Mbaperapera Vea Wuese Aôndo Gbem Sha won

“Or u perapera yô, á umbur nan . . . perapera u nan una lu gbem sha won je.”—PS. 112:6, 9.

1. (a) Ka mlu u dedoo u nyi a lu keghen mba Aôndo a nenge ve ér mba perapera laa? (b) Ka mpin u nyi a gem a dugh?

 MLU u dedoo ngu keghen uumace mba Aôndo a nenge ér mba mbaperapera mbara cii ken hemen. Vea za hemen u henen aeren a doon a Yehova gbem sha won. Shi er vea lu seer henen akaa a Aôndo a gbe la yô, asema a ve kpa aa iv a iwuese. Môm ken akaa a i gbe u or a lu a mi ve nana kuma u va ember mlu u dedoo u ken hemen la yô, ka “perapera” u i er kwagh na ken Pasalmi 112 la. Kpa, a er nan ve Yehova u a lu icighan Aôndo u perapera ne una nenge uumace mba ve yen ne ér mba mbaperapera? Ka sea nôngo tsung ser se er kwagh u vough kpa se kan shio, ashighe agen je yô se er asorabo a vesen je kpaa.—Rom. 3:23; Yak. 3:2.

2. Dooshima mgbegha Yehova er uivande uhar mba nyi?

² Yehova er kwagh sha dooshima, u una wase un u nengen uumace ér mba perapera yô. A er kwagh shon nena? Hiihii yô, a gema uma u Wan na u sha, u ishima ishima la sha ivande, a wa un ken iyav mbu iniunkwase, sha er a mar un a acôghor iyol shio yô. (Luka 1:30-35) Shighe u mbaihyomov mba Yesu wua un la, Yehova shi er ivande i kpilighyol igen, A nder Yesu, a na un uma u iengemegh ken jijingi.—1 Pet. 3:18.

3. Yange doo Aôndo u nan Wan na uma sha, sha ci u nyi?

 ³ Yehova yange na Wan na, Yesu kwagh ugen u vande lun a mi sha ga yô, kwagh shon yô, ka uma u kpen mayange ga. (Heb. 7:15-17, 28) Yange doo Yehova u eren kwagh ne, sha ci u shighe u Yesu tagher a ameen a taver la je kpa a za hemen u tilen sha mimi. Sha nahan yô, Yesu na Ter na mlumun u kuman sha aie u Satan er wener, uumace mba civir Aôndo sha ci u mtsera ve ayol a ve, ka sha ci u dooshima u mimi ga la.—Anz. 27:11.

4. (a) Shighe u Yesu hide yem sha la, yange za er nyi sha ci wase, man Yehova di gema er nyi? (b) Ú nenge kwagh u Yehova man Yesu ve er sha ci wou la nena?

⁴ Shighe u Yesu yem sha la, a hemba eren kwagh u vesen cii. Yange za “ande sha ishigh ki Aôndo sha ci wase” a “awambe Na iyol Na.” Ter wase u sha, u lun a dooshima la yange lumun nagh ku Yesu na, ku hingir “iwom i asorabo ase” la. Nahan, i “wanger imo i ken asema a [ase]” sha er se “er Aôndo u uma tom” yô. Kwagh ne na se ityôkyaa i eren sha ishember i i hii Pasalmi 112, i i kaa ér ‘Haleluya’ la.—Heb. 9:12-14, 24; 1 Yoh. 2:2.

5. (a) Se er nyi ve Aôndo una lumun se? (b) I nger Pasalmi 111 man Pasalmi 112 sha adondo adondo nena?

