Orkuranya U Jighjigh Man Mbahemenev Mba Shin Tine Mba Ve Til Sha Ityough Nagh la
Orkuranya U Jighjigh Man Mbahemenev Mba Shin Tine Mba Ve Til Sha Ityough Nagh la
“Ka an nan lu orkuranya u jighjigh, u fan kwagh, u ter u nan una wa nan ya sha ikyev sha u nana̱ karen ve kwaghyan sha ashighe ashighe?”—LUKA 12:42.
1, 2. Ka mpin u nyi Yesu yange pine shighe u lu pasen akaa a a lu ikyav i tesen ér se mba ken ayange a masejime laa?
ZUM u Yesu lu pasen akaa a á lu ikyav i vesen i tesen ér se mba ken ayange a masejime yô, á pine mpin ne ér: “Ka an nan lu wanakiriki u jighjigh man u fan kwagh u ter u nan una wa nan ya sha ikyev sha u nana naan ve kwaghyan sha ashighe ashighe?” Yesu za hemen kaa wener á na wanakiriki ne injar sha ci u jighjigh na la, gadia Ter una wa un akaa a na cii sha ikyev.—Mat. 24:45-47.
2 Yesu yange vande pinen imba mpin ne iwer kar imôngo ken ijime. (Ôr Luka 12:42-44.) Yange yila wanakiriki ne ér “orkuranya.” Orkuranya ka or u nengen sha ya u i ver nan sha mbatomov yô. Nahan cii kpa, nan kpa nan ngu ortom tsô. Ka an nan lu wanakiriki shin orkuranya nee, man ngu nan “kwaghyan sha ashighe ashighe” nena? Doo u se cii se fa mba i lu yaren tom a ve sha u nan se kwaghyan u ken jijingi la.
3. (a) Mbaaduav mba timen sha akaa a kwaghaôndo pase mkaanem ma Yesu sha kwagh u “wanakiriki” la nena? (b) Ka an nan lu “orkuranya” shin “wanakiriki” laa, man ka unô ve lu “ya” laa?
3 Mbaaduav mba timen sha akaa a kwaghaôndo ka ve shi kaan ér mkaanem ma Yesu man ma ôron kwagh u mbavesen mba ve lu a ityom ken mbaadua la. Nahan kpa, Yesu, un u a lu “ter” ken injakwagh i orkuranya ne la, yange ôr kwagh u mbakuranya kpishi mba vea lu ken mbaadua kposo kposo ga. Yange pase wang ér una ver “orkuranya” shin “wanakiriki” môm tseegh, sha u a nengen sha akaa na cii yô. Er magazin ne a vande pasen acin imôngo nahan, orkuranya ne ka “anikumuile u kpeghee” u nongo u mbahenen mba i shigh ve mkurem la. Aluer u ôr Ivangeli i Luka, ape Yesu ôr kwagh u orkuranya la yô, u mase kaven wer Yesu yange sember ôron kwagh u anikumuile ne. (Luka 12:32) “Ya” la kpa ka nongo shon ne môm, nahan kpa ishember ne gema ngi ôron kwagh u mba ve lu ken nongo ne asange asange. Kpa mpin u injaa gema due sha kwagh ne ve, Hanma or u ken nongo u wanakiriki ne nan ngu eren tom u nan kwaghyan u ken jijingi sha shighe vough laa? Se time sha kwagh u Ruamabera a er sha kwagh ne vighe vighe tsô se mase zuan a mlumun sha mpin ne.
Wanakiriki u Yehova u sha Ashighe a Tsuaa La
4. Yehova yange yila ikyurior i Iserael i tsuaa la ér nyi, man ka nyi i doo u se fa sha kwagh u ikyurior nee?
4 Yehova yange ôr kwagh u ior nav, ikyurior i Mbaiserael mba sha ayange a tsuaa la ér mba wanakiriki na. “ Ka ne [ior kpishi] ne lu mbashiada [ior kpishi] Av ye, kape TER A kaa ne, wanakiriki [or môm] Wam u M tsough.” (Yes. 43:10) Ior mba ken ikyurior la cii kohol lu nongo u wanakiriki ne môm. Nahan kpa, doo u se fa ser ka upristi kua Mbalevi, mba yange ve lu upristi ga la tseegh, yange i wa ve tom u tesen ikyurior la atindi a Yehova ye.—2 Kron. 35:3; Mal. 2:7.
