‘I Kuma Wanakiriki U Yehova Sha Ci U Akaabo Ase’
‘I Kuma Wanakiriki U Yehova Sha Ci U Akaabo Ase’
“I kuma Un sha ci u akaabo ase, i vihi Un iyol sha ci u aferakaa a ase . . . ka sha igbidiv Nav man i wanger se ye.”—YES. 53:5.
1. Doo u se lu a nyi ken ishima shighe u se lu umbur ku u Yesu laa, man ka kwaghôron u profeti u nyi una wase se u eren kwagh nee?
SE MBA eren mkombo u m-umbur sha u umbur ku u Kristu kua akaa a ku na man mnder na shin ku la a er sha ci wase yô. Ku umbur ne ka u wase se u umbur kwagh u paan hementor u Yehova iyol shi tseghan iti na man kwagh u kuren awashima na kua myom u uumace kpaa. Kwaghôron u profeti u ken Bibilo môm tsô, pase kwagh u nagh ku ipaa ku Kristu la man kwagh u ku na u er sha ci wase la vindi vindi, er i er ken Yesaia 53:3-12 nahan ga. Yesaia tsengaôron er Wanakiriki ne una ya ican yô, man er Kristu una kpe yô, shi a ôr averen a ku na la ua va a mi sha ci u Mbakristu mba i shigh ve mkurem la kua mba ve lu “iyôngo igen” la kpaa.—Yoh. 10:16.
2. Kwaghôron u profeti u Yesaia la pase mimi u nyi, man kwagh la una bende a vese nena?
2 Er uderimbaanyomov kar ken ijime puetaankaruhar, cii man i va mar Yesu shin tar yô, Yehova tsengaôron sha ikyev i profeti Yesaia ér, Wanakiriki Na u un tsough la una civir un sha mimi shighe u una tagher a imeen i vesen je kpaa. Kwaghôron ne tese er Yehova a ne Wan na jighjigh vangertiôr yô. Er se lu timen sha kwaghôron u profeti ne yô, ishima yase ia seer ivin a iwuese, shi jighjigh wase kpa una seer taver.
“I Laha Un” shi “i Wa Un Ikyo Ga”
3. Doo u Mbayuda yange ma ve ngohol Yesu sha ci u nyi, kpa ve gema ve er a na nena?
3 Ôr Yesaia 53:3. Gbidye kwar ken ishima nenge er yange a lu Wan u Aôndo u môm môm la ken ishima u undun iember i eren tom vea Ter na ikyooso ikyooso, van shin tar va nan uma na sha u paan se sha ikyev i isholibo man ku kera la. (Fil. 2:5-8) Nagh ku ipaa ku gba u una na la lu u paan se sha asorabo, man nagh ku i naan sha uile sha ikyev i Tindi u Mose la, lu a lu di mure u nagh ku Yesu kula tsô. (Heb. 10:1-4) Yange doo u Mbayuda mba ve lu keghen mve u Mesiya u ityendezwa la vea lumun un shi vea na un icivir. (Yoh. 6:14) Kpa ve gema ve “laha un” shi ve “wa un ikyo ga,” vough er kwaghôron u profeti u Yesaia tsengaôron nahan. Apostoli Yohane nger ér: “A va hen ya Na kpa ior Nav rumun Un ga.” (Yoh. 1:11) Apostoli Peteru yange kaa a Mbayuda ér: “Aôndo u uter asev, A civir Wanakiriki Na Yesu ye, Un u ne na Un kera, ne nyiman Un sha ishigh ki Pilatu zum u wa ishima u una pase Un á tuhwa yô. Kpa ne nyiman Un u A lu Icighan man u Mimi la.”—Aer. 3:13, 14.
4. Yange hool Yesu a angev nena?
4 Yesaia shi tsengaôron ér a “hool [Yesu] a angev kpaa.” Shighe u Yesu lu eren tom u pasen kwagh shin tar la, a vôr ashighe agen, kpa ikyav tese ér gbaan angev ga. (Yoh. 4:6) Yange hool un a angev mbu ior mba pasen ve kwagh la. Mhôônom yange ma kôr un a ve nahan bee mbagenev kpishi angev vev. (Mar. 1:32-34) Sha nahan yô, kure kwaghôron u profeti u a kaa ér: “Mimi je, ka angev asev je A tee sha iyol Na ye, atsan ase kpaa A tôô a” la.—Yes. 53:4a; Mat. 8:16, 17.
