Nenge! Wanakiriki U Yehova A Tsough Yô
Nenge! Wanakiriki U Yehova A Tsough Yô
“Nenge Wanakiriki Wam . . . icuwan Wam u ishima i doom a Na yum yô.”—YES. 42:1.
1. I taver Mbashiada mba Yehova ishima ér ve er nyi shighe u umbur ku u Yesu a lu zurum nee, man ka sha ci u nyi?
ER SHIGHE u umbur ku u Kristu a lu zurum yô, doo u ior mba Aôndo vea dondo kwaghwan u apostoli Paulu ne, a kaa ér: “Sé veren nen ashe sha Yesu Orhemen man Orkuren u jighjigh wase u nan.” Shi a za hemen ér: “Ver nen ishima sha Un u A taver ishima sha imbaanyiman i mbaasorabo sha iyol Na la, sha u uma wen u ken ishima la a̱ de kera vôron ga, ishima kpaa, i̱ de yen ne ga” yô. (Heb. 12:2, 3) Aluer se mba veren ashe sha uma u jighjigh u Kristu yange lu zan zan kar nan uma na sha u paan se la yô, kwagh ne una wase Mbakristu mba i shigh ve mkurem la kua akar a ve, a a lu iyôngo igen la u zan hemen u civir Yehova sha mimi, nahan kera ‘yinan ishima ga.’—Nenge Mbagalatia 6:9.
2. Akaaôron a profeti a Yesaia a er sha kwagh u Wan u Aôndo la tese se nyi?
2 Yehova yange ôr akaaôron a profeti sha ikyev i profeti Yesaia kpishi a sha kwagh u Wan na. Uprofeti mban vea wase se u “veren . . . ashe sha Yesu [Kristu] Orhemen man Orkuren u jighjigh wase u nan.” * Ve pase kwagh u uma u Yesu man ican i yange ya la kua mver u i ver un Tor shi hingir Oryiman wase la. Shi vea wase se u seer zuan a mfe sha kwagh u M-umbur u ku u Yesu, u a lu eren sha iyange i Tomanyiin, Aipor 9, aikighe la.
I Fa Wanakiriki Ne
3, 4. (a) Ka a̱ ôron kwagh u “wanakiriki” ken takerada u Yesaia nahan i lu ôron kwagh u ana? (b) Bibilo pase wanakiriki u i er kwagh na ken Yesaia ityough 42, 49, 50, 52, man 53 la nena?
3 I ter ishember i “wanakiriki” ne kwa kimbir kimbir ken takerada u Yesaia. Ashighe agen ka i yar tom a ishember ne u ôron kwagh u profeti ne iyol na. (Yes. 20:3; 44:26) Shi ashighe agen yô, ka i yar tom a i̱ u ôron kwagh u nongoior u Iserael cii shin Yakob. (Yes. 41:8, 9; 44:1, 2, 21) Man gema di akaaôron a profeti a vesen a i er sha kwagh u Wanakiriki ne, i nger ken Yesaia ityough 42, 49, 50, 52, man 53 la di ye? Ruamabera u Mbakristu u ken Zwa Grika gbihi se ken ime sha kwagh u Wanakiriki u Yehova, u i er kwagh na ken ityouv mbira la ga. Kwagh ka a er i doo yô, Oretiopia u eren tom ken ya u tor, u i er kwagh na ken takerada u Aerenakaa la yange lu ôron môm ken akaaôron a profeti ne shighe u jijingi mgbegha Filibu, orivangeli la ér a za kohol un la. Shighe u or u eren tom ken ya u tor la ôr kwagh u hegen a lu ken Yesaia 53:7, 8 la been yô, a pine Filibu ér: “Shi ôrom yôô; profeti ne yô, ka kwagh u an a ere? Ka kwagh na iyol na, shin ka kwagh u orgene?” Filibu vihi shighe ga, pase un er kwaghôron u profeti la a lu ôron kwagh u Yesu, u a lu Mesiya la yô.—Aer. 8:26-35.
