Doo u Ú Sendegh sha Kwagh u Ú Soo u Eren Yôô?

MBAYEV mba kiriki uhar mba numben imôngo. Wan u môm tsue anar u numben a mi u wan nomso u ve lu numben imôngo la, maa a gba ngoron ér: “Ka kwagh wam!” Uumace mba ve yen ne ka ve hii u tesen ieren i soon ayol a ve tseegh la shighe u ve lu iyev la je. (Gen. 8:21; Rom. 3:23) Heela tseegh ga, tar jimin cii kpa sue ieren i or soon iyol i nan tseegh la. Aluer se soo u palegh ieren ne yô, a gba u se nôngo kwagh tsung ve se dugh ieren ne ken a vese kera ye. Aluer se er nahan ga yô, se na mbagenev gbev mbu nôngon, shi se vihi ikyaryan yase vea Yehova kpaa.—Rom. 7:21-23.

Shighe u apostoli Paulu lu wan Mbakristu kwagh ér ve gbidyen kwar ve nengen er ieren ve ia bende a mbagenev la, a nger ér, “I na ian sha akaa cii. Kpa ka akaa cii man a lu iwasen ga. I na ian sha akaa cii kpa ka akaa cii a lu mmaa ga.” Shi za hemen ér: “De ne nen . . . anzughul ga.” (1 Kor. 10:23, 32) Nahan doo u se pine ayol a ase mbampin mban shighe u se lu eren akaa a se lu a ian i tsuan a ishima i yase u eren yô. Se pine ser, ‘Me lumun u den mer ian i m lu a mi i tsuan u eren kwagh u m soo la i karem shighe u kwagh la a lu yangen bem ken tiônnongo kpa? M wa iyol m kegh a kegh u dondon akaawan a Bibilo shighe u i taver mo u eren nahan la kpa?’

Shighe u Ú lu Tsuan Tom u Ú Er Yô

Mbagenev kpishi nenge ér, tom u ve tsough u eren la ka kwagh ve, ka u or ga, shi aluer u bende a orgen kpa a lu cuku tsô. Kpa nenge ase kwagh  u orkasua ugen ken angar ugen ken Imbusutariyan i Amerika ne. Yange i fa or ne sha do u haan man msôrom ma hunden. Va hiin u henen Bibilo vea Mbashiada mba Yehova yô, gba eren sha akaa a lu henen la, nahan de aeren a na a tse la. (2 Kor. 7:1) Shighe u tese isharen i duen kwaghpasen ken igbar vea tiônnongo yô, ortamen ugen wa un kwagh sha kwaghfan ér a hide a gbidye kwar sha tom u a lu eren la. Or ne teen msôrom ma i er sha like yô ken gar la cii. Msôrom man lu ma afatyô u eren akaa kpishi a mi, kpa hen ijiir ne yô, yange i nungwa ma sha msôrom ma nyohon i ma sha er a hunde yô.

Or ne kav ér aluer un ngu pasen kwagh ken igbar, kpa shi un ngu teen msorom mara yô, kwagh la una vihi iti i tiônnongo shi una vihi ikyaryan na vea Aôndo kpaa. Er lu a zegetsombor u koson nahan kpa, de u teen msôrom mara. Hegen ne ngu teen ityakerada suen tsombor na. Or ne vea kwase na man mbayev nav uhar er batisema hegen, mase shin ônov nav utar. Mba pasen loho u dedoo ne sha gbashima a mciem shio.

Shighe u Se lu Tsuan Mbaaboki Yô

U eren iemberyolough vea mba ve ne jighjigh a vese imôngo ga la ka kwagh u or tsuan a ishima i nan shin a wa akaawan a Bibilo kpa kere? Kwase Kristu ugen yange soo u zan iniongo vea gumor ugen u lu Orkristu ga yô. Shin er i ôr un akaabo a a lu ken kwagh u soo u eren la nahan kpa, nenge ér un ngu a ian i tsuan kwagh u un soo yô, sha nahan yô, yem iniongo la vea gumor la. Ica i gbe ga yô, i na un msôrom ma i haa icigh ki yaven shimin yô. Yange yav kpishi, va nderen yô, mase kaven er mba a senge ér ka mbaaboki nav la yav a na yô.—Nenge Genese 34:2.

Ka hanma shighe or nana lu vea mba ve ne jighjigh a vese imôngo ga ve, imba kwagh u se er sha heen ne ia tser nan ga. Nahan kpa, Bibilo kaa ér: “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” (Anz. 13:20) Anyiman nga sha kwagh ne ga, aluer se tsua u kôron ijende vea ior mbabov yô, se gba ken kwaghbo. Anzaakaa 22:3 kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.” Azende a ase aa fatyô u benden a vese kua ikyaryan yase vea Yehova Aôndo kpaa.—1 Kor. 15:33; Yak. 4:4.

