Er Se Kura Ikyaryan Yase Ken Tar U Dooshima A Ban Ne yô
Er Se Kura Ikyaryan Yase Ken Tar U Dooshima A Ban Ne yô
“Akaa ne M ngu wan ne tindi sha mi, sha er ne̱ doo ayol a en yô.”—YOH. 15:17.
1. Yange gba u Mbakristu mba ken derianyom u hiihii la vea doo ayol a ve sha ci u nyi?
HEN tugh mbu masetyô mbu Yesu shin tar la, a wa mbahenen nav mbajighjigh kwagh ér ve de paven ikyar i ve ye ayol a ve la ga. Yesu vande ôron hen aikighe la wener, mdoo u mbahenen nav vea doo ayol a ve la una tese ér ka ve ve lu mbadondon un ye. (Yoh. 13:35) Yange gba u mbaapostoli vea ya ikyar ayol a ve kangenaa, ve vea kôr cio u wan ishima a atsan a vea tagher a mi ken hemen la shi vea kure tom u ica a gba ga tsô Yesu una na ve la ye. Sha kpôô yô, yange i fa Mbakristu mba ken derianyom u hiihii la sha mdoo u ve doo ayol a ve shi Aôndo kpa doo ve ishima tsung la.
2. (a) Se kange ishima u eren nyi, man ka sha ci u nyi? (b) Ka mbampin mba nyi se time sha mini?
2 Nyian ne, doo se kpishi er se lu ken nongo u ú tser tar jimin cii, u mba ve lu ker ve dondon ikyav i Mbakristu mba ken derianyom u hiihii la nahan. Se kange ishima u kuran tindi u Yesu wa ér se doo ayol a ase sha mimi la. Nahan kpa, ior kpishi ken ayange a masejime ne mba a ieren i mimi ga shi mba a dooshima kpaa ga. (2 Tim. 3:1-3) Akar a ve ye la cii nga ze shimi ga, shi nga a lu sha u keren mbamtsera vev ayol a ve tseegh. Kpa saa se lu a imba ieren la ga keng ve se kura mlu wase u Mbakristu la ye. De se time ase nen sha akaa ne: Kanyi i lu imaagh ki ikyaryan i dedoo? Se ya ikyar i dedoo nena? Ka hanma shighe nahan a gba u se pav ikyar i se ye vea or laa? Man se kura ikyar i dedoo i se ye vea or la nena?
Kanyi i Lu Imaagh ki Ikyaryan i Tsan Gbemee?
3, 4. Kanyi i lu imaagh ki ikyaryan i tsan gbemee, man ka sha ci u nyi?
3 Mba Yehova a doo ve ishima la ka ve hemba yan ikyar i tsan gbem. Tor Solomon nger ér: “Man shi aluer or á hemba u a lu tswen la, kpa mba uhar vea gema á hemba di nan; kor u i zômon u igbar itiar yô, ngu fetyô u tôndon fese ga.” (Orpa. 4:12) Yehova ka una lu gbar u sha utar ken ikyar i ior ve ye la yô, ikyar ve la i tsa gbem.
4 Ior mba Yehova a doo ve ishima ga kpa vea fatyô u yan ikyar ayol a ve kangenaa. Nahan kpa, ior ka vea ya ikyar ayol a ve sha ci u Aôndo doo ve ishima yô, ikyaryan la ngi tenger mayange ga. Shighe u ayôôso a dugh yô, mba ve ye ikyar sha mimi la vea er kwagh u una doo Yehova ishima yô. Mbahendankwagh a Aôndo ka vea soo u van a mbampav hen atô wase yô, mbaihyomov mban ve mase kaven er dooshima u Mbakristu a taver dông yô. Ken mlu u mbacivir Yehova cii, ka ve hemba soon u kpen a u pasen aker a anmgbianev vev.—Ôr 1 Yohane 3:16.
