Anmgbianev Ve Za Hemen U Doon Ne Ishima

“Zenden nen ken dooshima, er Kristu kpaa se doo Un ishima . . . nahan.”—EF. 5:2.

1. Ka ieren i injaa i nyi Yesu kaa ér a fa mbadondon un a mini?

 Í FA Mbashiada mba Yehova sha loho u dedoo u Tartor u Aôndo u ve pasen sha uya uya la. Nahan kpa, Yesu Kristu gema ver ikyav igen i a fa jighjigh u nan u mba ve dondon un sha mimi la a mi yô. A kaa ér: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”​—⁠Yoh. 13:​34, 35.

2, 3. Mdoo u se doo a anmgbianev asev la ngu a bende a ior mba van mbamkombo mba Mbakristu nena?

² Mzough môm ken tar ne u ior ve doo ayol a ve ker er anmgbianev mba mimi ve doo ayol a ve ken Kristu nahan ngu sha won ga. Er mageneti ka a urugh iyôgh ki gen nahan, kape dooshima ngu a urugh mbacivir Yehova a zua ve ijiir i môm shi a urugh mbaasemaamimi a va a ve ken mcivir u mimi je la. Ikyav i tesen yô, orgen ken tar u Cameroon, mba yer iti na ér Marcelino, yange er aikyôr pir ashe shighe u lu eren tom yô. Aikyôr ne eren un kera yô, agwa samber ér yange lu ormbatsav, ka nahan a hingir orapirashe ye. Pasetô na kua mba yange zaan adua ken côôci i môm a ve cii kera na un msurshima ga, ve nyiishi ve zenda un ken côôci ve kera. Nahan zum u Orshiada u Yehova ugen lôhô Marcelino mkombo yô, taver un u zan. Yange soo ér kwagh u i vande eren a na ken côôci la shi a kimbir ga.

³ Yange Marcelino ze mkombo yô, kpiligh un iyol u nengen kwagh u za hemen hen Iyou i Tartor la. Hanma or ken tiônnongo sugh un sar sar, shi a zua a ishimasurun ken atesen a Bibilo a yange ungwa la. Maa hii u zan mbamkombo mba tiônnongo cii, shi za hemen u henen Bibilo, nahan i er un batisema ken inyom i 2006. Hegen Marcelino ngu pasen tsombor na kua mbawanndor a na mimi, shi a hii u henen Bibilo a iorov imôngo kpaa. Marcelino soo ér ior mba un lu henen Bibilo a ve cii ve nenge a dooshima u nongoior u Aôndo tese un la.

4. Er nan i doo u se ungwa kwaghwan u Paulu u a kaa ér “zenden nen ken dooshima” laa?

⁴ Mdoo u se doo a anmgbianev asev la ka kwagh u doon tsung, nahan gba u se cii se nôngo ser dooshima la a za hemen. Hen ase sha kwagh u usu u ka i keer u, u yeghen bugh bugh shighe u wuhe u ker kpishi, ve ior ve va sôsom her sha u samben wuhe la. Saa mba ôson usu mbara vea waan ikyon ker ve ua za hemen u yeghen ye, gayô ua pir. Kape ken tiônnongo kpaa, icur i kpilighyol i i kange se ken dooshima la ia sagh je la, aluer se Mbakristu asange asange se mba eren tom kpoghuloo u nyôôso icur shon ga yô. Se er kwagh ne nena? Apostoli Paulu na mlumun ér: “Zenden nen ken dooshima, er Kristu kpaa se doo Un ishima man A na iyol Na sha ci wase nahan, lu nagh ku nanden man nagh ku sôngon nan Aôndo sha ci u ihuma i doon.” (Ef. 5:⁠2) Mpin u i doo u se time sha mi yô, ér: ka sha igbenda i nyi nahan me fatyô u zenden ken dooshima?

“Ne Kpaa, Bugh Nen Ishima”

5, 6. Er nan ve Paulu taver Mbakristu mba ken Korinte ishima ér ve ‘bugh ishima’?

⁵ Apostoli Paulu yange nger Mbakristu mba ken Korinte mba sha ayange a tsuaa mbara ér: “Ne Mbakorinte, se ôr ne vanger wase cii, ishima yase bugh gbangelaa. Ka ken vese i imbishi ne ga, ka ken asema a en i imbishi ne ye. Ne di kpaa, gema er nen kwagh​—⁠m ngu ôron kwagh er ka i ôr a mbayev nahan​—⁠ne kpaa, bugh nen ishima.” (2 Kor. 6:​11-13) Er nan ve Paulu taver  Mbakorinte ishima ér ve bugh ishima ken mdoo u ve doo ayol a ve laa?