5. Ka mgem u vesen u nyi Yesu yange tese ér una va ken hemenee?
5 Ka ikyurior i Iserael la i̱ lu wanakiriki shon u Yesu yange ôr kwagh na la yee? Ei. Se fa ser ka ve ga, sha ci u kwagh u Yesu ôr a Mbayuda mba sha ayange a na la. A kaa a ve ér: “Á ngohol tartor u Aôndo hen a ven kera á na ikyurior i ia ume atam yô.” (Mat. 21:43) Mkaanem man tese wang ér, lu u mgem una va sha kwagh ne. Yehova una hingir u lun a ikyurior i he igen. Nahan kpa, ka ior mba ken nongo u wanakiriki u ken injakwagh i Yesu la cica cii ve lu a tom u nan ior ityesen i ken jijingi la ga, di vough er ngise la kpa, lu Mbaiserael mba ve lu “wanakiriki” u Aôndo la cica cii lu a tom u tesen ior atindi a Aôndo ga nahan.
Wanakiriki u Jighjigh la Due Ve
6. Ka ikyurior i he i nyi yange i hingir u lun sha iyange i Pentekosti u inyom 33 laa, man ka unô yange ve hingir u lun ken ikyurior nee?
6 Ka Mbaiserael mba ken jijingi ve lu ikyurior i he i í lu “Iserael u Aôndo” la ye. (Gal. 6:16; Rom. 2:28, 29; 9:6) Ikyurior ne yange i hii u lun sha iyange i Pentekosti u inyom 33 zum u Aôndo haa jijingi na sha mbahenen la. Hii shighe la je, Mbakristu mba i shigh ve mkurem mbara cii hingir u lun ken ikyurior i í lu nongo u wanakiriki u Ter, Yesu Kristu a ver hegen la. I wa hanma or u ken ikyurior ne tindi ér nana pase loho u dedoo shi nana gema ior ve hingir mbahenen. (Mat. 28:19, 20) Kpa lu u hanma or u ken nongo ne nana er tom u nan kwaghyan u ken jijingi sha shighe vough laa? De se nenge ase nen er Ruamabera á ne mlumun sha mpin ne yô.
7. Kanyi yange i lu tom u vesen u mbaapostoli lu a mi sha hiihii laa, man tom ve la yange u va seer nena?
7 Shighe u Yesu tsuaa mbaapostoli nav mba 12 la, tom u vesen u wa ve sha kyev yô lu u ve za pasen ior loho u dedoo. (Ôr Marku 3:13-15.) Tom ve ne zua sha inja i ishember i ken zwa Grika i í yer ér apostolos la vough. I̱ zua a ishember ne ken ishember igen i pasen ieren man inja i ishember shon yô ér “í tindi ve.” Kpa, ayange nga kar, hen shighe u i lu nôngon a ver tiônnongo u Kristu la yô, tom u apostoli la seer kua “tom u orkuran” kpa sha mi.—Aer. 1:20-26, NW.
8, 9. (a) Mbaapostoli mba 12 mbara yange ve hemba veren ishima sha nyi? (b) Ka unô kpa yange mbahemenev mba shin tine lumun a ityom i vesen i í na ve laa?
8 Mbaapostoli mba 12 mbara yange ve hemba veren ishima sha nyi? Akaa a yange er shighe u Pentekosti bee kera la, aa wase se u zuan a mlumun sha mpin ne. Zum u ayôôso due sha kwagh u kwaghyan u i karen kasev mba côgholov ayange ayange la yô, mbaapostoli mba 12 mbara yila mbahenen, kaa a ve ér: “Doo u sé undu kwaghôron u Aôndo, sé gema sé ver ishima sha tom u karen kwaghyan la ga.” (Ôr Aerenakaa 6:1-6.) Mbaapostoli maa tsua anmgbianev mba ve kuma u eren tom shon yô, ve ver ve “sha tom ne,” sha er mbaapostoli vea ver ishima “sha tom u kwaghôron” u Aôndo yô. Kwagh u mbaapostoli er ne va a iveren i Yehova, gadia “kwaghôron u Aôndo seer ngeen; iyenge i mbahenen seer ken Yerusalem kpishi.” (Aer. 6:7) Kwagh ne tese ér, ka mbaapostoli yange ve lu a tom u nan ior kwaghyan u ken jijingi la kpôô kpôô ye.—Aer. 2:42.
