Mbampin mba Mbaôron Takerada Ne Ve Pin La

Anzaakaa 24:27 tese se nyi?

Orngeren anzaakaa la wa gumor ugen kwagh ér: “Sôr tom wou ken won, sôr akaa ken sule wou wanger wanger, ken masetyô yô, maa ya wou.” Injakwagh i jijingi yange mgbegha orngeren Anzaakaa nger ne tese se nyi? I tese ér or nana vande wan iyol tsembelee cii ve nana mase vôson kwase veren tsombor ye. Aluer nan er nahan yô, nan tese ér nan fa er nan lu a ityom i eren ken ivese yô.

Ken ashighe a karen la, i pase inja i ivur ne ér, nom shin ter nana veren ishima sha u eren tom u nana zua a inyaregh ki koson tsombor u nan tseegh ga, kpa nana maan shin nana taver tsombor u nan ishima, er u tesen ú kwagh u Aôndo man Bibilo nahan. Er mpase ne a lu vough shi a har sha Bibilo nahan kpa, á pase semakwagh u ivur ne i lu ôron la jighilii ga. Sha ci u nyi? Nenge ase sha atôakyaa a ahar ne.

Hiihii yô, ivur ne ngi ôron kwagh u maan shin taver tsombor u or vande lun a mi la ishima ga. Nahan kpa, kwagh u ivur ne i lu ôron jighilii yô ka u maan Iyoukura kpôô kpôô. A fatyô u yaren tom a ishember i “maa” la sha injakwagh kpaa, inja er u tseren tsombor nahan; inja na yô, ka u vôson kwase veren tse je la.

Ityôkyaa i sha uhar yô, ivur ne tese u eren kwagh sha alô sha alô la tseer tseer, vough er u kaan ér, “Er kwagh ne hiihii, man u er ngula ye,” nahan. Nahan yô, ivur ne ngi tesen ér se̱ hemba veren ishima u eren tom u van a ime-mnger a u eren tom u Aôndo a ne se laa? Mayange ga!

Sha ashighe a tsuaa la, or a soo u “maan ya” [u nan], shin tseren tsombor sha u vôson kwase yô, i gba u nana pine iyol i nan ér, ‘Me fatyô u nengen sha kwase u me vôso la kua ônov mba alaghga se va mar la kpa?’ Cii man or a tser tsombor yô, nan vande lun a tom u eren, er u nengen sha sule shin iyiav mbi nan nahan. Nahan yô, mgem u Bibilo u i yer ér Today’s English Version la gema ivur ne jighilii nahan ér: “De maan ya wou shi tseren tsombor ga zan zan iyiav you mbia via, shi u fatyô u zuan a kwagh u kuren ugbayol ou ve.” Kwaghwan ne ngu a inja nyian kpa?

Een. Or u nan soo u vôson kwase yô, ka i gba u nana wa iyol tsembelee. Aluer nan ngu a gbong gbong iyol yô, a gba u nana eren tom. Nahan kpa, tom u or eren taveraa la saa sha u koson tsombor u nan sha iyol tseegh ga. Mkaanem ma Aôndo tese ér, aluer or nenge sha mbamgbe mba tsombor u nan mba sha iyol man mba ken ishima man mba ken jijingi ga yô, nan hemba gban kera a or u nan ne jighjigh ga yô! (1 Tim. 5:⁠8) Nahan aluer gumor ngu wan iyol i vôson kwase tseren tsombor yô, nana pine iyol i nan mbampin mba ve dondo shin heen ne: ‘M ngu a inyaregh ki me fatyô u nengen sha mbamgbe mba tsombor mba sha iyol kpa? M kuma u hemen tsombor sha akaa a ken jijingi kpa? Me fatyô u kuren tom u hange hange u henen Bibilo vea kwase wam man mbayev av hanma shighe la kpa?’ Mkaanem ma Aôndo tese ér ityom ne ngi hange hange.​—⁠Dut. 6:​6-8; Ef. 6:⁠4.

Nahan, gumor u nan soo u vôson kwase yô nana̱ hen sha kwaghwan u a lu ken Anzaakaa 24:27 la. Kape gumkwase kpa i doo u nana pine iyol i nan, aluer ka u nana fatyô u eren ityom i kwaseya shin ngô je la. Aluer gumor man gumkwase vôso ayol a ve, shi ve soo u maren ônov kpa doo u vea pine ayol a ve mbampin mban. (Luka 14:28) Aluer ior mba Aôndo dondo kwaghwan u injaa ne yô, vea fatyô u palegh mbamzeyol kpishi shi a saan ve iyol ken ivese ve kpaa.

[Mkaanem ma sha peeji 12]

Ka mbampin mba sha kwagh u ivesegh mba nyi i doo u gumor nana pine iyol i nana?