⁶ Time sha gbenda u yange i ver tiônnongo ken gar u Korinte u tsuaa tsuaa la. Lu ken mbee u inyom i 50 la Paulu za ken gar u Korinte ye. Zum u a hii u pasen kwagh ken Korinte la ior mbagenev hendan a na, nahan kpa apostoli ne de u pasen kwagh ga. Shighe kar kpuaa yô, ior kpishi ken gar la na jighjigh a loho u dedoo. Nahan Paulu tsa ken gar la “inyom i môm man iwer ateratar,” lu tesen tiônnongo u he la shi nyôôso un. Kwagh ne tese wang je ér Mbakristu mba ken Korinte yange ve doo un ishima kpishi. (Aer. 18:​5, 6, 9-11) Yange ve kpa ve lu a ityôkyaa i soon Paulu shi nan un icivir kpaa. Nahan kpa, mbagenev ken tiônnongo la pav a na. Alaghga asande a ior agen soo kwagh u yange a wa or kwagh sha mimi jighilii la ga. (1 Kor. 5:​1-5; 6:​1-10) Alaghga mbagenev keghen ato a iliam i dang i “uihembanmbaapostoli” la. (2 Kor. 11:​5, 6) Paulu yange soo ér anmgbianev nav mba nomso man mba kasev cii ve doo a na. Nahan a wa ve kwagh ér er ve lu mba nan jighjigh yô, ve ‘bugh ishima’ sha u van ikyua a na kua mbagenev kpaa.

7. Se ‘bugh ishima’ sha u doon ayol a ase nena?

⁷ Se di ye? Se anmgbianev se ‘bugh ishima’ sha u doon ayol a ase nena? Alaghga ior mbagenev mba ve lu kov môm shin aeren a ityôô a ve a lu inja i môm yô a taver ve u doon ayol a ve ga. Shi ior mba isharen i iemberyolough ve i lu inja i môm kpaa ashighe kpishi ka ve lu imôngo. Kpa aluer asaren a se Mbakristu mbagenev nga paven se a mbagenev yô, a gba u se ‘bugh ishima.’ Doo u se pine ayol a ase ser: ‘Dugh anmgbianev mba m hembe varen a ve la sha yô, kwagh zuan mo a mbagenev shin m dugh kwaghpasen vea anmgbianev mba nomso man mba kasev mbagenev je kpa? M fe lamen a anmgbianev mbahev hen Iyou i Tartor ga sha ci u m tôô mer saa vea tsa ayange aa kar ve me mase yan ikyar a ve yee? M sughun mbaganden kua mbayev mba kiriki ken tiônnongo kpa?’

8, 9. Kwaghwan u Paulu u i nger ken Mbaromanu 15:7 la una wase se u sughun ayol a ase sha gbenda u se seer doon a anmgbianev nena?

⁸ Sha kwagh u sughun ayol a ase la yô, mkaanem ma Paulu ôr a Mbaroma la ma a wase se u lun a mnenge u vough sha mbacivir Aôndo a vese imôngo. (Ôr Mbaromanu 15:⁠7.) Ishember i ken zwa Grika i í gem ér “lumun” la inja na ér “u ngohol or sar sar shin eren a nan doo doo shi lumun a aeren a ityôô a nan shi yan ikyar a nan.” Sha ashighe a tsuaa la yange or u wan ikyo sha mbavannya nana nyôr a azende a nan hen ya u nan yô, nan tese mbavannya mbara ér ve nenge er i saan nan iyol u nengen a ve yô. Se kpa Kristu ngohol se sha imba gbenda la nahan ken tiônnongo na, nahan i wa se kwagh ér se dondo un sha u ngohol mba ve civir Aôndo a vese imôngo la ken tiônnongo.

