Se Sugh Ne Za Van Sha Gbenda U Uma Ú Hemban Doon!
Se Sugh Ne Za Van Sha Gbenda U Uma Ú Hemban Doon!
“Sea lu uma shin sea kpe kpaa se mba kwagh u [Yehova].”—ROM. 14:8.
1. Yesu tese nyi sha kwagh u gbenda u uma ú hemban doon laa?
YEHOVA soo ér i saan se iyol sha gbenda u uma ú hemban doon la. Ior vea fatyô u eren uuma vev sha igbenda kposo kposo, kpa ka gbenda môm tseegh u hembe doon ye. Kwagh u a hembe doon u se er a uma wase yô, ka u dondon mkaanem ma Aôndo shi henen kwagh sha ikyev i Wan na, Yesu Kristu. Yesu yange tese mbadondon un ér ve civir Aôndo ken jijingi man ken mimi, shi na ve tom u geman ior hingir mbahenen. (Mat. 28:19, 20; Yoh. 4:24) Aluer se mba dondon akaawan a Yesu yô, a doo Yehova a vese shi una ver se doo doo.
2. Ior kpishi yange ve ngohol loho u Tartor ken derianyom u hiihii la nena, man inja i ishember i “Gbenda” la er nyi?
2 Zum u “Mba i sar ve u zuan a uma u tsôron” la ka vea na jighjigh yô, se lu a atôakyaa a injaa a kaan a ve ser “Se sugh ne za van sha gbenda u uma ú hemban doon!” (Aer. 13:48, NW.) Ken derianyom u hiihii la, ior udubu imôngo ken akuraior kposo kposo ngohol mimi shi ve tese ikyav i iyoltseghan ve sha ci u Aôndo ken igbar sha u eren batisema. (Aer. 2:41) Mbahenen mba tsuaa mbara yange ve dondo “Gbenda” la. (Aer. 9:2; 19:23) Ishember i “gbenda” ne lu sha inja vough, sha ci u mba yange ve hingir mba dondon Kristu cii ve dondon gbenda u uma, u ú har sha jighjigh u nan ken Yesu Kristu, shi u har sha u dondon ikyav na la.—1 Pet. 2:21.
3. Ior mba Yehova mba eren batisema sha ci u nyi, man i er ior batisema kuma nena ken anyom pue a á sember karen nee?
3 Tom u geman ior hingir mbahenen la ngu zan hemen leva leva ken ayange a masetyô ne, man mba eren u hegen ken ityar i hemban 230. Ken anyom pue a a kar la, ior mba hemban iyenge er 2,700,000 nahan tsua u civir Yehova shi eren batisema sha u tesen ikyav i iyoltseghan ve sha ci na. Aluer i kar kwar u iyengeior ne yô, a lu iorov 5,000 ken hanma sati! Or ka nan tsua ér i er nan batisema sha ci u Aôndo doo nan ishima shi nan zua a mfe u Ruamabera shi nan na jighjigh a kwagh u Ruamabera a tese la. Batisema u eren ka kwagh u vesen ken uma wase, sha ci u ka mhii u ikyaryan i sôngo sôngo vea Yehova. Shi ka ikyav i tesen ér se mba a vangertiôr ser Yehova una wase se u civir un sha jighjigh, vough er ngise wase mbatomov nav mba tsuaa mbara u zenden sha gbenda na nahan.—Yes. 30:21.
Doo u Ú Er Batisema sha ci u Nyi?
4, 5. Ter averen agen a batisema u eren a ve a mi la.
4 Alaghga u zua a mfe u Aôndo la shi u sôr uma wou, nahan u ngu orpasen loho u nan lu a̱ er batisema ga yô. Imba mzehemen la kuma iwuese. Nahan kpa, u tsegha iyol you sha ci u Aôndo ken msen vee, man u ngu veren ishima keghen wer i er u batisema kpa? Er u hen Bibilo yô, a shi nan kpa u fa er i gbe u uma wou una har sha u wuese Yehova, a lu sha u keren kwagh u doon sha ci wou shin ombon akaa kpishi tsô ga yô. (Ôr Pasalmi 148:11-13; Luka 12:15) Nahan ka mbamtsera man averen agen a nyi batisema u eren a ve a mini?
