Yobu Wuese Iti I Yehova

“I̱ wuese iti i TER.”—YOBU 1:⁠21.

1. A shi nan kpa lu an nan nger takerada u Yobu, man lu hanma shighee?

 MOSE yange lu anyom 40 shighe u yevese Farao, undu tar u Igipiti za lu ken tar u Midian la. (Aer. 7:23) Shighe u lu ken tar u Midian la, alaghga yange ungwa kwagh u atsan a Yobu ya yô. Yobu yange lu ken tar u Ushi, ikyua a tar u Midian. Anyom nga kar yô, Mose man ikyurior i Iserael va kar ikyua a tar u Ushi, zum u ve zurum a mkur u zende ve u ken taaikyôngo la, a shi nan kpa Mose yange ungwa er uma u Yobu za kure yô. Akaaôron a uter mbayiase mba Mbayuda tese ér ka Mose yange nger takerada u Yobu ye; yange nger u shighe u Yobu kpe kera yô.

2. Ka sha igbenda i nyi nahan takerada u Yobu u taver mbacivir Yehova mba sha ayange ne ishima?

² Takerada u Yobu taver jighjigh u nan u mbacivir Aôndo sha ayange ase ne kpishi. Ú taver jighjigh u nan ve nena? Ngeren ne wase se u fan kwagh ugen u yange er sha, u a lu a inja kpishi yô. Kwagh ne umbur se kwagh u ian i Aôndo a lu a mi i hemen sha won cii la, kwagh u a lu ikyaa i vesen sha won cii la. Takerada u Yobu shi wase se se fa kwagh u a lu u tilen sha mimi yô, shi se fa ityôkyaa i ashighe agen Yehova ngu a de ér mbacivir un ve ya ican yô. Heela tseegh ga, takerada u Yobu shi tese ér ka Satan Diabolo a lu Orhendan kwagh a Yehova u vesen, shi a lu orihyom u uumace kpaa ye. Takerada u Yobu shi tese ér aluer uumace mba ve yen, er Yobu nahan ne tagher a ican je kpa, vea fatyô u civir Yehova sha mimi her. De se time sha akaa agen a i nger ken takerada u Yobu la.

Satan Kar Yobu

3. Se fa nyi sha kwagh u Yobu, man er nan ve lu un keng Satan ta num sha a naa?

³ Yobu lu ornyar shi lu tagher tagher kpaa, yange lu tertamen u lun a inja i dedoo. A shi nan kpa, yange lu orwasenmhen u ior naan un icivir kpishi yô, shi eren a mbaatsanev dedoo kpaa. Hemban cii je yô Yobu cian Aôndo. I ôr kwagh u Yobu ér, lu or “u mimi, u perapera, u cian Aôndo, paregh kwaghbo.” Lu mcie u Yobu cian Aôndo la na ve Satan ta num sha a na ye, lu inyaregh ki lu a mi kpishi shin mlu u lu ityagheror la ga.​—⁠Yobu 1:1; 29:​7-16; 31:⁠1.

4. Kanyi i lu mimi?

⁴ Takerada u Yobu hii sha u ôron kwagh u mkombo u mbatyomov zua sha, zum u ve tile sha ishigh ki Yehova yô. Satan kpa va nyôr a ve imôngo, wa Yobu kwagh iyol kpishi. (Ôr Yobu 1:​6-11.) Satan yange ôr kwagh u akaa a Yobu lu a mi la, kpa hemba veren ishima sha u vihin mimi u Yobu. Ishember i “mimi” la tese ieren i perapera man ieren i mimi man i vough man i wang kpaa. Mimi u uumace u i ter ken Bibilo la tese mcivir u or civir Yehova a ishima i nan cii la.

