Ijoughave I Ve a Mzehemen u ken Jijingi

ALUER or soo u lun a tsombor u ú soo kwagh u Yehova shi u civir un yô, gba u hanma or hen tsombor la nana eren kwagh ken mzough. Zum u Yehova gba nom man kwase u hiihii la, a pase ve er i doo u vea eren kwagh ken mzough yô. Yange gba u Ifa una eren tom vea Adam, una lu “orwasen” un. (Gen. 2:18) Doo u ivaa ia lu mzough u nom man kwase vea wasen ayol a ve yô. (Orpa. 4:​9-12) Tom u Yehova a ne mbamaren man u a ne mbayev la kpa, saa vea zua ave ve vea er u ye.

Mcivir u hen Tsombor

Anmgbian Barry vea kwase na Heidi, mba a ônov utaan. Ve nenge ér, er ve eren kwagh ken ijoughave sha u henen Bibilo vea tsombor ve yô, ve za hemen ken jijingi. Barry kaa ér: “Ka m wa ônov av tom u keren mkaanem ma vea ôr ken kwaghhenen u hen tsombor wase yô. Ashighe agen ka m kaa a ve mer, ve ker mkaanem ken ngeren mba ken Awake! ma vea ôr yô. Shi ka se tema imôngo se wa agoyol sha igbenda i pasen kwagh i hanma ve nana yar tom a mi yô.” Heidi kpa kaa wener: “Hanma wase yô, nan nger akaa a nan soo u eren ken mcivir u Yehova la shin takerada, nahan ashighe agen ka sea tema kwaghhenen u hen tsombor wase yô, se nenge sha akaa shon sha er se fa er se lu zan hemen yô.” Anmgbian ne vea kwase na shi nenge ér, er i lu ashighe cii tsombor ve u nengen televishen tugh ga yô, ka ve zua a ian i teman ving ôron takerada tugh.

Mbamkombo Mba Tiônnongo

Anmgbian Mike vea kwase na Denise, mba a ônov unyiin. Tsombor ve yange u zua a injar sha u eren kwagh ken mzough nena? Mike kaa ér: “Ashighe agen, yange se wa ishima ser se za mkombo faa, kpa i gba sha mi ga, nahan kpa se mba ngur eren kwagh ken mzough yô, se gba zan mbamkombo sha shighe.” Denise pase wener: “Zum u ônov asev lu vesen a vese la, hanma ve lu a ityom i eren hen ya. Ka wan wase u kwase, Kim, yange yôron shi taren tebul u yan kwagh ye.” Wan ve Michael umbur kwagh ugen u yange ve eren yô. A kaa ér: “Tiônnongo wase yange nyôron mkombo hen ya wase sha iyange i Tomahar tugh. Nahan yange se ese iyou ker tsembelee shi se tar mkônom kpaa.” Shi wan ve Matthew kpa kaa ér: “Yange a lu iyange i mkombo yô, Baba a hide her tsuaa, a va wase se u wan agoyol sha ci u mkombo.” Kwagh ne yange wase ve nena?

Iniôngon Ve Saa Ishe Ga

Mika kaa wener: “Ken inyom i 1987 la, mo vea kwase wam, Denise, se hii u eren tom u pania. Hen shighe la, ônov asev utar lu a vese hen ya. Mbauhar ken a ve hii u eren tom pania er se nahan, man mbagenev mbara di er tom u maan iyaav mbi Betel. Kwagh ugen u a seer nan tsombor wase msaanyol yô, se wase iorov 40 ve tsegha ayol a ve sha ci u Aôndo, ve er batisema. Shi tsombor wase zua a ian i civirigh i za eren tom u maan kwagh sha ajiir kposo kposo, kua ken ityar igen je kpaa.”

Sha kpôô yô, tsombor ka ua eren kwagh ken mzough yô, iniôngon ve la i saa ishe ga. U fatyô u zuan a igbenda igen i u eren kwagh vea mba hen tsombor wou ken mzough kpa? Fa tsô wer, aluer tsombor wou ngu eren kwagh ken mzough yô, ua seer zan hemen ken jijingi.

[Foto u sha peeji 28]

Tsombor ka ua henen igbenda i pasen kwagh imôngo yô, u hemba fan u pasen ior kwagh