5. Hii nan ve ikyaryan i Rutu vea Naomi la lu i tsan gbemee?
5 Ior mba se ya ikyar a ve ve a saan se iyol yô, ka mba Yehova a doo ve ishima la. Nenge ase kwagh u Rutu man Naomi la. Ikyar i dedoo i kasev mban ya la ka môm ken akar a dedoo a i nger kwagh u a ken Bibilo yô. Lu nyi i na ve ikyar ve la lu i tsan gbemee? Rutu pase ityôkyaa zum u a ôr mkaanem man a Naomi la, ér: “Ior ou ka ior av; Aôndo wou kpaa ka Aôndo wam; . . . TER A̱ er a mo nahan, i̱ hemba nahan kpaa, ka ku tseegh ua pavem a we ye.” (Rutu 1:16, 17) Aôndo yange doo Rutu man Naomi ishima je zua ga, man lu dooshima ne bende a gbenda u ve eren kwagh ayol a ve la ye. Kwagh ne na yô, Yehova ver kasev mban cii doo doo.
Er Se Zua a Akar a Dedoo Yô
6-8. (a) Ka i er nan ve ior ve hingir u yan ikyar i tsan gbemee? (b) U ker u yan ikyar a mbagenev nena?
6 Kwagh u Rutu man Naomi la tese ér mba gbe zuan a akar a dedoo tsô ga. Lu mdoo u Yehova doo ve ishima la lu imaagh ki ikyaryan ve la ye. Kpa ka i gba u se nôngo kwagh kpoghuloo shi se tangen iyol ga ve ikyaryan yase ia tsa gbem ye. Anmgbianev mba hen tsombor môm mba ve civir Yehova je kpa gba u vea nôngo kwagh kpoghuloo ve vea ya ikyar kangenaa ye. Nahan yô, u zua a akar a dedoo nena?
7 Ker u yan ikyar a mbagenev. Apostoli Paulu yange taver akar a na a ken tiônnongo u ken Roma la asema ér ve “eren . . . a mbavannya dedoo.” (Rom. 12:13) U eren a mbavannya dedoo la wa u eren akaa a kiriki sha ci u ior hanma shighe ker. Kwagh ne ngu kwagh môm a u zan sha gbenda, man ka i gba u a tôôn angahar kure kure. Or môm kpa nana lu a ieren i eren a mbavannya dedoo la sha ci wou ga. (Ôr Anzaakaa 3:27.) Gbenda môm u eren a mbavannya dedoo yô, ka u lôhôn ior kposo kposo mba ken tiônnongo wer ve va ya iwer hen ya wou. A fatyô u hingir ikye you u eren a mba ken tiônnongo wou dedoo kpa?
8 Gbenda ugen u ú fatyô u keren wer u ya ikyar a mbagenev yô, ka u lôhôn anmgbianev kposo kposo wer ve due kwaghpasen a we imôngo. Ka wea due kwaghpasen vea or, man nea za hen ya u or ve wea ungwa or u ne dugh kwaghpasen imôngo la nana pasen er Yehova a doo nan ishima sha mimi nahan, kwagh u nan a hemba doon we cii.
9, 10. Paulu yange ver se ikyav i nyi, man se dondo ikyav na la nena?
9 De sangen a sange ior mba u tese ve dooshima ga. (Ôr 2 Mbakorinte 6:12, 13.) I lu nahan u nenge wer or môm môm nan ngu ken tiônnongo u ú fatyô u yan ikyar a nan ga vee? Aluer kwagh ngu nahan yô, alaghga tsô u ngu sangen a sange ior mba u nenge wer doo ú u ya ikyar a ve yô shinii? Apostoli Paulu ver se ikyav i dedoo sha u tesen mbagenev dooshima. Afaerenga yange una hen ér, a tsa kpa una ya ikyar vea mba ve lu Mbayuda ga mbara ga. Nahan kpa va hingir u lun “apostoli u atôatyev.”—Rom. 11:13.