4 Shighe u Yesu lu ankyundan u forototo la, jijingi mgbegha Shimion, orperapera ugen nahan kaa ér, “Yesu” una hingir “iwanger i á pase i hen atôatyev” yô, vough er i̱ tsenganôron ken Yesaia 42:6 man 49:6 nahan. (Luka 2:25-32) Heela tseegh ga, Yesaia 50:6-9 tsengaôron ican i yange i na Yesu hen tugh mbu gba u a ôr un ijir a wua un la. (Mat. 26:67; Luka 22:63) Yange Pentekosti u inyom i 33 la been yô, apostoli Peteru pase jighilii ér, Yesu ka “Wanakiriki” u Yehova. (Yes. 52:13; 53:11; ôr Aerenakaa 3:13, 26.) Akaaôron a profeti a sha kwagh u Mesiya ne tese se nyi?
Yehova Tese Wanakiriki Na
5. Yange i tese Wanakiriki ne nena?
5 Môm ken akaaôron a profeti a i er ken Yesaia sha kwagh u wanakiriki la ta iwanger sha mzough u kôôsoo u a lu hen atô u Yehova vea waniunda na, shighe u lu a va shin tar ga la. (Ôr Yesaia 50:4-9.) Wanakiriki la iyol na kpa tese ér Yehova yange tesen un hanma shighe cii, a kaa ér: “Hanma sev ka A nderem, ka A bughum ato er M̱ ungwa er ior mba henen kwagh nahan.” (Yes. 50:4) Sha ashighe la cii, Wanakiriki u Yehova ne ungwan Ter na shi henen kwagh hen a na kpaa, sha nahan yô, hingir orhenen u ungwan kwagh. Ka kwagh u civirigh kpishi u henen kwagh sha ikyev i Orgbanakaa.
6. Wanakiriki ne yange tese ér un ungwan Ter na sha mimi nena?
6 Ken kwaghôron u profeti ne, Wanakiriki ne ôr kwagh u Ter na ér: “Ter AÔNDO u Hembansha, NW”. Kwagh ne tese ér, Wanakiriki ne fa ér Yehova ka tor u hemban sha won cii. Yesu kaa ér: “Ter AÔNDO bugh ato Am, M hendan ga, M hide ijime kpaa ga,” kwaghôron ne tese ér ongo imo i Ter na sha mimi. (Yes. 50:5) Wanakiriki ne ‘lu vea [Yehova], er or u fan tom nahan luun saan saan [sha shigh ki Yehova] gbem ember sha ishigh Nagh gbem, ember ken tar Na u sha won cii, doo [un] a ônov mba iorov tsung.’—Anz. 8:22-31.
7. Kanyi i tese ér Wanakiriki ne lu a vangertiôr ér Ter na una wase un ken shighe u icana?
7 Ityesen i Wanakiriki ne ngohol man mdoo u ônov mba iorov doo un ishima tsung la yange wase un shighe u va shin tar la kua shighe u tagher a ameen la kpaa. Yange za hemen u ungwan imo i Ter na zan zan shighe u tagher a tôvacan u vihin tsung la je kpaa. (Ps. 40:8; Mat. 26:42; Yoh. 6:38) Sha ashighe a Yesu lu yan ican shin tar la cii, fa je ér, Ter na lumun un shi una wase un kpaa. Er kwaghôron u profeti u Yesaia la tsengaôron nahan, Yesu yange kaa ér: “Wen u a nem ishô la, ngu ikyua ikyua; . . . Ka an nan lu orhendan a moo? Nenge, Ter AÔNDO wasen Mo.” (Yes. 50:8, 9) Yehova yange wase Wanakiriki na u jighjigh ne shighe u lu eren tom na u pasen kwagh shin tar la, vough er kwaghôron u profeti u Yesaia ugen a tese nahan.