⁵ Aluer se soo ser Aôndo a lumun se yô, gba u se za hemen u nan awambe a Yesu a hee inya sha ci wase la jighjigh. Gba u hanma iyange yô se sughun Yehova sha er se doo un ishima kpishi yô. (Yoh. 3:16) Shi gba u se henen Mkaanem ma Aôndo hanma shighe shi se nôngon sha afatyô wase cii se eren sha akaa a se er ker la. Pasalmi 112 ngu a kwaghwan u injaa sha ci u mba i sar ve u lun a imoshima i wang sha ishigh ki Aôndo cii. Pasalmi ne zua sha Pasalmi u sha 111 la. I hii upasalmi mban cii sha ishember i “Haleluya” la. Shi ken zwa Heberu yô, ihiange 22 dondo sha mkaanem ma ma hii upasalmi mban la, hanma hwange yô u hii sha ishangebaacaa i môm ken asangaabaacaa a ken zwa Heberu, a a lu 22 la. *

Ityôkyaa i Lun Saan Saan

6. I ver “or” u cian Aôndo u i er kwagh na ken Pasalmi 112 la doo doo nena?

⁶ ‘Saan or u nan cie TER la iyol, man atindi a Na a doo nan ishima tsung la. Tsombor u nan ua hingir u ageegh sha won; kov u mbaperapera yô, á ver u doo doo.’ (Ps. 112:1, 2) Aluer u nenge yô, orpasalmi ne hii ôron kwagh u “or” môm tseegh, kpa ken ivur i sha uhar la yô, a hide a ôr kwagh u “mbaperapera.” Kwagh ne tese ér, Pasalmi 112 ne ngu ôron kwagh u nongo u u lu a ior ker kpishi yô. Kwagh ka a er i doo yô, apostoli Paulu yange ôr kwagh ter mkaanem ma ma lu ken Pasalmi 112:9 la sha kwagh u Mbakristu mba ken derianyom u hiihii la. (Ôr 2 Mbakorinte 9:8, 9.) Sha kpôô yô, pasalmi ne tese er a fatyô u saan mbadondon Kristu mba ve lu shin tar nyian ne iyol yô!

7. Gba u mbacivir Aôndo vea cian un sha mimi sha ci u nyi, man doo u u nengen atindi a Aôndo nena?

⁷ Er i tese ken Pasalmi 112:1 nahan, saan  Mbakristu mba mimi mban iyol tsung sha ci u mba “cie TER.” Mcie u ve cie u eren kwagh u vihin un ishima ne wasen ve u hendan a jijingi u tar u Satan ne. Kpa gema “doo [ve] ishima tsung” u henen Mkaanem ma Aôndo shi kuran atindi a na. Kwagh ne wa u kuran tindi u i we ve ér ve pase loho u dedoo u Tartor sha tar cii la kpa ker. Mba tan mbaaferev icin sha kwagh u iyange i ijirigh i Aôndo, i i lu van la, shi mba nôngon kwagh tsung sha er vea gema akuraior cii a hingir mba henen yô.—Esek. 3:17, 18; Mat. 28:19, 20.

8. (a) Aôndo ver mba ve civir un nyian sha gbashima la nena? (b) Ka averen a nyi a lu keghen mba ve lu a ishimaverenkeghen i va lun uma shin tar laa?

⁸ Er mbacivir Aôndo ve kor atindi a na, a a kou tindi u pasen loho u Tartor ker la yô, iyenge ve seer sha tar nyian je kuma er iorov miliôn utaankaruhar nahan. Or môm u nana nyiman ér ior mba Aôndo hingir mba “ageegh sha won” je kpa nan ngu ga? (Yoh. 10:16; Mpa. 7:9, 14) Man er Aôndo a lu kuren awashima na ne, una za hemen u ‘veren ve doo doo.’ A kura mba ve lu a ishimaveren i va lun uma gbem shin tar la jimin cii shighe u “zegecan” una va la, a nyôr a ve ken “tar u he,” u “perapera una tema ker” la. Shighe a karen yô, a hemba ‘veren’ mba vea war Armagedon la “doo doo” cii. Shighe u a lu nderen ior shin ku umiliôn imôngo la, vea lu keghen ve gbenda. Nenge imba kwagh u doon tsung u a lu keghen ve la sha wono! Tegh tegh tsô, mba atindi a Aôndo a “doo [ve] ishima tsung” mbara vea hingir vough shi vea ember “mlu u engem u lun a ikyangenev ga u ônov mba Aôndo la” gbem sha won.—2 Pet. 3:13; Rom. 8:21.

