Venda Mbaaie mba Satan a Samber a Mi La

‘I̱ DE tsughun ne ga. Aôndo wen una yima ne ga. De nen u hendan a mo, gayô kwagh a tser ne!’ Ka semakwagh ken loho u Rebeshake u lu ortyom u Tor Senakeribi, tor u tar u Ashiria, za ôr ior mba ken Yerusalem je la. Akumautya a tor la yange anger tar u Yuda. Tor yange tindi ortyom na Rebeshake ér a za ôr ior mba ken Yerusalem mkaanem mara, nahan iyol i kpe ve shi mciem ma gba ve iyol, ve de u hendan a na.—2 Utor 18:28-35.

Yange í fa Mbaashiria ér ka ior mba wan tswam shi eren ipila kpishi. Gadia ve taan mbaihyomov vev mciem iyol sha u pasen ve er ve vihi shi ka ve er a mbakwarev vev caveraa yô. Sha kwagh u orgen u timen sha akaa a mbayiase, Philip Taylor a er yô, Mbaashiria yange ve “eren akaa a tan ior mciem iyol kpishi shi ve samber a mbaaie mba vea na ior mba ve yem a ve uikyangen mbara vea cian ve, nahan vea za hemen u lun sha ikyev ve yô. Shi ve taan mbagenev mba alaghga vea va hendan a ve la kpa mciem iyol sha u pasen ve tswam u ve eren a ior la, shi ve ôr akaa sha a ve dang dang sha u ve nenge er ve gbe kwagh ga yô.” Aie u samber a mi ka ikyagh ki numugh ki lun a tahav kpishi. Taylor kaa wener, ka a samber a gwa u aiegh sha kwagh yô, i ver ishima ér “ior ve iv a mhen u aiegh la ken asema a ve.”

“Ka awambe man inyam” Mbakristu mba mimi ve “lu nôngon ityav a ve ga, kpa ka . . . ujijingi mba aferev,” ka ujijingi mba yange ve hendan a Aôndo je la. (Ef. 6:12) Tor ve ka Satan Diabolo. Un kpa yaren tom a ipila shin tswam man aie u eren.

Satan senge wener una fatyô u vihin mtil sha mimi u hanmô wase. Sha ayange a tertamen Yobu la, Satan kaa a Yehova Aôndo ér: “Hanma kwagh u or nan lu a mi cii, nana na sha ci u uma u nan.” Inja na yô, lu kaan ér aluer un er or ican tsung yô, ken masejime nana de u civir Aôndo sha mimi. (Yobu 2:4) Kwagh u Satan ôr la ka mimi kpa? Se cii se ver ikighir i se taver ishima ken ican a ar ve se kera tile sha mimi wase her ga yôô? Satan soo ér se hen nahan. Sha ityôkyaa ne yô, ngu a samber a mbaaie kure kure ér una wa mhen la ken asema a ase. De se time sha igbenda igen i a eren kwagh ne la, shi se nenge er se fatyô u hendan a na yô.

‘Amagh a Ve Nga Shin Vuulevu’

Satan yange nyôr ken Elifasa, u lu môm ken azende a Yobu a atar, a yange za hen a na la, nahan a nyiman a Yobu ér uumace yina u hendan a mbamtaver mba Satan a ve ve a mi cii. Yange ôr kwagh u uumace a Yobu ér: “Mban mba ve tem ken ayou a inyaagh, a amagh a a, a lu shin vuulevu ne, mba i her ve er ivina nahana! Ka i tim ve hen haregh u pepe man u iyangebeen; ka ve saa gbem, ma or nan wa ve ikyo ga.”—Yobu 4:19, 20.

