Zua A Iember Ken Tom U Geman Ior Hingir Mbahenen La
Zua A Iember Ken Tom U Geman Ior Hingir Mbahenen La
“Nahan yô, za nen, za gema nen akuraior cii a̱ hingir mbahenen.”—MAT. 28:19.
1-3. (a) Mbagenev kpishi mba nengen ian i henen Bibilo a ior la nena? (b) Ka mbampin mba nyi se lu timen sha mini?
ANMGBIAN u kwase ugen u a lu eren tom vea tiônnongo u lamen zwa Hindi ken tar u Amerika yange nger ér: “M ngu henen Bibilo vea tsombor ugen u u lu marnya u tar u Pakistan yô, kuma ulahadi 11 hegen, shi ve hingir azende am kpaa. Ka mea umbur er tsombor ne u sôôn hiden ken tar ve, ken Pakistan nahan mliam ma haam ashe. U ngu wer, ka ijungwen i me kera lu a ve ga la tseegh ka i na m vaa ga, kpa ka iember i ka m zua a mi shighe u ka mea tesen ve kwagh u Yehova la.”
2 I lu nahan u zua a iember sha u henen Bibilo a or er anmgbian u kwase ne nahan vee? Yesu man mbahenen nav mba sha derianyom u hiihii la yange ve zua a iember i vesen ken tom u geman ior hingir mbahenen ne. Zum u mbahenen mba akunduatargber mba Yesu tese ve u pasen kwagh mbara za hide a abaver a dedoo yô, Yesu iyol na “ember ken Icighan Jijingi.” (Luka 10:17-21) Kape mbakpishiv nyian ve zough a iember i vesen ken tom u geman ior hingir mbahenen je la. Ikyav i tesen yô, ken inyom i 2007 la, mbapasen kwagh sha gbashima hen Bibilo a iorov mba kuman er miliôn ataratar man tiôn nahan hanma wer.
3 Nahan cii kpa, mbapasenkwagh mbagenev mba a zua a msaanyol u henen Bibilo a or la ga. Mbagenev di yô, alaghga ken anyom a a sember karen ne cii ve hen Bibilo a ma or ga. Ka mbamtaver mba nyi nahan, alaghga se̱ tagher a mi zum u se lu nôngon ser, se hen Bibilo a oro? Se hemba mbamtaver mba shon nena? Man ka mbamtsera mba nyi se zua a mi aluer se nôngo sha afatyô wase cii ser se kura tindi u Yesu a we se ér: “Za gema nen akuraior cii a̱ hingir mbahenen” laa?—Mat. 28:19.
Mbamtaver Mba Vea Fatyô u Yangen Se Iember Yô
4, 5. (a) Ior mbagenev ken ityar igen mba nengen loho u dedoo u se pasen ne nena? (b) Ka mbamtaver mba nyi mbapasenkwagh mbagenev ve tagher a mi sha ajiir a gene?
4 Ken ityar igen yô, ka i torough ior iyol u ngohol ityakerada yase, shi ka i doo ve u henen Bibilo a vese kpaa. Anmgbian ugen ken tar u Australia vea kwase na, mba yange ve tsua u eren tom u pasen kwagh ken tar u Zambia sha anshighe kpuaa yô, nger ér: “Akaa a se vande ungwan sha kwagh u tar u Zambia la cii ka mimi. Zambia ka ijiir i ior ve keghen ato a loho u se pasen ne kpishi yô. Kwagh pasen u sha godobi nahan doo je gande! Ior ka ve pine se akaa, mbagenev je yô, ve pine umagazin sha atineakaa a ve soo la jighilii.” Inyom i môm ken anyom a a sember karen la, anmgbianev mba nomso man mba kasev mba ken tar u Zambia yange ve hen Bibilo a iorov hemba 200,000 nahan. Hanma orpasenkwagh yange nan hen Bibilo a or môm tseegh ga.
