Ikyu Iin i Mbakristu Ngi Lun a Icivir shi Ngi Lun Akuma Akuma shi Ngi Doon Aôndo Kpaa

YA LA iv a ijungwen. Mbavaanku zer akondo a il a mbavaanku ve zeren la, mba vaan ku viligh iyol inya. Mbaamarev di mba vinen amar sha ityougholov mbi i lu kuhwan gong gong la. Mbagenev di mba yan tar ember man akaa sen kera daalaa. Ior mbagenev yav hen inya, gadia ve ma ingbete-msôr gande ve iyol. Kwagh shon yô, ka iniongo i lu eren hen ya ne yee? Sha ajiir agen yô, ka akaa a ior ve eren hen ku, ape ior uderi imôngo ka ve za sha u za veren orkpen la gbenda je la.

Mbashiada mba Yehova kpishi mba sha ajiir a ior mba hen icombor ve mbagenev kua mbawanndor a ve ve civir tsav shi ve cie mbakpenev yô. Ior umiliôn imôngo na jighjigh ér, or ka nana kpe yô, nan hingir jijingi u uter mbatsev, shi nan lu a tahav mbu wasen shin eren mbaumav kwaghbo. Aeren a ior ve eren hen ikyu iin kpishi zua sha jighjigh u nan ne. U vaan ku u or u doon we ishima la ka ieren i sha gbaaôndo. Yesu man mbahenen nav kpa, yange ve vaa ku u ior mba doon ve ishima ashighe agen. (Yoh. 11:33-35, 38; Aer. 8:2; 9:39) Nahan cii kpa, ma shighe môm kpa ve zungwe za kar ikyaa inya er ior mba sha ayange a ve la eren nahan la ga. (Luka 23:27, 28; 1 Tes. 4:13) Sha ci u nyi? Sha ci u ve fa mimi sha kwagh u kuugh.

Bibilo ôr wang ér: “Mbaumav fa er vea kpe yô, kpa mbakpenev yô, fa ma kwagh ga, . . . Dooshima ve kua ihyom ve i kôron man iwuhe ve cii saa ishe ngise je . . . ma tom shin mhen shin mfe shin kwaghfan mba shin Sheol [uwar u uumace jimin cii] henpe u ze la ga.” (Orpa. 9:5, 6, 10) Avur a Bibilo ne tese wang ér, or ka nana kpe yô nan kera fe ma kwagh ga. Nan kera henen sha kwagh shin nan benden kwagh ave ga, shi nan kera lamen shin nan fe ma kwagh môm ga. Doo u mimi u Bibilo u hange hange u Mbakristu ve fe sha kwagh u mlu u mbakpenev ne una bende a gbenda u ve iin ikyu la nena?

“Kwagh u Hôngorough Kpaa, De Benden Nen Ave Ga”

Hanma ikyurior i Mbashiada mba Yehova ve dugh ker cii, mba palegh aeren a ityôô a a gbe a zough sha jighjigh u mbagenev ve ne ér mbakpenev yem za mba mape, nahan vea fatyô u wasen mbaumav shin eren ve kwaghbo la. Aeren a ku iin, er ku tsan man iniongo i kuugh man ku umbur man nagh ku wamen mbakpenev kua ku zungwen u kwase-kyoson cii ka aeren a hôngorough, man a vihin Aôndo ishima, sha ci u a zua sha ityesen i ujijingi mbabov, i uma shin jijingi u or kpen ga la. Man ityesen ne ka i ken Bibilo ga. (Esek. 18:4) Er i lu u Mbakristu mba mimi vea “fatyô u yan sha tebur u Ter kua sha tebur u ujijingi mba bov . . . ga” yô, mba nyer iyol ken aeren a ityôô ne ga. (1 Kor. 10:21) Kpa mba kor tindi u a kaa ér: “Lu nen kposo, . . . kwagh u hôngorough kpaa, de benden nen ave ga” la. (2 Kor. 6:17) Nahan kpa, ka hanma shighe i lun se zange u palegh aeren a ityôô ne ga.