Wanakiriki Ne Er Tom u Pasen Kwagh Shin Tar
8. Kanyi i tese ér Yesu yange lu “icuwan” u Yehova, er i tsengaôron ken Yesaia 42:1 nahana?
8 Bibilo pase se kwagh u yange er shighe u i er Yesu batisema ken inyom i 29 la. Ijiir la kaa ér: “Icighan Jijingi sen sha a Na . . . imo kpaa due Sha kaa ér: We, U ngu Wan Wam u ishima ishima; ka We ishima i doom a We yum ye.” (Luka 3:21, 22) Nahan Yehova pase kwagh u “icuwan” na wang, er i er ken kwaghôron u profeti u ken Yesaia la nahan. (Ôr Yesaia 42:1-7.) Shighe u Yesu lu eren tom u pasen kwagh shin tar la, kure kwaghôron u profeti ne sha gbenda u vesen kpishi. Mateu yange ôr kwagh ken Ivangeli na ter mkaanem ma ma lu ken Yesaia 42:1-4 la sha Yesu.—Mat. 12:15-21.
9, 10. (a) Yesu yange kure kwaghôron u ken Yesaia 42:3 la shighe u lu eren tom u pasen kwagh shin tar la nena? (b) Kristu yange va a “ijirôron i sha mimi,” shighe u lu shin tar la nena, man una ‘ver ijirôron i mimi sha won cii’ hanma shighe?
9 Mbahemenev mba ken kwaghaôndo u Mbayuda yange ve nyaghen Mbayuda mba ve lu atsanaior la. (Yoh. 7:47-49) Yange i nzughul a ve kpishi. A fatyô u tôôn ve karen sha ‘azenga a sombon’ shin ‘imenger i i shi cuku u pirin’ yô. Kpa Yesu yô, eren a ior nahan ga, yange eren a atsanaior man mba i nzughul a ve la sha dooshima. (Mat. 9:35, 36) Yange a lôhô amba la sha dooshima ér: “Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem.” (Mat. 11:28) Heela tseegh ga, Yesu “va a ijirôron sha mimi.” sha u tesen atindi a Yehova a wang a sha kwagh u dedoo man u bo la. (Yes. 42:3) Shi a tese ér gba u se kuran Atindi a Aôndo sha kwaghfan man sha mhôôn kpaa. (Mat. 23:23) Yesu shi tese ijirôron i mimi sha u pasen hanma or cii kwagh, a lu mbanyarev shin atsanaior kpaa.—Mat. 11:5; Luka 18:18-23.
10 Yesaia shi tsengaôron ér “icuwan” u Yehova ‘una ver ijirôron i mimi sha won cii.’ (Yes. 42:4) Er a lu Tor u Tartor u Mesiya yô, una er kwagh ne shighe u una hembe ityartor i sha won cii avur avur, una gema a ver Tartor na u perapera la. Una ver tar u he u “perapera una tema ker yô.”—2 Pet. 3:13; Dan. 2:44.
“Iwanger” man “Ikyuryan”
11. Yesu yange lu “iwanger i akuraior” ken derianyom u hiihii la sha nyi gbenda, man hen shighe wase ne kpa ngu iwanger nena?
11 Yesu yange lu “iwanger i akuraior” sha u kuren kwagh u Yesaia 42:6 a er la. Shighe u lu eren tom u pasen kwagh shin tar la, lu Mbayuda jighilii hii van ve a iwanger i ken jijingi ye. (Mat. 15:24; Aer. 3:26) Nahan kpa, Yesu kaa ér: “Mo M ngu iwanger i tar.” (Yoh. 8:12) Yange hingir iwanger hen Mbayuda man akuraior cii sha u van a iwanger i ken jijingi hen a ve tseegh ga, kpa na uma na u vough la ér a lu iwom sha ci u ior cii. (Mat. 20:28) Yange mba nderen un yô, a wa mbahenen nav tindi ér, ve pase kwagh na zan zan “ken ikighir i tar je.” (Aer. 1:8) Shighe u Paulu man Barnaba lu eren tom u pasen kwagh la, ve ôr kwagh sha ishember i“iwanger i akuraior” la, nahan ve tôô kwaghôron ne ve kar sha tom u pasen kwagh u ve lu eren hen mba ve lu Mbayuda ga la. (Aer. 13:46-48; nenge Yesaia 49:6.) Anmgbianev mba Yesu mba ve lu shin tar la kua akar a ve la mba zan hemen u eren tom u samber a iwanger i ken jijingi ne, sha nahan yô, mba wasen ior u nan Yesu u a lu “iwanger i akuraior” la jighjigh.