9 Ayange nga kar yô, i wa mbagenev ityom i vesen sha ikyev. Ka sha iwasen i icighan jijingi yange i tindi Paulu man Barnaba tom u mishen ken tiônnongo u ken Antioki la ye. Ve kpa, yange i hingir u va yilan ve ér mbaapostoli, nahan kpa i wa ve ken mbaapostoli mba 12 mbara ga. (Aer. 13:1-3; 14:14; Gal. 1:19) Mbahemenev mba shin tine mba ken Yerusalem mbara yange ve lumun a mtsough u i tsua Paulu man Barnaba ér ve lu mbaapostoli la. (Gal. 2:7-10) Yange mba tsough Paulu yô, un kpa gba nan mbagenev kwaghyan u ken jijingi la. Lu hen shighe ne nger washika na u hiihii sha iwasen i jijingi u Aôndo ye.
10. Ka Mbakristu mba yange i shighe ve mkurem mba ken derianyom u hiihii la cica cii yange ve er tom u nan ior kwaghyan u ken jijingi yee? Pase ase yôô.
10 Nahan kpa, Mbakristu mba i shighe ve mkurem la cii lu nengen sha tom u pasen kwagh shi nan ior kwaghyan u ken jijingi laa? Ei. Apostoli Paulu kaa a vese ér: “Ka ve cii ve lu mbaapostoli yee? Ka ve cii ve lu uprofeti yee? Ka ve cii ve lu mbatesen yee? Ka ve cii ve eren akaa a sha agee yee?” (1 Kor. 12:29) Er Mbakristu mba i shighe ve mkurem la cica cii lu eren tom u pasen kwagh nahan kpa, lu iorov kpuaa ken a ve, iorov anigheni tseegh, Aôndo yar tom a ve u ngeren ityakerada 27 i Ruamabera u Mbakristu u ken zwa Grika la ye.
Wanakiriki u Jighjigh u sha Shighe Wase Ne
11. Ka “akaa” a nyi yange i wa wanakiriki la sha ikyeve?
11 Mkaanem ma Yesu ma ken Mateu 24:45 la tese wang ér, sha shighe u mkurtar ne kpa nongo u wanakiriki u jighjigh la ua lu her. Mpase 12:17 yila ve ér tsombor u kwase, “u u shi her” la. I wa akaa a Kristu a shin tar ne cii sha ikyev i asandeaior a a shi her ken nongo ne la. “Akaa” a i we orkuranya u jighjigh sha ikyev la ka akaa a Ter a shin tar ne cii, man akaa ne wa ior mba vea ya dyako u Tartor shin tar la kpa ker, man ikyav kua hanma kwagh u i yaren tom a mi sha u pasen loho u dedoo cii.
12, 13. Orkristu shin Kwasekristu ka nan hingir u fan ér nan ngu a ishimaveren i yemen sha nena?
12 A er nan ve Orkristu shin Kwasekristu nana fa ér nan ngu a ishimaverenkeghen i hemen sha, nahan nan kpa nan ngu ken asande a Mbaiserael mba ken jijingi mba ve shi her laa? Se zua a mlumun sha mpin ne ken mkaanem ma Paulu yange ôr a mba lun a ishimaveren i yemen sha er un nahan la. A kaa a ve ér: “Mba Jijingi u Aôndo A hemen ve la cii, ka ônov mba Aôndo je la. Gadia ne ngohol jijingi u kpan u né shi né cia kwagh ga kpa ne ngohol jijingi u mlu u wan, ka sha mi je se yer ser Aba, Tere, ye. Ka Jijingi iyol Na A lu eren shiada vea jijingi wase imôngo er, se mba ônov mba Aôndo ye. Aluer se mba ônov yô, se mba mbayandyako kpaa, ka mbayandyako u Aôndo man mbayandyako a Kristu imôngo kpaa, aluer sea ya ican a Na imôngo sha u shi á na se iengem a Na imôngo kpaa yô.”—Rom. 8:14-17.
