Wase Mbayev Ou Ve Hemba Mbamzeyol mba Ve Tagher a Mi Kpishi La

AGUMAIOR ase nga tagher a mbamzeyol mba taver tsung. Nga tagher a jijingi u botar u Satan ne, shi gba u aa nôngo a “asaren a sha inja i mbayevikyaior la” kpaa. (2 Tim. 2:22; 1 Yoh. 5:19) Heela tseegh ga, er a lu nôngon ér aa ‘umbur u A gbe a la’ yô, a gba u aa wa ishima a ilyahan shin tarnahan u mba ve soo akaa a ve ne jighjigh a mi ga la. (Orpa. 12:1) Anmgbian ugen, u i yer iti na ér Vincent yô, ôr kwagh u shighe u lu vesen a vese la kaa ér: “Hanma shighe cii or yange nan lahan mo shin nan tswamen mo, gayô nan soo u nôngon num a mo sha ci u m lu Orshiada yum. Ashighe agen i nzughul a mo kpishi je yô, m kera soo u zan makeranta kpaa ga.” *

Dugh mbamkighir mba tar ne kera je kpa, alaghga mbayev asev mba nomso shin mba kasev  vea nôngo kwagh kpoghuloo ve vea fatyô u palegh isharen i keren u eren kwagh er mbakov vev nahan la ye. Anmgbian u kwase ugen u lun anyom 16, iti na ér Cathleen, a kaa ér: “Ior ka vea nengen ér u ngu or u soon kwagh u mbagenev ga nahan, i doo u ga cii.” Anmgbian u nomso ugen u a lu anyom 21 yô, iti na ér Alan, ôr kwagh a ishima na i môm kaa nahan ér: “Ashighe kpishi akar a am a ken makeranta yange a lôhôm ér se due se za ma ahumbe imôngo ken m-bee u sati, man mimi yange i sarem ape zan a ve.” Heela tseegh ga, isharen i agumaior eren anumbe ken makeranta, i ka i na ve u ngôôr lun a azende a bo ga la kpa, i taver tsô. Tanya, anmgbian u kwase ugen u a lu anyom 19 yô, kaa ér: “Anumbe a eren doom kpishi. Mbatesen anumbe a eren ken makeranta yange ve shi nôngon ér m lu ken tihi u mba eren anumbe. Yange i taver mo u vendan kpen kpen.”

U wase mbayev ou vea hemba mbamzeyol mbakpishiv mba ve tagher a mi la nena? Yehova wa mbamaren tom u tesen mbayev vev gbenda u vea za yô. (Anz. 22:6; Ef. 6:4) Ishimaveren i mbamaren mba civir Aôndo yô, ka u wan isharen i ungwan imo i Yehova ken asema a mbayev vev. (Anz. 6:20-23) Aluer ve er nahan yô, kwagh ne una mgbegha mbayev vev u hendan a mbamkighir mba taregh shighe u mbamaren vev ve lu a ve imôngo ga je kpaa.

Ka kwagh u ican kpishi u mbamaren keren kwaghyan shi nengen sha tsombor shi eren ityom i tiônnongo shighe môm. Ormaren ugen nana lu eren akaa ne cii tswen shin nana lu eren a er ikyar u nan u fan mimi ga a lu hendan a nan la. Nahan cii kpa, Yehova soo ér mbamaren ve ver shighe u tesen shi wasen mbayev vev. Sha nahan yô, u fatyô u eren nyi sha er u wase mbayev ou vea kura ayol a ve sha mkighir u mbakov shi vea hemba ameen man ilyahan i í lahan ve ayange ayange laa?

Ya Ikyar a Yehova Ikyangegh You

Kwagh u hiihii yô, gba u agumaior ase aa fa ér Yehova ka Or u a lu jim jim yô. Gba u a wase ve vea ‘nenge a u i nengen a Na ga la.’ (Heb. 11:27) Vincent u i vande teren kwagh na la umbur er mbamaren nav yange ve wase un u yan ikyar a Yehova ikyangegh nagh yô. A kaa ér: “Yange ve tesem er msen a lu a inja yô. Ka m umbur shighe u m lu wanye cukuu ve hanma tugh m er msen hen Yehova cii m mase yaven la. Yehova yange lum or jim jim.” U eren msen vea mbayev ou kpa? Keghen ato sha mbamsen vev hen Yehova. Mba kimbir a kimbir asemberatii a mbamsen  mba ve ker ken ityou la tseegh shinii? Shin mba pasen ken mbamsen vev er i lu ve ken ishima jim jim a Yehova laa? Aluer u ngu ungwan er ve eren mbamsen vev yô, vea lu yan ikyar i mimi vea Yehova kpa ú fa.