5 Aluer u ngu Orkristu u nan tsegh iyol i nan sha ci u Aôndo yô, uma wou una hemba lun a inja cii. A saan we iyol sha ci u ú ngu eren ishima i Aôndo. (Rom. 12:1, 2) Icighan jijingi u Yehova una wase u u̱ lun a eren a mbacivir Aôndo, er bem man jighjigh u nan nahan. (Gal. 5:22, 23) Aôndo una ungwa mbamsen ou, shi una ver iniôngon you i u lu nôngon wer u eren kwagh u mkaanem nam ma kaa la doo doo. A saan we iyol ken tom wou u pasen kwagh la, shi aluer u ngu eren ishima i Aôndo yô, kwagh la una taver ishimaverenkeghen you i va zuan a uma u tsôron la. Heela tseegh ga, aluer u tsegha iyol you shi u er batisema yô, u lu tesen wer mimi je u soo u lun Orshiada u Yehova.—Yes. 43:10-12.
6. Batisema wase ka a tese ken igbar ér nyi?
6 Ka sea tsegha ayol a ase sha ci u Aôndo shi sea er batisema yô, se lu pasen ken igbar ser se mba kwagh u Yehova. Apostoli Paulu yange nger ér: “Ma or môm ken vese nan gbe lun uma sha ci u nan iyol i nan ga, man shi ma or gbe kpen sha ci u iyol i nan kpaa ga. Gadia shin sea lu uma, kpa ka sha ci u Ter se lu uma ye, shin sea kpe kpaa, ka sha ci u Ter se kpe ye, nahan yô, shin sea lu uma shin sea kpe kpaa se mba kwagh u Ter.” (Rom. 14:7, 8) Aôndo tese ér hanmô wase nan gba un kwagh sha u nan se ian i tsuan kwagh u se soo u eren la. Ka sea tsua u dondon gbenda u uma ne sha ci u Aôndo doo se ishima yô, se na i saan un iyol. (Anz. 27:11) Batisema u eren ka ikyav i tesen iyoltseghan yase sha ci u Aôndo shi pasen ken igbar ser Yehova ka Tor wase. Batisema u eren ka a tese ér se ta ikyaa a Aôndo sha kwagh u ian i a lu a mi i hemen sha won cii la. (Aer. 5:29, 32) Ka sea er nahan yô, Yehova kpa a ta ikyaa a vese. (Ôr Pasalmi 118:6.) Batisema shi ka a bugh se gbenda u zuan a averen a ken jijingi agen kpishi hegen kua ken hemen kpaa.
Mbahenen mba i Er Ve Batisema Mbara Mba ken Mzough u Anmgbianev u a Lu sha Tar cii La
7-9. (a) Yesu yange na mba ve undu akaa a ve cii ve dondo sha a na la ibumun i nyi? (b) Ityendezwa i Yesu i í nger ken Marku 10:29, 30 la ngi kuren sha mi nyian nena?
7 Apostoli Peteru yange kaa a Yesu ér: “Nenge ase, se undu akaa cii, se dondo U, nahan ka nyi je sé va zua a mini?” (Mat. 19:27) Peteru soo u fan er mlu na u ken hemen kua u mbahenen mba Yesu mbagenev la una lu yô. Yange ve de akaa a injaa saa ve sha er vea na ayol a ve jimin cii sha tom u pasen kwagh ú Tartor yô. (Mat. 4:18-22) Lu nyi ibumun Yesu na ve?
8 Ivangeli i Marku pase ér Yesu ôr kwagh u tesen ér mbahenen nav vea lu ken mzough u anmgbianev mba ken jijingi. Yesu kaa er: “Or ngu u nana undu ya, shin anmgbianev mba nomso, shin anmgbianev mba kasev, shin ngô, shin ter, shin ônov, shin ishule sha ci Wam man Loho u Dedoo ne, man nana de ngohol mtsera kwa akunduataan hegen hen shighe ne ga; uya man anmgbianev mba nomso man anmgbianev mba kasev man ungô man ônov man ishule a mbamtev mba sha atsan kpaa, man ken ayange a ken hemen, nana ngohol uma u tsôron.” (Mar. 10:29, 30) Mbakristu mba sha derianyom u hiihii la, er Lidia man Akula man Prishila man Gayu nahan, ve lu ken ior mba ve na “uya” vev shi ve hingir “anmgbianev mba nomso” man “anmgbianev mba kasev” hen mbacivir Aôndo a ve imôngo, er Yesu tôndo zwa nahan la.—Aer. 16:14, 15; 18:2-4; 3 Yoh. 1, 5-8.
