Ú ‘Wa Amise, shi I Tim U Dông’ Kpa?

Í LU nahan u nenge ahumbe a taver daase a zegekon vee? Ahumbe ka a daase a kon u vesen sha utaha, kpa kon shon u tile her dông. Sha ci u nyi? Ityôkyaa yô, kon la ka u wa amise shin inya gbang gbang. Se fatyô u lun er imba kon la nahan. Shighe u se tagher a ameen taveraa yô, se kpa se tile dông aluer se ‘wa amise, shi i tim se dông’ yô. (Ef. 3:​14-17) Kanyi i tim se sha mini?

Mkaanem ma Aôndo kaa ér: “Kristu Yesu iyol Na ka iwen i sha zongo” i nongo u Kristu. (Ef. 2:20; 1 Kor. 3:11) Í wa se Mbakristu kwagh ér se ‘zenden ken a Na nahan vough, er se we amise ken a Na shi i maa se ken a Na kpaa, man i taver jighjigh wase u nan’ yô. Aluer se er nahan yô, se fatyô u hendan a ameen a karen jighjigh wase u nan cii, kua ameen a “kwaghôron u sha msendegh” u ior ve er sha “atseregh a gbilinigh” la kpaa.​—⁠Kol. 2:​4-8.

“Igbanger man Iniembe man Mtav man Mze”

Nahan kpa, se “wa amishe” shi se “taver jighjigh wase u nan” nena? Gbenda u vesen môm u se wa amishe a za shin inya yô, ka u timen sha Mkaanem ma Aôndo a ne i nger la sha gbashima. Yehova na se agee kwagh môm a “uicighanmbaiorov imôngo cii u kaven er igbanger man iniembe man mtav man mze” u mimi a lu yô. (Ef. 3:18) Nahan yô, Orkristu môm nana de lu a mkav sha atôakaa a hiihii tsô man i kuman nan ga; inja na yô, nana de keren u fan di “atôakaa a hiihii” a ken Mkaanem ma Aôndo la tseegh tsô ga. (Heb. 5:12; 6:⁠1) Kpa i̱ gba hanma wase ishima u seer fan akaa a mimi a Bibilo i er la.​—⁠Anz. 2:​1-5.

Jighilii yô, ka mfe tseegh i gbe u se lu a mi kpishi ve se ‘wa amishe shi a tim se’ ken mimi ga. Gadia Satan je kpa fa kwagh u a lu ken Bibilo yô. Gba u se er kwagh a hemba nahan. Gba u se fa “dooshima u Kristu u a gande u fan la.” (Ef. 3:19) Nahan kpa, aluer se mba timen sha akaaôron a Bibilo sha ci u Yehova doo se ishima shi mimi doo se ishima yô, se seer fan Mkaanem ma Aôndo, nahan jighjigh wase u nan kpa una seer taver.​—⁠Kol. 2:⁠2.

Kar Mfe Wou

Er nan u kar mfe u ú zough a mi sha kwagh u akaa a mimi a hange  hange a a lu ken Bibilo la hegen u nenge ga? Aluer u ngu eren nahan yô, ishima a hemba taver we u henen Bibilo sha tseeneke wou cii. Ikyav i tesen yô, ôr avur a hiihii a washika u apostoli Paulu ngise nger Mbaefese la. (Nenge akwati u a lu a itinekwagh ér “Hen Mbaefese” la.) U ôron u been yô, pine iyol you wer, ‘M kav inja i asember a ken Bibilo a i nger a ken akwati ne a yier a yier ne je he?’ De se time sha asember shon sha adondo adondo.

Aôndo Vande Veren Je “I Lu a Gba Tar Ga”

Paulu nger mbananjighjigh a na imôngo washika kaa ér: ‘Aôndo vande veren se sha u Una lumun se, se̱ lu ônov Nav ken Yesu Kristu’ yô. Sha kpôô yô, Yehova wa ishima ér una lumun uumace mbagenev u lun ken tsombor na u sha u vough la. Mba Aôndo a lumun ve ve lu ônov nav la vea hingir upristi mba vea tema tor a Kristu imôngo yô. (Rom. 8:​19-23; Mpa. 5:​9, 10) Satan tese sha ilyahan i yange hii van a mi sha hemen u Aôndo la ér or u Aôndo gba la lu vough ga. Yehova maa gema er kwagh u vough; a tsua mbagenev ken tsombor u uumace ér ve va bee a iferkwagh sha won cii, kua imbor i ifer, Satan Diabolo kpaa! Nahan kpa, Yehova vande tsuan ior ken uumace veren mba una va lumun ve u lun ônov nav ga. Kpa, Aôndo kange ishima ér kweior shin nongoior ugen ken uumace ve za tema tor a Kristu sha.​—⁠Mpa. 14:​3, 4.

Kwagh u Paulu nger hen anmgbianev nav mba ken Kristu ér, í tsua nongo ve je “i lu a gba tar ga” la, lu “tar” u nyi lu ôronoo? Lu shighe u Aôndo lu a gba tar shin uumace ga  la lu ôron ga. Luun er ka nahan yô, ma lu ijirôron i sha mimi ga. Gadia luun er Aôndo vande veren Adam man Ifa ér ve gba ken kwaghbo shighe u lu a gba ve ga la je nahan, shi ma na ve ibo sha aeren a ve nena? Nahan tsô, gema lu hanma shighe Aôndo kange ishima ér una sôr kwagh u yange er shighe u Adam man Ifa ve ta ikyaa a Satan sha u hendan kwagh a hemen u Aôndo laa? Yehova yange tsua ér una er kwagh ne zum u mbamaren asev mba hiihii mbara hemba un ato la cii ve, ve hii u tseren tsombor u uumace mbaasorabo mba a fatyô u paan ve mban shin tar ye.

