Noov, Lu Nen a Imba Dooshima u Kristu kpa lu a mi la!

 HEN tugh mbu Yesu mbu masetyô shin tar la, a kaa a mbaapostoli mba jighjigh mbara ér: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yoh. 13:​34, 35) Sha kpôô yô, gba u Mbakristu mba mimi vea doo ayol a ve.

 Apostoli Paulu ôr kwagh a Mbakristu mba ve lu noov la jighilii kaa ér: “Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan.” (Ef. 5:25) Nom u nan lu Orkristu nana dondo kwaghwan ne ken ivaa i nan nena, hemban je yô aluer kwase u nan la kpa nan civir Yehova yôô?

Kristu Wa Tiônnongo Ikyo

 Bibilo kaa ér: “Noov kpaa, kasev vev ve̱ doo ve ishima keng er ayol a ve nahan . . . Or u kwase u nan a doo nan ishima yô, ka iyol i nan je i doo nan ishima ye. Gadia mayange ma or nana kôr iyol i nan ihyom ga kpa nan koson i shi nan kor i kpaa di er Kristu kpaa A eren a nongo Na nahan.” (Ef. 5:​28, 29) Mbahenen mba Yesu yange ve doo un ishima tsung. Yange wa ve ikyo. Er mbahenen nav mbara yina nahan je kpa, yange waan ishima a ve shi eren a ve dedoo kpaa. Yesu yange hemba veren ishima sha aeren a dedoo a mbahenen nav lu a mi la, sha u “Una ver nongo Na sha ishigh Nagh, u̱ engem” yô.​​—⁠Ef. 5:⁠27.

 Er Kristu yange tese tiônnongo na dooshima nahan, kape noov kpa ve tesen kasev vev dooshima sha mkaan man sha ieren je la. Kwase u nom u nan a tesen nan dooshima hanma shighe yô ka nan nenge ér nom u nan la wa nan ikyo, nahan i saan nan iyol. Kpa gema kwase u nan lu a hanma kwagh u nan soo hen ya u nan, kpa nom u nan a kera ver ishima sha nan ga shin nom u nan la nan we nan ikyo ga yô a saan nan iyol ga.

 Nom nana tese ér nan wa kwase u nan ikyo nena? Nana er kwagh ne sha u tesen mbagenev kwase u nan sha icivir shi wuese nan er nan lu suen nan yô. Aluer kwase wase u van a mzehemen hen tsombor yô, i lu kwagh u doon nom u pasen mbagenev kwagh sha mi. Shighe u nan lu vea we tseegh la kpa nana kav er nan doo u ishima yô. Alaghga a lu inja er u benden nan uwegh iyol man u sen a nan shin u kuven nan nahan ka kwagh u ikyoo ga yô, kpa akaa ne gba kwase kwagh kpen kpen.

“Kunya . . . Kôr Un u Yilan Ve Er Anmgbianev Ga”

 “Kunya” yange u “kôr” Kristu Yesu “u yilan [mbahenen nav mba i shigh ve mkurem mbara] ér anmgbianev ga.” (Heb. 2:​11, 12, 17) Aluer u ngu Orkristu u ú lu nom yô, umbur kpaa wer kwase wou la shi ngu anmgbian wou u kwase ken Kristu. Iyol i nan tsegh sha ci u Yehova la hemba iceghzwa i ivesegh i nan er la, aluer yange wea vôso nan cii ve nan er batisema shin nana vande eren batisema cii ve u vôso nan kpaa. Anmgbian u nomso ka nana hemen kwaghhenen ken tiônnongo, man nana yila kwase wou ér nana na mlumun yô nan yila nan ér “Anmgbian u Kwase.” We kpa ka anmgbian wou u kwase, ka ken Iyou i Tartor tseegh ga, ken ya kpa nan ngu anmgbian wou u kwase. Doo u ken ya kpa u eren a nan doo doo shi u lu a nan sar sar kpaa, di vough er ka a lu sha Iyou i Tartor kpa u eren a nan nahan.