Yar Tom a Inyaregh You sha Kwaghfan

9, 10. Mbakristu mba mimi mba eren a inyaregh vev ki ken jijingi kira nena, man perapera ve una lu gbem sha won nena?

⁹ ‘Mngee u akaa man inyaregh ki kpishigh vea lu hen ya u nan; perapera u nan kpaa una lu gbem sha won je. Iwanger due kôndo sha ken ime sha ci u mba ve lu a mimi yô, a mrumun u sha mhôôn man mhôônom ma zungwen man perapera  kpaa.’ (Ps. 112:3, 4) Sha ayange a tsuaa la, i fa mbacivir Aôndo mbagenev sha inyaregh vev. Shi hide sha vegher ugen yô, mba Aôndo a lumun ve mbara cii mba mbanyarev, vea lu a ki kpôô kpôô ga je kpaa. Kpa u ôron kwagh haan mbabov kera yô, alaghga mba ve tsough u hiden a ayol a ve ijime sha ishigh ki Aôndo la vea lu mbaibanave shi ior vea nengen ve ér ve gba kwagh ga, vough er i eren sha ayange a Yesu la nahan. (Luka 4:18; 7:22; Yoh. 7:49) Nahan kpa, aluer or ngu a inyaregh kpishi shin nan ngu a mi kpuaa kpa, nana fatyô u lun orinyar ken jijingi.—Mat. 6:20; 1 Tim. 6:18, 19; ôr Yakobu 2:5.

¹⁰ Mbakristu mba i shigh ve mkurem mbara man akar a ve cii mba koson inyaregh ki ve lu a mi ken jijingi kpishi la ken akpa ve tseegh ga. Kpa “iwanger [ve] due kôndo” sha ken tar u Satan u u we ime yum ne, “sha ci u mba ve lu a mimi yô.” Ve er kwagh ne sha u wasen mbagenev sha er ve kpa ve zua a mtsera ken akaa a injaa a ken jijingi la yô, akaa shon yô, ka kwaghfan man mfe u fan Aôndo. Mbaahendanev nôngo ér vea yange tom u pasen loho u Tartor ne, kpa ve kan shio. Kpa atam a tom u perapera ne u um la yô, aa lu “gbem sha won.” Aluer mbacivir Aôndo za hemen u lun mbaperapera shighe u i lu tôvon ve a ican yô, vea fatyô u lun a vangertiôr ér vea lu uma “gbem sha won.”

11, 12. Ka sha igbenda igen i nyi nahan mbatomov mba Aôndo ve yaren tom a inyaregh veve?

¹¹ Ior mba Aôndo cii, mba i shigh ve mkurem man mba ve lu ken nongo u “zegeikpelaior” la tese ér ve mba ne mbagenev kwagh wuee. Pasalmi 112:9 kaa ér: ‘Nan sar, nan na mbaibanave.’ Mbakristu mba mimi nyian mba ne Mbakristu mbagenev iyua, kua mbawanndor a ve mba ve lu ken ibanave la kpaa. Shi ka ve wase ior mba aahe a er ve la sha inyar. Ieren ne i ne msaanyol, di er Yesu yange kaa ér a lu nahan.—Ôr Aerenakaa 20:35; 2 Mbakorinte 9:7.

¹² Heela tseegh ga, nenge ase inyaregh ki i vihi sha u gberen magazin ne ken ijô 172 la, ijô ne kpishi ka mba ve fe lun a kwagh ave ga la ve hembe lamen i ye. Shi mba eren magazin ne ken icer i iliam i sha ave kposo kposo man ungeren mba mbaapirashe kpaa.