12. Yehova na Wanakiriki na “hingir ikyuryan hen ior” nena?
12 Yehova ôr a Wanakiriki na u a tsough la ken kwaghôron u profeti shon ér: “M kura U kpaa; M gema U, U hingir ikyuryan i ior.” (Yes. 42:6) Satan yange nôngo sha afatyô na cii ér una wua Yesu nahan una yange un u kuren tom u va shin tar u va eren la. Nahan kpa, Yehova kura un zan zan shighe u kuma u una kpe la. (Mat. 2:13; Yoh. 7:30) Yehova nder Yesu shin ku, gema un hingir “ikyuryan” shin kwagh u a na sha u paan ior yô. Ityendezwa la tese ér, Wanakiriki u jighjigh u Aôndo ne una za hemen u lun “iwanger i akuraior,” duen a ve ken ime i ken jijingi la kera.—Ôr Yesaia 49:8, 9. *
13. Shighe u Yesu lu eren tom u pasen kwagh shin tar la, yange yima ‘mba ve tem ken ime’ mbara nena, man ngu yiman ve her nena?
13 Sha u kuren ityendezwa i Yehova a er la yô, yange gba u Wanakiriki na una ‘bugh mbaapirashe ashe shi una dugh mbakwarev agbe shi una dugh mba ken gaadi ken ime kera.’ (Yes. 42:7) Shighe u Yesu lu eren tom u pasen kwagh shin tar la, a kure kwaghôron ne sha u ponon aeren a kwaghaôndo u aiegh shi pasen loho u dedoo u Tartor. (Mat. 15:3; Luka 8:1) Sha nahan yô, dugh Mbayuda mba yange ve hingir mbahenen nav la ken ikyangenev mbi ken jijingi kera. (Yoh. 8:31, 32) Shi Yesu wase mbagenev umiliôn imôngo mba ve lu Mbayuda ga la u fan mimi. A wa mbadondon un tindi ér, ve “za gema . . . akuraior cii a̱ hingir mbahenen,” shi a tôndo zwa a ve ér una “luun a [ve] ayange ayange zan zan mkurtar je.” (Mat. 28:19, 20) Er Yesu a lu sha nahan kpa, ngu nengen sha tom u pasen kwagh u i lu eren tar sha won cii ne.
Yehova Kende a “Wanakiriki” Na Sha
14, 15. Yehova kende a Wanakiriki na sha nena, man ka sha ci u nyi?
14 Shi Yehova ôr kwagh ken kwaghôron u profeti ugen u sha kwagh u Wanakiriki na, u a lu Mesiya la ér: “Nenge, á kpe Wanakiriki Wam iyol, á na Un icivir, á kende Un sha, á kende Un sha tsung je.” (Yes. 52:13) Er Wan u jighjigh ne yange ungwa imo i Yehova shi tese ér un sue hementor Na, shi er lu jighjigh shighe u tagher a imeen i hemban kpaa yô, Yehova kende a na sha.
15 Apostoli Peteru nger kwagh u Yesu ér: “Ngu ken uwegh ku yanegh ku Aôndo, i gema mbatyomov mba Shaav man tahav kua agee i wa Un sha ikyev.” (1 Pet. 3:22) Apostoli Paulu kpa nger ér: “A hide a iyol Na ijime, hingir u ungwan kwagh zan zan ar ken ku, man lu ku u sha [kon u mtsaha, NW ] je. Ka sha ci u nahan man Aôndo A kende Un sha kpishi je ye, A ii Un iti i i hembe hanma iti igen cii, sha er hanma inyu cii i mba ve lu Sha man mba ve lu shin tar man mba ve lu shin atô u taregh kpaa, ia gure inya ken iti i Yesu yô, man hanma nombor kpaa ua pase er Yesu Kristu ka Ter je sha ci u iengem i Aôndo Ter.”—Fil. 2:8-11.
