Mbampin mba Mbaôron Takerada Ne Ve Pin La

Doo u anmgbian u kwase nana kange ityough zum u nan lu geman kwaghôron u ken Bibilo ken iliam i sha ave la hen mkombo u Mbakristu shin hen mkohol u kiriki shin u vesenee?

Kera kpa, gba u Kwasekristu nana kange ityough zum u nan lu eren akaa a kera yô i lu tom u nom u nan shin ma anmgbian ugen ken tiônnongo nan eren yô. Kwagh ne zua sha kwaghwan u apostoli Paulu a we ér, “hanma kwase u nana eren msen shin nana ôron kwaghôron u profeti man nan cir kwagh sha ityou ga yô, nan ngu heen ityough ki nan,” gadia ka ‘nom a lu ityough ki kwase’ la. (1 Kor. 11:​3-10) Zum u anmgbian u kwase nan kange ityough sha inja man akuma akuma sha ashighe ne yô, nana lu tesen ér nan ngu a icivir sha mserakaa u Aôndo ken tiônnongo u Kristu.​—⁠1 Tim. 2:​11, 12. *

Kpa hide sha ashighe a anmgbian u kwase nan lu geman kwaghôron u anmgbian u nomso a lu nan la ken iliam i sha ave la di ye? Sha kpôô yô, anmgbian u kwase la ngu geman di a gema kwagh u anmgbian u nomso a lu ôron la ken zwa ugen tsô. Inja na yô, ka un a lu tesen ior ga, kpa ka anmgbian u nomso, u anmgbian u kwase la a lu geman kwaghôron na ken iliam i sha ave la, a lu tesen ior ye. Nahan cii kpa, u geman kwagh ken iliam i sha ave la kaha a u eren tom u tafinta la. Ken iliam i sha zwa yô, mbaungwan vea fatyô u kenger sha or u nan kwaghôron shi keghen ato a or u geman kwagh la sha shighe shon môm. Anmgbianev mbakasev mba ve eren tom u tafinta sha aan angan cii ashighe kpishi ka ve tile ape a nengen a ve tseer tseer ga yô. Ashighe agen di yô, alaghga a na ve ian i teman inya eren tom u tafinta, shin aluer ve tile sha je kpa, a lu sha tsembe ga, a lu shin ape mbaungwan ve lu la, sha er vea tile vea ver ishigh sha or u a lu nan kwaghôron la yô. Nahan a kera gba hange hange u vea kange ityough hen shighe la ga.

 Kwagh ugen yô, mbamgem va ken iwavaren kpishi, man er i gem yaren tom a iwavaren ne sha u geman kwaghôron ken iliam i sha ave yô, ashighe kpishi kwagh ne ka a na mbaungwan ve hemban nengen a or u nan lu geman akaaôron ken iliam i sha ave la. Ashighe kpishi ka i lu or u geman kwaghôron ken iliam i sha ave la i tesen nan sha televishen u vesen ye, kpa or u nan kwaghôron la iyol na yô, alaghga mbaungwan vea nenge a na tso kpaa ga. Sha nahan yô, a doo u anmgbian u kwase u a lu geman kwaghôron ken iliam i sha ave la una kange ityough sha u tesen ér un ngu geman a gema kwagh tseegh tsô.

Kwagh u i ser sha kwagh u anmgbianev mbakasev geman kwaghôron ken iliam i sha ave ne bende a akaaôron a i ne ken Makeranta u Henen Tom u Hemen u Aôndo man u tesen akav a nengen man u nan mbamlumun ken Bibilo i Henen ken Tiônnongo man Mkombo u Henen Tomshiren kua Iyoukura i Henen la nena? Gba u anmgbian u kwase u a lu geman kwagh ken iliam i sha ave sha aaven ne la una kange ityoughoo? Doo u mba ve ve mkombo cii vea kav ér ka anmgbian u kwase ne jighilii a lu hemen kwaghhenen ga, nahan sha ashighe a henen kwagh agen yô, a lu hange hange u una kange ityough keng ga. Ikyav i tesen yô, zum u á lu geman mbamlumun mba mbaungwan ve lu nan, gayô á lu geman akaaôron a anmgbianev mba kasev ve lu nan shin á lu geman akav a nengen yô, saa una kange ityough kpee ga. Nahan kpa, zum u á lu geman akaaôron a anmgbianev mba nomso ve lu nan ken mbamkombo mban shin á lu geman kwagh sha ci u anmgbian u hemen Iyoukura i Henen shin anmgbian u hemen Bibilo i Henen ken Tiônnongo, shin á lu hemen sha u wan atsam yô, doo u una kange ityough. Shighe u ma mkombo a lu zan hemen yô, alaghga a gba u anmgbian u kwase nana lu geman akaaôron a anmgbianev mba nomso man mba kasev kua a mbayev man mbatamen vea lu nan la. Sha nahan yô, a hemba doon aluer anmgbian u kwase ne kange ityough sha shighe u mkombo la cii yô.

[Ngeren u shin kpe]