Eren Iyua a Ishima i Sar Sar

APOSTOLI PAULU yange nger kwagh sha kwagh u iyua i nan ér: “Hanma or nana̱ na er nan we ken ishima i nan la nahan,” maa a kaa ér: “I̱ de lu zunguruu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.” (2 Kor. 9:⁠7) Yehova kighir ma or ér nana sue mcivir u mimi ga. Ka a de ér mbacivir un ve tsua a ishima ve u nan un kwagh sar sar. Man hii sha ayange a tsuaa la zan zan nyian, ior nav mba ne un kwagh sha gbashima. Time ase sha akav a atar a a dondo ne.

Shighe u Yehova due a Mbaiserael ken Igipiti kera la, a kaa a ve ér ve er tabernakel. Kpa ikyav mbi eren tabernakel a mi lu ga, nahan i yôô ér Mbaiserael ve na iyua. Sha nahan yô, ‘hanma or u ishima i tor nan ityô man hanma or u jijingi u nan mgbegha nan yô,’ nan na zenaria man azurfa man togula man ikyav mbi hweev kua ikyav mbigenev. Ior mbara lu a ishima i nan nagh je yô, i va yôô a yôô ér kuma, ve̱ tile nahan.​—⁠Eks. 35:​5, 21; 36:​6, 7.

Anyom uderi imôngo nga kar, ka va gbe u a  maa tempel yô, ior mba Aôndo shi zua a ian i vea tese ér ve sue mcivir u wang yô. Tor Davidi na iyua mgbeghaa sha ci u mmaa u tempel shi lôhô mbagenev kpaa ér ve na iyua. Nahan ve na iyua ne gbur gbu gbur je. Zenaria man azurfa u ve na la tseegh kpa, aluer i gema ken inyaregh ki ainge yô, hemba inyaregh ki kuman udola biliôn deri môm! Nahan ior ember, sha er ve na Yehova iyua gbar gbar yô.​—⁠1 Kron. 29:​3-9; 2 Kron. 5:⁠1.

Mbadondon mba Yesu mba sha derianyom u hiihii la kpa yange ve lu a ishima i nan iyua saan saan. Yange i er iorov er 3,000 nahan batisema sha iyange i Pentekosti u 33 la, man mbakpishiv lu ior mba ken Yerusalem ga. Nahan Mbakristu cii hira kohol inyaregh va a mi sha u wasen mba ve lu a kwagh ave ga la sha er ve lu ken gar u Yerusalem, ve he kwagh u jighjigh ve u nan u he ne ve seer yô. Anmgbianev mbara lu teen akaa ve van a inyaregh kira hen mbaapostoli sha u wasen mba ve lu a kwagh ga la. Nenge er yange a saan Yehova iyol u nengen imba jighjigh u nan man dooshima u tesen hen mbagenev la sha wono!​—⁠Aer. 2:​41-47.

Nyian kpa, Mbakristu mba zan hemen u suen mcivir u wang sha u nan shighe ve man tahav vev man inyaregh vev sar sar. Ngeren u kiriki u a dondo ne tese igbenda igen i u fatyô u eren kwagh ne yô.

[Ngeren u kiriki u a lu sha peeji 18 la]

Igbenda I Mbagenev Ve Tsough U Eren

IYUA I SUEN TOM U PASEN KWAGH U I LU EREN TAR SHA WON CII NE YÔ

Mbagenev kpishi ka ve er iyua ne sha u veren inyaregh ki vea kenden shin akwati u eren iyua u i nger sha mi ér “Worldwide Work” (Tom u i Lu Eren Tar sha Won Cii La).

Hanma uwer yô, atôônanongo a Mbashiada mba Yehova nga a tindi a inyaregh kin shin afishi a Mbashiada mba Yehova a a lu ken tar ve la. Or nana fatyô u tindin a inyaregh ki nan soo u eren iyua a mi la hen afishi a Mbashiada mba Yehova a hen tar u nan la. Aluer or ngu tindin a takerada u bamegh u i yer ér cheque la yô, nana nger ér i kimbi “Watch Tower.” Or nana fatyô u eren iyua sha akaa a hwee man akaa a injaa agen. Aluer or ngu tindin a amba akaa ne yô, nana nger kwagh u tesen ér akaa shon ka iyua.

IGBENDA I EREN IYUA

Dugh u eren iyua sha inyar jighilii kera kpa, igbenda igen ngi i or a fatyô u suen tom u Tartor u i lu eren tar sha won cii ne yô. Igbenda shon yô ka:

Ishiôlansi: Or nana fatyô u ngeren ér i na Watch Tower inyaregh ki ishiôlansi shin penshen u nan.

Bam: Or nana fatyô u ngeren ér shighe u nan kpe yô, i na Watch Tower inyaregh ki nan koso ken bam man jindinyar i nan we ken bam nan zough a mtsera sha mi la, er atindi a bamegh a tese la vough shin penshen u nan.

Shia man Mtsera: Or nana fatyô u nan Watch Tower iyua i shia i nan yam vea bam shin kômpeni shin mtsera u nana zough a mi sha anzô a ior ve ngohol hen a nan la.

Inya Shin Ya: Or nana fatyô u nan Watch Tower iyua sha inya shin ya u a fatyô u teen yô. Aluer ka ya u ior ve lu her u or nana lu her zan zan nana kar kpen je kpaa. Kpa a hemba doon aluer u lam a afishi a branci a ken tar wou cii ve u er imba iyua ne yô.

Ngeren u Tesen Kwagh u U Soo Wer i Er Shighe u U Kpe yô man u Nan Orgen Shin ma Nongo Inyaregh Wer Ve Koso: Or nana fatyô u ngeren ér shighe u nan kpe yô, i na Watch Tower akaa a nan lu a mi cii shin inyaregh ki nan. Shin nana fatyô u ngeren ér inyaregh ki nan ne Watch Tower ér a lu nan a mi la a saa a mi shighe u nan kpe yô.

Ishember i “igbenda i eren iyua” ne tese ér aluer gba u or nana er imba iyua ne yô, gba u nana fa igbenda ne vough, nana wa iyol cii ve nana er iyua ne ye.

Aluer u soo u fan seer yô, nger Afishi a Branci a Mbashiada mba Yehova a ken tar u Najeria la sha adereshi u a lu shin heen ne gayô gbidye waya. U fatyô u pinen afishi a branci a a nengen sha tar u ú lu ker la kpaa.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020