Shighe u Se lu Wuhan Iyol shi Se lu Eren Hwe Yô

Gbenda u ior ve koron akondo shi ve eren hwe la ngu gem hanma shighe. Nahan kpa, akaawan a Bibilo a sha kwagh u iyolwuhan man hwe yô nga gem ga. Paulu wa kasev Mbakristu kwagh ér “ve̱ wuhan ayol a ve daalaa, i̱ lu sha kwaghfan man akuma akuma kpaa.” —Kwaghwan ne bende a nomso kpaa. (1 Tim. 2:9) U ngu wer, Paulu yange lu tesen kasev inja  ikyondo i vea koron shin lu kaan ér Mbakristu cii ve wuhan iyol kwagh môm ga. A pase kwagh u lun akuma akuma nena? Takerada u pasen asemberakaa ugen pase ishemberti i akuma akuma la ér, “ka u lun a imanger shio . . . u wuhan iyol shin lun a ieren i ior cii ve lumun a mi yô.”

Doo u se pine ayol a ase ser: ‘Me fatyô u ôron sha mimi mer, m eren kwagh akuma akuma aluer m ngu sendegh u wuhan iyol i ia na hanma or nana kenger mo yôô? Inja ikyondo i m hoo la ka i na ior ve hen imba or u m lu shin or u m lu kaven yôô?’ Se na ior “ityôkwagh i nôngon gbev” sha u ‘kera wan akaa a ase iyol yase ikyo tseegh ga, kpa . . . wan akaa a mbagenev ikyo kpaa.’—2 Kor. 6:3; Fil. 2:4.

Shighe u Se lu Eren Kpenga Yô

Shighe u anmgbianev lu nyighen shin tsughun anmgbianev mbagenev ken tiônnongo u ken Korinte la, Paulu nger ér: “Kera guda u ne gba ngohol ibo sha apera tsô gaa? Kera guda u kwagh a̱ gba saan ne tsô gaa?” Paulu yange wa Mbakristu kwagh ér, aluer ka u vea za a anmgbian ve ken atejir yô, guda ve de kwagh a sar ve. (1 Kor. 6:1-7) Anmgbian ugen ken tar u Amerika yange dondo kwaghwan ne. Anmgbian u ken Kristu ugen u tôô anmgbian ne tom yô lu a zayol vea na sha kwagh u inyaregh ki gba pe una kimbi anmgbian ne yô. Anmgbian ne dondo kwaghwan u Ruamabera, nahan za kohol un acin imôngo ér vea sôr zayol ne, kpa gba sha mi ga. Shighe kar yô, ve za a zayol ne ken “nongo u Kristu” u mbatamen ve til sha ityough nagh la.—Mat. 18:15-17.

Kpa kwagh ka a er i vihi yô, er i za a zayol ne ken nongo u Kristu nahan kpa, i fatyô u sôron un ga. Er anmgbian u yange i lu un a inyaregh ne er msen sha kwagh shon kpishi yô, de ér inyaregh ki anmgbian u tôô un tom ne lu un a mi la ki sar. Sha ci u nyi? Shighe kar yô, a kaa ér, “Anzughul ne yange na yô m kera lu zuan a iember ga, shi lu vihin mo shighe u injaa u ma m er akaa a ken jijingi a mi la kpaa.” Yange den ér inyaregh kira ki sar cii yô, mase nengen er iember na lu hiden her yô, shi nenge er Yehova lu veren tom na doo doo kpaa yô.

Ken Akaa a Ikyoo Ga Kpaa

Shighe u ka sea kera sendegh sha kwagh u se soo u eren la ken akaa a cuku ga yô, kwagh la a va a averen kpishi. Anmgbian ugen vea kwase na mba ve lu eren tom u pania yô, za mkohol u vesen faa sha iyange i hiihii i mkohol shon, ve za tsôr ijiir i ve soo u teman her yô. Mkohol hiin yô, tsombor ugen u lun a mbayev utaankaruhar va nyôr hen ijiir i mkohol la. Er anmgbian ne vea kwase na nenge er tsombor ne lu keren ijiir i teman yô, ve na ve mkônom vem mhar ér ve tema. Kwagh ne na yô tsombor ne cii tema ijiir i môm. Mkohol u vesen la been, ayange nga kar kpuaa yô, tsombor ne nger pania ne washika u sughun ve. Ve pase ken washika la er yange i lu ve ken ishima shighe u ve va nyôr hen mkohol la fele ga yô. Kpa ieren i sha dooshima i anmgbian la vea kwase na la yange i gema i na ve iember.

Aluer se mba sha ian i wasen mbagenev yô, se kera sendegh sha kwagh u se soo la ga, kpa se wase ve. Aluer se mba tesen dooshima u a “keren kwagh na iyol na tsô ga” la yô, se wase u van a bem ken tiônnongo kua mbawanndor a vese. (1 Kor. 13:5) Kpa u hemban cii yô, se kura ikyaryan yase vea Yehova.

[Foto u sha peeji 20]

Se mba palegh u sendegh ikyaa sha kwagh u ikyondo i se tsough u huan laa?

[Foto u sha peeji 21]

Ka maan we iyol u nan anmgbianev ijiir i u tsough u teman la kpa?