5. Satan yange wa Yobu kwagh iyol ér nyi?

⁵ Satan yange kaa ér Yobu ngu civir Aôndo sha mimi ga, kpa ngu civir un sha ci u mtsera u una zua a mi la. Satan shi kaa ér aluer Aôndo de u eren a Yobu doo doo shin a de u kuran un yô, Yobu una de u civir un. U nan mlumun sha kwagh u Satan ôr ne yô, Yehova na Satan ian ér a za kar orjighjigh ne. Sha nahan yô, ken iyange i môm tseegh, loho nyôr a Yobu ér i ii uzendenya nav shi i tim mbagenev shi i wua mbatomov nav shi ônov nav pue kpe cica cii. (Yobu 1:​13-19) Imeen i Satan la yange i na Yobu de u civir Aôndo sha mimi? Bibilo ôr kwagh u Yobu yange er zum u tagher a akaa a vihin ne yô, ér: “Ka TER A ne ye, shi ka TER A ngohol kpaa ye; i̱ wuese iti i TER.”​—⁠Yobu 1:⁠21.

6. (a) Shighe u mbatyomov shi kohol sha ishigh ki Yehova yô, lu nyi i ere? (b) Shighe u Satan kaa ér Yobu ngu civir Yehova sha mimi ga la, lu Yobu tseegh Satan lu wan un kwagh iyol yee?

 ⁶ Shi sha shighe ugen kpa, mbatyomov mba shaav kohol sha ishigh ki Yehova. Satan shi wa Yobu kwagh iyol ér: “Kwavyolough sha kwavyolough; mimi je, hanma kwagh u or nan lu a mi cii, nana na sha ci u uma u nan. Naregh ase uwegh Ough, bende ikyuhe na kua inyam na, tsô una venda U sha ishigh Yough je.” Fa wer Satan yange fiir uumace cii ken aie ne. Zum u Diabolo kaa ér ‘Hanma kwagh u or nan lu a mi cii nana na sha ci u uma u nan’ la, lu kaan ér Yobu kua hanma “or” u civir Yehova cii nan civir un sha mimi ga. Nahan Aôndo na Satan ian ér a ta Yobu angev mbu nyoon tsung. (Yobu 2:​1-8) Kpa ikyaren i Yobu yange i saa heela tseegh ga.

Kwagh u Se Hen sha Ieren i Yobu Yô

7. Ka sha nyi gbenda kwase u Yobu man mbavannya nav nzughul a naa?

⁷ Sha hiihii la, kwase u Yobu kpa ican i nom na la i bende a na. Ônov mba yange ve saa un, kua inyaregh ki ve kera lu a mi ga la yange nyoon un tsung. Shi yange a vihi un kpishi u nengen er nom na gba angev mbu nyoon tsung yô. Nahan a kaa a Yobu ér: “Nahan kpaa shi u kusu mimi wou hereghe? Venda Aôndo, yô, kpe kera.” Shi iorov utar va nyôr her, ve va ér vea va sur Yobu ishima. Ve yô lu Elifasa man Bildadi kua Sofar. Kpa ve lu “mbasurunshima mba injaav ga,” sha ci u ve lu wan a wa Yobu kwagh iyol. U tesen ikyav yô, Bildadi kaa ér ônov mba Yobu yange ve er iferkwagh, nahan ku ve la lu vough. Elifasa kaa ér ican i Yobu la ka mtsaha u a lu zuan a mi sha asorabo a a er yô. Shi a kaa ér kwagh gba Aôndo a ior mba ve civir un sha mimi la ga! (Yobu 2:​9, 11; 4:8; 8:4; 16:2; 22:​2, 3) Nahan cii kpa, Yobu kusu mimi na her. Kpa yange tsume zum a “na ishô iyol na sha ishigh ki Aôndo” la. (Yobu 32:⁠2) Nahan kpa, mayange Yobu gbihi mimi na ga.