Aluer agumaior hen u ôron Mkaanem ma Aôndo cii been sha tseeneke ve yô, ngula kpa a lu gbenda u dedoo ugen u vea fatyô u kporom ikyua a Yehova yô. Cathleen, u se vande teren kwagh na la kaa ér: “M-er u m ôr Bibilo jimin cii m bee shighe u m lu gumkwase la wasem kpishi. Kwagh ne nam vangertiôr ér aluer ior mba hendan a mo je kpa, Yehova una suem.” Mbayev ou ver shighe u ôron Bibilo sha tseeneke ve kpa?—Ps. 1:1-3; 77:12.

Sha kpôô yô, gbenda u mbayev ve ngohol tsaha la ngu kwagh môm ga. Shi mvese ve u ken jijingi la kpa alaghga una har sha er anyom a ve a lu la. Nahan cii kpa, aluer i tese ve tsembelee ga yô, a taver agumaior u fan ér Yehova ka Or u a lu jim jim yô. Gba u mbamaren vea tese mbayev vev Mkaanem ma Aôndo sha gbashima, sha er vea fatyô u ungwan imo i Yehova, nahan lun a mhen na sha ma kwagh hanma ijiir i ve lu cii. (Dut. 6:6-9) Gba u mbayev ou vea na jighjigh ér kwagh ve asange asange gba Yehova ishima.

Er u Er Ve Iliam You ia Lu i Injaa Yô

Gbenda u injaa ugen u ú fatyô u wasen mbayev ou yô, ka u lamen vea ve. Sha mimi yô, u lamen vea mbayev doo doo la hemba di u gban ôron kwagh a ve tsô la. Kwagh ne kua u pinen ve mbampin shi keghen ato sha mbamlumun vev mbara, aluer mbamlumun mba shon kaha a kwagh u ú soo wer ma ve ôr la je kpaa. Ngô ugen u lun a ônov mba nomso uhar, iti na ér Anne, a kaa ér: “Ka m pine mbampin zan zan m kar fan kwagh u ve lu henen ken ishima man kwagh u a lu zan ve iyol ken uma la.” Mbayev ou fa ér aluer ve soo u ôron kwagh yô u kegh ato kpa? Tanya, u se vande ôron mkaanem nam la, kaa ér: “Mbamaren av yange ve kegh ato a mo zulee shi ve umbur akaa a se lam sha mi la kpaa. Yange ve fa ati a mbakov wam mba ken makeranta. Yange ve pinem kwagh ve kua akaa agen a yange se vande lamen sha mi ken  ijime yô.” U keghen ato shi umbur kwagh u i lam sha mi la ka akaa a hange hange a aa na iliam yase ia hemba maan a iyol cii yô.

Icombor igen kav ér ashighe a i ye kwaghyan la ka aan a dedoo a mba hen tsombor vea fatyô u lamen iliam i injaa yô. Vincent pase wener: “U yan kwaghyan imôngo hen tsombor wase lu se kwagh u injaa. Yange i soo ér se ya kwagh a tsombor imôngo hanma shighe u se ker cio u eren nahan cii. Kpa i wa se tindi ér shighe u i lu yan kwagh yô, or nana de nengen televishen shin ungwan redio shin ôron takerada ga. Er ashighe kpishi se lamen sha akaa a vesen ga yô, kwagh la lu shighe u kundu kundu u wasen mo hanma iyange cii u nengen sha mbamzeyol man mbamkighir mba m tagher a mi ken makeranta la.” Shi a kaa ér: “U hanma shighe lamen vea mbamaren av sha ashighe a se ye kwagh la shi wasem u kera cian u lamen a ve sha akaa a vesen a m soo mer ve nam iwasen sha mi la ga.”

Pine iyol you wer, ‘Ka ahô a me nahan ka se ya kwagh imôngo hen tsombor ken sati?’ U sôr ian u ver sha er u yaan kwagh vea tsombor wou imôngo, nahan u hemba lun a ian i seer lamen iliam i injaa vea mbayev ou vee?