10 Kwagh ugen yô, Paulu yange ya ikyar vea mba ve lu kov na la tseegh ga. U tesen ikyav yô, un vea Timoteu yange ve ya ikyar kangenaa, shin er anyom a ve lu kwagh môm ga shi ve due ijiir i môm ga nahan kpaa. Nyian ne, ka i doo agumaior kpishi u yan ikyar vea mba ken tiônnongo mba ve hembe tsan a ve la. Anmgbian u kwase ugen u a lu anyom ikyundu kar yô, mba yer un ér Vanessa, a kaa ér: “Ikyarem ugen ngu anyom akunduahargber kar. Me fatyô u ôron un hanma kwagh u me ôr azende am a se lu kov môm la cii. Man kwagh wam doo un ishima kpishi.” Ka i er nan ve or hingir u yan imba ikyar laa? Vanessa kaa ér: “Yange m nôngo kwagh tsung ve m ya ikyar ne ye, m gba teman a tema tsô ga.” Sar ú u yan ikyar a ior mba ve lu kov wou tseegh ga kpa? Aluer sar ú yô, Yehova una ver iniôngon you la kpee.
11. Kwagh u Yonatan man Davidi la tese se nyi?
11 Lu a ieren i mimi. Solomon nger ér: “Huror yô, lu a dooshima gbem, man shi i mar anmgbian sha ci u ayange a ican.” (Anz. 17:17) Alaghga Solomon lu a ikyar i ter na Davidi ya vea Yonatan la ken ishima shighe u lu ngeren mkaanem man la. (1 Sam. 18:1) Tor Saulu yange soo ér wan na Yonatan a tema tor sha Iserael. Kpa Yonatan lumun a mtsough u Yehova tsua Davidi ér a lu tor la. Nahan ishima vihi Yonatan a Davidi er Saulu nahan ga. Shi ishima yange i vihi un sha ci u icivir i i lu nan Davidi la ga, shi angereke a Saulu lu samber a mi sha iyol i Davidi la kpa, orti lumun a mi ga. (1 Sam. 20:24-34) Se mba er Yonatan nahan kpa? Ka a na ahuraior a ase ityom ken tiônnongo nahan i doo se kpa? Shighe u ve lu yan ican yô, se mba surun ve asema shi se mba ne ve iwasen kpa? Aluer se ungwa angereke a vihin sha iyol i ma ikyar yase nahan ka se sase lumun a minii? Shin ka se paa ikyar yase la ityough sha mimi er Yonatan nahana?
Shighe u i Gbe u Se Pav Ikyaryan Yô
12-14. Ka mtaver u nyi mbahenen Bibilo mbagenev ka ve tagher a mini, man se wase ve nena?
12 Or u henen Bibilo ka nana nguren geman uma u nan yô, nan tagher a mbamtaver kpishi sha kwagh u akar a nan. Alaghga nan ngu a akar a ka i doo nan u lun vea ve yô, kpa mba kor atindiakaa a Bibilo ga. Adooga yange nan maan ahumbe vea akar a nan ne hanma shighe. Kpa hegen yô, nan nenge ér akaa a akar a nan a eren la aa vihi mlu u nan u dedoo la, nahan gba u nana kera luun a ve imôngo hanma shighe ga. (1 Kor. 15:33) Nahan je kpa, afaerenga nana nenge ér aluer nan kera ngu lun a ve imôngo ga yô, nan ngu eren kwagh a ve sha mimi ga.
13 Aluer u ngu henen Bibilo man u tagher a imba kwagh ne yô, umbur wer, a doo a doo ikyar ú u mimi er u lu nôngon wer u sôr uma wou nahan. Nahan nan kpa a saa nan u kohol we henen kwagh u Yehova. Kpa azende aa a lu a mimi ga yô, ‘aa gbaa lamen sha a we dang tsô,’ sha ci u ú kera “nyer nongo a ve ken ijimba i eren i ganden ikyaa inya la, ga yô.” (1 Pet. 4:3, 4) Kpa jighilii yô, ka we u lu eren kwagh a ve sha mimi ga ze, kpa ka ve ve lu eren kwagh a we sha mimi ga ye.