5 Nahan cii kpa, sha ajiir agen yô, alaghga a taver mbapasenkwagh u nan ityakerada ken won shi henen Bibilo a ior hanma shighe. Sha ci u nyi? Ashighe kpishi, ior ka ve lu hen ya shighe u orpasenkwagh nan va u va pasen kwagh la ga, man ashighe agen di yô, alaghga vea kohol ior hen ya nyiaan je kpa kwagh a gba ve sha kwaghaôndo ga. Ambaaior la adooga vea lu mba ve dugh hen uyaav mba i eren kwaghaôndo her ga yô, shin mba kwaghaôndo jimin cii a te ve ijar sha ieren i imangerev i i dumbur ken kwaghaôndo u aiegh la. Mbakuran mba aiegh nzughul a ior kpishi ken jijingi, ve gba kenden ve dang tsô. (Mat. 9:36) Jighilii yô, a doo mbara nahan u henen Bibilo keng ga.
6. Ka uzayol mba nyi alaghga mbapasenkwagh mbagenev vea lu tagher a mini?
6 Mbapasenkwagh mbajighjigh mbagenev tagher a zayol u a yangen ve u zuan a iember yô. Shin er yange ve lu eren tom u geman ior hingir mbahenen ne taveraa nahan kpa, angev shin zayol u iyolbeen ka i va a mi la na yô, mba kera eren tom ne er yange ve eren nahan ga. Heela tseegh ga, mbamzeyol mbagenev mba, mba ka se va a mi sha iyol yase yô. U tesen ikyav yô, ka i lu u inja er u yina u henen Bibilo a or yôô? Alaghga a lu u ken ishima er yange lu Mose ken ishima shighe u Yehova tindi un ér a za lam a Farao la nahan. Mose kaa ér: “Tere, mo m ngu or u fan kwaghôron ga, ngise kpaa ga, shin hegen er U er kwagh a wanakiriki Wou ne kpaa ze.” (Eks. 4:10) Zayol ugen u una fatyô u yange mbagenev u zuan a iember yô, ka mciem ma lun a mi ér vea fatyô u geman or ga la. Alaghga se hen ser, or la nan hingir orhenen ga sha ci u se fa ityesen ga, nahan ishima ia za se iyol. Sha nahan yô, se palegh u henen Bibilo a or sha er imba kwagh la ia er se ga yô. Se hemba mbamtaver mba se ter sha heen mban nena?
Sôr Ishima You
7. Lu nyi i̱ mgbegha Yesu u eren tom u pasen kwagha?
7 Kwagh u hiihii u se er sha u hemban mbamtaver mban yô, ka u sôron asema a ase. Yesu kaa ér: “Ka sha m-iv u ken ishima man zwa u er kwagh ye.” (Luka 6:45) Kwagh u yange wase Yesu u eren tom u pasen kwagh ne sha gbashima yô, lu ikyo i yange wa mbagenev la. U tesen ikyav yô, shighe u Yesu nenge Mbayuda de u civir a Aôndo yô, “mhôônom kôr Un a ve tsung.” Tsô a kaa a mbahenen nav ér: “Sunda ngee je . . . sôn nen Ter u sunda, A tindi mbatomov ken sunda Na.”—Mat. 9:36-38.
8. (a) Ka akaa a nyi nahan i doo u se gbidye kwar sha mini? (b) Mkaanem ma orgen u henen Bibilo a er la tese se nyi?
8 Shighe u se lu eren tom u geman ior hingir mbahenen yô, doo u se hide se gbidye kwar se nenge mbamtsera mba se zough a mi sha ci u yange ma or hen Bibilo a vese la. Heela tseegh ga, shi se hen kwagh u ior mba se zou a ve shighe u se lu pasen kwagh la man mtsera u vea ungwa loho wase ve vea zua a mi la yô. Kwase ugen nger afishi a branci a ken tar na washika wener: “Sarem ka ngeren sughun Mbashiada mba Yehova mba kasev mba yange ve tesem Bibilo hen ya wam la kpishi. M fa je mer, ashighe agen yange i wa taver ve a mo, sha ci u m lu a mbampin kpishi mba pinen ve, sha nahan yô, i gba u vea lu gbem a hemba shighe u ve ver la. Kpa, ve wa ishima a mo, shi torough ve u tesen mo kwagh u ve fe la kpaa. M wuese Yehova man Yesu kpishi er kasev mban ve wase uma wam nahan.”