Ior mba ken Afrika man ityar igen kpishi na jighjigh ér, aluer i dondo aeren a ityôô ne ga yô, a doo ujijingi mba uter mbatsev ga. Nahan ior ka ve nenge ér, aluer ve dondo aeren ne ga yô, a wa ityô ve ifan, shi ikyôr kpa ia lagh ve ga. Er ve vende u nyôron iyol ken amba a ku iin la yô, ior mba Yehova kpishi tagher a ityuhwanev man ilyahan shi icombor ve kua ityô ve cii ka ve nenge ve ér ve due ityô. Shi i wa mbagenev mbaaie  iyol ér, ve soo ijoughave ga shi mba ne mbakpenev icivir kpaa ga. Ashighe agen mbananjighjighga ka ve kighir Mbakristu ér ve de iin ku ga, ve vea kar a ii ú sha er ve soo la. Nahan yô, se er nan ve se palegh u tagher ishigh a ior mba ve hanger ér saa i ii ku sha gbenda u u vihi Aôndo ishima laa? Hemban cii je yô, se er nan ve se palegh uiniongo man aeren a aa vihi ikyaryan yase vea Yehova laa?

Pase Kwagh u Ú Tsough la Wang

Sha ajiir agen yô, ka anmgbianev mba ken agbaa kua mbatamen mba hen ityô ka ve tese kwagh u a er sha u iin or u nan kpe la ye. Nahan yô, Orkristu u nan civir Aôndo sha mimi yô, nana̱ pase wang ér, ka Mbashiada mba Yehova nan soo ér ve ii ku la sha gbenda u Bibilo i lumun la ye. (2 Kor. 6:14-16) Akaa a a ze hemen hen ku iin u Orkristu la cii i de lu akaa a aa za imoshima i mbananjighjigh mbagenev iyol shin aa na mbagenev mba ve fe atesen a ase sha kwagh u mlu u mbakpenev la gbev mbu nôngon ga.

Shighe u i tsough ma anmgbian u ken tiônnongo u Kristu ér nana na kwaghôron u kuugh yô, mbatamen ve wase mbananjighjigh mba or kpe ve la ve fa akaawan a Bibilo a a gbe a zough sha kwagh u ku iin la. Ka nahan ve akaa a a lu eren hen ku shon cii aa zua sha Ruamabera ye. Aluer mbananjighjighga soo u nyôron a aeren a hôngorough sha ku iin la yô, doo u ne tile dông shi ne taver ishima ne pase ve kundu kundu man sha ishima i legh legh ner, Mbakristu mba eren ambaakaa la ga. (1 Pet. 3:15) Kpa aluer or u hen tsombor u nan ne jighjigh ga, nan hanger ér saa nana nyôr a aeren a hôngorough sha ku iin la di ye? Aluer kwagh ngu nahan yô, or u hen tsombor u nan ne jighjigh la, nana dugh ave sha ku iin la sha. (1 Kor. 10:20) Shighe u kwagh a lu nahan yô, i na kwaghôron u kuugh akuma akuma ken Iyou i Tartor shin hen ma ijiir igen sha er mbananjighjigh mba or u doon ve ishima nan kpe la vea zua a “ishimasurun i ken icighanruamabera” yô. (Rom. 15:4) Ikyom i orkpen la ia lu hen Iyou i Tartor shin hen ijiir la ga je kpa, i na kwaghôron la sha icivir sha er a lumun a mi yô. (Dut. 34:5, 6, 8) Alaghga kwagh u mbananjighjighga vea er la una seer nan se ishimavihin man ijungwen, kpa se fatyô u zuan a ishimasurun sha u fan ser, er se kange ishima u tilen sha mimi hen Aôndo la hungur un ga, man ka un una na se “agee a hemban la” ye.—2 Kor. 4:7.

Nger Akaa a Ú Soo Wer i Er sha Ku Wou man a U Soo Ga la Shin Inya

Or ka nana vande ngeren akaa a nan soo ér i er sha ku u nan la shin inya man aa nan soo ér i de eren ga la yô, i kera taver u pasen mba hen tsombor u nan mba ve ne jighjigh ga mbara ga, sha ci u ka ve soo u eren sha kwagh u nan soo la. Nger akaa a ú soo wer i er hen ku wou man a ú soo wer i de eren ga la. Shi tese ijiir i ú soo wer i ii u her la man or shin ior mba vea lu ityough sha ku wou la cii shin inya. Akaa ne nga hange hange. (Gen. 50:5)  Aluer u nger akaa ne cii u wa uwegh, mbashiada ou kpa wa ave kaveraa yô, anmgbianev ou mba ve ne jighjigh ga mbara vea hemba lumun a mi cii. Or u nan suur sha kwaghfan u ken Bibilo, nahan nan vanden wan ago iyol tsuaa yô, nan keghen zan zan shighe u nan beeyol kpishi shin nan gbe icôronuange cii ve nan ngeren akaa ne ga, ka nan vande ngeren a shin inya tsuaa je.—Anz. 22:3; Orpa. 9:12.

