Ityesen I Yehova Hemba Ngin A Inja A Ityesen I Taregh
Ityesen I Yehova Hemba Ngin A Inja A Ityesen I Taregh
“M nenge akaa cii hingir mo msaa sha ci u mfe u fan Kristu Yesu Terem la a hembe ica yum yô.”—FIL. 3:8.
1, 2. Kanyi Mbakristu mbagenev ve tsough u erene, man ka sha ci u nyi?
ZUM u orgen u i yer un ér Robert hii makeranta u henen iyev la je, ikyav tese ér ngu a ityough. Shighe u lu anyom anigheni la, môm ken atica a Robert, u lu u kwase yô, za hen ya u Robert za kaa a mbamaren nav ér kwagh u hemban Robert u eren yô, ngu sha won ga. Tica ne yange lu a ishimaverenkeghen ér Robert una lu ortwer. Er fa takerada ken kôleeji yum yô, Robert kuma u nyôron hanma yunivasiti i hemban doon cii ken tar na. Kpa Robert gema tsua u eren tom pania u keke la, kera za yunivasiti i ior kpishi ve nengen ér ka ian i dedoo i vesen i aluer or de i kar nan yô, nana kera zua a i ga la ga.
2 Mbakristu mba lun iyev man mbabeenyol kpishi mba zough a aan a vea za hemen ken tar u ainge ne, di vough er Robert nahan. Mbagen mba keren u yaren tom a aan ne veseghee sha u vea za hemen ga, sha er vea ver ishima sha akaa a ken jijingi yô. (1 Kor. 7:29-31) Kanyi ka i mgbegha Mbakristu er Robert nahan u eren tom u pasen kwagh sha gbashima? Ityôkyaa i vesen yô, Yehova doo ve ishima. Ityôkyaa igen yô, ve fa ér ityesen i Yehova hemba ngin a inja a ityesen i taregh. U mase kaven er uma wou ma a lu, luun er wea fe mimi ga kpa? Aluer se mba henen sha averen a se zough a mi sha ci u Yehova ngu tesen la yô, kwagh ne una wase se, nahan loho u dedoo ua lu se kwagh u vesen, shi se pase mbagenev u sha gbashima kpaa.
Ka Kwagh u Civirigh u Lun Mba Aôndo a Tesen Ve La
3. Er nan se fe ser Yehova keghen iyol u tesen uumace mba ve lu vough ga laa?
3 Shin er uumace ve lu vough ga nahan kpa, Yehova keghen iyol u tesen ve sha ci u erdoo na. I ôr kwaghôron u profeti sha kwagh u Mbakristu mba i shigh ve mkurem mbara ken Yesaia 54:13 ér: “Ônov ou ci ca kpaa vea lu mba TER A tese ve yô; mkpeyol u ônov ou kpaa una vese je.” Se fatyô u kaan ser mkaanem mara ma ôron kwagh u “iyôngo igen” i Kristu la kpaa. (Yoh. 10:16) Kwaghôron u profeti ugen u a lu ivin sha ayange ase ne la, wase se u kaven kwagh ne. Yesaia yange nenge ken mpase u sha mnenge akuraior cii lu zan iuu u za civir Aôndo sha mimi. A pase ér ior mban lu lamen ayol a ve kaan ér: “Va sé kôndo nen sha uwo u TER, sha iyou i Aôndo u Yakob, A̱ tese se igbenda Na, se kpaa sé zende sha igbenda Na” (Yes. 2:1-3) Ka kwagh u civirigh kpishi u lun mba Yehova a tese ve yô!
4. Kanyi kwagh Yehova a soo hen mba a tesen ve laa?
4 Se er nana ve se kuma u Yehova una tese se? Kwagh u vesen u i gbe u se er yô, doo u se lu asema leghlegh, shi se lumun ityesen. Orpasalmi nger wener: “TER ka u doon man u mimi kpaa . . . . Una tese mbaasemaleghlegh gbenda Na.” (Ps. 25:8, 9) Shi Yesu kaa ér: “M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô.” (Luka 10:21) Aluer se fa ser Aôndo “ne mba ve hir ayol a ve ijime la mrumun u sha mhôôn” yô, a wase se u kporom ikyua a na.—1 Pet. 5:5.