Er i Hii Ve Aaven a Karen Iyol a Lu Kwagh u Injaa Yô

Mcivir u tsombor civir Aôndo imôngo aikighe ken hanma sati la kpa una wase mba hen tsombor u lamen ayol a ve gbar gbar, shi kwagh ne una wase agumaior u sôron mbamzeyol mba vev kpaa. Alan, u se vande teren kwagh na la, kaa ér: “Mbamaren asev yange ve yar tom a shighe u tsombor wase u henen kwagh la sha u pinen se fan akaa aa a lu zan se iyol la. Yange ve time sha atôakyaa a a bende a kwagh u a lu zan se iyol la.” Ngô u Alan kaa ér: “Yange sea henen kwagh yô, se pande shighe se kar iyol kpaa. Aaven a karen iyol ne wase mbayev asev u henen er vea pasen kwagh u jighjigh u nan ve shi vea tese ér kwagh u ve ne jighjigh a mi la ka u mimi yô. Kwagh ne na ve vangertiôr u hemban mbamtaver mba ve tagher a mi la.”

Nahan kpa, shighe u mbayev ve tagher a mkighir u mbakov yô, ashighe kpishi a gba u vea er kwagh a hemba u ve vendan u eren kwagh u mbakov ve soo man karen yemen kwagh ve kera tsô la. A gba u vea pase ityôkyaa i ve vende u eren kwagh, man er i hii ve ve tsough u eren kwagh shon yô. Shi gba u vea ôr kwagh vangertiôr  shighe u i lu nahan ve tar sha ci u jighjigh ve u nan yô. Aluer ve fatyô u lamen paase paase sha akaa a ve ne jighjigh a mi la ga yô, a taver ve u tilen dông sha ci u kwagh u mcivir u mimi. Aaven a karen iyol aa wase ú u maan vangertiôr ken a ve.

Ngeren u a lu sha peeji 18 la tese akaa agen a tsombor ua fatyô u karen iyol sha mi shighe u ú civir Aôndo aikighe yô. Nenge wer i kar iyol ne sha mimi sha u pinen mbayev ou ve pase er i hii ve ve ne mbamlumun mba ve ne sha mbampin mba i pin ve la yô. Shi shighe u ne lu karen iyol la, time nen sha akav agen ken Bibilo kua akaa a mbayev vea hen kwagh sha mi yô. Aluer i tsaase mbayev hen ya nahan yô, vea fatyô u lun a agoyol sha mbamzeyol mba vea tagher a mi ken makeranta man sha ajiir agen la kpaa.

Ya Wou Ka Ijiir i Kundu Kundu i Waren Kpa?

Ya wou ka ijiir i hanma iyange i mbayev ou ve dugh makeranta yô, ka i saan ve iyol u hiden her kpa? Aluer ya wou ka ijiir i kundu kundu i mbayev ou hiden her waren yô, kwagh la una wase ve u hendan a mbamtaver vev mba ayange ayange mbara. Anmgbian u kwase ugen u a lu môm ken tsombor u Betel hegen yô kaa ér: “Shighe u m lu vesen a vese la, kwagh u hemba doon mo cii yô, lu mlu u ya wase lu ijiir i kundu kundu, i waren la. Yange mea ya ican ken makeranta nan nan kpa, m fa je mer me hide hen ya tsô me mem.” Mlu u hen ya wou ngu nena? Ya wou ka ijiir i ‘ishima i nyoon man u hendan kwagh a orgen kua mpav’ ve dumbur her shinii, ka ijiir i “dooshima man msaanyol man bem” ve dumbur here? (Gal. 5:19-23) Aluer ashighe kpishi bem ngu lun hen ya ga yô, ka u nôngo kpoghuloo u fa akaa a i doo u ne gema eren hen ya wou ve una hingir ijiir i kundu kundu i waren sha ci u mbayev ou kpa?