Ka i taver mbagenev kpishi u vanden ngeren imba kwagh ne shin inya. Kpa, u eren nahan la tese ér or nan via ken jijingi shi nan wa mbagenev ikyo sha dooshima kpaa. (Fil. 2:4) Hemba doon u ú sôr akaa ne iyol you shighe u u lu uma la u ver vough, a u den wer mba hen tsombor wou mba ve lu zungwen mbara ve er akaa ne ayol ave, man alaghga je yô, a va kighir ve ér ve lumun aeren a hôngorough, aeren shon a orkpen la yange na jighjigh a mi ga, shi lumun a kpaa ga la.

Ikyu Iin Yen i Luun Akuma Akuma

Ken ityar i ken Afrika kpishi, ior na jighjigh ér, aluer i ii or u nan kpe la yôughyôugh ga yô, a doo jijingi u uter mbatsev ga. Mbagenev nenge ér, ku iin ka shighe u vea tese shagba ve man inyaregh vev sha “ihyagh” yô. (1 Yoh. 2:16) Ka i vihi shighe man inyaregh kpishi sha er a ii orkpen la “ior ve ôron kwagh a mi” yô. Ka i var ufoto mba orkpen la sha ajiir kposo kposo u yôôn ku u nan, sha er ior kpishi vea va ku u nan yô. Ka i yam shingir i kpela foto u orkpen la shami i na mbavaanku ve huwa. Shi ka i yam mbaakwati mba taver ishe sha er ior vea nenge a ôron kwagh a mi yô. Ken tar ugen ken Afrika, mbagenev ka ve er mbaakwati mba lun er umato man agirgi a purugh man utso kua akaa agen kposo kposo nahan sha u tesen inyaregh vev man shagba ve kua yôughyôugh ve kpaa. Ashighe agen ka ve dugh ikyom i orkpen la shin akwati ve gbir sha gambe u doonashe u i er un sha inja yô. Aluer orkpen la ka kwase yô, alaghga a wuha nan iyol sha ikyondo i ivesegh i pupuu shi a wa nan mbaagba mba taver ishe, gayô a zer nan asa a taver ishe shi a shighe nan kpagh kpaa. Doo u ior mba Aôndo vea nyôr iyol ken aeren angara?

Mbakristu mba ve vighe yô, ka ve nenge a kwaghfan u a lu sha u palegh aeren a mba ve fe atindiakaa a Aôndo ga ve eren la. Se fa er uzege mba ikyuugh man aeren a hen ikyu iin a ruamabera a lumun a mi ga la cii a lu ‘a Ter ga, kpa a lu a tar u u lu karen kera ne’ nahan. (1 Yoh. 2: 15-17) Gba u se wa ikyo sha er se hingir u nyôron iyol ken ieren i taregh i gban gesa la ga yô. (Gal. 5:26) Akaa aa a vande eren yô tese ser mcie u cian mbakpenev la ka una ya tor ken uma u ior, a hingir ieren i ityôô yô, ior ve za ku iin kpishi, nahan i hingir kwagh u ican u nengen sha hanma kwagh u a lu zan hemen her cii. U civir mbakpenev la ngu a na mbananjighjighga ve hingir u eren aeren a hôngorough. Hen amba a ikyu iin la, ior ka ve vaan genger genger a mmem shio, shi ve kuven ikyom i orkpen la shi ve lamen a i inja er or shon nan ngu uma nahan, shi ve varen nan inyaregh kua akaa agen iyol kpaa. Aluer Mbakristu mba eren ambaakaa ne hen ikyu iin ve yô, vea va a ilyahan sha iti i Yehova man ior nav kpen kpen.—1 Pet. 1:14-16.

