Wuese Yesu U A Lu Davidi U Vesen Man Solomon U Vesen la
Wuese Yesu U A Lu Davidi U Vesen Man Solomon U Vesen la
“Nenge, u A hembe Solomon icivir Ngun heen ne.”—MAT. 12:42.
1, 2. Sha mnenge u uumace yô, ityom i í tindi Samuel ér a za shighe Davidi mkurem, a hingir tor la kpiligh se iyol sha ci u nyi?
PROFETI SAMUEL yange nenge ér Davidi kuma u lun tor ga, ka di wanye u kuran ilev tsô. Heela tseegh ga, Davidi yange due hen Betelehem, gar u za iti kpaa ga yô. Yange i fa Betelehem ér ka angar u “kpeghee ken ikwe i Yuda.” (Mika 5:2) Nahan kpa, profeti Samuel yange shighe Davidi, u i nenge ér a gba kwagh ga shi a due hen gar u ikyoogh ga ne mkurem ér a̱ lu tor u Iserael.
2 Yese yange hii van a wan na David hen Samuel ér a shighe un mkurem ga, lu wan u sha uhar shin u sha utar u ter na va a na hen Samuel kpaa ga. Shighe u Samuel za hen ya u orjighjigh Yese u za shighen wan na la mkurem ér a hingir tor u Iserael la, Davidi u lu wan u masetyô ken ônov mba Yese mba anigheni la lu her tsô kpaa ga. Kpa Yehova gema lumun Davidi, man mlumun u Yehova lumun Davidi la hemba lun kwagh u vesen cii.—1 Sam. 16:1-10.
3. (a) Yehova ka una kar ishima i or yô, ka kwagh u injaa u nyi ka a hemba veren ishima sha mini? (b) Lu nyi i̱ za hemen zum u i shighe Davidi mkurem kera laa?
3 Yehova yange nenge a kwagh u Samuel nenge a mi ga yô. Yange fa ishima i Davidi, nahan doo un a na. Kwagh gbe Aôndo sha mlu u or u ken won la ga, kwagh hembe gban un sha mlu u or u ken atô la. (Ôr 1 Samuel 16:7.) Nahan Samuel nengen ér Yehova tsua môm ken ônov mba Yese mba utaankaruhar mbara ga yô, a kaa ér i̱ za va a wan u Yese u masetyô la ape lu kuran ilev la. Bibilo kaa ér: “Tsô [Yese] tindi, i va nyôr a [Davidi]. Un lu nyian, a doo ashe ikyor, doo u kenger. Tsô TER kaa er: Mough, haa un mkurem gadia ka un je ne. Tsô Samuel tôô korough ku mkure, a shighe un mkurem hen atô u anmgbianev nav; Jijingi u TER kpaa kende Davidi sha agee, hii sha iyange la je man ken hemen kpaa.”—1 Sam. 16:12, 13.
Davidi Yange Tile sha Ityough ki Kristu
4, 5. (a) Pase akaa a Davidi agen a a zough vea Yesu yô. (b) Yesu ka Davidi u vesen sha ci u nyi?
4 Yange i mar Davidi anyom kar er 1,100 nahan, maa i mar Yesu ken gar u Betelehem, ape i vande maren Davidi la. Shi Yesu kpa ior kpishi yange ve nenge ér a kuma u lun tor ga. Inja na yô, lu tor u mbagenev ken Iserael kpishi soo la ga. Nahan kpa Yehova gema tsua un. Yehova yange soo un tsung er Davidi nahan. * (Luka 3:22) Yesu kpa ‘jijingi u TER lu sha a na’ vough er Davidi kpa lu a na nahan.
5 Kwagh u Davidi man u Yesu zua sha igbenda igen kpaa. U tesen ikyav yô, Ahitofel yange lu or u wan Davidi kwagh, nahan kpa gema nenge Davidi mker. Kape Yesu kpa Yuda u Isekarioti, u lu môm ken mbaapostoli nav la yange nenge un mker je la. (Ps. 41:9; Yoh. 13:18) Yesu man Davidi cii yange ve lu a ishimatseen sha iyou i Yehova. (Ps. 27:4; 69:9; Yoh. 2:17) Yesu shi lu oryandyako i Davidi kpaa. Cii man i̱ mar Yesu yô, ortyom kaa a ngô na ér: “Ter Aôndo . . . Una na Un ikyônough ki torough ki Ter Na Davidi.” (Luka 1:32; Mat. 1:1) Nahan kpa, er uityendezwa mba sha kwagh u Mesiya cii kure sha Yesu yô, Yesu hemba Davidi. Yesu lu Tor shi lu Mesiya u ior ver ashe a na ica i gba ér ngu van yô, nahan lu Davidi u tamen, gadia uityendezwa mba sha kwagh u Mesiya cii kure sha a na.—Yoh. 7:42.