9 Kwagh u Yesu ôr la ngu hemban kuren sha mi nyian cii. “Ishule” i mbadondon un ka ve undu la ka igbenda i zuan a inyaregh i ior kpishi, er mbamishen man mbaerentom shin Betel man mbanan ayol a ve sha u za wasen tom ken tar ugen kua mbagenev kpaa, ka ve undu a ishima ve sha er vea er ityom i Tartor ken ityar kposo kposo la. Anmgbianev mba nomso man mba kasev kpishi undu uya vev sha er vea eren uma u akuma akuma yô, man ka i saan se iyol u ungwan uvande-eren vev mba tesen er Yehova a nenge sha a ve la, man er ve civir Yehova ve ve zough msaanyol la kpaa. (Aer. 20:35) Heela tseegh ga, mbacivir Yehova mba i er ve batisema cii vea fatyô u zuan a iveren i ‘vanden keren Tartor u Aôndo man perapera na’ la ken mzough u anmgbianev u sha tar cii la.—Mat. 6:33.
Zua a Mkor ken “Ijiir i Yeren”
10, 11. Kanyi i lu “ijiir i yeren i Uhembansha,” man se er nan ve se nyôr kere?
10 Iyoltseghan man batisema u eren shi ne se iveren igen kpaa, ka ian i civirigh i nyôron ken “ijiir i yeren i Uhembansha” je la. (Ôr Pasalmi 91:1.) Ijiir ne ka ijiir i sha injakwagh i lun kundu kundu man ken mkor, ka mlu u zuan a mkor sha akaa a vihin mlu wase u ken jijingi la. Ka “ijiir i yeren” sha ci u mba ve lu a mnenge u Aôndo sha akaa ga shi ve suur sha a na kpaa ga la ve fa i ga. Aluer se mba eren sha iyoltseghan yase shi suur sha Yehova a ishima yase cii yô, se lu kaan a na sér: “U ngu ijiir yam i yeren man iyouutya yam, Aôndo wam u m suur sha a We ne.” (Ps. 91:2) Se er nahan yô, Yehova Aôndo una hingir se ijiir i teman i kundu kundu. (Ps. 91:9) Ma ijiir igen i hemban doon i or nana tema ker kundu kundu je kpa ngi ga.
11 Er se lu ken “ijiir i yeren” i Yehova ne yô, tese ér se mba a ian i civirigh i yan ikyar a na kôôsôô. Ikyaryan ne ka i hii sha iyoltseghan man batisema u eren. Ka sea yaan ikyar a na cii yô, se za hemen u taver ikyaryan la sha u kporom hen a na sha Bibilo i henen man msen u eren kua u ungwan imo na hanma shighe. (Yak. 4:8) Or môm kpa nan ngu a lu kôôsôô a Yehova i hemba Yesu, u a lu a vangertiôr ken Orgban je a te akperan ma shighe môm ga la ga. (Yoh. 8:29) Nahan yô, mayange se huna nen Yehova shin tahav nav man isharen i a lu a mi i wasen se ér se er sha iyoltseghan yase la ga. (Orpa. 5:4) Akaa a injaa a ken jijingi a Yehova a ne ior nav la ka ikyav i tesen tseer tseer ér a soo se sha mimi shi hange un u se civir un kpaa.
Paradiso Wase u ken Jijingi la a Gba u Kwagh
12, 13. (a) Paradiso u ken jijingi la kanyi? (b) Se fatyô u wasen mba ve sember van ken tiônnongo la nena?
12 Iyoltseghan man batisema u eren ka ve bugh se gbenda u lun imôngo ken paradiso u ken jijingi la. Ka ijiir i injaa i ken jijingi, ape mbananjighjigh ve lun ken bem a Aôndo man ayol a ve yô. (Ps. 29:11; Yes. 54:13) Tar ne ngu a kwagh môm u a fatyô u tôôn un karen sha paradiso wase u ken jijingi la ga. Kwagh ne ka a hemba duen tseer tseer shighe u mkohol u ityar ityar, ape anmgbianev asev mba nomso man mba kasev ken akuraior man ijô kposo kposo ka ve zua imôngo ken bem man mzough man dooshima u anmgbianev la.
