Kwagh u Anmgbianev Ou mba Nomso man mba Kasev mba Ve Kondo Ato la a Gba U Ishima!

NYIAN nongoior u Aôndo hingir zege tsombor u anmgbianev mba nomso man mba kasev mba ken Kristu, man tsombor ne hii sha ayange a tsuaa la je. Nomso man kasev mba sha ayange a tsuaa er Samuel man Davidi man Semson man Rahabi man Mose man Aberaham man Sara man Noa kua Abel nahan cii mba ken tsombor ne. Mbagenev kpishi ken tsombor ne ka mbaakondoato. U tesen ikyav yô, Orshiada u hiihii ken tar u Mongolia vea kwase na lu mbaakondoato. Jighjigh u anmgbianev asev mba nomso man mba kasev mba kondon ato mba ken tar u Russia la na yô, se hemba ijir ken atejir u vesen ken Yuropa, u á ne or ian i eren kwagh sha ishima i nan, i yer un ér European Court of Human Rights la.

Sha ayange a ase ne, “wanakiriki u jighjigh man u fan kwagh” gber ityakerada shi ver atôônanongo kua mbamkohol mba vesen man mba kiriki ken iliam i sha ave. (Mat. 24:45) Akaa ne wase mbaakondoato kpishi. * Kpa i lu nahan u hen er yange i lu mbaakondoato shighe u ve henen kwagh u Aôndo u mimi shi ve vesen ken mimi aa akaa ne shio la kpa? U hen kwagh u ú er ve u wase mbaakondoato mba ve lu hen ijiir you la kpa?

Shighe u í Lu a Er Akaa a ken Iliam i sha Ave Ga La

Aluer u pine mbaakondoato mba ve lu ken mimi ica i gbe hegen er yange hii ve ve hingir u fan Aôndo nahan vea kaa a we ér nyi? Alaghga vea ôr u er yange lu ve ken ishima shighe u ve hii fan mimi sha kwagh u iti i Aôndo la, man er mimi ne tseegh kpa gema uma ve shi wase ve u tilen dông zan zan ve va mase zuan a icer i vidio shin i DVD i wasen ve u henen akaa a mimi a ken Ruamabera, aa a cimin u kaven la ken iliam i sha ave yô. Alaghga vea pase u er yange lu ve shighe u i lu a gba geman kwaghôron ken iliam i sha ave ken mbamkombo mba Mbakristu shin i lu a gba nan kwaghôron ken iliam i sha a ve tseegh ga la yô. Nahan cii kpa yange orgen nan tema nan dondo a ve, nan ngeren kwagh sha kwapipaa sha u wasen ve u kaven kwagh u i lu ôron la. Anmgbian ugen u a lu orakondoato yange hen akaa a mimi a ken Bibilo sha imba gbenda ne anyom ataankarahar cii ve i va mase zuan a or u nana pasen kwaghôron ken iliam i sha ave ken mbamkombo mba tiônnongo u lu her la ye.

Mbaakondoato mba ve lu ken mimi ica i gbe hegen la ka ve umbur er yange i lu ve zum u vea pasen ior mba ungwan kera kwagh vea anmgbianev mbagenev ken tiônnongo yô. Yange i nger loho u za pasen ior sha uya uya tiônôô sha an-kaade u cuku, nahan ve kôr un uwegh môm, ve gema ve kôr di Iyoukura man Awake! mba hev ken uwegh ku genegh. Yange i lu ve ican kpishi u henen Bibilo a mbaakondoato mbagenev ken ityakerada i ve ayol a ve kua mba ve henen Bibilo a ve la ve kav tsembelee ga ne. Mbaakondoato mbaganden umbur er yange vea pasen kwagh man ior a kaven kwagh shon ga ve, iyol i kpe ve, nahan ve kera fatyô u zan hemen a iliam sha akaa a mimi a ken jijingi ga la. Shi ve fa er Yehova ka una doo or ishima kpishi kpa nana kanen shio u eren un tom vangertiôr ve i lu nan ken ishima yô. Er nan ve lu ve ken ishima nahana? Ityôkyaa yô, yange ve henen ér ve kav kwagh u ve lu lamen a ior sha mi la jighilii ga.

Shin er anmgbianev asev mba kasev man mba nomso mba ve lu mbaakondoato mban lu tagher a mbamtaver mban nahan kpa, ve tile sha mimi ve her. (Yobu 2:⁠3) Ve lu veren ashe sha Yehova. (Ps. 37:⁠7) Nahan hegen Yehova ngu veren ve doo doo sha akaa a ve mbagenev kpishi yange ve ver ashe u zuan a mi ga la kpaa.