Se Dondo Nen Tor Wase, u A Lu Orkuran Kpaa La
6. Davidi lu orkuranilev sha nyi gbenda?
6 Yesu ngu orkuran kpaa. Ka aeren a dedoo a nyi orkuranilev ka nan lu a mini? Orkuranilev ka nan koso iyôngo i nan sha gbashima man sha ishimataver shi nan hemen iyôngo i nan kpaa. (Ps. 23:2-4) Davidi lu orkuranilev shighe u lu iyev la, nahan ver ishima sha iyôngo i ter na doo doo. Shighe u begha man dwem soo u kôron ilev nav la a wa ku ikyo ga, a kura iyôngo na sha ikyev i begha man dwem.—1 Sam. 17:34, 35.
7. (a) Lu nyi i wa Davidi agoyol a va hingir toroo? (b) Yesu yange tese ér un ngu Orkuran ilev u Dedoo nena?
7 Anyom a Davidi tsa ken toho man sha uwo u kuran ilev la wa un ago sha tom u vesen u kuran ikyurior i Iserael. * (Ps. 78:70, 71) Yesu kpa yange er akaa a tesen ér un ngu orkuranilev u dedoo. Yehova ngu nan un agee a hemen shi kuran “anikyumuile u kpeghee” kua “iyôngo” igen la kpaa. (Luka 12:32; Yoh. 10:16) Akaa ne tese ér Yesu ngu Orkuranilev u dedoo. A fa ilev nav tsembelee, je yô yer i cii sha ati ati. Yange soo iyôngo na kpishi je yô, shighe u lu shin tar la, na iyol na sha ci ve a ishima i môm. (Yoh. 10:3, 11, 14, 15) Er Yesu a lu Orkuranilev u Dedoo yô, a er kwagh u Davidi tsa sha won kpa er ga yô. Yesu yange na nagh ku ipaa sha ci wase, nahan nagh kura bugh uumace gbenda u waren sha ikyev i ku. Kwagh tsô una yange Yesu u kuran “anikyumuile u kpeghee” la u zuan a uma u kpen ga la sha ga. “Iyôngo igen” la kpa Yesu una hemen i, ia zua a uma u tsôron ken tar u he u perapera, ape ior mba lun asema er gbaseela nahan vea kera lu ga la.—Ôr Yohane 10:27-29.
Dondo Tor u Hemban Ityav La
8. Se fatyô u kaan ser Davidi lu tor u hemban ityav sha ci u nyi?
8 Davidi yange taver ishima sha ityav mbi nôngon tsung, yange nôngo ityav u kuran tar u ior mba Aôndo, shi “TER na Davidi mhembe hanma ijiir i una za cii.” Shighe u Davidi lu hemen ikyurior i Iserael la, tar u Iserael hii hen ifi u Igipiti zan zan za kighir hen ifi u Uferati. (2 Sam. 8:1-14) Yehova yange na Davidi tahav, nahan a hingir tor u ageegh. Bibilo kaa ér: “Gwa u Davidi samber sha ityar ityar cii; TER er akuraior cii, a cian un.”—1 Kron. 14:17.
9. Pase er Yesu u Aôndo a ver un tor la yange hemba yô.
9 Yesu yange taver ishima vough er Tor Davidi nahan. Er Yesu a lu tor u Aôndo a tsough un yô, yange tese ér un hemba azôv agee sha u dughun ior mba azôv lu nzughur a ve la ken ikyangenev mbi azôv kera. (Mar. 5:2, 6-13; Luka 4:36) Satan Diabolo u a lu orihyom u vesen u Aôndo la je kpa yange lu a tahav sha Yesu ga. Yehova yange na Yesu agee hemba tar u Satan a lu hemen u ne.—Yoh. 14:30; 16:33; 1 Yoh. 5:19.