Lu Inja er “Aôndo . . . Tsaha Un” Nahan
5. Mbayuda kpishi yange ve nenge ku u Yesu nena, man kwagh ne seer ican na sha ci u nyi?
5 Ôr Yesaia 53:4b. Ior mba sha ayange a Yesu la kpishi yange ve fa ityôkyaa i i na ve Yesu ya ican shi kpe ga. Sha nahan yô, ve na jighjigh ér, ka Aôndo a lu tsahan un ye, inja er a haa un angev mbu ndôhôr ishima iyol nahan. (Mat. 27:38-44) Mbayuda yange ve wa Yesu aie iyol ér ngu or u ityuhwan. (Mar. 14:61-64; Yoh. 10:33) Kpa, Yesu lu orisholibo shin or u ityuhwan ga. Man a shi nan kpa, er Yesu lu Wanakiriki u Yehova shi Ter na doo un ishima tsung yô, ku u yange gba u una kpe sha ci u aie u i wa un iyol ér ngu or u ityuhwan la seer ican i̱ lu yan la. Nahan kpa, lumun u eren ishima i Yehova.—Mat. 26:39.
6, 7. Yehova yange ‘tsaha’ Wanakiriki na u jighjigh sha nyi gbenda, man kwagh ne saan Un iyol nena?
6 Kpiligh se iyol er i hii ve ior yange ve wa Yesu aie iyol ér ngu or u ityuhwan ga, sha ci u Yesaia kpa kaa ér ‘Aôndo a tsaha’ Kristu. Kpa a gema taver se er i hii ve profeti ne a tsengeôron ér: “Lu ishima i TER je u vihin Un iyol” yô. (Yes. 53:10) A er nan man Yehova una ‘tsaha’ un, u Un iyol na a kaa ér: ‘Nenge Wanakiriki Wam . . . icuwan Wam u ishima i doom a Na yumu’ laa? (Yes. 42:1) A fatyô u kaan ér, kwagh ne na saan Yehova iyol sha nyi gbenda?
7 Cii man se kav kwaghôron u profeti ne yô, saa se umbur imbwase i Satan kaa sha kwagh u hemen u Yehova la. Yange kaa ér, mbatomov mba Aôndo mba ve lu Sha man mba ve lu shin tar cii vea fatyô u civir Un sha mimi ga. (Yobu 1:9-11; 2:3-5) Mtil u Yesu tile sha mimi zan zan ku na la na mlumun u vough sha imbwase i Satan ne. Er Yehova yange de mbaihyomov nav wua Kristu nahan kpa, se fatyô u ôron ser, Un kpa yange ya ican shighe u nenge i lu wuan Wanakiriki na u ishima ishima la yô. Nahan kpa, er Yehova nenge Wan na tile sha mimi dông yô, doo un kpishi. (Anz. 27:11) Heela tseegh ga, kwagh u ku u Wan na la ua er sha ci u uumace mba ve gem asema la yange na saan Yehova iyol kpen kpen.—Luka 15:7.
“I Kuma Un sha ci u Akaabo Ase”
8, 9. (a) ‘I kuma Yesu sha ci u akaabo ase’ nena? (b) Peteru ôr mimi u kwagh ne nena?
8 Ôr Yesaia 53:6. Uumace mbaasorabo mba ve lu er iyôngo i i tsum nahan la ndera keren ér i yima ve sha ikyev i angev man ku u ve zough a mi hen Adam la. (1 Pet. 2:25) Er se yen yô, wan u Adam môm tsô kpa, nan kuma u hiden a kwagh u Adam ta kera la ga. (Ps. 49:7) Nahan kpa, er Ter wase a lu a dooshima tsung yô, a “na ibo yase cii i shire sha” Wan na u ishima ishima, u a lu Wanakiriki na u a tsough la. Er Kristu lumun ér “i kuma un sha ci u akaabo ase” shi “i vihi Un iyol sha ci u aferakaa a ase” yô, a tôô asorabo a ase sha kon u mtsaha shi a kpe sha ci wase kpaa.