⁹ Shighe u se sughun anmgbianev asev hen Iyou i Tartor man sha ajiir agen yô, se fatyô u lamen a mba se nenge a ve ga shighe a kar la shin mba se lam a ve ga shighe a kar yô. Er nena u tee miniti kpuaa u lam a ve ga? A kôron mkombo ugen yô, se za hemen u eren nahan a mbagenev. Aluer se mba eren nahan yô, a kera tôôn se shighe kpishi u lamen iliam i injaa a anmgbianev asev mba nomso man mba kasev  mba ken tiônnongo cii tseren ga. Aluer se fatyô u lamen a hanma or cii hen shighe môm ga kpa, i de ze u iyol ga. A fatyô u sughun orgen ken hanma mkombo ga kpa, i de vihin nan ga.

10. Hanma or ken tiônnongo nan ngu a ian gbangelaa i eren nyi, man kwagh ne una va se a mtsera nena?

¹⁰ U sughun ior la ka vegher u hiihii u ngohol ve. Ishughun ka i na ne lam sha akaa a injaa shi ne kôr ijende i gbekeke kpaa. Ikyav i tesen yô, shighe u mba ve ze mbamkohol mba vesen man mba kiriki la ka vea pase ayol a ve hen mbagenev shi vea hii iliam a ve yô, i sar ve u shi nengen a ve kwa ugen kpaa. Mba ve eren tom u maan Ayou a Tartor man mba ve wasen shighe u aahe a er mbagenev la, ka ve hingir azende a injaa sha ci u ka ve fa ayol a ve sha aeren a dedoo ken akaa a ve eren imôngo la. Aan a zuan a ior kôron ijende i gbekeke a ve de ishar ken nongo u Yehova. Aluer se mba tesen ior kposo kposo dooshima wase yô, ior kpishi vea hingir azende a ase, nahan dooshima u a zough se ken mcieaôndo u mimi la una seer taver.

Nôngo Ior Ve Zaan Ikyua a We

11. Marku 10:​13-16 tese ikyav i nyi i Yesu a vere?

¹¹ Mbakristu cii vea fatyô u nôngon ér ior ve zaan ikyua a ve, er Yesu eren nahan. Nenge kwagh u Yesu er zum u mbahenen nav lu yangen mbamaren mbagenev ér ve de ve a mbayev vev hen a na ga la. A kaa a ve ér: “De nen mbayev mba kiriki, ve̱ va her a Mo; de kera yangen nen ve ga, gadia ka anza a mban ne je tartor u lu u ve ye.” Tsô “A kuve ve, shi A penda ve ave sha ityou kpaa, A ver ve doo doo.” (Mar. 10:​13-16) Nenge er yange a kpiligh mbayev mba kiriki mbara iyol er Ortesen u Hemban nahan a soo kwagh ve sha wono!

12. Kanyi ia fatyô u yangen se u lamen a mbageneve?

¹² Hanma Orkristu nana pine iyol i nan ér, ‘M soon mer mbagenev ve va ikyua a mo kpa, shin hanma shighe ior ka ve nenge m wa ityough inya m eren kwagh wama?’ Aeren agen aa lu a bo ga, kpa ashighe agen aa fatyô u yangen ior u lamen a mbagenev. U tesen ikyav yô, aluer hanma shighe se mba eren a hanseeti sha ave shin se wa mbaanar ken ato se ungwan akaa a i kor ken hanseeti shighe u se lu vea mbagenev yô, á lu tesen ér se soo u lun ikyua a ve ga. Shi aluer hanma shighe ior ka ve nenge se wa ityou u kenger shin kômputa u cuku u kôron sha uwe yô, vea kure ikyaa ér se soo u lamen a ve ga. “Shighe u huan ving ngu” ka mimi. Kpa shighe u se lu vea ior yô, ka hembe lun “shighe u lamen.” (Orpa. 3:⁠7) Alaghga mbagenev vea kaa ér, “M soo u lun kwagh wam” shin “kam pe lamen pepe ga.” Nahan kpa, ka sea lamen a ior sar sar zum u i taver se u eren nahan je kpaa yô, se lu tesen ve dooshima u “keren kwagh na iyol na tsô ga” la.​—⁠1 Kor. 13:⁠5.

13. Paulu yange wa Timoteu kwagh ér a nengen anmgbianev mba nomso man mba kasev mba ken Kristu nena?

¹³ Paulu yange wa Timoteu u lu gumor la kwagh ér a na hanma or ken tiônnongo icivir. (Ôr 1 Timoteu 5:​1, 2.) Doo u se kpa se eren a mbaganden mba ken Kristu er ka ungôôv asev man uter asev nahan; mbayev mba kiriki kpa se eren a ve er ka ônov mba mbamaren asev nahan. Aluer se mba eren nahan yô, anmgbianev asev mba doon se ishima mba nomso man mba kasev cii vea nenge ér se mba paleghaa a ve ga, kpa vea nenge ér se mba ikyua a ve.