16. Yange i ‘kende a Yesu sha tsung’ ken inyom i 1914 la nena, man hii shighe la je ngu eren nyi?
16 Ken inyom i 1914 la, Yehova seer kenden a Yesu sha. Yange i ‘kende a na sha tsung’ shighe u Yehova na un Tor u Tartor u Mesiya la. (Ps. 2:6; Dan. 7:13, 14) Hen shighe la je, Kristu hingir u ‘teman tor hen atô u mbaihyomov nav.’ (Ps. 110:2) Kwagh u tema tor ve hii eren yô, daa Satan man azôv a na Sha gbihi ve shin tar. (Mpa. 12:7-12) Kristu, u a lu Shirushi u Vesen la, due a asande a mba i shigh ve mkurem, ve lu shin tar la ken “Zegebabilon” kera. (Mpa. 18:2; Yes. 44:28) Shi a hemen tom u pasen loho u dedoo, u i lu eren tar sha won cii sha u kohol asande a mba i shigh ve mkurem man “iyôngo igen,” i i lu umiliôn umiliôn, i lu suen “anikumuile u kpeghee” la.—Mpa. 12:17; Yoh. 10:16; Luka 12:32.
17. Se hen nyi sha kwagh u akaaôron a profeti a Yesaia a er sha kwagh u “Wanakiriki” laa?
17 Akaaôron a profeti a ken takerada u Yesaia a se hen ne wase se u seer lun a iwuese sha Kristu Yesu, u a lu Tor wase man Oryiman wase la. Ityesen i Aôndo yange tese Yesu cii man va shin tar la wase un kpishi u ungwan imo i ter na shighe u lu shin tar la. Yange tese ér un ngu “iwanger i akuraior” sha u eren tom u pasen kwagh, shi mnenge u a lu nengen sha u zan zan nyian la kpa tese ér ngu iwanger i akuraior. Kwaghôron u profeti ugen u sha kwagh u Wanakiriki, u a lu Mesiya la tese ér una ya ican shi una na uma na sha ci wase. Doo u se ‘ver ishima’ sha akaa ne, er ku umbur u Yesu u lu ikyua yô.—Heb. 12:2, 3.
[Ngeren u shin kpe]
^ U fatyô u zuan a akaaôron a profeti ne ken takerada u Yesaia 42:1-7; 49:1-12; 50:4-9; man 52:13–53:12.
^ Aluer u soo u fan kwagh u i er sha kwagh u kwaghôron u profeti u ken Yesaia 49:1-12 la yô, nenge takerada u Isaiah’s Prophecy—Light for All Mankind II, [zwa buter] peeji 136-145.
U Hiden Saven a Sav
• Ka an nan lu “Wanakiriki” u i er kwagh na ken akaaôron a profeti a ken takerada u Yesaia laa, man er nan se fe?
• Ka ityesen i nyi yange Wanakiriki ne ngohol hen Yehovaa?
• Yesu ngu “iwanger i akuraior” nena?
• Yange i kende a Wanakiriki ne sha nena?
[Mbampin Mba Ngeren u Henen]
[Foto u sha peeji 21]
Filibu yange fa “Wanakiriki” u i er kwagh na ken Yesaia la ér ka Yesu, un u a lu Mesiya la
[Foto u sha peeji 23]
Er Yesu lu Wanakiriki u Yehova a tsough un yô, mhôônom kôron un a atsanaior man mba i nzughul a ve la
[Foto u sha peeji 23]
Ter u Yesu yange kende a na sha tsung shi na un Tor u Tartor u Mesiya