Mhôônom man Ieren i Mimi

13. Ka unô ve ver ikyav i hemban cii i nan nagha, man se dondo ikyav ve la nena?

¹³ ‘Kpe or u mhôônom ma ker nan la iyol, nan pwaren nan ne la.’ (Ps. 112:5) Alaghga u nenge er ior kpishi ve wasen mbagenev, kpa i lu sha ci u mhôônom kôr ve a ve ga yô. Mbagenev ka ve wase ior sha u tesen ér ve hemba mban a kwagh a ve, shin ve wase ve a ishima ve i môm ga. Or môm kpa ka saan nan iyol u keren iwasen hen ambaaior la ga. Kpa, ka a lu or u mhôônom ma ker nan a or yô, i kundu se iyol u ngohol iwasen hen a nan kpen kpen. Yehova ver ikyav i hemban cii i zungwen mhôônom shi nan nagh saan saan. (1 Tim. 1:11; Yak. 1:5, 17) Yesu Kristu yange zungwen ior mhôônom vough er Ter na nahan. (Mar. 1:40-42) Nahan yô, aluer se soo ser Aôndo a nenge se ér se mba mbaperapera yô, doo u se naan nagh saan saan shi mhôônom maa kôron se a ior kpaa, hemban je yô shighe u se dugh kwaghpasen se lu wasen mbawanndor a vese ser ve fa Yehova la.

14. Ka sha igbenda i nyi nahan se ‘eren akaa a ase sha mimi’?

¹⁴ ‘Nan eren akaa a nan sha mimi.’ (Ps. 112:5) Orkuranya u jighjigh la nengen sha akaa a Ter na sha mimi, er i tsenge ôron nahan. (Ôr Luka 12:42-44.) Se fatyô u nengen a kwagh ne ken akaawan a ken Ruamabera a i ne mbatamen, mba ashighe agen ka i gba u vea nenge sha isholibo i vesen i or er ken tiônnongo la. Gbenda u nongo u wanakiriki u tese ken Bibilo ér i eren akaa ken atôônanongo man hen iyav mbi mbamishen kua iyav mbi Betel la tese ér wanakiriki ne eren kwagh sha mimi. Ka mbatamen tseegh i gbe u vea eren kwagh sha mimi ga, hanma Orkristu yô, gba u gbenda u nan eren kwagh a mbagenev kua mbananjighjighga shi gbenda u nan eren kpenga a mbagenev la kpa ua tese ér nan eren kwagh sha mimi.—Ôr Mika 6:8, 11.

 Averen Nga sha ci u Mbaperapera

15, 16. (a) Ilyoho i bo i se ongo shin tar ne ngi benden a mbaperapera nena? (b) Ior mba Aôndo kange ishima ér vea za hemen u eren nyi?

¹⁵ ‘Gadia nana tenger mayange ga; or u perapera yô, á umbur nan gbem. Nana cia loho u bo ga, ishima i nan i taver sha er nan suur sha TER yô. Ishima i nan i taver, nan cia kwagh ga, zan zan nana kar nengen a awashima u nan sha mbaahendanev mba nan la.’ (Ps. 112:6-8) I gbe je ka hegen ior ve lu hemban ungwan ilyoho i bo, er ityav man tswam man iangev mbi hev kua mbi tsev mbi mbi lu hiden her la man ifer man ibanave kua mvihi u i lu vihin tar la nahan ye. Mba Aôndo a nenge ér mba mbaperapera la kpa loho u bo ne ngu benden a ve, kpa u ta ve mciem iyol ga. Kpa er ve lu a vangertiôr ér uma una va doo ken hemen shi ve fe ér tar u perapera u Aôndo mgbôghom yô, asema a ve “taver” shi mba ‘cie loho u bo ga.’ Kwagh ka una tser ve kpa ve fatyô u wan ishima, sha ci u ve suur sha Yehova. Den ér mbaperapera ve “tenger” mayange ga, kpa wasen ve shi ne ve agee a wan ishima.—Fil. 4:13.