8. Elihu ver mba i gbe u vea wa ior kwagh nyian la ikyav i dedoo i nyi?

⁸ Shi takerada u Yobu ôr kwagh u Elihu; un kpa yange va Yobu inya. Elihu yange vande keghen ato ungwan iliam i Yobu vea akar a na a atar la cii. Shin er iorov mba unyiin mbara cii ve lu tamen a Elihu nahan kpa, Elihu lu a kwaghfan hemba ve cica cii. Yange lam a Yobu sha icivir. Elihu wuese Yobu sha ieren na i mimi la. Nahan kpa a kaa a Yobu ér, Yobu hemba veren ishima sha u nan ishô iyol na yum. Elihu shi kaa a Yobu ér u civir Yehova sha mimi la ka kwagh u vough. (Ôr Yobu 36:​1, 11.) Elihu ver mba i gbe u vea wa mbagenev kwagh nyian la ikyav i dedoo kpen kpen! Elihu yange wa ishima, kegh ato a Yobu zulee shi wuese un, maa a wa un kwagh sha gbenda u taver un ishima.​—⁠Yobu 32:6; 33:⁠32.

9. Yehova yange wase Yobu nena?

⁹ Ken masejime yô, Yobu zua a orvannya ugen u kpilighyol kpishi! Bibilo kaa ér: “TER  gema kaa a Yobu ken ura u hiar.” Yehova wa Yobu kwagh sha gbenda u kundu kundu, a pine Yobu mbampin kpishi, mba vea wase un u kôôm mhen na yô. Yobu ngohol kwaghwan la a ishima i môm, a kaa ér: “M ngu ma kwagh je ga . . . m zamber ken vuulevu kua ken mtwe.” Shighe u Yehova lam a Yobu bee kera yô, ishima vihi un a akar a Yobu a atar la, gadia ve ôr “kwagh u mimi” ga. Yehova kaa ér Yobu a er msen sha ci ve. Nahan “TER dugh Yobu ken ican na kera, zum u a er msen sha ci u akar a na la; TER shi na Yobu akaa kuma er a tsuaa la nahan kwa har.”​—⁠Yobu 38:1; 40:4; 42:​6-10.

Yehova Doo Se Ishima Nena?

10. Yehova yange gba den aie u Satan la tsô shin tim un her ave ave ga sha ci u nyi?

¹⁰ Ka Yehova a gbe akaa cii shi a lu Tor u Hemban sha won cii ye. Er nan ve yange gba den aie u Diabolo er la tsô ga? Yehova yange fa ér aluer un gba den aie u Satan la shin un tim Satan her ave ave kpa kwagh la una bee a ikyaa i Satan due a mi la ga. Satan yange kaa ér aluer akaa a Yobu a lu a mi la cii saa yô, or u civir Yehova sha mimi tsung ne una kera civir Yehova ga. Nahan Satan kar Yobu, kpa Yobu tile sha mimi her. Satan shi kaa ér hanma orumace cii, aluer nan tagher a ma mnyoon yô, nana de u civir Aôndo. Yobu yange ya ican kpishi, kpa a undu mimi na ga. Nahan orjighjigh, u lu a mbamyen la tese ér Satan ka oraie. Mbacivir Aôndo mbagenev di ye?

11. Yesu yange na mlumun wang sha mbaaie mba Satan yange er la nena?

¹¹ Sha nahan yô, hanma or u civir Aôndo u Satan a kar nan kpa nan til sha mimi her cii yô, nan tese ér hen a nan yô, akaa a orihyom u bo ne a we Yehova man uumace iyol la cii ka mimi ga. Yesu va shin tar ne va tese wang ér Satan ka oraie. Yesu lu or u vough, di er ter wase u hiihii, Adam nahan. Yesu yange civir Aôndo sha mimi zan zan kar kpen, nahan mase tesen ér Satan ka oraie shi akaa a a we Yehova man uumace iyol la cii ka mimi ga.​—⁠Mpa. 12:⁠10.

