Za Hemen U Lun A Iember Ken Ashighe A Ican
Za Hemen U Lun A Iember Ken Ashighe A Ican
“Mba ve suur sha [Yehova] cii yô, ve̱ ember; Ve̱ genger amo sha iember gbem.”—PS. 5:11.
1, 2. (a) Ka akaa a nyi aa na se nyôr ken ican tsung nyiana? (b) Dugh atsan a uumace cii ve ye la kera je kpa, kanyi i gbe u Mbakristu vea waan ishima a mini?
MBASHIADA MBA YEHOVA kpa mba ye atsan a uumace jimin cii ve ye la. Ior mba Aôndo kpishi ya atsan sha ci u afer a ior ve er ve la, gayô sha ci u ityav mbi nôngon tser ve shin i nzughul a ve sha igbenda igen. Uaahe man ibanave man angev man ku mba ve a ican tsung. Apostoli Paulu yange nger vough nahan ér: “Gadia se fa akaa a i gbe a sha won cii la nga kinen imôngo nga toghor zan zan hegen.” (Rom. 8:22) Shi ka se ya atsan sha ci u mbamyen asev kpaa. Er Tor Davidi u tsuaa la yange kaa nahan, alaghga se kpa se kaa ser: “Gadia aferakaa am cirim, yisa, a yuhwam a hembam, er ikyav mbi yuhwan yum yô.”—Ps. 38:4.
2 Dugh atsan aa a tseren uumace cii la kera je kpa, Mbakristu mba mimi tôô kon u mtsaha u sha injakwagh. (Luka 14:27) Sha kpôô yô, i kôr mbahenen mba Yesu ihyom shi mba tev ve a ican er Yesu kpa i tôv un a ican nahan. (Mat. 10:22, 23; Yoh. 15:20; 16:2) Sha nahan yô, er se lu keghen averen a tar u he la, gba u se nôngo kwagh kpoghuloo shi se waan ishima kpaa, ve se fatyô u dondon Kristu ye.—Mat. 7:13, 14; Luka 13:24.
3. Er nan ve se fe ser saa Mbakristu vea ya atsan ken uma ve keng ve vea er ishima i Aôndo ga?
3 Kwagh ne tese ér Mbakristu mba mimi mba zough a iember man msaanyol ken uma ve sha won gaa? Saa uuma asev vea iv a ijungwen man ishimavihin zan zan mkur una kar vanaa? Er se lu keghen mkur u uityendezwa nav la, Yehova soo ér i saan se iyol je ka ashe tugh ga. Bibilo ôr kwagh u mbacivir Aôndo mba mimi kwa imôngo ér ka ior mba lun a iember. (Ôr Yesaia 65:13, 14.) Pasalmi 5:11 kaa ér: “Kpa mba ve suur sha a We cii yô, ve̱ ember; ve̱ genger amo sha iember gbem.” Se fatyô u lun a iember man bem man mkom shin er se lu yan atsan nahan je kpaa. De se time nen se fa er Bibilo ia wase se u tagher a uzayol asev kpa se lu a iember her yô.
Yehova Ka ‘Aôndo u Saan Saan’
4. Ior ka vea venda u eren ishima i Aôndo nahan i lu un ken ishima nena?
4 Nenge ikyav hen Yehova. Er a lu Aôndo Uhemban agee yô, tar sha won cii ngu sha ikyev na. Kwagh ban un ga shi gba un u ma or nana na un iwasen kpaa ga. Shin er or kom agee sha a na ga nahan kpa, yange ishima ia wa zan un iyol keng zum u wan na u môm hemba ato hingir Satan la. Shi er ken hemen mbatyomov mbagenev dondo Satan ijime, ve hemba ato la kpa, ishima yange ia vihi Aôndo keng je. Shi hen ase er yange á kôr Aôndo iyol shighe u Adam man Ifa, mba ve lu tomaveegh na u hemban cii shin tar la gema ijime a na la. Hii shighe la je, ior ubiliôn imôngo mba ve lu vor u Adam man Ifa la venda u lun sha ikyev i Yehova.—Rom. 3:23.