Gbenda ugen u ú wase mbayev ou vea hemba mbamtaver yô, ka u keren uijende mba dedoo sha ci ve. Ikyav i tesen yô, u fatyô u lôhôn anmgbianev mba nomso man mba kasev mba ken tiônnongo, mba akaa a ken jijingi a gbe ve ishima yô, wer ve va er anumbe vea tsombor wou imôngo kpa? Shin u fatyô u yôron iwer hen ya wou akuma akuma nahan lôhôn ortamen u sôron atôônanongo shin mbagenev mba ve eren tom hanma shighe la wer ve va ya i vea tsombor wou imôngo kpa? U fa mbamishen shin mba eren tom shin Betel mba mbayev ou vea fatyô u kôron ijende a ve, mba a hemba kpa, vea lamen sha Intanet shin vea ngeren uwashika gayô vea lamen ashighe agen sha telefon vea ve kpa? Aluer mbayev ou kôr azende a amba ne yô, kwagh la una wase ve u kôôm angahar a ve veren sha gbenda vough shi henen sha akaa a ken jijingi a vea soo u eren yô. Hen kwagh sha gbenda u ieren i dedoo i apostoli Paulu yange i bende a gumor Timoteu la. (2 Tim. 1:13; 3:10) Ikyar i kangenaa i Paulu ya a Timoteu la wase Timoteu u veren ishima na cii sha akaa a ken jijingi a yange tsua u eren la.—1 Kor. 4:17.

Wuese Mbayev Ou

Doo Yehova er agumaior a lu tilen dông sha kwagh u mimi, shin er a lu tagher a mbamkighir mba tar u Satan nahan kpaa. (Ps. 147:11; Anz. 27:11) Sha mimi yô, we kpa ka wea nenge er agumaior ase a tsough u eren ishima i Yehova nahan i doo ú tsô. (Anz. 10:1) Pase mbayev ou ve fa er i lu u ken ishima a ve la, shi wuese ve kpishi, sha u tesen ér ve doo u ishima. Yehova ver ikyav i dedoo sha ci u mbamaren. Shighe u i er Yesu batisema la Yehova kaa ér: “We, U ngu Wan Wam u ishima ishima, ka We ishima i doom a We yum ye.” (Mar. 1:11) Nenge er ibumun i Ter u Yesu na un la yange ia taver un ishima u hemban mbamtaver mba lu u una tagher a mi la sha wono! Nahan we kpa tese mbayev ou ve fa ér ve doo u ishima, shi wuese ve sha kwagh u ve eren la.

Sha kpôô yô, u fatyô u kuran mbayev ou cii sha ikyev i mbamkighir man ilyahan kua iheen i í heen ve la ga. Nahan cii kpa, u fatyô u eren kwagh veseghee sha u wasen ve. Sha nyi igbenda? Wase ve ve ya ikyar a Yehova ikyangegh. Ker ian i ne fatyô u lamen imôngo sha gbenda u injaa yô. Nôngo Mcivir u hen Tsombor u aikighe la i eren un sha u karen iyol, shi gema ya wou a hingir ijiir i kundu kundu i waren. U eren nahan la una wa mbayev ou agoyol a tagher a mbamtaver.

[Ngeren u shin kpe]

[Ngeren u kiriki/Foto u sha peeji 18 la]

AAVEN A IYOLKAREN AA FATYÔ U WASEN

Akaa agen a agumaior a tagher a mi sha ashighe agen yô, ka a je ne. Er nan u kar iyol sha akaa ne agen sha shighe u Mcivir u hen Tsombor wen u aikighe la ga?

▸ Or u tesen anumbe ugen lôhô wan wou u kwase ér a va er anumbe vea tihi u eren anumbe ken makeranta.

▸ Wan wou u nomso due makeranta ngu hiden hen ya man i na un taav ér a ma.

▸ Mbayevnomso mbagenev ta wan wou u nomso icin ér aluer a pase kwagh yô, vea gbidye un.

▸ Shighe u wan wou u kwase a lu pasen kwagh sha uya uya la, a za tagher a ikyar na u ken makeranta ugen.

▸ I pine wan wou u kwase sha ishigh ki kelase er i hii ve a civir tuta ga yô.

▸ Wanyenomso ugen zer nahan wan wou u nomso tar sha ci u ngu Orshiada.

[Foto u sha peeji 17 la]

Mbayev ou ver shighe u ôron Bibilo sha tseeneke ve kpa?

[Foto u sha peeji 19 la]

Tsombor wou ngu eren anumbe vea mbagenev mba akaa a ken jijingi a gbe ve ishima la kpa?