“Sha Mlumun Na u sha Mhôôn u Ngeen Yum La”

Er nan ve Paulu kaa ér ka “sha mrumun u sha mhôôn [u Aôndo] u ngeen yum la” kwagh hingir u lun er i pase ken mhii u takerada u Mbaefese la nahana? Yange ôr nahan sha ci u tesen wang er i hingir tindi hen Yehova, u saa una yiman uumace mba asorabo keng ga yô.

Sha mlu wase tseegh yô, mô wase môm kpa nan kuma u a yima nan ga. Nahan kpa, er tsombor u uumace u doo Yehova ishima yum yô, a na Wan na u môm môm la hingir ipaa sha u yiman se. Aluer u nenge er se lu vough ga, se lu mbaasorabo yô, mimi je, ka sha mlumun u sha mhôôn se zough a ipaan ye, er Paulu yange kaa nahan.

Kwaghmyer u Awashima u Aôndo

Sha hiihii la, Aôndo pase gbenda u una sôr kwagh u Satan vihi la ga. Lu “kwaghmyer.” (Ef. 3:​4, 5) Yange mba va veren nongo u Kristu yô, Yehova pase gbenda u una kure awashima na u hiihii sha ci u uumace man tar la wang. Paulu pase wener, er ‘shighe va kuma vough yô,’ Aôndo hii u “sôron akaa cii,” ka u sôron akaa sha gbenda u kohol uumace tar sha won cii hingir nongoior môm je la.

Í hii u kohol ior sha iaven i hiihii ken inyom i 33, sha iyange i Pentekosti, zum u Yehova hii u kohol mba vea za tema tor a Kristu imôngo sha la. (Aer. 1:​13-15; 2:​1-4) Iaven i sha uhar la lu u kohol ior mba vea lu ken paradiso shin tar sha ikyev i Kristu ken Tartor u Mesiya yô. (Mpa. 7:​14-17; 21:​1-5) Ishember i í gem ér u “sôron akaa cii” la ngi ôron kwagh u Tartor u Mesiya ga, gadia hen shighe la i lu a ver Tartor la ga, lu ken inyom i 1914 la i ver u ye. Kpa ishember la ngi ôron kwagh u Aôndo iyol na lu eren sha u kuren awashima na u hiden a uumace sha won cii ken mzough la.

“Sha Mhen yô, Lu Nen Mbavesen”

Akperan nga ga, aluer u ngu henen kwagh sha tseeneke wou sha gbashima yô, u hingir u fan “igbanger man iniembe man mtav man mze” u mimi vindi vindi. Nahan kpa, aluer se wa akaa a eren ave kpishi yô, Satan una zua a ian enger enger i nan se iyolkpen shin vihin gbashima u se lu a mi u henen kwagh sha tseeneke wase la. Yô, de ne un ian wer a er a we nahan ga. Kpa yar tom a “mkav” u Aôndo a ne u la, nahan ‘sha mhen yô, lu orvesen.’ (1 Yoh. 5:20; 1 Kor. 14:20) Nenge wer u fa ityôkyaa i jighjigh wou u nan, shi waan agoyol veren a ver sha er u fatyô u nan ‘imo sha mpin u hanma or u nana pine u ityôkyaa i ishimaverenkeghen i i lu ken a we la’ yô.​—⁠1 Peteru 3:⁠15.

Tôô ase wer yange u lu ken Efese shighe u i ôr washika u Paulu sha kwa u hiihii la. Mkaanem nam man yange ma ma mgbegha ú u lun a isharen i keren “mfe u fan Wan u Aôndo” seer kpa? (Ef. 4:​13, 14) Yange ma sar u keng! Nahan yô, mkaanem ma jijingi mgbegha Paulu nger ne ma mgbegha u u lun a isharen i eren nahan nyian kpaa. Aluer Yehova doo u ishima a ishima you i môm, shi u ngu keren u fan Mkaanem nam yô, u ‘wa amise, shi a tim u dông’ ken Kristu kpaa. Nahan, u fatyô u tilen dông ken hanma imeen i alaghga Satan una va a mi hen a we cii ve mkur u tar u ifer ne una mase van la.​—⁠Ps. 1:​1-3; Yer. 17:​7, 8.

[Ngeren u kiriki/Foto peeji 27 la]

“Hen Mbaefese”

‘I̱ wuese Aôndo, Ter u Ter wase Yesu Kristu u A ver se sha hanma iveren i dedoo i ken jijingi sha ajiir a Sha ken Kristu. A tsuwa se ken a Na je er i lu a gba tar ga yô sha u lun mba i tsegh ve man u lun a acôghor iyol ga kpaa sha ishigh Nagh. Ka sha dooshima je A vande veren se sha u Una lumun se ye, se̱ lu ônov Nav ken Yesu Kristu, sha mwe u A wa ishima la ye, ka sha ci u iwuese i á wuese iengem i mlumun Na u sha mhôôn u A lumun se ken Udoonshima la. Ken a Na yô, se mba a mpaa u sha awambe Na man shi mde u gbev mbu nôngon sha mlumun Na u sha mhôôn u ngeen yum la, u A ne ken vese wuee la ken hanma mfe kua mkav kpaa. A pase se kwaghmyer u awashima Na u A wa ishima ken Kristu sha u sôron akaa cii sha ci u shighe una va kuma vough la yô, Una kohol akaa a a lu Sha man a a lu shin tar kpaa ci ca cii sha ikyev i Kristu.’​—⁠Ef. 1:​3-10.