5. Kanyi kwagh ishima i ze Yehova iyol sha mi yumu?
5 Ihyembeato i yange Satan hii la ngi zan hemen zan zan nyian. Yehova ndera nengen er ior ve civir akombo shi ve eren ipila shi ve woo mbagenev shi ve eren idya la kuma er anyom 6,000 nahan. (Gen. 6:5, 6, 11, 12) Heela tseegh ga, shi a ungwa mbaaie mbabov mba i eren sha a na kua ilyahan i i lahan un la kpaa. Mbacivir un sha mimi je kpa, ashighe agen ka ve vihi un ishima ker. Bibilo ôr kwagh u imba shighe ne i kaa ér: “Kpash! Ve hendan a Na ken deserti, acin imôngo je, ve vihi Un ishima ken toho; ve shi ve mee Aôndo, ve bam Icighan u Iserael.” (Ps. 78:40, 41) Shighe u ior mba Yehova ve vende un yô, ishima ka i vihi un ker kpen kpen. (Yer. 3:1-10) Sha kpôô yô, akaabo nga eren, man ka aa er yô, ishima ka i za Yehova iyol kpen kpen.—Ôr Yesaia 63:9, 10.
6. Yehova ka a sôr uzayol mba ihyembeato i ve a mi la nena?
6 Nahan kpa, Yehova den ér ishimavihin i yange un u eren kwagh u i gbe u una er la ga. Shighe u uzayol mba vesen ve ve yô, Yehova ngu a ker gbenda fele fele sha u sôron uzayol mba shon, sha er ve de vihin karen ikyaa inya ga yô. Shi a sôr akaa a ver sha er ken hemen yô, awashima na una kure vough yô. Sha ci u kwagh u dedoo u Yehova a lu eren ne yô, ngu doo un kpishi u keghen shighe u a va tsegha iti na shi a kende a mtemtor na sha ve mbacivir un sha jighjigh cii vea zua a averen la. (Ps. 104:31) Een, shin er i laha Yehova kpishi nahan kpa, ‘msaanyol mgbough sha ishigh [nagh]’ her.—1 Tim. 1:11; Ps. 16:11.
7, 8. Zum u akaa a ze kpe yô, se kav Yehova nena?
7 Ka mimi, se fatyô u sôron uzayol er Yehova nahan ga. Kpa, se fatyô u kaven un zum u se tagher a mbamtaver yô. Ka kwagh u sha gbaaôndo u asema vihin se shighe u kwagh a ze kpe yô, kpa doo u se saa ken ishimavihin ga. Er i gbe se sha ibeen i Aôndo yô, se mba a kwaghfan man mhen u eren kwagh sha inja, mba vea fatyô u wasen se u timen sha uzayol asev vighe vighe shi eren kwagh sha inja man sha shighe vough kpaa.
8 Kwagh u vesen u una wase se u nôngon a uzayol mba uma yô, ka u se kaven ser se mba a tahav sha akaa agenegh ga. U zeren henen sha ambaakaa la una seer se ijungwen shi una yange se u zuan a iember ken mcivir u mimi. Se keren igbenda i injaa i sôron uzayol asev yô, a hemba doon u tôôn ishima yase sha uzayol mbara kera, geman haren sha akaa a nan se iember. Akav a ken Bibilo aa a dondo shin heen ne tese mimi u kwagh ne wang.
Mnenge u Vough Ngu Hange Hange
9. Hana yange tese ér un ngu a mnenge u vough nena?
9 Nenge ase ikyav i Hana, u a va hingir ngô u profeti Samuel la. Ishima yange i vihi Hana tsung sha ci u mar wan ga. Penina u lu wuhe na la laha un shi naha un tar sha ci u ikyôm na la. Ashighe agen ishima yange i vihi Hana je a vaa, kwaghyan kpa a ya ga. (1 Sam. 1:2-7) Zum ugen la a za ken icighanjiir u Yehova, “ishima lu vihin Hana, a gba sônon TER, vaan tsung.” (1 Sam. 1:10) Hana pasen Yehova ishima na been kera yô, pristi u tamen, Eli gema kaa a na ér: “Yô, za ase bem bem; Aôndo u Iserael A̱ na u kwagh u u sen Un yô.” (1 Sam. 1:17) Hen shighe la, Hana kav ér un er kwagh u un fetyô u eren cii. Lu a tahav mbu sôron ikyôm na la ga. Hana wa ishima. Tsô Hana maa “kôr gbenda, a yem a za ya kwagh, ishigh nagh kera tese ishima i vihin ga.”—1 Sam. 1:18.