14 Zum u akar a or u nan lu henen Bibilo, a Aôndo a doo a ishima ga la a undu nan yô, mba ken tiônnongo vea fatyô u yan ikyar a nan sha er a kera huan nan ga yô. (Gal. 6:10) U fa ior mba ve lu henen Bibilo, shi ve ze mkombo la kpa? U lun a ve imôngo ashighe agen kpa?
15, 16. (a) Aluer ma ikyar yase de u civir Yehova yô se er nena? (b) Se tese ser Aôndo doo se ishima nena?
15 Kpa aluer ma ikyar wase u ken tiônnongo nan gema ijime a Yehova, nahan gba u a dugh nan ken mimi kera di ye? Imba kwagh ne ka i vihi se kpen kpen. Anmgbian u kwase ugen ôr er yange lu un ken ishima shighe u ikyar na u ishima ishima ugen de u civir Yehova yô, ér: “Yange m zungwe kpishi. M hen mer ijende yam ne taver ken mimi, kpa ka nahan ga. Ka i lum er yange lu civir Yehova tsô ér i doo tsombor na nahan. Kwagh ne na yô, m hide m gba gbidyen kwar sha ityôkyaa i i ne ve m civir Yehova la. M ngu civir Yehova sha ityôkyaa i vough je kpa?” Anmgbian u kwase ne yange er nena? A kaa ér: “Yange m haa mbamzeyol av cii sha Yehova. Nahan m kange ishima u tesen Yehova mer a doom ishima ka sha ci u a nam akar a dedoo ken nongo na tseegh tsô ga.”
16 Aluer se ta ikyaa a mba ve tsough u yan ikyar a tar ne yô, se kera lu akar a Aôndo ga. Orhenen Yakobu nger ér: “Ne fa er u yan ikyar a tar i lu u lun ihyom a Aôndo gaa? Nahan yô, or u i sar nan ka lun ikyar a tar yô, nan hingir orihyom u Aôndo je ve.” (Yak. 4:4) Aluer se mba eren kwagh a Aôndo sha mimi yô, se tese ser A doo se ishima sha u lun a vangertiôr ser Una wase se u wan ishima a shighe u ikyar yase i undu Un la kpaa. (Ôr Pasalmi 18:25.) Anmgbian u kwase u se vande ôron kwagh na la kure ikyaa ér: “M mase kaven mer, se fatyô u kighir or ser nana soo Yehova shin nana soo se ga. Gadia ka kwagh u or nana tsua iyol i nan yô.” Kpa kanyi se er ve se ya ikyar i dedoo a mba ve lu ken tiônnongo a vese her laa?
Er Se Kura Ikyaryan Yase Yô
17. Akar a dedoo nga lamen ayol a ve nena?
17 Kwaghôron u dedoo ngu a wase se u kuran ikyar i se ye vea mbagenev la. Er ú lu ôron Bibilo sha kwagh u Rutu vea Naomi man Davidi vea Yonatan kua Paulu vea Timoteu nahan, ú nenge er akar a dedoo a lamen ayol a ve gbar gbar man sha icivir yô. Sha kwagh u gbenda u i doo u se lamen a mbagenev la yô, Paulu kaa ér: “Kwaghôron wen a̱ luun u doon gbem, u i we bar sha mi yô.” Lu “mba ve lu ken won la” jighilii Paulu lu ôron kwagh u gbenda u i doo u se lamen a ve la ye, ka mba ve lu anmgbianev asev ken Kristu ga je la. (Kol. 4:5, 6) Jighilii yô, aluer gba u se naan mbananjighjighga icivir shighe u se lu lamen a ve yô, doo u se hemba nan akar a ase a ken tiônnongo icivir shighe u se lu lamen a ve la cii.
18, 19. Doo u se nenge kwaghwan u ma ikyar yase i ken Kristu nan we se la nena, man ka ikyav i nyi mbatamen mba ken Efese ve ver se?