9. Yesu yange ver ishima sha nyi, man se fatyô u dondo un nena?
9 Se cii se fa er yange lu hanma or cii nan ngohol ityesen i Yesu la ga nahan. (Mat. 23:37) Mbagenev yange ve dondo un, kpa ka ze deghôô yô, ve huna ityesen na, nahan “ve kera za a Na ityô ga.” (Yoh. 6:66) Nahan kpa, Yesu de ér ieren i mbagenev la i vihi loho na ga. Shin er vor u Yesu ta la kpishi ume atam ga nahan kpa, hemba veren ishima sha kwagh u dedoo u un lu eren la. Yange nenge er iyiav mbi ken sule via kuma u sundan yô, nahan saan un iyol kpishi u wasen tom sunda la. (Ôr Yohane 4:35, 36.) Se kpaa, doo u se hemba veren ishima sha inya i gbilinigh i i lu a asange a wua la ga, kpa se hemba veren ishima sha sunda u i gbe u se sunda ken uharegh asev la. De se time nen sha kwagh u una wase se u lun a vangertiôr la yô.
Lôô a Ishima i Sundan
10, 11. Kanyi i doo u u er sha er u za hemen u pasen kwagh saan saana?
10 Orsule ka nan ta ivor ér nana va sunda iyiav. Kape se kpa, i gbe u se pasen loho a ishimaveren i hiin Bibilo i henen a ior je la. Nahan kpa, aluer u ngu pasen loho u Tartor hanma shighe kpa u ngu zuan a ior hen uyaav vev ga, shin u ngu fantyô zuan a ior mba u soo u hiden za sôron ve la ga di ye? Kwagh ne una fatyô u nan we iyol kpen. Sha nahan yô, doo u ú de kwagh pasen u sha uya uya laa? Mayange ga! Mbagenev kpishi, ka sha kwaghpasen u sha uya uya u i pase ica i gbe hegen ne i lu zuan a ve ye.
11 Aluer u soo u zuan a msaanyol ken tom wou u pasen kwagh ne yô, hii nan u seer igbenda you i pasen kwagh la sha u lamen a ior sha igbenda igen ga? U tesen ikyav yô, i lu nahan u kar u pasen ior kwagh sha ugodobi shin sha ajiir a tom vee? Ú fatyô u pasen ior kwagh sha telefon, shin ngohol unamba mba ior mba u vande pasen ve kwagh u Tartor la sha er u gbidyen ve waya hanma shighe kpa? Aluer u gba uwer u pasen kwagh ga, shi u ngu yaren tom a igbenda igen kpa u pasen kwagh yô, u zua a msaanyol u or ka nan zua a mi shighe u ior ve kegh ato a loho u Tartor la.
Er Se Wa Ishima a mba Kwagh a Gbe Ve a Kwaghaôndo Ga la Yô
12. Aluer ior mba hen haregh wase soo kwagh u kwaghaôndo ga nahan se er nena?
12 Aluer kwagh kera gba ior mba ken haregh wou a kwaghaôndo ga nahan, u er nena? Ú fatyô u geman gbenda u u pasen kwagh la sha er kwaghôron wou la una kôr ve ken ishima kpa? Apostoli Paulu yange nger mbananjighjigh a na imôngo mba ken Korinte wener: “Mbayuda yô, m hingir ve er Oryuda nahan . . . Mba ve lu sha tindi ga yô, m hingir ve er or u sha tindi ga yô, . . . nahan kpaa m ngu or u sha atindi a Aôndo ga ze.” Paulu er nahan sha ci u nyi? A kaa wener: “Ior cii m hingir ve hanma kwagh cii, sha u a lu nan nan kpaa, me yima mbagenev yô.” (1 Kor. 9:20-22) Se kpa se fatyô u zuan a atôakyaa aa a doo ior mba hen haregh wase u ungwan yôô? Ior kpishi mba ve eren kwaghaôndo ga yô, soo u sôron icombor ve. Shi alaghga vea lu nôngon ér ma ve fe awashima u uma. Se fatyô u pasen amba a ior la loho u Tartor sha gbenda u ua kôr ve ken ishima kpa?
13, 14. Se seer zuan a msaanyol ken tom u geman ior hingir mbahenen la nena?