¹⁶ Shi gba u ior mba Aôndo mbaperapera vea wa ishima a ihyom man mbaaie mba mbaahendanev ve we ve iyol la; akaa ne cii fatyô u yangen Mbakristu mba mimi u pasen kwagh u Tartor ga, man aa fatyô u yangen ve mayange ga. Ior mba Aôndo tile dông, ve gba uwer u eren tom u Yehova a ne ve, u pasen loho u dedoo u Tartor shi geman ior hingir mbahenen la ga. Se fa ser, er mkur u tar ne a mgbôghom yô, mbaperapera vea za hemen u tagher a ahendan. Ihyom ne ia kure shighe u Satan Diabolo una tôô ian na i Gogi, u ken tar u Magogi, una ta num sha ior mba Aôndo tar sha won cii la. Hen shighe la, se mase “nengen” er Yehova una tim ‘mbaahendanev asev’ sha gbenda u kunya yô. A saan se iyol kpishi u nengen er Yehova una tsegha iti na vindi vindi hen shighe la yô!—Esek. 38:18, 22, 23.

“Á Kende . . . Nan Sha, sha Icivir”

17. A “kende” a orperapera “sha, sha icivir” nena?

¹⁷ Shighe u Diabolo kua tar u a lu hemen u ne ua kera hendan a vese ga la, a saan se iyol u wuese Yehova ken mzough je a zua ga! Mba ve lu perapera sha ishigh ki Aôndo cii, a lu msaanyol u vea zua a mi gbem sha won je la. A tim ve kera ga, gadia Yehova tôndo zwa ér, ‘korough’ ku orperapera yô a ‘kenden ku sha, sha icivir.’ (Ps. 112:9) Shighe u mbaperapera mba Yehova vea nenge a tim mbaihyomov mba ve hendan a mtemtor u Yehova cica cii la, vea ember kpishi.

18. Mkaanem ma i kur Pasalmi 112 a mi la maa kure nena?

¹⁸ ‘Iferor nan nenge, vihi nan, nan yan anyi nan sough kera; isharen i iferor ia saa ishe.’ (Ps. 112:10) Kera shi ica ga tsô mba ve hendan a ior mba Aôndo cii vea “sough kera” sha ihyom ve la. Shighe u “zegecan” una va la, isharen i ve lu a mi i yangen tom wase u pasen kwagh u Tartor la ia tim a ve imôngo.—Mat. 24:21.

19. Ka vangertiôr u nyi se lu a mini?

¹⁹ U lu môm ken mba vea war la kpa? Man aluer angev shin iyolbeen hungwa a we cii man mtim u tar u Satan ne nahan, u lu môm ken “mbaperapera,” mba a va nder ve shin ku la kpa? (Aer. 24:15) Aluer u za hemen u nan nagh ku ipaa ku Yesu kura jighjigh shi u za hemen u dondon ikyav i Yehova, vough er ‘or’ u i er kwagh na ken Pasalmi 112 la nahan yô, u fatyô nan mlumun wer, een. (Ôr Mbaefese 5:1, 2.) Mayange je Yehova una hungur mbaperapera ga, una “umbur” ve gbem, kua ityom ve i perapera la cii. Yehova una umbur ve shi vea doo un ishima gbem sha won.—Ps. 112:3, 6, 9.

[Ngeren u shin kpe]

Mbampin mba Henen sha Kwagh

• Ka atôakyaa a nyi se lu a mi a kaan ser, “Haleluya”?

• Ka akaa a a lu eren ainge a nyi a ne i saan Mbakristu iyoloo?

• Ka mba nan nagh mba nyi ve doo Yehova ishima?

[Mbampin Mba Ngeren u Henen]

[Foto u sha peeji 25]

Aluer se soo ser Aôndo a lumun se yô, gba u se za hemen u nan awambe a Yesu a hee inya sha ci wase la jighjigh

[Foto u sha peeji 26]

Uiyua mba se ne saan saan la mba wasen mba aahe a er ve la shi mba wasen u gberen ityakerada i pasen akaa a ken Bibilo