18 Akar a dedoo nga we mhen u azende a ve sha ada, nahan ka ve lamen ayol a ve gbar gbar man sha icivir kpaa. Tor u fan kwagh Solomon nger ér: “Mkurem ma shighen kua kwaghhumandoon mba ne ishima i saan saan, kape mdoom ma ikyar u or ma ma dugh ken mhen u gbar gbar ma lu la.” (Anz. 27:9) Kape u nengen kwaghwan u ma huror wou nan ne u laa? (Ôr Pasalmi 141:5.) Huror wou ka nana ôr u er ieren you i ze nan iyol nahan u er nena? Ka u nenge mkaanem ma nan mara wer ka erdoo shin ka i hingir we iyongoo?
19 Apostoli Paulu yange ya ikyar i dedoo vea mbatamen mba ken tiônnongo u ken Efese. Adooga yange fa mbagenev ken ve shighe u ve hingir Mbakristu ica lu a gba ga la. Nahan kpa, shighe u mase zuan vea ve la, yange wa ve kwagh gbar gbar. Nahan ve nenge kwaghwan na la nena? Ishima yange i vihi akar a Paulu ne ker a na ga. Kpa ve gema ve wuese a wuese er kwagh ve a gbe Paulu ishima yô, shi er lu kwagh u vea kera nenge a na ga yô, ve vaa tsung.—Aer. 20:17, 29, 30, 36-38.
20. Ikyar i dedoo ia er nyi?
20 Akar a dedoo nga ngohol a ngohol kwaghwan tseegh ga, a kpa nga we akar a ve kwagh. Nahan kpa, doo u se fa shighe u i doo u se ‘lu sha kwagh wase ayol a ase’ yô. (1 Tes. 4:11) Shi doo u se umbur ser, “Hanmô wase nana va ôr [Aôndo] kwagh u nan iyol i nan je.” (Rom. 14:12) Nahan kpa, ka a gba hange hange yô, ikyar i dedoo i umbur ikyar i nan kwagh u atindiakaa a Yehova a er yô. (1 Kor. 7:39) U tesen ikyav yô, aluer u fa ma ikyar ú u nan lu kwav nan ngu soon or u nan ne jighjigh ga kpishi nahan u er nena? U cia u vihin ikyar u la ishima, nahan u ungwa atoo? Aluer u wa ikyar u la kwagh, kpa nan venda nahan u er nena? Ikyar u dedoo una pine mbakuran mba lun a dooshima ér ve wase ikyar u nan u á lu nôngon gbeev la. Kpa gba u ú taver ishima ve u er kwagh nahan ye. Nahan kpa, aluer Yehova doo mba ve ye ikyar ayol a ve la ishima yô, kwagh môm una vihi ikyaryan ve la ga.
21. Se cii se mba eren nyi ashighe agene, kpa hii nan i lu hange hange u yan ikyar kangenaa a mba ken tiônnongoo?
21 Ôr Mbakolose 3:13, 14. Ashighe agen “kwagh [ka] á nzughul” ikyar wase a vese, shi ve kpa ve er shin ve ôr kwagh u vihin se. Yakobu nger ér: “Se cii se mba nenge gbev sha akaa kpishi.” (Yak. 3:2) Nahan kpa, mba fe ikyaryan i dedoo sha m-de u mba ve ye ikyar ayol a ve la ve den ayol a ve kwaghbo vindi vindi la, ka ikwa i ve vihi ayol a ve ishima la ga. Ka hange hange u yan ikyar i dedoo sha u lamen gbar gbar shi den ayol a ase kwaghbo kpaa. Aluer se mba a imba dooshima la yô, una hingir “kwagh u maghen mlu u vough.”
Ú Na Mlumun Wer Nyi?
• Kanyi ia wase se u yan ikyar i dedoo?
• Ka hanma shighe nahan a gba u se pav ikyar i se ye vea or laa?
• Gba u se er nyi ve se kura ikyaryan yase?
[Mbampin Mba Ngeren u Henen]
[Foto u sha peeji 18]
Lu nyi i lu imaagh ki ikyar i Rutu ya vea Naomi laa?
[Foto u sha peeji 19]
U eren a mbavannya dedoo hanma shighe kpa?