve lumun ér i shighe un mkurem sha icighan jijingi kpaa ga.
Ityesen hen Avese:
2, 4. Saa se fa “mimi,” ka atesen a Mbakristu jimin cii, a a lu ken Bibilo la shi se eren sha mi keng ve se zua a myom ye.—3 Yoh. 3, 4.
8-11. Aluer se soo ser “mrumun u sha mhôôn man mhôônom ma zungwen man bem mba ve dugh hen Aôndo Ter man shi hen Yesu Kristu” la ma kar se kua mzough u anmgbianev la ga yô, gba u se ‘ver ishima’ sha ayol a ase sha er se palegh mba ve ‘kera lun ken ityesen i Kristu ga’ la yô.—2 Yoh. 3.
“NYÔR NONGO SHA TOM U SHA MIMI LA”
Yohane yange nger washika na u sha utar la hen huror na Gayu. A nger ér: “Aluer m ungwa mer, mbayev av mba zenden sha mimi yô, kam iember je hemba akaa agen cii.”—3 Yoh. 4.
Yohane wuese Gayu sha tom na u “vough” u a lu eren sha u wasen anmgbianev mba zenden sha la. A za hemen ér: “Ka u sé nyôr a [ambaaior] la ken ya kpee, sha u se kpaa sé nyôr nongo sha tom u sha mimi la” yô.—3 Yoh. 5-8.
Mbamlumun sha Mbampin mba sha Akaa a ken Ruamabera:
11—Mbagenev ka ve hingir u eren akaabo sha ci u nyi? Ka sha ci u ve taver ken jijingi ga, nahan mba kera nengen a Aôndo ken ashe a asema a ve ga. Er ve nengen a Aôndo sha ashe ve a marami la ga yô, ve hen ér ngu nengen a ve ga.—Esek. 9:9.
15—“Ahuraior” a i er kwagh u a heen ne ka unô? Ishember i “ahuraior,” i i yar tom a mi heen ne ka mba ve lu kôôsôô tseegh ga. Yohane yar tom a ishember ne u ôron kwagh u mbananjighjigh cii.
Ityesen hen Avese:
4. Anmgbianev mba ken tiônnongo mba ve vighe ken jijingi ka vea nenge anmgbianev mba kiriki vea “zenden ken mimi” nahan i doo ve kpen kpen. Heela tseegh ga, mbamaren ka vea wase mbayev vev vea hingir u civir Yehova nahan i saan ve iyol kpishi.
5-8. Mbatamen mba zenden sha man mba eren tom mishen man mba eren tom shin iyagh ki Betel shin afishi a branci man upania ka ve er anmgbianev vev tom taveraa sha ci u mdoo u ve doo ve ishima kua Yehova la. Doo u se dondo ikyav ve i dedoo i jighjigh u nan la shi se wasen ve kpaa.
9-12. Doo u se dondo ikyav i dedoo i jighjigh u Demeteriu la, kpa se dondo ikyav i bo i Diotrefe u yange lu or u msende la ga.
“LUUN NEN KEN DOOSHIMA U AÔNDO”
Yuda ôr kwagh u mba yange ve nyôr ken myer ve lu vihin tiônnongo la ér: “Ka mbagbanahon mba ma kwagh a kom ve ga, mba zenden sha asaren a ve ayol a ve, ijô ve ngi hagher sha akaaôron, mba nyohon zwa.”—Yuda 4, 16.
Mbakristu vea hendan a aeren a bo nena? Yuda nger ér: “Ne mbadoon mo ishima yô, umbur nen akaaôron a mbaapostoli mba Ter wase Yesu Kristu ve tsengaôron la.” Shi a za hemen ér: “Luun nen ken dooshima u Aôndo.”—Yuda 17-21.
Mbamlumun sha Mbampin mba sha Akaa a ken Ruamabera:
3, 4—Yuda wa Mbakristu kwagh ér ve “nôngon . . . ityav tsung sha kwagh u jighjigh u nan” sha ci u nyi? Yange ôr kwagh ne sha ci u ‘udangmbaiorov nyôr ken tiônnongo myer.’ Man ve ‘gema mrumun u sha mhôôn u Aôndo hingir ve ijimba i eren.’
20, 21—Se ‘lu ken dooshima u Aôndo’ nena? Akaa nga atar a a wase se u eren kwagh ne yô: (1) ka sha u maghen ayol a ase ken “icighanjighjigh [wase] u nan,” sha u henen Mkaanem ma Aôndo zulee shi duen kwaghpasen kpoghuloo; (2) sha u eren msen ken “Icighan Jijingi” shin sha tahav mbu cighan jijingi; man (3) sha u nan kwagh u a ne ve i gbe u se va zua a uma u tsôron la jighjigh, ka ipaa i Yesu Kristu a ne sha ci wase je la.—Yoh. 3:16, 36.
Ityesen hen Avese:
5-7. Mbaaferev vea war ijirôron i Aôndo? Akav a atar a Yuda a ter sha heen la tese ér mayange vea war ga.
8-10. Doo u se dondo ikyav i Mikael, ortyom u Sha u tamen la, nahan se na ior mba Aôndo a ne ve tahav la icivir.
12. Mba vendan mimi mba ka ve lu inja er mba a dooshima la ka ior mba bogh mba vea fatyô u vihin jighjigh wase yô. Mba er vande u u lu shin atô u mnger hen pe tso a karen shin ior ve gbe iyol nahan. Mba ve tesen atesen a aiegh la ka ior mba bogh, kpa er ve lu a kwagh ken jijingi ga yô, mba er ka abeen a a lu a mngerem ga nahan. Mba a kwagh u injaa ga, vough er kon u u kpe sha shighe u hiir nahan. Er kon u i wuhe u shin tine ka u kpe nahan, kape ve kpa a va tim ve je la. Aluer se nyagh mba vendan mimi mban yô, a lu ieren i sha kwaghfan.
22, 23. Mbakristu mba mimi kôr kwaghbo ihyom. Anmgbianev mba ken tiônnongo mba ve vighe, hemban je yô, mbatamen ka ve tsuwe “mba ve lu tan akpelan la” ken usu u mtim u tsôron la sha u wasen ve ken jijingi.
[Pictures on page 28]
Mngerem man jijingi man awambe er shiada ér “Yesu ka Wan u Aôndo”