12. Hanma or u civir Yehova cii nan ngu a ian man tom u eren nyi?

¹² Nahan kpa, Satan ngu a de u karen mbacivir Yehova ga. Hanmô wase yô nan ngu a ian man tom u tilen sha mimi, nahan tesen ér nan ngu civir Yehova sha ci u a doo nan ishima, ka sha ci u akaa a dedoo a a eren a nan la ga. Se nenge tom la nena? Se nenge ser ka kwagh u civirigh kpishi u civir Yehova sha mimi. Shi er se fe ser Yehova ne se agee a wan ishima a ameen shi den ér i mee se i hemba agee a ase ga, vough er de ér imeen i Yobu la i hemba agee a na ga nahan doo se kpishi.​—⁠1 Kor. 10:⁠13.

Satan ka Orihyom u Bo man Or u Vendan Mimi

13. Takerada u Yobu seer pasen se kwagh u Satan nena?

¹³ Ruamabera u Mbaheberu pase akaa kpishi a tesen er Satan yange hendan kwagh a Yehova man er a mee uumace ve undu Yehova yô. Shi ken Ruamabera u ken zwa Grika la, i seer ôron se akaa a Satan a er sha u hendan kwagh a Yehova yô. U tesen ikyav yô, i ôr se ken takerada u Mpase ér, ica a gba ga tsô Yehova una paa hementor na iyol shi una mase timin Satan kera. Takerada u Yobu seer pasen se kwagh u ihyembeato i Satan la. Shighe u Satan va nyôr mkombo vea ônov mba Yehova sha la, yange va sha u va wuese Yehova ga. Diabolo yange lu a awashima u bo. Yange we Yobu kwagh iyol shi mba ne un ian ér a kar Yobu yô, “Satan kar sha ishigh ki TER kera.”​—⁠Yobu 1:12; 2:⁠7.

14. Satan yange nzughul a Yobu nena?

 ¹⁴ Takerada u Yobu pase se ér Satan ka orihyom u uumace u mhôônom ma ker un a or môm môm ga yô. Yange mbatyomov nyôr mkombo sha, u i er kwagh na ken Yobu 1:6 la shighe wa karen cii ve shi ve nyôr u i er kwagh na ken Yobu 2:1 la ye, man hen shighe ne Yobu tagher a ikyaren i nyoon kpen kpen. Mtil u Yobu tile sha mimi la na yô, Yehova kaa a Satan ér: “[Yobu] kusu mimi na taveraa shin er u va vemben Mo wer, M̱ kôr un ihyom, M̱ tim un sha ityôkyaa ga, nahan kpaa.” Nahan kpa, Satan lumun ér akaa a un wa Yobu iyol la ka aie ga. A gema a akaa ér i na un ian una kar Yobu sha gbenda u hemban vihin cii. Nahan Satan yange kar Yobu sha shighe u lu yôughyôugh man shighe u gba ican la cii. Sha mimi yô, kunya ngu ker Satan a mbaibanave shin mba ican i tser ve la ga. A kôr ior mba mimi ihyom. (Yobu 2:​3-5) Er i lu cii kpa, ieren i mimi i Yobu la i tese ér Satan ka oraie.

15. Mbavendanmimi mba sha ayange ne mba inja kwagh môm a Satan nena?

¹⁵ Satan yange lu or u hiihii u venda mimi. Aeren a mbavendanmimi mba sha ayange ne nga kwaghmôm a aeren a diabolo la. Alaghga vea zer puun anmgbianev mbagenev ken tiônnongo shin mbatamen mba ken Kristu gayô Mbahemenev mba Shin Tine. Mbavendanmimi mbagenev ka ve soo ér i de yaren tom a iti i Aôndo, i Yehova la ga. Kwagh gba ve u henen kwagh u Yehova shin civir un ga. Mba er ter ve Satan nahan, kwagh hemba gban ve u bulan ior mba mimi. (Yoh. 8:44) Ka nahan ve mbacivir Yehova ve palegh u zan ikyua a ve ye!​—⁠2 Yoh. 10, 11.