9 Apostoli Peteru nger ér: “Ka sha kwagh ne je i yer ne ye, gadia Kristu kpaa ya ican sha ci wen, A ver ne ikyav je sha u né dondo Un ijime yô. Ka Un jim kpaa A tôô asorabo ase ken iyol Na je sha [kon u mtsaha] sha er ma se kpe kera sha kwagh u isholibo, kpa se̱ gema se̱ lu uma sha ci u perapera” ye. Shi a za hemen u ôron kwagh u i er ken profeti Yesaia la ér: “Ka sha agbir a Na man se zough a mkpeyol ye.” (1 Pet. 2:21, 24; Yes. 53:5) Kwagh ne bugh mbaasorabo gbenda u van hen Aôndo, er Peteru a ôr nahan, ér: “Kristu kpaa kpe sha ci u asorabo kwa môm, Un Orperapera sha ci u mbaaferev sha u Una va a vese hen Aôndo yô.”—1 Pet. 3:18.
“Er Waniyôngo u i Ze a mi sha u Za Sôngon Yô”
10. (a) Yohane u eren Batisema yange ôr kwagh u Yesu nena? (b) Kwagh u Yohane ôr la kuma sha Yesu sha ci u nyi?
10 Ôr Yesaia 53:7, 8. Shighe u Yohane u eren Batisema nenge Yesu lu van yô, kaa ér: “Nenge Waniyôngo u Aôndo u A tee isholibo i tar kera ne, Ngura.” (Yoh. 1:29) A shi nan kpa, Yohane lu a mkaanem ma Yesaia la ken ishima, shighe u lu ôron kwagh u Yesu u a lu Waniyôngo la. Mkaanem mara kaa ér, i va a na “er waniyôngo u i ze a mi sha u za sôngon yô.” (Yes. 53:7) Yesaia tsengaôron ér: “A gbihi uma Na ken ku je.” (Yes. 53:12) Kwagh ka a er i doo yô, ken tugh mbu Yesu umbur ku na la, a na mbahenen nav mba pue kar môm mba jighjigh mbara iyongo nahan kaa ér: “Ka awambe Am a ikyuryan je ne, a i hee a sha ci u ior kpishi sha u den asorabo” yô.—Mat. 26:28.
11, 12. (a) Mlumun u Isaka lumun a ishima i môm ér i na nagh a uma na la tese se nyi sha kwagh u nagh ku Kristu? (b) Kanyi i doo u se lu a mi ken ishima sha kwagh u Yehova, u a lu Aberaham u Vesen la shighe u se lu umbur ku u Kristuu?
11 Yesu yange lumun u geman iyol na nan nagh a mi sha u eren ishima i Yehova, vough er Isaka u ngise la kpa er nahan. (Gen. 22:1, 2, 9-13; Heb. 10:5-10) Er Isaka lumun ér i na nagh a na nahan kpa, lu Aberaham kôr un na nagh a mi ye. (Heb. 11:17) Kape kwagh u Yesu kpa a lu je la, er lumun ér una kpe nahan kpa lu Yehova jighilii na un ian ér a na nagh ku shon ye. Nagh ku Wan u Aôndo na la tese ér uumace doo Aôndo ishima tsung.
12 Yesu iyol na kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yoh. 3:16) Apostoli Paulu nger ér: “Aôndo tese se dooshima Na sha ku u Kristu A kpe sha ci wase er se lu mbaasorabo her la.” (Rom. 5:8) Sha nahan yô, shighe u se lu umbur ku u Kristu sha u nan un icivir yô, doo u se umbur ser, ka Yehova, u a lu Aberaham u Vesen la a ser ian ér i na iwom ne ye. Se mba eren mkombo u umbur ku u Yesu sha u wuese Yehova.