14. Ka mbamtsera mba nyi ve lu sha u lamen a mbagenev sha gbenda u maan ve a maa?

¹⁴ Aluer se mba lamen a ior man iliam la ka i maan ve a maa yô, se wase ve u tilen ken jijingi dông shi zuan a msurshima kpaa. Anmgbian ugen u a eren tom shin afishi a branci yô, ka a umbur kwagh u mbaganden mbagenev kpishi shin Betel mba yange ve lamen a na hanma shighe er lu or u he shin Betel la. Mkaanem vem ma taver un ishima mara yange ma na yô, a nenge ér un doo tsombor u Betel ishima jim jim. Nahan un kpa ka a nôngon u dondon ieren ve la sha u lamen a anmgbianev nav mba shin Betel mba ve za sember van cii.

Iyol i Hiden a mi Ijime Ngi Wasen Se u Himen Iyongo

15. Kanyi i̱ tese ér iyongo ia fatyô u gban hen atô wase?

¹⁵ A shi nan kpa anmgbianev mba kasev uhar mba ken Kristu mba ken Filipi, Yuodia man Suntuki, yange taver ve u himen iyongo i í gba  hen atô ve la. (Fil. 4:​2, 3) Iyongo i í gba hen atô u Paulu vea Barnaba la yange i hingir kwagh u ken igbar, je ve pav hen anshighe ugen la, nahan hanma or yem gbenda u nan. (Aer. 15:​37-39) Kwagh ne tese ér ashighe agen iyongo ia fatyô u gban hen atô u Mbakristu mba mimi. Yehova ne se iwasen i himen iyongo shi hiden lun akar. Kpa a soo kwagh ugen hen a vese.

16, 17. (a) Iyol i hiden a mi ijime ka kii i himen iyongo nena? (b) Mzough u Yakob hide zua vea Isou la tese ér iyol i hiden a mi ijime ka kwagh u injaa nena?

¹⁶ Tôô ase wer gba u we man ijende you ne due zende sha kwaghhendan. Cii ne hii zende wen yô, gba u ú wa kii u bugh injin u mato wou la. Kape gbenda u keren bem shighe u iyongo i gbe hen atô wen kpa u lu a kii i bughun u je la. Kii shon yô, ka u hiden a iyol ijime. (Ôr Yakobu 4:10.) Er Ruamabera a tese ikyav i i nger shin heen ne nahan, kii la ka i na mba iyongo i gbe hen atô ve la ve hii u dondon akaawan a Bibilo.

¹⁷ Zum u Yakob ngohol anngô na Isou, u i mar un ahina vea na la dyako u waniunda yô, ishima vihi Isou a na kpishi, nahan a soo u wuan un; kwagh ne er tsa je kuma anyom ikyundu nahan. Shighe la kar yô, ahina ne za mgbôghom u hiden zuan ayol a ve, “nahan cier Yakob iyol kpishi, ishima gba nyian un.” A hen ér alaghga tsô Isou una ta num sha a na keng abunde ga. Kpa yange mba za zough yô, Yakob gema er kwagh u kpiligh Isou iyol. Yange “gba guren tan inya” zan zan za mgbôghom a anngô na Isou. Tsô Isou er nena? “Isou kura ayem za kohol un kuve un, kamber un ave sha mon, gba susen un zwa; tsô ve gba vaan.” Ve kera nôngo num ga. Iyol i hiden a mi ijime i Yakob tese Isou la wase un u hemban nyityô kwagh i bo i alaghga Isou yange wa ken ishima u eren un cii. —⁠Gen. 27:41; 32:​3-8; 33:​3, 4.

18, 19. (a) Shighe u iyongo i zough se a orgen yô, gba u se tsua a ishima yase u dondon kwaghwan u Ruamabera sha ci u nyi? (b) Aluer se soo u himen iyongo a orgen kpa sha hiihii la ka taver nan yô, doo u se yina ishima ga sha ci u nyi?