13 U ngeen kwagh ga yô, ka i shighe ve mban mkurem sha icighan jijingi u Aôndo, nahan ve ngohol “myer” shin mlehe u a dugh sha la. (Heb. 3:1) Ka Aôndo a lôhôn hanma ve ye. Ka a lôhôn ve je maa ve vengese fese, ve lumun m-mar u i mar ve ve hingir ônov mba Aôndo la a akperan shin mciem iyol shio. (Ôr 1 Yohane 2:20, 21.) Nahan mba karen a ishima tsô mba lu a ishimaverenkeghen ne ayol a ve ga, kpa ka Yehova ka a ver ve ikyav shin a haa icighan jijingi na sha a ve ye.—2 Kor. 1:21, 22; 1 Pet. 1:3, 4.
Mnenge u Vough
14. Mba i shigh ve mkurem la mba nengen myer ve la nena?
14 Doo u mba i shigh ve mkurem la vea nengen ayol a ve sha shighe u ve lu keghen injar ia na ve sha la nena? Ve kav ér mlehe ne ka kwagh u doon tsung, nahan kpa ve fa er i lu di mlehe tseegh tsô yô. Gba u vea ta jighjigh ve u nan kera ga zan zan ku ve sha er vea ngohol injar i a na ve la yô. Ve hide a ayol a ve ijime, nahan ka ve ken ishima er lu Paulu nahan, gadia yange kaa ér: “Anmgbianev av, mo yô, m ngu henen mer m zua a mi hingir kwagh wam ve ga, kpa kwagh u m lu eren yô, ngu môm, akaa a ken ijime la hungur mo kera m ngu naregh zan sha akaa a ken hemen la. M ngu yevese zan hen ikighir i i ver la sha u zuan a iyua i myila u a sen sha, u Aôndo A lu yilan ken Kristu Yesu la.” (Fil. 3:13, 14) Gba u asande a mba i shigh ve mkurem la vea nôngo sha afatyô ve cii vea “zende . . . zende u u kom sha myer u i yila [ve] la, a iyolgengese ga,” vea eren nahan a “mciem man ikyarikyase iyol” kpaa.—Ef. 4:1, 2; Fil. 2:12; 1 Tes. 2:12.
15. Doo u Mbakristu vea nengen mba ve ye bredi shi ve me wain ken mkombo u umbur ku u Yesu la nena, man mba i shigh ve mkurem la mba nengen ayol a ve nena?
15 Doo u Mbakristu mbagenev di vea nengen or u nan senge ér nan kpa i shighe nan mkurem, u nan gem yan bredi shi man wain ken mkombo u umbur ku u Yesu la nena? I de kur ikyaa ér nan ngu eren kwagh u shami ga ze. Kwagh ne ka kwagh u nan vea Yehova. (Rom. 14:12) Nahan kpa, Mbakristu mba i shigh ve mkurem sha mimi mbara mba keren icivir ga. Ve na jighjigh ér, er i shigh ve mkurem yô, ve mba a mkav sha akaa a ken jijingi hemba mbagenev ken “zegeikpelaior” mba ve vie ken jijingi kpishi la je kpaa ga. (Mpa. 7:9) Shi ve na jighjigh ér ve hemba ngeen a icighan jijingi a akar a ve a a lu “iyôngo igen” la keng ga. (Yoh. 10:16) Mba keren ér i er kwagh a ve kposo ga; shi mba kaan ér, er ve ye bredi shi ve me wain u umbur ku u Yesu la yô, ve hemba mbatamen mba i ver ve ken tiônnongo la kpaa ga.
16-18. (a) Hanma or u i shigh nan mkurem yô, nan ngu uwegh sha u pasen akaa a mimi a he a ken Bibiloo? Tese ikyav. (b) Er nan ve i lu hange hange u Mbahemenev mba Shin Tine vea zaan idyu a hanma or u nan senge ér nan kpa i shighe nan mkurem sha jijingi ga?
16 Mba i shigh ve mkurem mba ve lu sha tar mbara cii mba tem imôngo shin mba timen sha akaa a ken Bibilo imôngo sha er vea gema a pase anmgbianev akaa a he a ken Bibilo a ve tôv sha mi laa? Ei. Shin er i lu tom u nongo u wanakiriki la jimin cii u koson ya u mbahenen mba Kristu mba i shigh ve mkurem la nahan kpa, hanma or ken nongo ne nan eren kwagh môm shin nan ngu a tom môm ga. (Ôr 1 Mbakorinte 12:14-18.) Er se vande ôron nahan, ken derianyom u hiihii la, ve cica cii ve lu eren tom u hange hange u pasen kwagh la. Kpa lu iorov kpuaa ken a ve tseegh i yar tom a ve u ngeren ityakerada i Bibilo shi nengen sha nongo u Kristu ye.