5. Kanyi yange i na ve se ar sha mfe u Aôndoo?
5 Ka sha tahav asev shin sha kwaghfan wase se va hingir u fan mimi yee? Ei. Sha kpôô yô, luun er ka se tseegh yô, mayange ma se zough a mfe u Aôndo ga. Yesu kaa ér: “Ma or nana fatyô u gban van her a mo ga, saa Ter u A tindim la, Una urugh nan.” (Yoh. 6:44) Ka sha cighan jijingi man tom u pasen kwagh ne, Yehova a lu urugh ior mba lun er iyôngo nahan, mba ve lu “akaainjaa a [ken] akuraior cii” ne ye. (Hag. 2:7) U wuese er u lu môm ken mbara mba Yehova a urugh ve a ve a ve ikyua a Wan na la ga he?—Ôr Yeremia 9:23, 24.
Ityesen i Aôndo Ngi Ne Uuma Asev Mba Hembe Doon
6. U zuan a “mfe u TER” la ka a bende a uuma mba iorov sha gbenda u vesen nena?
6 Kwaghôron u profeti u Yesaia yar tom a atiakaa a wasen se u nengen a kwagh ne ken ishima ser, hen shighe wase ne ior vea lu geman anza a ve. Ior mba yange ve wa tswam kpa, hegen ve gema ve hingir mba lun a bem. (Ôr Yesaia 11:6-9) Mba ve lu ihyom a mbagenev sha ci u kwavyolough shin tar shin zwa shin ma ieren i ityôô i mbagenev kaha kposo a i ve la, ve hen u lun imôngo vea mbagenev hegen, shi mba eren kwagh a ve ken ijoughave kpaa. Ka inja er ve “gema usanker vev, . . .[ve] var indyuhar a mi” nahan. (Yes. 2:4) Kanyi i ne ve ior ve gem anza ve nahana? Ka sha ci u ve zua a “mfe u TER” shi ve yar tom a mi ken uuma vev. Shin er mba eren Aôndo tom ve yen nahan kpa, ve kohol vea anmgbianev vev sha tar cii mba ken mzough môm u mimi. Isharen i ior ve lu a mi sha loho u dedoo man atam a injaa a loho ne u lu umen sha tar cii la tese ér ityesen i Yehova hemba ngin a inja a ityesen i taregh.—Mat. 11:19.
7, 8. (a) Ka “ayou a utya” a nyi nahan ityesen i Yehova i wasen ior u hembene? (b) Kanyi i tese ér ityesen i Yehova ngi ve un a iwuese?
7 Apostoli Paulu kar tom u pasen kwagh u mbacivir Aôndo ve eren la sha ityav mbi ken jijingi. A nger wener: “Ikyav mbi utyav yasev ka mbi iyolough ga, kpa ka mbi ageev sha ishigh ki Aôndo sha ci u yôhôr ayou a utya, man sha ci u vihin mbamhen kera man shi hanma kwagh u taven u i kende a mi sha, sha u yisan kwaghfan u Aôndo” la. (2 Kor. 10:4, 5) Ka “ayou a utya” a nyi nahan ityesen i Yehova i yôhôr, i pasen ior mba Aôndo i tohoo? Se tese ikyav sha akaa kpuaa tsô: Ikyav mbi ior ve tee sha kwagh u atesen a aiegh man mbamhen mba gbilinigh mba sha akaa mbaimev man mbamhen mba uumace. (Kol. 2:8) Ityesen i Yehova ngi wasen ior u den aeren a bo, geman lun a aeren aa Aôndo a soo la. (1 Kor. 6:9-11) Ityesen ne ngi ne uma u hen tsombor hembe doon. Shi ngi ne mba ve lu a ishimaverenkeghen ga la u fan kwagh u a lu awashima u uma jim jim yô. Ka imba ityesen i kwagh a gbe sha mi nyian je ne.