Hen ijiir igen ken Ruamabera, í tôô se i kar sha “ikyav mbi inyaav,” ka mtem ma taver iyol ga, ma i maa sha inyatyuu je la. (2 Kor. 4:7) Se yina sha ci u se ya dyako u isholibo man mlu u vough ga. (Rom. 5:12) A kende se tseegh yô, Satan una zôhô se a ngôôr ga. Kpa er se lu Mbakristu yô, se fatyô u suur sha iwasen i Yehova. Er se yen nahan cii kpa, se gba kwagh sha ishigh ki Yehova. (Yesu. 43:4) Heela tseegh ga, Yehova ne icighan jijingi na hen mbara mba ve sen un yô. (Luka 11:13) Jijingi na una fatyô u nan se “agee a hemban,” a aa wase se u nôngon a nyityô ican i Satan una er se cii. (2 Kor. 4:7; Fil. 4:13) Aluer se hendan a Diabolo man se  ‘tile dông sha jighjigh u nan’ yô, Aôndo una na se ishimataver kua agee. (1 Pet. 5:8-10) Nahan yô, ityôkyaa ngi i se cia Satan Diabolo ga.

Or “Me Ifer er ka Mngerem Nahan”

Elifasa pine ér: ‘Or ngu nyi je, u nana lu wang-na? Man shi u kwase a mar nan, nana lu perapera?’ A gema a na mlumun sha mpin ne iyol na, ér: ‘Nenge, kera suur sha uicighanmbaiorov ga; een, Usha kpaa kera mba wang sha ishigh Nagh ga; man hire u nan ndôhôr ishima nan hôngor kpaa, u ka nan ma ifer er ka mngerem nahan la!’ (Yobu 15:14-16) Elifasa lu kaan a Yobu ér orumace u perapera môm ngu sha ishigh ki Yehova ga. Diabolo shi ngu a yar tom a mhen u ifer kpaa. Ka a soo wener ishima i nyian se sha asorabo a se vande eren ken ijime la, nahan se zer nan ayol a ase ibo gbem, shi se hen ser i de se asorabo a se er la ga. Shi ka a soo wener se hen ser kwagh u Yehova a soo hen a vese la kehe kar ikyaa inya, shi mhôônom nam ma zungwen man kwaghbo na u den kua iwasen i a ne se la cii kehe kuma u wanger asorabo ase ga.

Ka mimi, se cii se ‘er isholibo, nahan se kera mba a iengem i Aôndo ga.’ (Rom. 3:23; 7:21-23) Nahan kpa, kwagh la tese ér se gba kwagh sha ishigh nagh ga ze. Yehova fa er ‘tseyô, u i yer un er Diabolo man shi Satan la’ ka a ya mtsera sha mlu wase u isholibo la yô. (Mpa. 12:9, 10) Er Aôndo a fe ér ‘se mba vuulevu yô,’ we ishima a vese shi “zehe” a vese “gbem ga.”—Ps. 103:8, 9, 14.

Aluer se de asorabo a se eren la shi se vaa afanyô sha asorabo shon shi se gema ishima se hide hen Yehova yô, ‘una de se kwaghbo wuee.’ (Yes. 55:7; Ps. 51:17) Bibilo kaa ér, ‘asorabo a ase aa nyian bong kpaa, aa kungu er awombo nahan.’ (Yes. 1:18) Nahan yô, de se kange nen ishima, mayange je se de nen u nôngon ser se er ishima u Aôndo ga.

Ken mlu wase u isholibo la, mayange se fatyô u lun mbaperapera sha ishigh ki Aôndo ga. Adam man Ifa yange de mlu u vough kua ian i ve lu a mi i lun uma gbem sha won la saa ve, kpa lu ve tseegh ga, se kpa saa se. (Rom. 6:23) Nahan kpa, er uumace ve doo Yehova ishima kpishi yô, a ker gbenda u den se asorabo a ase, aluer se na jighjigh a nagh ku ipaan ku Wan na, Yesu Kristu a ne sha iyol na la yô. (Mat. 20:28; Yoh. 3:16) Nenge “mlumun u sha mhôôn” u Aôndo a tese ne a kpilighyol sha wono! (Titu 2:11) A fatyô u den se asorabo a ase! Nahan, er nan ve i doo u se de ser Satan a na se u henen ér a fatyô u den se asorabo a ase ga ze?

“Bende Ikyuhe Na kua Inyam Na”

Satan kaa ér aluer Yobu nyôr ken uange yô, una kera na Aôndo jighjigh ga. Zum u Diabolo lu nahan Yehova tar la, a kaa a na ér: “Bende ikyuhe na kua inyam na, tsô una venda U sha ishigh Yough je.” (Yobu 2:5) Akperan nga ga, luun er Orihyom u Aôndo una fetyô u nan ér se hen ser, ka er se gbe kwagh sha ishigh ki Aôndo ga la se gbe angev yô, ma i saan un iyol kpen kpen.