17 U tesen ikyav yô: Ashighe agen Ruamabera ngu a ôr kwagh u “nongo u Kristu” ér ú ôr ma or u nan er isholibo yô ijir. (Mat. 18:17) Nahan kpa, jighilii yô, ka mbatamen tseegh ka ve ôr nan ijir ye, gadia ka ve ve lu angahar a tiônnongo ye. Mbatamen mban mba za pin hanma or ken tiônnongo mnenge u nan sha kwagh u ijir shon cii man ve kur i ga. Ka ve er tom u i we ve la, ve kure ijir ne sha ci u tiônnongo jimin cii.
18 Nahan nyian ne kpa, iorov kpuaa ken mba i shigh ve mkurem mbara mba a tom u lun angahar a nongo u wanakiriki ne. Ka ve ve lu Mbahemenev mba Shin Tine mba Mbashiada mba Yehova ye. Ve mba shon mba jijingi a tsough ve shi a hemen ve ne, mba nengen sha tom u Tartor man u koson anmgbianev ken jijingi. Er ken derianyom u hiihii la kpa lu nahan, Mbahemenev mba Shin Tine mban mba ze idyu a hanma or u nan lu ken nongo u wanakiriki la cii man ve eren kwagh ga. (Ôr Aerenakaa 16:4, 5.) Nahan kpa, Mbashiada mba i shigh ve mkurem mbara cica cii mba eren tom u sunda u hange hange, u ú lu za hemen hegen ne sha gbashima. Nongo u “wanakiriki u jighjigh man u fan kwagh” la ngu iyol i môm tsô, nahan kpa asandeaior a ken nongo ne gema mba a ityom ave kposo kposo.—1 Kor. 12:19-26.
19, 20. Ka mnenge u vough u nyi zegeikpelaior i lu a mi sha “wanakiriki u jighjigh man u fan kwagh” kua Mbahemenev mba Shin Tine mba ve lu angahar a nan laa?
19 Doo u akaa a i pase sha heen wang ne aa bende a zegeikpelaior i í lu a ishimaverenkeghen i lun uma gbem sha won shin tar, i í lu seer a seer iyenge la nena? Er ve kpa ve lu akaa a Tor yô, saan ve iyol u eren hanma kwagh u Mbahemenev mba Shin Tine, mba ve lu angahar a “wanakiriki u jighjigh man u fan kwagh” la ve kaa ér i er cii. Mba ve lu zegeikpelaior la mba lahan kwaghyan u ken jijingi u i ne ve sha ikyev i Mbahemenev mba Shin Tine la ga. Er ior mba ken zegeikpelaior ve ne nongo u wanakiriki ne icivir nahan kpa, mba nengen ma or u nan kaa ér nan ngu or u ken nongo u wanakiriki ne ér nan hemba mbagenev ga. Ma Orkristu môm u i shigh nan mkurem sha jijingi u Aôndo sha mimi nana soo ér i nengen nan nahan ga.—Aer. 10:25, 26; 14:14, 15.
20 Sea lu ior mba hen “ya,” mba ve lu vegher u asande a mba i shigh ve mkurem mbara shin sea lu ior mba ken zegeikpelaior kpa, doo u se kange nen ishima ser se eren kwagh ken ijoughave vea orkuranya u jighjigh man Mbahemenev mba Shin Tine mba ve lu angahar a na la. Yô, hanma wase nana “kuran” shi nana za hemen u lun a jighjigh u nan zan zan mkur.—Mat. 24:13, 42.
Ú Umbur Kpa?
• Ka an nan lu “wanakiriki u jighjigh man u fan kwagh” laa man ka unô ve lu ya laa?
• Ka i er nan ve or nan fa ér nan kpa nan ngu ken mba ve lu yemen sha laa?
• Ka unô i lu tom ve u pasen se mimi mba hev mba ken Bibiloo?
• Doo u or u i shigh nan mkurem sha jijingi la nana nengen iyol i nan nena?
[Mbampin Mba Ngeren u Henen]
[Foto u sha peeji 23]
Nyian ne, Mbahemenev mba Shin Tine mba angahar a wanakiriki u jighjigh man u fan kwagh la. Ken derianyom u hiihii la kpa kape lu je la.