13 Paradiso u ken jijingi u se lu ker ne ngu kposo a mlu u ken tar u vihin tsung la. (Ôr Yesaia 65:13, 14.) Aluer se mba yôôn angwe u loho u Tartor la yô, se lu lôhôn mbagenev kpaa ser ve va nyôr ken paradiso u ken jijingi ne. Shi u wasen mba ve sember van ken tiônnongo mba i lu u a tsaase ve ken tom u pasen kwagh la kpa ka iveren. Sha iniezwa i mbatamen yô, alaghga se lu a ian civirigh i wasen mba hev mbagenev, di er Akula man Prishila yange ve ‘seer bughun gbenda u Aôndo wanger wanger’ hen Apolo nahan.—Aer. 18:24-26.
Za Hemen u Henen Kwagh hen Yesu
14, 15. Ka atôakyaa a injaa a nyi se lu a mi a zan hemen u henen kwagh hen Yesuu?
14 Se mba a atôakyaa a injaa a aa wase se u zan hemen u henen kwagh hen Yesu yô. Cii man Yesu a va shin tar yô, a vande eren tom vea Ter na udubumbaanyomov mba or fe iyenge ve ga yô. (Anz. 8:22, 30) Yesu yange fa je ér gbenda u uma ú hemban doon la har sha u civir Aôndo shi pasen mimi. (Yoh. 18:37) Yesu yange fa wang ér aluer un tsua gbenda u uma ugen yô, a lu u keren mtsera sha ci na iyol na tseegh shi a tese kwaghfan ga. Yange fa er a kar un sha ikyaren i taver kpishi shi a wua un kpaa yô. (Mat. 20:18, 19; Heb. 4:15) Er i lu un se nengen ken a na yô, a tese se er se tile sha mimi yô.
15 Yange i er Yesu batisema ica gba ga tsô, Satan mee un ér a undu gbenda u uma ú hemban doon la, kpa mayange Satan kôrcio ga. (Mat. 4:1-11) Kwagh ne tese se ér nyityô kwagh i Satan a er cii kpa, se fatyô u tilen sha mimi her. A doo un u tan num sha mba ve lu kuman u a er ve batisema la man mba ve sember eren batisema la. (1 Pet. 5:8) Anmgbianev asev mba hen tsombor vea hen ér ve mba wasen se, nahan vea nôngo u yangen se, kpa a lu sha ci u i ôr ve mimi sha kwagh u Mbashiada mba Yehova ga. Nahan kpa, ameen angara nahan ka a na se ian i tesen aeren a Mbakristu, er u nan mbagenev icivir man u eren kwagh sha kwaghfan zum u se lu nan mlumun sha mbampin shin pasen kwagh nahan. (1 Pet. 3:15) Kwagh ne una bende a mba vea kegh ato a vese la sha gbenda u dedoo kpen kpen.—1 Tim. 4:16.
De Undun Gbenda u Uma Ú Hemban Doon la Ga!
16, 17. (a) Ka akaa atar a hange hange a nyi i er ken Duteronomi 30:19, 20, a or a er ve nana zua a uma? (b) Yesu man Yohane man Paulu sue kwagh u Mose nger la nena?
16 Mose yange wa Mbaiserael kwagh kuma anyom 1,500 nahan cii ve Yesu va shin tar ye, ér ve tsua gbenda u uma ú hemban doon hen shighe la. A kaa ér: “M yila Sha man tar, ve̱ lu shiada sha a ven nyian, er m ver uma man ku sha ishigh yough, man shi iveren man ifan; yô, tsua uma sha er ú lu uma, we a tsombor wou; er TER, Aôndo wou, A̱ doo u ishima, u̱ ungwan imo Na, u̱ var a Na, gadia ka uma wou man ayange ou a ngeen je la, sha er u̱ tema ken tar u TER bum a uter ou, Aberaham man Isaka man Yakob, er Una na ve u la.” (Dut. 30:19, 20) Mbaiserael tile sha mimi ga, kpa akaa a atar a á lu hange hange sha u zuan a uma, a Mose ter la yô, gema ga. Yesu man mbagenev yange ve va kimbir teren a.