10. Paulu yange tese ér un ngu a mnenge u vough zum u tagher a zayol u lu u una fatyô u sôron ga la nena?
10 Apostoli Paulu kpa yange lu a mnenge u vough ne zum u a tagher a zayol yô. Lu a zayol u nan un ishimavihin kpishi. A yila un ér “saa ken iyol.” (2 Kor. 12:7) Zayol la una lu nyi kpa, Paulu er kwagh u fatyô u eren yô, yange er msen hen Yehova sha u zuan a mpeveryol. Paulu sôn Yehova sha kwagh ne kuma kwagh me? Yange sôn Yehova kuma kwa tar. Sen kwa u sha utar la yô, Aôndo pase Paulu ér una dugh un “saa ken iyol” sha ivande ga. Paulu lumun a mimi u kwagh ne, nahan hemba haren ishima sha u civir Yehova a ishima i môm.—Ôr 2 Mbakorinte 12:8-10.
11. Msen man mzamber mba wasen u nôngon a uzayol nena?
11 Akav ne tese ér zum u se tagher a uzayol mba vihin ken ishima yô, se̱ de u eren msen hen Yehova ga. (Ps. 86:7) Kpa mkaanem ma Aôndo wa se kwagh ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen ma sha mzamber a ishughun.” Yehova una er nyi sha mbamsen man mbamzamber asev mbara? Bibilo shi kaa ér: “Man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Fil. 4:6, 7) Alaghga Yehova una tôô uzayol asev mbara kera ga, kpa una ungwa msen wase sha u kuran asema a ase. Zum u se er msen sha ma zayol yô, alaghga se nenge er i doo u se de ser ishima i za hemen u nyian se her ga yô.
I Doo U u̱ Eren Ishima i Aôndo
12. U lun a ishimanyian sha uzayol asev gbem la kwaghbo ngu ker sha ci u nyi?
12 Anzaakaa 24:10 kaa ér: “Aluer ú gba uwer sha iyange i ican yô, agee ou vese ga.” Injakwagh igen kaa ér: “Kpa ishima i vihin yô, i ne ishima i yinan.” (Anz. 15:13) Mbakristu mbagenev de iyol kpe ve je ve de u ôron Bibilo sha tseeneke shi gbidyen kwar sha mkaanem ma Aôndo kpaa. Mbamsen vev kpa ka ve er laa laa tsô ér gba u eren, shi alaghga mba kera biishi a mbaciviraôndo a ve imôngo kpaa ga. Sha mimi yô, u zeren zungwen sha uzayol asev gbem la kwaghbo ngu ker.—Anz. 18:1, 14.
13. Ka ityom igen i nyi ia fatyô u been a iyolkpen shi nan se iembere?
13 Nahan kpa, aluer se mba a mnenge u vough yô, se har ishima yase sha akaa a aa fatyô u nan se mkom man msaanyol la. Davidi yange nger ér: “Doom u eren ishima You, Aôndo wam.” (Ps. 40:8) Zum u akaa a nzughul ken uma wase yô, kwagh u i doo u se er ga yô, ka u undun mcivir wase u se civir hanma shighe la. Sha kpôô yô, icigh ki ishimavihin yô, ka u eren ityom i nan se msaanyol la. Yehova kaa a vese ér a saan se iyol, aluer se mba nengen ken mkaanem nam hanma shighe yô. (Ps. 1:1, 2; Yak. 1:25) Ken Icighan Ruamabera man ken mbamkombo mba Mbakristu kpaa, se mba zough a “kwaghôron u saan saan” u una fatyô u taver se asema shi nan se iember yô.—Anz. 12:25; 16:24.
14. Ka ibumun i Yehova a ne se i nyi i ne se iember hegene?
14 Aôndo na se atôakyaa kpishi a nan se iember. Ityendezwa na i va nan se myom la ka ityôkyaa i vesen i nan se iember. (Ps. 13:5) Se fa ser nyityô ican i i̱ lu eren se hegen cii kpa, ken mkur yô, Aôndo una na mba ve keren un yô injar. (Ôr Orpasenkwagh 8:12.) Profeti Habaku pase imba vangertiôr la ken mkaanem ma doon ungwan ma ma dondo shin heen ne ér: “Shin er kon u tur ua kpar ga, man er ma atam aa lu sha ikyon i wain ga, man atam a kon u olev aa lu ga; shin er ishule ia doo iyiagh ga, man iyôngo ia tim ken ityôr kera, man ibua kpaa ia kera lu ken atôr ga, Nahan kpaa, mo me ember ken TER, me ember ken Aôndo u myom wam.”—Hab. 3:17, 18.
“Saan Ior mba Yehova A Lu Aôndo Ve la Iyol!”
15, 16. Ter uiyua mba Aôndo mbagenev mba vea fatyô u nan se iember, er se lu keghen averen ken hemen ne.