13 Mba pasen kwagh u Tartor kpishi zua a iember kpishi ken tom u geman ior hingir mbahenen ne shin sha ajiir a ior ve soo kwagh u kwaghaôndo ga je kpaa. Ve er kwagh ne nena? Ve er kwagh ne sha u henen zwa ugen. Anmgbian ugen vea kwase na, mba ve hembe anyom 60 yange ve nenge ér mbayevmakeranta udubu udubu, mba ve lamen zwa u China, vea icombor ve va tema twer hen haregh u i ne tiônnongo ve yô. Nom la kaa ér: “Sha ci u ityôkyaa ne yô, ishima mgbegha se u henen zwa China.” A za hemen ér: “Shin er yange gba u se vihi shighe kpishi hanma iyange u henen zwa la nahan kpa, kwagh ne na se hingir u henen Bibilo a ior kpishi, mba ve lamen zwa China yô, hen ijiir yase.”
14 Aluer u kôr cio u henen zwa ugen ga je kpa, u fatyô u yaren tom a antakerada u i yer ér, Good News for People of All Nations la tsemberee, shighe u u zough a or u nan lamen zwa ugen yô. Shi u fatyô u zuan a ityakerada i i gber i ken ijô i ior mba u zough a ve mbara. Jighilii yô, aluer se soo u pasen mba ve lamen zwa ugen shi aeren a ityôô a ve kpa a lu kposo yô, a gba u se na shighe wase kua tahav asev kpishi. Kpa de hungur kwagh u Mkaanem ma Aôndo ma er la ga, ma kaa ér: “Or u nan lee wuee yô, nana sunda di wuee je.”—2 Kor. 9:6.
Tom Ne Ka u Tiônnongo Jimin Cii
15, 16. (a) Tom u geman ior hingir mbahenen la ka u tiônnongo jimin cii sha ci u nyi? (b) Ka tom u nyi mbabeenyol ve lu a mi u erene?
15 Tom u geman ior hingir mbahenen la ka tom u or môm tseegh ga. Kpa, ka tom u tiônnongo jimin cii. Á fatyô u ôron nahan sha ci u nyi? Yesu kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yoh. 13:35) Man sha mimi yô, shighe u mbahenen Bibilo ka vea za mbamkombo asev yô, ve nenge dooshima u a lu hen atô wase la nahan i doo ve kpen kpen. Kwase u henen Bibilo ugen nger ér: “Ka mea za mbamkombo nahan i doom je i gande. Ior mbara ka ve ngohol ior saan saan.” Yesu yange kaa wener, mba vea hingir mbadondon un cii icombor ve ia hendan a ve. (Ôr Mateu 10:35-37.) Nahan kpa, Yesu tôndo zwa wener, vea zua a anmgbianev ken jijingi mba “nomso man mbakasev kua ungôôv man ônov” ken tiônnongo.—Mar. 10:30.
16 Anmgbianev asev mbanomso man mbakasev mbabeenyol mbara mba a ci u vesen ken tom u wasen mbahenen Bibilo u zan ikyura. Sha nyi gbenda? Er mbabeenyol mbagenev ve kera fetyô u henen Bibilo a ior ga nahan kpa, mkaanem vev ma taver ishima ma ka ve ôr ken mbamkombo mba tiônnongo la, ka ma taver jighjigh u hanma or u nan ongo ma cii. Er i fe ve ér, mba zenden “sha gbenda u perapera” yô, kwagh la ka a seer iengem i tiônnongo shi a urugh mbaasemaamimi ve va ken nongo u Yehova kpaa.—Anz. 16:31.
Er Se Hemba Mciem Yô
17. Aluer ishima ngi zan se iyol ér se yina u henen Bibilo a or nahan, se er nena?
17 Aluer ishima ngi zan we iyol ér ú yina u henen Bibilo a or nahan, u er nena? Umbur er yange Yehova wase Mose, na un Icighan Jijingi, shi na un Aron, u lu anngô na u nomso la ér a wasen un yô. (Eks. 4:10-17) Yesu yange tôndo zwa wener, jijingi u Aôndo una sue tom wase u pasen kwagh ne. (Aer. 1:8) Heela tseegh ga, shighe u Yesu tindi mbahenen nav ér ve za pase kwagh la tindi ve uhar uhar. (Luka 10:1) Nahan, aluer ka taver we u henen Bibilo a or yô, sôn Aôndo a na u jijingi na kua kwaghfan, shi due kwaghpasen a or u nana na ú lu a vangertiôr shi mfe u nan la una wase u yô. Er se fe ser Yehova tsua u yaren tom a ior mba ve gbe kwagh ga, ka “akaa a a lu a agee ga ken tar” je la, sha u kuren tom na yô, kwagh ne taver jighjigh wase kpen kpen.—1 Kor. 1:26-29.