Wanakiriki ‘Gema Ior Kpishi ve Hingir Mbaperapera’
13, 14. Wanakiriki u Yehova ‘gema ior kpishi hingir mbaperapera’ nena?
13 Ôr Yesaia 53:11, 12. Yehova ôr kwagh u Wanakiriki na u a tsough la ér: “Wanakiriki Wam u perapera la, Una gema ior kpishi vea hingir mbaperapera.” Sha nyi gbenda? Mkur u ivur i sha 12 la na mlumun sha kwagh ne. I kaa ér: “Man [Wanakiriki] . . . sôn sha ci u mbaaferev kpaa.” Mbayev mba Adam cii i mar ve ken isholibo, mba ‘mbaaferev,’ sha nahan yô, ve ngohol “injar i isholibo i kimbin,” ka ku je la. (Rom. 5:12; 6:23) Gba u a hime uumace mbaasorabo vea Yehova keng. Kwaghôron u profeti u i er ken Yesaia ityough 53 la pase er Yesu a “sôn” shin a zamber a Aôndo sha ci u uumace mbaasorabo sha gbenda u doon kpen kpen. I jiir la kaa ér: “Mtsaha u van se a bem la, gema lu sha a Na; ka sha igbidiv Nav man i wanger se ye.”—Yes. 53:5.
14 Kristu ‘gema ior kpishi hingir mbaperapera’ sha u tôôn asorabo a ase sha iyol na shi kpen sha a ci wase kpaa. Paulu nger ér: “Doo m-iv u Aôndo cii u teman ken a Na je. Man er A va a bem sha awambe a sha [kon u mtsaha] Na la yô, lu sha a Na je man Aôndo hime akaa cii a iyol Na ye, akaa a a lu shin tar man akaa a a lu Sha kpaa.”—Kol. 1:19, 20.
15. (a) “Akaa a a lu Sha,” a Paulu a er kwagh a ter la ka unô? (b) Ka unô i gbe u vea ya bredi sha iyange i umbur ku u Yesu laa, man ka sha ci u nyi?
15 “Akaa a a lu Sha,” a i hime a vea Yehova sha ikyev i awambe a Kristu la, ka Mbakristu mba i shigh ve mkurem, mba i gbe u vea za tema tor vea Kristu sha la. Mbakristu mba ve “lu a kwar sha myer u a dugh Sha” la cii i na ve ‘ishô gbem sha won.’ (Heb. 3:1; Rom. 5:1, 18) Sha nahan yô, Yehova lumun ve, ve hingir ônov nav mba ken jijingi. Icighan jijingi er shiada sha kwagh ve ér mba “mbayandyako a Kristu imôngo,” mba i gbe u vea hingir utor man upristi ken Tartor u sha yô. (Rom. 8:15-17; Mpa. 5:9, 10) Ve hingir vegher u Iserael u ken jijingi, ka “Iserael u Aôndo” je la, shi i nyôr a ve ken “ikyuryan i he” kpaa. (Yer. 31:31-34; Gal. 6:16) Er ve lu ken ikyuryan i he la yô, ve kuma u yan bredi sha iyange M-umbur u ku u Yesu la shi man wain u nyian u Yesu yange ôr kwagh na ér: “Iyongo ne ka ikyuryan i he i ken awambe Am a i hee sha ci wen ne” la kpaa.—Luka 22:20.
16. Kanyi i lu “akaa a a lu shin tar” laa, man a hingir mbaperapera sha ishigh ki Yehova nena?
16 Iyôngo igen i Kristu, i i lu a ishimaverenkeghen i va yan dyako shin tar gbem sha won la di mba “akaa a a lu shin tar” la. Mban kpa, Wanakiriki u Yehova na, ve hingir mbaperapera sha ishigh ki Yehova. Er ve ne nagh ku Kristu jighjigh yô, “ve ôô uriga vev ken awambe a Waniyôngo, ve kungu ve,” sha nahan yô, Yehova na ve ishô. Kpa a na ve ishô ve hingir ônov nav mba ken jijingi ga, kpa ve hingir ahuraior a na, shi a na ve ishimaverenkeghen i waren “zegecan” kpaa. (Mpa. 7:9, 10, 14; Yak. 2:23) Er iyôngo igen ne i lu ken ikyuryan i he ne ga, shi ve lu a ishimaverenkeghen i yemen sha ga yô, mba ye bredi sha iyange i umbur ku u Yesu la ga, kpa ka ve za sha u tesen icivir.