15 Er se lu keghen averen a kpilighyol a i ver sha ci wase ne, Yehova soo ér se ember akaa a dedoo a un ne se la. Bibilo kaa ér: “M fa ma kwagh u hemban doon [uumace] ngu ga, saa u ember man u eren akaa a dedoo sha ayange a ve lu uma la cii. Man shi er hanma or nana̱ ya kwagh, nana̱ ma kwagh, i̱ doo nan iyol ken tom u nan ye ican sha mi la cii; kwagh ne ka iwua i Aôndo je.” (Orpa. 3:12, 13) “U eren akaa a dedoo” la kua u eren akaa a dedoo sha ci u mbagenev. Yesu kaa ér u nan a na kwagh hembe saan iyol a u ngohol a ngohol kwagh. U eren erdoo a ikyar yase u ken ivese man ônov asev man mbamaren asev man anmgbianev asev mbagenev la ve a mkom kpishi je. (Anz. 3:27) U lun ishima legh legh shi ngohol mbavannya dedoo shi den anmgbianev asev mba nomso man mba kasev mba ken Kristu kwaghbo la ne se iember kpishi, shi ka kwagh u doon Yehova kpaa. (Gal. 6:10; Kol. 3:12-14; 1 Pet. 4:8, 9) Shi aluer se er tom kwaghpasen a iyol i tangen shio yô, se zua a injar mgbeghaa.
16 Mkaanem ma ken takerada u Orpasenkwagh ma i ter sha heen ne, ma ôr akaa a taver ga, a nan msaanyol ken uma, er u yan kwagh man u man kwagh nahan. Sha kpôô yô, sea lu yan atsan kpa, se fatyô u zuan a iember ken nyityô iyua i Yehova a ne se cii. Heela tseegh ga, zum u se kenger mdooashe u iyange shighe u i lu miren la, shin gburumaa u lun a uimondon mba doon ashe shin iniumbe i annyamegh mba kiriki kua akaa a igbetar agen a doon kenger yô, se mba kimbin inyaregh ga, kpa ka i saan se iyol shi se iv a iember kpaa. Aluer se hen sha akaa ne yô, Yehova una seer doon se ishima, gadia ka un a ne se hanma kwagh u doon cii ye.
17. Kanyi ia va va se a myôhôryol sha ikyev i uzayolo, man er shighe a lu a kuma ga ne, kanyi i ne se msurshima?
17 U hemban cii yô, aluer Aôndo doo se ishima, se mba kuran atindi a na shi se na jighjigh ken nagh ku ipaan kura yô, se va zua a myôhôryol sha hanma zayol u uma u vough ga ne a ve a mi la cii, shi se ember gbem sha won kpaa. (1 Yoh. 5:3) Er shighe la a lu a va ga ne, u fan ser Yehova fa hanma kwagh u a lu zan se iyol cii la ne se msurshima. Davidi nger ér: “Me ember, me ember tsung sha erdoo Wou, gadia U nenge ican yam, U fa er i lu zan uma wam iyol yum yô.” (Ps. 31:7) Dooshima u Yehova a lu a mi sha a vese la una mgbegha un u yiman se sha ikyev i hanma zayol cii.—Ps. 34:19.
18. Doo u iember ia dumbur hen atô u ior mba Aôndo sha ci u nyi?
18 Er se lu keghen mkur u uityendezwa nav yô, se kav nen Yehova, Aôndo u saan saan. Se kera de ser mbamhen mba kpeegh ve yange se u zan hemen ken mcivir u Aôndo ga. Shighe u zayol a ve yô, se hen u eren kwagh sha inja man sha kwaghfan kpaa. Yehova una wase se u nôngon a mnyoon u ken ishima shi keren hanma gbenda cii u nôngon a mvihi u a ve ken ihyembeato la. I saan se iyol a akaa a dedoo a a dugh hen a na la, a se nengen a mi man a ken jijingi kpaa. Aluer se mba kôôsôô a Aôndo yô, se fatyô u ember sha ci u ka i “saan ior mba TER A lu Aôndo ve la, iyol!”—Ps. 144:15.
Ú Hen Nyi?
• Se kav Yehova zum u se lu nôngon a uzayol nena?
• Ishimawan ia wase se u nôngon a uzayol nena?
• Shighe u se lu ken ican je kpa, se fatyô u eren ishima i Aôndo saan saan nena?
[Mbampin Mba Ngeren u Henen]
[Foto u sha peeji 16]
Akaabo a i eren la nga ne Yehova ishimavihin
[Credit Line]
© G.M.B. Akash/Panos Pictures
[Foto u sha peeji 18]
Yehova na se kwagh u una wase se se za hemen u ember yô