10, 11. Ka tom u nyi Yesu u a lu Tor u Hemban ityav la a lu a mi u eren sha?
10 Yange i nder Yesu shin ku kôndo yem sha, anyom nga kar er 60 nahan yô, apostoli Yohane nenge mpase u sha mnenge u profeti u sha kwagh u Yesu. Mpase u sha mnenge la lu sha kwagh u tom u Yesu, u a lu tor u hemban la a lu eren sha yô. Yohane nger ér: “Nenge, nyinya u pupuu lu. Un u a tema sha mi la, lu a ada; shi i na un tsar u sha ityou kpaa. A due, lu hemban, man lu sha u una hemba kpaa.” (Mpa. 6:2) Ka Yesu a hende nyinya u pupuu la ye. I “na un tsar u sha ityou” ken inyom i 1914, shighe u i ver un Tor ken Tartor u sha la. Mba ne un tsar kera cii yô, “lu hemban, man lu sha u una hemba kpaa.” Yesu ngu tor u hemban er Davidi nahan. Yange i na un tor u Tartor u Aôndo, ica i gbe ga yô hemba Satan ityav, nahan a daa un vea azôv a na a gbihi shin tar. (Mpa. 12:7-9) Yesu una za hemen u hemban man “una hemba” shighe u una tim tar u Satan kera gburu gburu la.—Ôr Mpase 19:11, 19-21.
11 Yesu ngu tor u sha mhôôn er Davidi nahan, shi una yima “zegeikpelaior” sha iyange i Armagedon. (Mpa. 7:9, 14) Kwagh ugen yô, Yesu man mba 144,000, mba vea tema tor a na imôngo la vea nder “mbaperapera kua mba ve lu perapera ga” la shin ku. (Aer. 24:15) Mba a nder ve vea lu shin tar la vea lu uma gbem sha won. Mba a ishimaverenkeghen i doon kpen kpen! Nahan se cii se kange nen ishima, se za nen hemen u “eren akaadedoo” sha er se va lu uma shighe u tar cii ua mgbough a mbaperapera, mba vea lu sha ikyev i hemen u Davidi u Vesen la.—Ps. 37:27-29.
Yehova Ungwa Msen u Solomon Sôn Ér i Na Un Kwaghfan La
12. Solomon yange sôn Aôndo ér a na un nyi?
12 Solomon, wan u Davidi kpa yange tile sha ityough ki Yesu. * Shighe u Solomon hingir tor la Yehova ande hen a na ken mnya kaa a na ér una na un hanma kwagh u a sen cii. Solomon yange lu a ian i sônon inyaregh man tahav shin sônon Yehova ér a seer un ayange. Nahan kpa gema sôn Yehova a ishima i môm ér: “Nam mkav man mfe sha u m̱ duen, m̱ nyôron sha ishigh ki ior mban; gadia ka anti je nana fatyô u ôron imbaikpelaior You ne ijiri?” (2 Kron. 1:7-10) Yehova ungwa msen u Solomon ne.—Ôr 2 Kroniku 1:11, 12.
13. Se fatyô u kaan ser or môm yange nan hemba Solomon kwaghfan ga sha ci u nyi, man Solomon zua a kwaghfan na la hana?
13 Shighe u Solomon lu civir Yehova sha mimi her la, kwaghfan na hemba u mbakov na cii. Yange ôr “anzaakaa dubu utar.” (1 Utor 4:30, 32, 34) I nger anzaakaa a Solomon ôr la kpishi shin inya, man ior mba ve soo u zuan a kwaghfan yô mba ôron ngeren ne. Torkwase u Sheba yange mough ken tar na zende ukilomita 2,400 va u va karen Solomon “sha mbampin mba cimin.” Akaa a Solomon ôr un la doo un tsung shi doo un kpishi er tartor u Solomon lu yôughyôugh yô. (1 Utor 10:1-9) Bibilo pase ape Solomon zua a mfe yô, i kaa ér: “Tar cii, sar u u nengen a Solomon, sha u ungwan kwaghfan na, u Aôndo A ne un ken ishima la.”—1 Utor 10:24.