 Aluer u ngu a ityom ken tiônnongo yô, alaghga a taver we u nengen sha ityom you i ken tiônnongo shi kuren ityom i u lu a mi hen tsombor  wou la kpaa. Aluer mbatamen man udiakon mba eren kwagh ken mzough, shi u ngu tesen mbagenev u eren ityom ken tiônnongo vough vough yô, u fatyô u zuan a ian i nengen sha mbamgbe mba anmgbian u kwase u i gbe u ú hemba veren ishima sha nan cii la, ka kwase wou je la. Umbur wer, anmgbianev mba nomso mbagenev mba ken tiônnongo mba vea fatyô u eren ityom i í ne u la yô, kpa ka we tseegh u lu anmgbian u nomso u i zough u vea kwase wou imôngo ye.

 Heela tseegh ga, ka we kpa u lu ityough ki kwase wou ye. Bibilo kaa ér: “Ityough ki hanma nomsoor yô, ka Kristu, man ityough ki kwase yô, gema ka nom.” (1 Kor. 11:⁠3) Nahan u er tom wou u lun ityough la nena? Ú er tom ne sha dooshima, kpa a lu sha u ôron ivur i se ter sha heen ne hanma shighe, kaan wer kwase wou a na u icivir ga. U er tom wou u lun ityough la sha u dondon ikyav i Yesu Kristu sha gbenda u ú eren kwagh a kwase wou la.​​—⁠1 Pet. 2:⁠21.

“Ne Mba Akar Am”

 Yesu yange yila mbahenen nav ér akar a na. Yange kaa a ve ér: “M kera yila ne Mer ikpan ga, gadia kpan fe kwagh u ter na a eren ga; kpa M yila ne Mer, akar, gadia akaa a M ongo hen Terem cii, M ôr ne a.” (Yoh. 15:​14, 15) Yesu vea mbahenen nav yange ve lamen ayol a ve doo doo. Shi ve eren akaa imôngo kpaa. Yange i lôhô ‘Yesu . . . kua mbahenen Nav’ iniongo i kwasehe ken gar u Kana. (Yoh. 2:⁠2) Shi yange ve lu a ijiir i ve zaan her faa faa yô, er sule u Gesemane nahan. Bibilo kaa ér “Yesu kohol ker a mbahenen Nav keke.”​​—⁠Yoh. 18:⁠2.

 Doo u kwase nana kav er nan lu ijende i nom u nan i ishima ishima yô. Sha kpôô yô, doo u ne noov man kasev ne eren akaa imôngo. Civir nen Aôndo imôngo. I doo ne u henen Bibilo imôngo. Luun nen imôngo, zenden nen imôngo shi lamen nen imôngo shi yaan nen kwagh imôngo kpaa. De gbe lun nen nom man kwase tsô ga, lu nen azende a dedoo.

“Ve Doo Un Ishima zan zan Ar sha Mkur Je”

 Mbahenen mba Yesu yange ve “doo Un ishima zan zan ar sha mkur je.” (Yoh. 13:⁠1) Noov mbagenev mba dondon Kristu sha gbaa ne ga. Alaghga je yô ka ve undu ‘kwase ve u ve er nan iyev’ la ve yem ve za vôso kwase u nan lu a mhem iyol her yô.​​—⁠Mal. 2:​14, 15.

 Kpa mbagenev, er or u i yer un ér Willi la nahan yô, ve dondo ikyav i Kristu la. Er i vihi kwase u Willi iyol kpishi yô, gba u una nenge sha kwase na anyom imôngo je. Nahan Willi nenge kwagh ne nena? A kaa ér: “Hanma shighe ka m nenge mer kwase wam ka iyua i Aôndo a nem yô, man shi kape m tee un kpaa je la. Bee kera yô, yange m tôndo zwa u nengen sha a na sha ashighe a doon man a doon ga cii, anyom kar hegen je kuma 60. Mayange ityendezwa la ia hungur mo ga.”

 Ne noov mba ken Kristu, lu nen a imba dooshima u Kristu kpa lu a mi la. Waan kwase wou u a cier Aôndo la ikyo, ngu anngôu u kwase man ijende you kpaa.

[Foto u sha peeji 20]

Kwase wou ngu ijende you i ishima ishima kpa?

[Foto u sha peeji 20]

‘Kwase wou a̱ doo u ishima’