 Nahan kpa, ka sea kera fatyô u eren hanma kwagh u yange se vanden eren ken mcivir u Yehova ga je kpa, te se kera ga. Aluer i za ta num sha ma hur-or wase, i vihi nan iyol di ye? Nana kera gba se kwagh ga sha ci u nan kera fatyô u eren kwagh sha ci wase er yange nan vande eren la ga yumuu? Mayange ga cii! Nana doo se ishima her, shi se nenge sha a nan dedoo, hemban je yô, aluer nan vihi iyol zum u nan lu nôngon kwagh sha ci wase yô. Doo u se hen ser Yehova una er a vese nahan ga he? Bibilo kaa ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.”—Heb. 6:10.

Ruamabera ôr kwagh u “kwasecôghol ugen u a lu icankwase,” u alaghga yange sue mcivir u Aôndo anyom imôngo yô. Zum u Yesu nenge kwase shon lu haan “ideri ihiar” ken akwati u inyar u ken tempel la, yange nenge ér kwagh u kwase la na la ka u injaa ga shinii? Yesu nenge nahan ga, kpa gema wuese kwase shon kpishi er yange lu ken ibanave kpa, nôngo sha afatyô na cii sue mciviraôndo u mimi yô.—Luka 21:1-4.

Myen wase una va se a nyityô ican cii, a lu iyolbeen shin angev je kpaa. Aluer se za hemen u tilen sha mimi yô, mayange je ikyar i se ye a Yehova la ia tenger ga. Mayange Aôndo una undu mbacivir un sha mimi sha ci u mlu u ican u ve nyer ker la pande ve tahav mbu civir un yum ga.—Ps. 71:9, 17, 18.

‘Tôô Nen Agunduutya u Myom’

Se kura ayol a ase sha mbaaie mba Satan a samber a mi la nena? Apostoli Paulu nger ér: “Taver nen ken Ter sha tahav mbu agee a Na. Huwa nen ikyav mbi utyaav mbi Aôndo cii iyol sha u né fatyô u tilen dông hendan a ayom a diabolo yô.” Kwagh môm ken ikyav mbi utyaav mbin yô, ka ‘agunduutya u myom.’ (Ef. 6:10, 11, 17) Er Satan a lu samber a mbaaie yô, gba kpee u se tôô agunduutya la se cir. Agunduutya ka a kura ityough ki orshoja u nan cir un la. “Ishimaveren keghen myom” i se lu a mi la, ka vangertiôr u se lu a mi ser Aôndo una kure uityendezwa mba a er sha kwagh u tar u he u engem la je la, ia kura mbamhen asev, nahan se venda mbaaie mba Satan mbara. (1 Tes. 5:8) Gba u se kura ishimaverenkeghen la dông sha u henen Ruamabera sha tseeneke wase zulee.

Yobu yange taver ishima ken tswam man ipila i vihin tsung i tagher a mi sha ikyev i Satan la. Jighjigh u nan u Yobu sha kwagh u mnder u shin ku yange taver je, mciem ma kuu kpa fatyô u na un ishimayinan ga. A kaa a Yehova ér: “Ú yila, mo me gema me vengese; tom u ave Ou ua sar U.” (Yobu 14:15) Yange a lu u Yobu una kpe sha ci u mtil na u sha mimi je kpa, a na jighjigh ér mdoo u mbacivir Aôndo sha mimi ve doo un ishima la una mgbegha Un u yilan ve shin mbakpenev.

Se kpa ma se lu a imba vangertiôr la ken Aôndo. Yehova una fatyô u yangen nyityo kwagh i Satan kua mbatomov nav vea va a mi sha a vese cii. Shi umbur kpaa wer, Paulu taver se ishima ér: “Aôndo yô, ka u jighjigh, Una rumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.”—1 Kor. 10:13.

[Foto u sha peeji 20 la]

Mcivir u ú civir Yehova sha mimi la gba un kwagh

[Foto u sha peeji 21 la]

Tôô agunduutya u myom la cir