I̱ Wuese Yehova man Wanakiriki u a Tsough La!
17. Akaaôron a profeti a i er ken takerada u Yesaia sha kwagh u Wanakiriki ne wase se u wan ago a umbur ku u Yesu nena?
17 Akaaôron a profeti a i er ken takerada u Yesaia sha kwagh u Wanakiriki ne, a se tim sha mi la ka gbenda u injaa kpishi, u wan se ago a va umbur ku u Kristu. Kwagh ne wase se u “veren . . . ashe sha Yesu Orhemen man Orkuren u jighjigh wase u nan.” (Heb. 12:2) Se hen se fa er Wan u Aôndo a hembe ato gayô. Ngu er Satan nahan ga, kpa ka i sar un tsung u henen kwagh sha ikyev i Yehova, shi nengen Yehova ér ka Aôndo u Hemban kpaa. Shi se hen ser shighe u Yesu lu eren tom u pasen kwagh shin tar la mhôônom kôr un a ior kpishi nahan bee ve angev mbu sha iyol man mbu ken jijingi. Akaa a a er ne tese ikyav i kwagh u una va er, shighe u una tema Tor u Tartor u Mesiya ken tar u he, shighe u una ‘ver ijirôron i mimi sha won’ cii la. (Yes. 42:4) Gbashima u yange lu a mi sha tom u pasen kwagh u Tartor je hingir “iwanger i tar” la ka ikyav i dedoo, i i gbe u mbadondon nav vea dondo vea pasen loho u dedoo sha gbashima tar sha won cii yô.—Yes. 42:6.
18. Kwaghôron u profeti u Yesaia la na se wuese Yehova kpishi kua Wanakiriki na u jighjigh la sha ci u nyi?
18 Kwaghôron u profeti u Yesaia ne shi wase se u seer fan kwagh u nagh ku vesen ku Yehova a ne sha u tindin Wan na u ishima ishima shin tar ér a va ya ican shi a kpe sha ci wase la. Yange doo Yehova u nengen ican i Wan na lu yan la ga, kpa kwagh u doo un yô, lu mtil u Yesu tile sha mimi zan zan ku na la. Kwagh u Yesu a er sha u tesen ér Satan ka or u aiegh shi mtsegh u a tsegha iti i Yehova shi a paa hementor na iyol la a̱ doo se, vough er Yehova kpa i doo un nahan. Heela tseegh ga, Kristu tôô asorabo ase sha iyol na shi kpe sha ci wase kpaa. Sha nahan yô, a bugh ian sha er anikumuile u kpeghee u i shigh un mkurem la kua iyôngo igen la ia hingir mbaperapera sha ishigh ki Yehova yô. Shighe u se lu eren mkombo u umbur ku u Yesu la, se wuese nen Yehova man wanakiriki na u jighjigh la tsung.
U Hiden Saven a Sav
• Ka sha nyi gbenda nahan ‘i lu ishima’ i Yehova u “vihin” Wan na iyolo?
• “I kuma [Yesu] sha ci u akaabo ase” nena?
• Wanakiriki ‘gema ior kpishi hingir mbaperapera’ nena?
• Akaaôron a profeti a sha kwagh u Wanakiriki la, a u tim sha mi la wa u ago a umbur ku u Yesu nena?
[Mbampin Mba Ngeren u Henen]
[Foto u sha peeji 26]
“I laha Un man se kpaa se wa Un ikyo ga”
[Foto u sha peeji 28]
“A gbihi uma Na ken ku je”
[Foto u sha peeji 29]
Mba ve lu “iyôngo igen” la mba ze mkombo u umbur ku u Yesu la sha u tesen iwuese