Er se fe mlu u mbakpenev wang yô, se taver nen ishima sha er ikyu iin yase ia lu a aeren a taregh her ga yô. (Ef. 4:17-19) Er Yesu lu or u hange hange, u hemban sha won cii, u i gbe je nan lu sha won nahan kpa, yange i ii un sha kwaghfan man akuma akuma kpaa. (Yoh. 19:40-42) Mba ve lu a “mhen u Kristu” yô, ka ve nenge ér ikyu i Mbakristu ve iin akuma akuma la ka i sha icivir. (1 Kor. 2:16) Sha kpôô yô, ikyu i Mbakristu ve iin akuma akuma la ka gbenda u hemban doon u palegh aeren a hôngorough a hen ku a a zough sha Ruamabera ga la. Shi kwagh ne ka a wase ve u lun ving, eren ku la sha icivir man sha gbenda u u kom mba Aôndo a doo ve ishima la kpaa.

Doo u Ember hen Kuu?

Alaghga a lu ieren i hen ijiir yen u anmgbianev man mbawanndor kua mbagenev hiden va kumban kpishi shighe u i ii ku kera yô, sha er vea ya tar a ember shi vea vine amar a ityogholough gong gong yô. Ashighe kpishi ikyu i ember ne ngi i nungwa msôrom ma man kpishi kua aeren a idyaa kpa ker. Mbagenev ka ve hen ér, aluer ve er gurgur nahan yô, vea hungur a mnyoonom ma kuugh mara. Mbagenev di hen ér ka ieren i ityôô, nahan mba a kwagh u eren shami ga. Kpa ior kpishi na jighjigh ér, imba gurgur la ngu hange hange sha u wuese shi nan orkpen la icivir shi wasen jijingi u nan sha er una za kohol ujijingi mba uter mbatsev yô.

Mbakristu mba mimi nenge a kwaghfan u a lu sha u dondon kwaghwan u Ruamabera ne yô, a kaa ér: “Ishima i vihin hemba doon a ahan a sen; gadia ka sha ishigh ki tsughur, ishima i hingir dedoo ye.” (Orpa. 7:3) Heela tseegh ga, ve fa mtsera u a lu sha u henen sha mlu u uma a ngôôr ga la man ishimaverenkeghen i mnder u shin ku la yô. Sha kpôô yô, mba ve ye ikyar kangenaa vea Yehova yô fa er ‘iyange i kuugh i hembe doon a iyange i maren or’ yô. (Orpa. 7:1) Er se fe ser, ugurgur mba eren hen ku gba zua sha akombo a civir man aeren a idyaa yô, doo u Mbakristu mba mimi vea er ugurgur mbara shin vea za amba a iniongo la kpaa ga. Aluer se mba vea mba keren iemberyolough kpishi la imôngo yô, tese ér se wa Aôndo kua imoshima i mbacivir Yehova la ikyo ga.

Ior Ve Nenge a Mkposo

Doo se kpishi er se kera cie mbakpenev, er ior mba ve fe Aôndo ga ve cie la, ga nahan. (Yoh. 8:32) Er se lu “ônov mba iwangerev” yô, ka se va ku sha gbenda u u tese ér se mba ken iwanger i ken jijingi yô, shi ka se zungwe akuma akuma man sha icivir, gadia se mba a ishimaverenkeghen i mnder u shin ku la. (Ef. 5:8; Yoh. 5:28, 29) Er se lu a ishimaverenkeghen yô, se mba kera zungu kpishi er “mba ve lu a ishimaverenkeghen ga la nahan ga.” (1 Tes. 4:13) Ishimaverenkeghen ne ia wase se se tile dông se ta ikyaa a mcivir u mimi, nahan se kera cia or se nyôr iyol ken aeren a hôngorough ga.—1 Pet. 3:13, 14.

Aluer se tile sha mimi se mba dondon akaawan a Ruamabera yô, ior vea ‘kav mkposo u mba ve lu civir Aôndo a mba ve lu civir Un ga la.’ (Mal. 3:18) Shighe ngu van u ku ua kera lu ga yô. (Mpa. 21:4) Er se lu keghen shighe u a va kure ityendezwa la yô, Yehova a kohol se ken mlu u wang a acôghor iyol ga, shi se lu nen paleghaa a botar ne kua aeren a u, a a lahan Aôndo la cii.—2 Pet. 3:14.

[Foto u sha peeji 30]

U ngeren akaa a se soo ser i er hen ku wase la ka ieren i sha kwaghfan

[Foto u sha peeji 31]

Ikyu iin i Mbakristu i luun akuma akuma man sha icivir kpaa