Dondo Tor u A Lu a Kwaghfan La
14. Ka sha igbenda i nyi nahan Yesu “A hembe Solomon?”
14 Ka orumace môm tseegh yange nan hemba Solomon kwaghfan ye. Or shon yô ka Yesu, gadia a pase ér un u “A hembe Solomon icivir Ngun heen ne.” (Mat. 12:42) Yesu yange pase ior “mkaanem ma uma u tsôron.” (Yoh. 6:68) U tesen ikyav yô, Ityesen i Yesu i sha Uwo la yange i seer tan iwanger sha akaa agen ken anzaakaa a Solomon la. Solomon yange pase akaa kpishi a aa na ve a saan or u civir Yehova iyol yô. (Anz. 3:13; 8:32, 33; 14:21; 16:20) Yesu yange pase ér, aluer or nan ngu eren akaa a a gbe a zough sha mcivir u Yehova shi nan ngu veren ishima sha uityendezwa mba Yehova mba ve lu kuren la yô, nana zua a msaanyol u mimi. A kaa ér: “Saan mba ve lu mbaibanave ken jijingi la iyol, gadia tartor u Sha ka u ve je.” (Mat. 5:3) Mba ve lu eren sha akaawan a ken ityesen i Yesu la yô, ve seer sôsom a Yehova u a lu “imbor i uma” la. (Ps. 36:9; Anz. 22:11; Mat. 5:8) Kristu ngu a “kwaghfan u Aôndo.” (1 Kor. 1:24, 30) Er Yesu Kristu a lu Tor Mesiya yô, ngu a “Jijingi u kwaghfan.”—Yes. 11:2.
15. Se zua a iwasen sha kwaghfan u Aôndo nena?
15 Se mba se lu dondon Solomon u a hembe cii la se zua a iwasen sha kwaghfan u a dugh hen Aôndo la nena? Yehova pasen kwaghfan na ken Mkaanem nam, nahan gba u se nôngo kpoghuloo se ker kwaghfan la sha u timen ken Bibilo vindi vindi, hemban cii yô se timen sha mkaanem ma Yesu a er ken Bibilo la shi se gbidyen kwar sha akaa a se er la kpaa. (Anz. 2:1-5) Shi kwagh ugen u se er yô, se za hemen u sônon Aôndo kwaghfan. Mkaanem ma Aôndo taver se ishima ér, aluer se sôn Aôndo iwasen sha mimi yô, una ungwa se. (Yak. 1:5) Icighan jijingi una wase se se zua a akaa a injaa ken Mkaanem ma Aôndo, a aa wase se u sôron mbamzeyol man u tsuan akaa a injaa a se er yô. (Luka 11:13) Shi i yilan Solomon kpaa ér “Orpasenkwagh” u za hemen u “tesen ior mfe” yô. (Orpa. 12:9, 10) Yesu, u a lu ityough ki nongo u Kristu la kpa i yila un ér orpasenkwagh u ior nav. (Yoh. 10:16; Kol. 1:18) Nahan se zaan nen mbamkombo mba tiônnongo hanma shighe, ape a ‘tese se mfe’ na la.
16. Yesu man Solomon mba kwagh môm sha nyi gbenda?
16 Tor Solomon yange er akaa kpishi. Yange kohol ior sha u ve maa tar u Iserael. Shi yange ver ishima ér i maa ayou ajiirigh a tor man igbenda man atungu a mnger man agar a ombon iyiav ker man agar a akekeautya kua agar a mbaanyinyav nav kpaa. (1 Utor 9:17-19) Tom u maan kwagh ne yange u wase tartor u Iserael cii. Yesu kpa ngu or u maan kwagh. A maa tiônnongo na sha “vande.” (Mat. 16:18) Shi una nenge sha tom u maan kwagh ken tar u he la kpaa.—Yes. 65:21, 22.
Dondo Tor u Bem
17. (a) Ka akaa a vesen a nyi yange i fa hemen u Solomon sha mini? (b) Kpa lu nyi Solomon kôr cio u eren ga?