8 Er uvande-eren mba ve dondo heen ne ve tese nahan, môm ken aeren a Yehova ka a wase ior u lun a mi yô, ka inja i mimi. (Heb. 13:18) Kwase ugen ken tar u India lumun ér i hen Bibilo a na, nahan shighe kar yô, a hingir orpasenkwagh u nan lu a̱ er batisema ga yô. Iyange igen yar tom u maan Iyou i Tartor, nahan kurun tom ngur hiden hen ya na yô, a nenge a shiligh ku haren sha mon gba lu hen inya ikyua a tashan u mato, man shiligh kura kuma inyaregh udola deri anigheni. Shin er gba ican nahan kpa, yange za a shiligh ku shon za na hen tashan u dasenda ér i ker or u i lu ku nan la i na nan. Kwagh u kwase ne er ne kpiligh ordasenda ugen iyol kpishi! Ka tamber yô, ordasenda ugen kende pine un ér: “Kanyi i ne ve u ve a shiligh kun u va ne se?” Kwase ne kaa ér: “Bibilo i m lu henen la i gema mlu wam, nahan m hingir ormimi hegen.” Kwagh ne doo ordasenda ne kpen kpen, nahan a kaa a ortamen u ken Kristu u va vea kwase ne hen tashan u dasenda u va nan shiligh kura la ér: “Ior mba ken kpentar ne hemba umiliôn 38. Nahan aluer u wase iorov pue ve gema ve hingir er kwase ne nahan yô, ú er ka tom u kiriki ga.” Ka sea hen sha uuma mba iorov umiliôn imôngo mba ityesen i Yehova i gem ve la nahan se zua a atôakyaa kpishi a wuese Yehova ga he?
9. Er nan ve ior ve fetyô u geman uuma veve?
9 Tahav mbu geman or mbu Mkaanem ma Aôndo ma lu a mi la man iwasen i Yehova a ne sha icighan jijingi na la, ngi wasen ior u geman uuma vev kpishi je. (Rom. 12:2; Gal. 5:22, 23) Mbakolose 3:10 kaa ér: “Haa [nen] orhe iyol u ka i sôr un hegh sha u una lu a kwaghfan u sha inja i ibeen i Un u A gbe un la.” Loho u ú lu ken Mkaanem ma Aôndo la, ka Bibilo je la, ngu a tahav mbu duen a kwagh u a lu or ken ishima jim jim la, shi ngu gem gbenda u or nan henen kwagh shi nan nengen kwagh la kpaa. (Ôr Mbaheberu 4:12) Aluer or zua a mfe u vough u ken Bibilo shi nan gema uma u nan, nan ngu kuran atindi a perapera a Yehova yô, nana hingir ijende i Aôndo shi nana lu a ishimaverenkeghen i lun uma gbem sha won la.
Yehova We Se Agoyol sha Kwagh u ken Hemen
10. (a) Er nan i lu Yehova tseegh a kom u wan se agoyol sha kwagh u una va er ken hemen laa? (b) Ka mbamgem mba kpilighyol mba nyi ve sôôn van sha tar ciilii?
10 Ka Yehova tswen a kom u nan se iwasen i se wa agoyol sha kwagh u ken hemen ye, sha ci u ka un a fe kwagh u ken hemen ye. Ka un a fe mlu u uumace u ken hemen ye. (Yes. 46:9, 10) Kwaghôron u profeti u Bibilo pase ér “iyange i vesen i TER mgbôghom.” (Sef. 1:14) Mkaanem ma Anzaakaa 11:4 ma ma er kwagh u iyange ne la ma a va kure vough. Ma kaa ér: “Inyaregh ki lu a inja sha iyange i ishima i vihin la ga, kpa perapera yô, ka a yima ken ku.” Sha iyange i Yehova una ôr tar u Satan ijir la, a lu mlu wase vea Aôndo la kwagh a gba sha mi ye. Inyaregh kia gba kwagh ga. Jighilii yô, Esekiel 7:19 kaa ér: “Vea haa azurfa ve sha igbenda i ken gar, man zenaria ve kpaa una hingir er kwagh u hôngorough nahan.” Er se vande lun a mfe sha kwagh ne cii una va mase eren yô, wase se u tsuan akaa a se soo u eren la hegen sha kwaghfan.