18. Se hemba mciem ma henen ser, aluer se hii Bibilo i henen a or kpa se kôr cio u geman nan ga la nena?
18 Se hemba mciem ma henen ser, aluer se hii Bibilo i henen a or kpa se kôr cio u geman nan ga la nena? Doo u se umbur ser, tom u geman ior hingir mbahenen ne ngu inja er iwer i yôron nahan ga, sha ci u ka or u nan er iwer la nana fatyô u eren i doon shin vihin ye. Kpa tom u geman ior hingir mbahenen la, wa iniôngon yase tseegh ga. Ka Yehova ngu a hemba eren tom ne cii ye, sha ci u ka un ngu a urugh orhenen la, a va a nan hen a na ye. (Yoh. 6:44) Se man anmgbianev mbagenev ken tiônnongo cii ka se yar tom a mfe u tesen u se lu a mi la u wasen orhenen la sha er nana za ikyura yô. (Ôr 2 Timoteu 2:15.) Gba u orhenen la iyol i nan kpa nana er sha kwagh u nan lu henen la. (Mat. 7:24-27) Or ka nana henen Bibilo vea vese man nana va de nahan i vihi se kpen kpen. Ka se ver ishima ser, mba ve lu henen Bibilo a vese la ve tsua kwagh u injaa, kpa hanmô wase nana va “ôr Aôndo kwagh u nan iyol i nan.”—Rom. 14:12.
Ka Mbamtsera mba Nyi Se Zua a Mini?
19-21. (a) Ka sea henen Bibilo a ior nahan se zua a mbamtsera mba nyi? (b) Yehova nengen mba ve eren tom u pasen kwagh ne nena?
19 Tom u henen Bibilo a ior la ka u na se hemba veren ishima u keren Tartor hiihii. Shi ka u na se fa Mkaanem ma Aôndo shi se umbur ma ken asema a ase gbem. Bibilo i henen vea ior ka i er kwagh ne nena? Pania u nomso ugen u i yer un ér Barak, yô kaa wener: “Bibilo i henen a or ka i mgbegha u u hingir wanyemakeranta u fan mkaanem ma Aôndo tsema tsema. M nenge mer doo u me vande nyôôso vangertiôr wam cii ve me fatyô u tesen orgen tsemberee ye.”
20 Aluer u ngu a or u u henen Bibilo a nan ga yô kwagh la tese ér tom shiren wou ngu Aôndo a inja ga shinii? Ka nahan ga! Yehova wuese iniôngon yase i civir un la kpishi. Mba ve eren tom u pasen loho u dedoo ne cii mba “mbatomov mba Aôndo.” Nahan kpa, Bibilo i henen a or la, ka i seer nan se iember zum u ka sea nenge er Aôndo a ne vor u se lee la u lu vesen nahan. (1 Kor. 3:6, 9) Anmgbian u kwase ugen u a lu pania yô, mba yer un ér, Amy, a kaa ér: “Ka wea nenge or u u henen Bibilo a nan nana vesen ken jijingi nahan u wuese Yehova kpishi, er a yar tom a we, u nan orhenen la iwua i hemban doon cii nahan, ka ian i fan Yehova man i zuan a uma u tsôron je la.”
21 Aluer se mba nôngon sha afatyô wase cii ser, se hii Bibilo i henen a ior, shi se za hemen u henen i a ve yô, kwagh la una wase se u hemban veren ishima u eren Aôndo tom hegen, shi kwagh shon una taver ishimaverenkeghen yase i va waren ken tar u he la kpaa. Sha iwasen i Yehova yô, se yima mba ve lu ungwan a vese la kpaa. (Ôr 1 Timoteu 4:16.) Kwagh la una na a saan se iyol kpen kpen.
Ú Umbur Kpa?
• Ka mbamtaver mba nyi alaghga vea yange mbagenev u henen Bibilo a ioro?
• Aluer ior mba hen haregh wase kpishi soo kwagh u kwaghaôndo ga yô, se er nena?
• Ka mbamtsera mba nyi, ka se zua a mi sha u henen Bibilo a ioro?
[Mbampin Mba Ngeren u Henen]
[Foto u sha peeji 9]
Ú ngu seer igbenda you i pasen loho la sha er ú zua a mbaasemaamimi kpa?