Hen ase sha iniôngon i anmgbian ugen u a lu orakondoato u lun a tsombor yô. Cii man i er icer i vidio i ken iliam i sha ave ne yô, anmgbian ne lu hemen  tsombor na ken kwaghhenen. Wan na u nomso umbur kwagh u yange ter na eren yô, a kaa ér: “Kwaghhenen u hen tsombor yange a taver terem kpishi, sha ci u akaa a yange i gba u una tese se la cii i lu ngeren mba ken ityakerada. Ashighe kpishi yange a kav kwagh u i er ken ngeren mba shon jighilii ga. Se mbayev kpa yange se na kwaghhenen a seer taver un. Yange una tsume yô, her ave ave je se pase un ser a tsume. Nahan cii kpa, za hemen u henen kwagh a tsombor wase hanma shighe. Yange nenge ér kwagh u Yehova u se henen la hemba aheen a un zough a mi ashighe ashighe sha ci u un fa takerada yina un la.”

Shi nenge ase ikyav i anmgbian Richard u á lu ken gar u Brooklyn ken kpentar u New York ken tar u Amerika la. Anmgbian ne hemba anyom 70 hegen, ka orakondoato shi a pir ashe kighir sha mi. I fa Richard kpishi sha ci u banen ken mbamkombo mba Mbakristu ga. Ka una mough u zan mkombo yô, a yemen sha kpe-gbenda, a ôron ajiir a umato ve til ve tee ior la sha er una za fa ape kahan yemen hen Iyou i Tartor yô. Sha iyange i mkombo igen senou lu haan kpishi, nahan i kera za mkombo shon ga. Ior mba ken tiônnongo cii i pase ve er mkombo a lu sha iyange la ga yô, Kpa i gema i hungur u ôron Richard kwagh sha mi. Anmgbianev mba fe ér Richard fa er mkombo la a bundu ga yô, maa ve mough ér vea za ôr un, kpa ve za zua a na tile hen Iyou i Tartor ken won lu wan ishima keghen ér i va bugh hunda. Mba pin un er i hii ve a lu zenden ken senou yô, a kaa wener, “Yehova doom ishima.”

U Er a Mbaakondoato Nena?

Mbaakondoato mba hen ijiir you kpa? U fatyô u henen iliam i sha ave sha u lamen a ve kpa? Mbaakondoato ka vea tesen ior zwa ve yô, ve kundu iyol shi ve wa ishima a ve kpaa. Alaghga u fatyô u zuan a orakondoato aburabur shin shighe u i dugh kwaghpasen yô. Nahan u er a nan nena? Nôngo lam a nan. Lam a nan sha u ngeren a nger kwagh gayô kpelan a kpela kwagh shin takerada tesen nan gayô tesen nan ufoto gayô lamen a nan sha ashe, gayô nôngo er akaa ne cii. Aluer orakondoato u ú zough a nan la nan soo mimi ga je kpa, ôr Orshiada u kondon ato shin u nan fe iliam i sha ave yô wer nana za lam a orakondoato u ú zough a nan la. Aluer u lam a orakondoato ken iliam i sha ave yô, loho la ua hemba kôron nan ken ishima.

Alaghga u ngu henen iliam i sha ave shi u ngu ken tiônnongo u a eren mkombo ken iliam i sha ave tseegh yô. U er nena ve u fa u lamen sha ave tsema tsema shi kaven iliam i sha ave wang-na? Shin er alaghga mbapasenkwagh mbagenev hen tiônnongo wou vea lu mba kondon ato ga nahan kpa, lamen a ve ken iliam i sha ave, i de lu sha zwa ga. Aluer u ngu eren nahan yô, kwagh ne una wase u u henen sha kwagh ken iliam i sha ave, sha u nengen a nenge. Ashighe agen a lu u pe ôron a ôr kwagh sha zwa kera lamen ken iliam i sha ave ga, sha ci u alaghga hemba kan we kôvora u eren nahan. Nahan kpa, gba u u wa ishima, er ka wea henen ma zwa ugen ve u wa ishima zan zan u va fa u lamen u wang nahan.