11.Ka gbenda ugen u nyi nahan man ityesen i Aôndo i wasen se u wan agoyol sha kwagh u ken hemenee?
11 Gbenda u tseer tseer u ityesen i Aôndo i wasen se u wan agoyol sha mve u iyange i Yehova yô, ka sha u wasen se u tsuan akaa a vesen ken uma sha inja. Apostoli Paulu nger Timoteu wener: “Mba ve lu mbanyarev ken tar u ainge ne yô, wa ve kwagh wer, ve̱ de gengese ayol a ve ga, ve de veren ishima sha inyaregh ki i fe kwagh sha min ken hemen ga la ze, kpa ve̱ ver ishima sha Aôndo.” Aluer se mba mbanyarev ga kpa, kwaghwan u Yehova ne una lu se a iwasen. Kwagh ne wa nyi man nyi kere? Hemba doon u se keren u “eren akaa a dedoo” shi se nôngon u lun “mbanyarev sha aeren a dedoo,” a u se keren ser se ombo uyôughyôughmbaakaav la. Aluer mcivir u Yehova ngu kwagh u hiihii ken uuma asev yô, se wa ‘wa imagh ki dedoo sha ci wase ayol a ase ken hemen.’ (1 Tim. 6:17-19) Imba ieren i tangen iyol ga ne ia tese er se mba a kwaghfan, sha ci u Yesu kaa ér: “Aluer or á zua a tar cii, kpa uma u nan una gema á saa nan yô, á doo nan sha nyi?” (Mat. 16:26, 27) Er iyange i Yehova i nangem yô, doo u hanma wase nana pine iyol i nan ér: ‘Ka han m ombon akaa a injaa ama? M ngu kpan u inyar shin kpan u Aôndoo?’—Mat. 6:19, 20, 24.
12. Aluer ior mba kenger tom wase u pasen kwagh la ashe ashe kpa, se gba uwegh ga sha ci u nyi?
12 Kwagh u vesen ken “aeren a dedoo” u̱ Mkaanem ma Aôndo ma kaa a Mbakristu ér ve er yô, ka tom u waren uma, ú pasen kwagh u Tartor shi geman ior hingir mbahenen la. (Mat. 24:14; 28:19, 20) Nyian kpa ior mbagenev vea tese icivir sha tom wase u pasen kwagh ne ga, er lu sha derianyom u hiihii la nahan. (Ôr 1 Mbakorinte 1:18-21.) Kpa ieren ve ne i tese ér loho wase kera ngu a inja ga ze. Heela tseegh ga, ieren ve la i pande mluainja u ian i í ne hanma or ér nana na jighjigh a loho shon, er shighe a lu her ne ga. (Rom. 10:13, 14) Aluer se wase ior zua a ityesen i Yehova yô, se zua a averen kpishi je.
Yehova Veren Mbatomov Nav Mba Ve Tangen Iyol ga la Doo Doo
13. Apostoli Paulu yange tange iyol na ga sha ci u loho u dedoo nena?
13 Cii man apostoli Paulu hingir Orkristu yô, yange i tsaase un ér a za ikyura ken tar u Mbayuda. Shighe u alaghga Paulu lu a hemba anyom 13 ga la, mough ken gar na u Tarsu u i maren un ker la yem ken Yerusalem sha u Gamaliel, Ortesenatindi u lun a icivir, a za yese un. (Aer. 22:3) Shighe kar yô, Paulu maa hii u duen iti hen atô u mbakwav na, man luun er yange za hemen a kwaghhenen ne yô, alaghga gwa ma za un sha kwagh u Mbayuda kpen kpen. (Gal. 1:13, 14) Zum u Paulu lumun loho u dedoo shi ngohol tom u pasen kwagh yô, a hungur a hanma kwagh cii. Yange vaa afanyô sha kwagh u tsua u eren nee? Ei. A nger jighilii ér: “M nenge akaa cii hingir mo msaa sha ci u mfe u fan Kristu Yesu Terem la a hembe ica yum yô. Ka sha ci Na man m de akaa cii a saam ye, m nenge a hingir mo hôngor.”—Fil. 3:8.