Yobu Wuese Iti I Yehova

16. Ieren i Yobu a Yehova lu nena?

¹⁶ Yobu yange yaren tom a iti i Yehova shi wuese i kpaa. Shighe u i va ôr Yobu ku u ônov nav la, nyoon un kpishi, nahan kpa a na Aôndo ibo ér A er kwagh u kpeegh ga. Shin er hen sha lan ér ka Aôndo a woo un ônov nahan kpa, a wuese iti i Yehova. Yange ôr ken Ikyokwaghôron na igen ér: “Nenge, mcie u cian TER, ka kwaghfan je la, man u paven a iferkwagh ka mkav.”​—⁠Yobu 28:⁠28.

17. Lu nyi i wase Yobu ve kusu mimi na here?

¹⁷ Lu nyi i wase Yobu ve kusu mimi na here? Ikyav tese wang ér yange vande yan ikyar vea Yehova kangenaa cii ve tagher a imeen ye. Se nenge a kwagh u tesen ér Yobu yange fa imbwase i Satan kaa Yehova la ga, nahan kpa Yobu kange ishima ér mayange una gbihi mimi na ga. A kaa ér: “Zan zan me kpe je kpaa, me gbihi mimi wam ga.” (Yobu 27:⁠5) Lu nyi i wase Yobu ve ya ikyar a Yehova kangenaa nahana? Akaa a yange ungwa ér Aôndo er a Aberaham man Isaka man Yakob, mba ve lu anmgbianev nav mba ken agbaa la doo un ishima. Shi Yobu yange nenge a aeren a Yehova kpishi ken akaa a Yehova a gbe la.​—⁠Ôr Yobu 12:​7-9, 13, 16.

18. (a) Yobu yange civir Yehova sha mimi nena? (b) Ka sha igbenda i nyi nahan se dondo ikyav i dedoo i Yobu laa?

 ¹⁸ Akaa a Yobu hen la kende isharen ken a na i eren ishima i Yehova. Yange naan Aôndo nagh hanma shighe cii, ér alaghga tsô tsombor na er kwagh u vihin Aôndo shin “ve venda Aôndo ken asema a ve.” (Yobu 1:⁠5) Shighe u Yobu tagher a ikyaren i vesen je kpa, a za hemen u ôron akaa a dedoo sha iyol i Aôndo. (Yobu 10:12) A ver se ikyav i dedoo kpen kpen! Se kpa doo u se henen kwagh u Yehova kua mbaawashima nav hanma shighe. Se mba eren akaa hanma shighe a a ne ikyaryan yase vea Yehova i taver kpishi yô; akaa shon yô, ka Bibilo i henen man u zan mbamkombo man msen u eren man tom u pasen loho u dedoo. Heela tseegh ga, se mba eren kwagh u se fetyô cii ser ior ve fa iti i Yehova la . Er yange doo Yehova a ieren i mimi i Yobu la nahan, kape ieren i mimi i mbacivir Aôndo nyian kpa ngi i na i saan Yehova iyol je la. Se time sha itinekwagh ne ken ngeren u a dondo ne.

Baver We Kpa?

• Lu nyi Satan Diabolo nenge a mi ken Yobu ve kar unuu?

• Ka ikyaren i nyi Yobu wa ishima a mini, man yange er nena?

• Kanyi ia wase se ve se kusu mimi wase er Yobu nahana?

• Se hen nyi sha kwagh u Satan ken takerada u Yobuu?

[Mbampin Mba Ngeren u Henen]

[Foto u sha peeji 4]

Takerada u Yobu pase se ikyaa i Satan a dugh a mi sha ian i Aôndo a lu a mi i hemen la

[Foto u sha peeji 6]

Ka akaa a nyi nahan aa fatyô u karen mimi wouwe?