17 Kwagh u hiihii yô, ér, ‘Ter Aôndo wase a̱ doo se ishima.’ Se tese ser Aôndo doo se ishima sha u dondon igbenda na i perapera la. (Mat. 22:37) Kwagh u sha uhar yô, ér ‘saa se ungwan imo i Yehova’ sha u henen Mkaanem ma Aôndo shi kuran atindi a na. (1 Yoh. 5:3) U se eren kwagh ne yô, a gba u se zaan mbamkombo mba Mbakristu hanma shighe, ape i timen ken Bibilo la. (Heb. 10:23-25) Kwagh u sha utar yô, ér ‘se var a Yehova.’ A lu nyi je sea tagher a mi kpa, se na nen Aôndo jighjigh hanma shighe cii shi se dondo Wan na.—2 Kor. 4:16-18.
18. (a) Iyoukura yange i ôr kwagh u mimi u se fe ne ken inyom i 1914 la ér nyi? (b) Doo u a lu se ken ishima sha kwagh u iwanger i mimi nyian nena?
18 U dondon mimi u Bibilo ken uma wase la ka iveren i kpegh ga! Ken inyom i 1914 la, i gber mkaanem ma injaam man ken Iyoukura, ér: “Se mba ior mba lun a iveren, mba i saan ve iyol ga he? Aôndo wase ka u jighjigh gaa? Aluer or fa gbenda u hemban doon a ngun yô, nana dondo ase u. Aluer ma or zua a kwagh u hemban doon a ngun yô, nana kaa se. Se fa kwagh ugen u hemban doon a ngun ga shin kwagh u a doo i zulum a zulum sha kwagh u se zough a mi ken mkaanem ma Aôndo la tsô kpaa ga. . . . Bem man iember man iveren i se zough a mi sha mfe u se fe Aôndo u mimi wanger wanger la, ka kwagh u a fatyô u pasen sha mkaan shin sha ngeren vough ga yô. Mfe u se zough a mi sha kwagh u Kwaghfan man Perapera man Tahav man Dooshima u Aôndo la, kure hanma isharen yase i ken ishima man i ken mhen wase kpaa. Se ker kwagh ugen seer sha ngun ga. Kwagh ugen u hemban doon se a ngun je kpa ngu ga, saa u zan hemen u fan Aôndo wase seer a seer tsô.” (Iyoukura, [zwa Buter], Disemba 15, 1914, peeji 377-378) Iwuese i se lu a mi sha iwanger i mimi la gema ga. Sha kpôô yô, se hemba mban a ityôkyaa i ember hegen cii, sha ci u se mba ‘zenden ken iwanger i TER.’—Yes. 2:5; Ps. 43:3; Anz. 4:18.
19. Er nan ve i doo u mba ve kom u a er ve batisema la vea kera wa a wa ahô ga?
19 Wea soo u ‘zenden ken iwanger i Yehova,’ kpa wea lu a tsegha iyol you sha ci u Aôndo shi i er u batisema, ú hingir Orkristu ga yô, de kera timbir ga. Er hanma kwagh u i gbe u eren cii sha er u kuma u a er u batisema, u a lu gbenda u injaa u tesen iwuese sha kwagh u Aôndo man Kristu ve er sha ci wase la. Na Yehova kwagh wou u injaa u hemban cii, ka uma wou je la. Tese wer u wa ishima u eren ishima i Aôndo sha u dondon Wan na. (2 Kor. 5:14, 15) U eren nahan la ka gbenda u uma ú hemban doon je ka u henen a hen ga!
Ú Kaa Wer Nyi?
• Batisema wase ka a tese ér nyi?
• Iyoltseghan sha ci u Aôndo man batisema u eren mba ve a averen a nyi?
• U henen kwagh hen Yesu la ka kwagh u hange hange sha ci u nyi?
• Kanyi ia wase se ve se undu gbenda u uma ú hemban doon la ga?
[Mbampin Mba Ngeren u Henen]
[Foto u sha peeji 25 la]
Batisema wou la tese ér u tsua gbenda u uma ú hemban doon
[Ufoto u sha peeji 26 la]
U ngu ken mkor ken “ijiir i yeren” la kpa?