14, 15. Ka averen a nyi nahan se zough a mi sha ci u se mba “mbashirentom a Aôndo [imôngoo]”?
14 Nyian kpa Mbakristu mba eren akaa a tesen ér ve tange iyol sha ci u loho u dedoo ga, er Paulu nahan. (Mar. 10:29, 30) Ka sea er nahan kwagh a saa see? Robert u se vande teren kwagh na sha mhii u ngeren ne la, ngu a mnenge u a lu kwagh môm a mnenge u mbagenev kpishi yô. A kaa ér: “M ngu a afanyô a vaan gbenda môm môm ga. Tom u pasen kwagh u m eren sha hanma shighe ne vam a iember man mkom, shi u nam ian i ‘benden, nengen mdoom ma TER.’ Zum u ka mea de mer akaa a saam ishe sha ci u akaa a ken jijingi a m tsough u eren la yô, Yehova ka a nam akaa i hemba a m de mer a saam ishe la. Ka i lu inja er kwagh môm kpa yange m de mer a saam ishe ga nahan. Ka liba tseegh m zough a mi ye!”—Ps. 34:8; Anz. 10:22.
15 Aluer u pasen shi u tesen ior kwagh shighe kar hegen yô, alaghga we kpa u zough a aan a benden nengen er Yehova a doo yô. Mase zan ashighe nga a yange u pase ior loho u dedoo, nahan u nenge a ikyav i tesen ér jijingi u Yehova ngu a we, ngu wasen we je he? U nengen a msaanyol u ior sha ci u Yehova bugh ve asema sha u ve keghen ato a loho kpa? (Aer. 16:14) I lu nahan Yehova wase u u hemban mbamtaver, sha u bughun we gbenda u seer eren tom vee? Mase zan a sue u sha ashighe a ican, nahan a wase u sha u u za hemen u eren un tom zum u ú hen wer tahav mbu yinan we iyol vee? (Fil. 4:13) Zum u se ayol a ase se zough a iwasen hen Yehova sha u se er tom wase u kwaghpasen yô, ka se seer fan ér ngu kpôô kpôô, shi se seer kporom ikyua a na kpaa. (Yes. 41:10) Aluer u ngu môm ken “mbashirentom a Aôndo imôngo,” man u ngu eren icôron-tom u tesen mbagenev ityesen i Yehova yô, kera ka iveren u zough a mi gaa?—1 Kor. 3:9.
16. Ú nengen uiniôngon ou man er u den wer akaa a saa u ishe sha ci u ityesen i Yehova la nena?
16 Ior kpishi mba we shima ér vea er kwagh u una lu ve a inja gbem sha shighe u ve lu uma la cii. Kpa se nenge yô, akaa a vesen a ior ve eren sha tar ainge ne je kpa, mba ngôôr hungur a mi ga. Nahan kpa, ityom i ior mba Yehova ve lu eren nyian sha ci u tseghan iti na la ia lu kwagh u a̱ tsa nan nan kpa ior mba Yehova vea hungur a mi ga yô. A umbur i gbem sha won. (Anz. 10:7; Heb. 6:10) Yô, se cii se lumun icivir i í ne se u eren tom u tesen ior akaa a Yehova la, gadia tom ne ka u mayange je a hungur a mi ga yô.
Ú Na Mlumun Wer Nyi?
• Kanyi Yehova a soo hen mba a tesen ve laa?
• Ityesen i Yehova ngi ne uuma mba iorov mba hembe doon nena?
• Ka averen a nyi nahan se zough a mi sha iwasen i se wasen mbagenev u zuan a injar i ityesen i Yehova laa?
[Mbampin Mba Ngeren u Henen]
[Foto u sha peeji 23]
Ior Mba Yehova a tesen ve la mba ken mzough u mimi u anmgbianev u tar sha won cii la
[Foto u sha peeji 24]
U lun môm ken “mbashirentom a Aôndo imôngo” la ka iveren ga he?