Aluer se mba nôngon sha gbashima ser se lam ken iliam i sha ave yô, se lu tesen ser anmgbianev asev mba nomso man mba kasev mba ve lu mbaakondoato mbara doo se ishima shi se mba ne ve icivir. Hide hen ase sha mzeyol u anmgbianev mban ve tagher a mi ayange ayange er ve fetyô u kaven kwagh u ior ve eren hen ijiir tom shin ken makeranta ga la. Anmgbian ugen u a lu orakondoato yô kaa ér: “Hanma iyange yô, ior mba ve lu a mo cii ka ve shi lamen. Ashighe kpishi ka i lum er m ngu a or ga  shi m gba kwagh kpaa ga nahan, tsô ishima i vihim ker kpishi shi m hingir num a ior je kpaa. Me fatyô u pasen vindi vindi er ka i lum ken ishima ashighe agen ga.” Mbamkombo asev ve luun ashighe a dedoo a anmgbianev asev mba nomso man mba kasev mba ve lu mbaakondoato mbara vea zuan a kwaghyan u ken jijingi shi vea luun a vese shi vea lamen a vese sar sar yô.​—⁠Yoh. 13:​34, 35.

Gba u se waan iniongo i kiriki i mbaakondoato i í nyer mkombo vea atôônanongo a mba ve ongo kera la ikyo. Atôônanongo ne ka aa eren mbamkombo yô, i geman akaaôron ken iliam i sha ave sha er mbaakondoato ve kav kwagh u i lu ôron la yô. Nahan mbaakondoato mba ve lu ken tiônnongo la ka ve tema sha hemen ken Iyou i Tartor la sha er vea kav kwagh u i lu ôron la jighilii yô. Kwagh ne ka a wase ve u nengen wang er or u nan kwaghôron la a lamen shi or u geman kwaghôron ken iliam i sha ave la a pasen kwagh shon yô. Ikyav tese ér mbagenev ken tiônnongo cii ka i ngôôr hoghol ve a kwagh ne ga, nahan i kera lu kwagh u danen ve ga. Mba eren nahan sha mbamkohol mba kiriki kua mba vesen mba i ne ian ér i geman akaaôron ken iliam i sha ave la. Anmgbianev kuma iwuese kpishi sha tom u ve lu eren ken tiônnongo kpoghuloo sha u pasen mbaakondoato akaaôron vough er mbaakondoato ayol a ve kpa ve lamen nahan la.

Alaghga u ngu ken tiônnongo u a lu a nongo u mba lamen sha ave shi a suen u yô, shin u ngu ken tiônnongo u a lu a mbaakondoato kpuaa mba i geman akaaôron ken mbamkombo ken iliam i sha ave sha ci ve yô. U er nana ve anmgbianev mba ve lu mbaakondoato mban vea fa ér kwagh ve gba u ishima? Lôhô ve ve va hen ya wou. Wea fatyô yô, hen akav a ken iliam i sha ve kpuaa. De cie wer zwa la taver u lamen yum ga. U fatyô u lamen u, man imba dooshima u ú tesen ne una umbur we akaa ken hemen a nan we iember. (1 Yoh. 4:⁠8) Mbaakondoato mba ve lu Mbashiada a vese imôngo la mba a kwagh u nan se vese. Ka ve ôr akaa a injaa kpishi, shi ka i gba ve ishima u fan kwagh kpaa shi kwagh ka a hom ve dedoo. Anmgbian u nomso ugen u mbamaren nav ve lu mbaakondoato yô kaa ér: “Ken uma wam cii m hemba hoghol iyol a mbaakondoato, kwagh u me gema me na ve shawon ve a kuma sha kwagh u m zough a mi hen a ve la je kpa ngu ga. Se fatyô u zuan a kwaghfan kpishi hen anmgbianev asev mba nomso man mba kasev mba ve lu mbaakondoato la.”

Mba ve civir Yehova sha mimi man mbaakondoato mba ve eren nahan la cii ve doo Yehova ishima. Ikyav i jighjigh ve u nan man ishimawan ve la na nongo u Yehova seer zuan a averen. Sha nahan yô, kwagh u anmgbianev asev mba nomso man mba kasev mba ve lu mbaakondoato la a gba se ishima!

[Ngeren u shin kpe]

[Foto u sha peeji 31]

Aluer i pase orakondoato loho u Tartor ken iliam i sha ave yô, alaghga nana hemba kaven loho shon

[Foto u sha peeji 32]

Mbamkombo asev ve luun ashighe a dedoo a anmgbianev asev mba nomso man mba kasev mba ve lu mbaakondoato mbara vea zuan a ishimataver ken jijingi yô