¹⁸ Bibilo ngi a kwaghwan u vough sha kwagh u himen iyongo. (Mat. 5:​23, 24; 18:​15-17; Ef. 4:​26, 27) * Nahan kpa, saa se dondo kwaghwan la, ga yô, a taver se u keren bem. Se kpa se fatyô u hiden a iyol ijime keren bem, nahan aluer se mba keghen ser saa or u se gbe iyongo a nan la nana vande hiden a iyol i nan ijime cii ve se hime iyongo yô, ka gbenda u keren bem la ga.

¹⁹ Aluer se hii u keren bem a or u se gbe iyongo a nan, kpa ma ityôkyaa igen ngi i í ne ve i  taver nan u himen iyongo shon yô, doo u se yina ishima ga. Alaghga gba u or u ú soo u himen iyongo a nan la nana time sha kwagh shon shighe a kar. Anngôôv mba Yosev yange ve er kwagh a na caveraa je gande. Yange ve er kwagh la ica i gba cii ve va mase nengen a na ye, hen shighe ne a lu mue-tor u tar u Igipiti. Nahan kpa, ve mase geman ishima zamber a na ér a de ve kwaghbo ve. Yosev de ve kwaghbo ve, nahan ônov mba Yakob hingir ikyurior i lun a ian i civirigh i yilan sha iti i Yehova. (Gen. 50:​15-21) Ka sea luun vea anmgbianev asev mba nomso man mba kasev bem bem yô, se lu wasen tiônnongo u lun ken mzough man ken iember kpaa.​—⁠Ôr Mbakolose 3:​12-14.

Se Doo Nen Ayol a Ase “sha Ieren man sha Mimi”

20, 21. Angahar a Yesu ôô mbaapostoli nav la tese se nyi?

²⁰ Er kera shi ica ga u a wua Yesu la, a kaa a mbaapostoli nav ér: “M ver ne ikyav i tesen sha er ne kpaa er nen er M er ne nahan” yô. (Yoh. 13:15) Yange sember ôôn ve mba 12 mbara angahar been. Kwagh u Yesu er la lu di adini shin lu u tesen ve erdoo na tsô ga. Cii man Yohane a ôr kwagh sha kwagh u angahar a Yesu ôô mbahenen nav la yô, a nger ér: “Er ior [mba Yesu] mba ve lu shin tar ne ve doo Un ishima yô, ve doo Un ishima zan zan ar sha mkur je.” (Yoh. 13:⁠1) Lu mdoo u mbahenen nav doo un ishima la mgbegha un u eren kwagh u yange lu ikpan eren la ye. Nahan gba u ve kpa vea hiden a ayol a ve ijime, vea eren akaa sha ci u mbagenev sha dooshima. Se kpa, mdoo u se doo ayol a ase sha mimi la a mgbegha se u tesen anmgbianev asev mba nomso man mba kasev mba ken Kristu cii ser se wa ve ikyo shi kwagh ve gba se ishima kpaa.

²¹ Apostoli Peteru u yange de ér Yesu a ôô un angahar la yange kav inja i kwagh u Yesu er a ve la. A nger ér: “Er ne vande wanger asema a en kera sha ikyo i ne wan mimi ikyo la u zan ken dooshima u mimi u hen anmgbianev yô, doo nen ayol a en ken ishima tsung.” (1 Pet. 1:22) Apostoli Yohane, u un kpa Ter ôô un angahar la nger ér: “Mbayev av, dooshima wase a̱ de kera luun sha mkaan shin sha nombor tsô ga, kpa i̱ lu sha ieren man sha mimi kpaa.” (1 Yoh. 3:18) Yô, asema a mgbegha se u tesen mdoo u se doo a ayol a ase la sha ieren.

[Ngeren u shin kpe]

Ú Umbur Kpa?

• Se ‘bugh ishima’ sha igbenda i nyi ken mdoo u se doo ayol a ase laa?

• Kanyi ia wase se u nan mbagenev ian i van ikyua a vese?

• Iyol i hiden a mi ijime ngi wasen se u keren bem nena?

• Kanyi ia mgbegha se u wan ikyo sha kwagh u anmgbianev asev mba ken Kristuu?

[Mbampin Mba Ngeren u Henen]

[Foto u sha peeji 21]

Sughun anmgbianev ou mba ken Kristu sar sar

[Foto u sha peeji 23]

De deen wer ashighe a mbagenev van ikyua a we la a kar u ga