17 Inja i iti i Solomon la jighilii yô ér “bem.” Tor Solomon yange tema tor ken Yerusalem. Inja i Yerusalem ér bem u “Avegher Ahar.” Solomon yange tema tor anyom 40, anyom ne cii bem gba ken tar u Iserael. Bibilo ôr kwagh u anyom ne ér: “Yuda man Iserael ve tema doo doo, hanma or hen itine i wain i nan, man hen itine i tur i nan, hii hen Dan zan zan za ar hen Bersheba, sha ayange a Solomon la cii.” (1 Utor 4:25) Er Solomon lu tor u injaa nahan kpa, yange bee Mbaiserael angev man isholibo man ku ga. Nahan kpa, Solomon u Vesen la yô, una kar a mbamzeyol mba ior mba vea lu sha ikyev na la kera cii.—Ôr Mbaromanu 8:19-21.
18. Ka akaa a doon a nyi se ember ken tiônnongo u Kristu?
18 Hegen ne kpa, bem ngu ken tiônnongo u Kristu. Se mba ember Paradiso u mimi u ken jijingi. Se mba ken bem vea Aôndo man mbawanndor a vese. Ungwa kwagh u profeti Yesaia a er sha kwagh u bem u se lu zuan a mi hegen ne. A kaa ér: “Vea gema usanker vev, vea var indyuhar a mi, awange a ve kpaa aa hingir ahô a sôron ikyon a mi; ikyurior igen ia kera tsuwa sanker a ikyurior igen ga, vea kera hen ityav mbi nôngon kpaa ga.” (Yes. 2:3, 4) Aluer se lumun ser jijingi u Aôndo a̱ hemen se yô, se na paradiso u ken jijingi ne una seer doon a doo.
19, 20. Ka atôakaa a nyi se lu a mi a embere?
19 Nahan kpa, mlu wase u ken jijingi la una hemba doon cii. Shighe u uumace mba ungwan imo i Aôndo vea ember bem u been mayange ga sha ikyev i hemen u Yesu la, ‘á pase ve sha ikyev i mlu u hôôn la á tuhwa’ kure kure zan zan vea kar hingir uumace mba vough. (Rom. 8:21) Shighe u a mase karen “mbaasemaleghlegh” ikyaren i masetyô ken mbee u Hemen u Anyom Dubu la, “vea ya dyako u tar, á saan ve iyol sha mngee u bem.” (Ps. 37:11; Mpa. 20:7-10) U ôron kwagh haan mba bov kera yô, hemen u Kristu Yesu la ua hemba hemen u Solomon la ica je.
20 Mbaiserael yange ve ember shighe u Mose man Davidi man Solomon lu hemen ve la, nahan kpa se va hemba ember sha ikyev i hemen u Kristu cii. (1 Utor 8:66) Se wuese nen Yehova tsung sha er a ne se wan na u môm môm, u a lu Mose man Davidi man Solomon u Vesen yô!
[Ngeren mba shin kpe]
^ A shi nan kpa, inja i iti i Davidi ér u “ishima ishima.” Yehova ôr kwagh u Yesu acin ahar ér, “Wan Wam u ishima ishima, u i doom a Na yum” yô.—Mat. 3:17; 17:5.
^ Davidi yange lu er waniyôngo u a ne orkuran na jighjigh nahan. Yange suur sha Yehova, u a lu Orkuran u Hembancii la ér a kura un shi a hemen un kpaa. Yange kaa ér: “TER ka orkuran mo, kwagh môm banem ga.” (Ps. 23:1) Yohane u eren Batisema yange kaa ér Yesu ka “Waniyôngo u Aôndo.”—Yoh. 1:29.
^ Kwagh ka a er i doo yô, iti i Solomon igen ér Yedidia. Inja i iti ne ér “un u a doo Yehova ishima” la.—2 Sam. 12:24, 25.
Ú Fatyô u Pasen Kpa?
• Yesu ka Davidi u Vesen sha nyi gbenda?
• Yesu ngu Solomon u Vesen nena?
• Kanyi i hembe doon we sha kwagh u Davidi u vesen man Solomon u vesen laa?
[Mbampin Mba Ngeren u Henen]
[Foto u sha peeji 31]
Kwaghfan u Aôndo na Solomon la tile sha ityough ki kwaghfan u Solomon u Vesen la
[Foto u sha peeji 32]
Hemen u Yesu la ua hemba hemen u Solomon man Davidi la ica je!