Yehova Soo ér we u lu “Dedoo”

SHIGHE u kwagh u cieryol u i gbe tar je a lu a er ga la una hii u eren la, Aôndo Uhembanagee una nenge ér mba un lumun a ve cii ve “war.” (Yoel 2:32) Kpa, sha mimi yô, Yehova waren ior sha ikyev i kwaghbo gbem. Er i lu “her a [na] imbor i uma i lu” yô, nengen ér uumace gba kwagh, shi ve kuma u kuran ve kpaa.—Ps. 36:9.

Mbacivir Aôndo mba jighjigh mba sha ayange a tsuaa la kpa lu a mnenge ne sha kwagh u uma. Sha kwagh u Genese 33:18 a er yô, Yakob man tsombor na cii yange ve zende hen ijiir i cieryol ve za nyôr ape ve lu zan la “dedoo.” Yakob yange suur sha Yehova sha u a kura un yô, kpa un iyol na kpa lu nôngon ér una kura uma u mba ve lu zenden a na imôngo mbara cii. (Gen. 32:7, 8; 33:14, 15) Aluer u ngu dondon atindiakaa a Bibilo yô, u fatyô u kuran iyol you kua i mbagenev kpaa. De se nenge nen er mimi ne a benden a mbamaan Ayou a Tartor man amba tom la nahan kua mba ka ve na iwasen shighe u aahe a ermbagenev la yô.

Iyolkuran sha Ikyev i Tindi u Mose

Ken Tindi u Mose la, yange gba u ior mba Aôndo vea dondo gbenda u vea er kwagh ve vea kura ayol a ve yô. Ikyav i tesen yô, yange Oriserael nana maa iyou yô, i gba u nana wa igyar sha haav mbu i sha, nana kase cii. Er ior luun sha tor u ayou a ve ashighe kpishi yô, igyar la i̱ yange ve u̱ osough sha gban. (1 Sam. 9:26; Mat. 24:17) Aikyôr yange una er sha ci u or per tindi u kuran iyol ne yô, Yehova a tsaha nan.—Dut. 22:8.

Tindi shi lu sha kwagh u zendenya u a vihi orgen iyol la kpaa. Bua u or yange una kôr orgen man nana kpe yô, í gba u or u bua la nana wua un sha ci u kuran mbagenev. Kwagh yange a saa or u bua la kpishi sha ci u i gba u nana ya inyam na shin nana tee i kpaa ga. Kpa aluer bua una vihi or iyol, man or u bua la nana kera kura bua shon ga di ye? Yange una za kimbir wuan or yô, bua shon man or u bua la cii i wua ve. Tindi la na yô, mba yange i kende ve ken ishima u gban kenden ilev vev tsô la cii ve hide ve gbidye kwar sha ieren ve la.—Eks. 21:28, 29.

Tindi shi yange ôr kwagh u yaren tom a ikyavmbitomov sha inja kpaa. Mbaiserael kpishi yange ve taven ikyon sha azembe. Yange or a gberen kon man gbengerjembe ua tsua ken hondo abu ua tume orgen u nan til her ikyua nana kpe yô, i gba u orgberenkon la nana yevese a za yer ken ma gar u waren. Yange i gba u nana lu ken gar la zan zan pristi u tamen una kar kpen, nahan or u nan woo or abu la nan pav a tsombor u nan kua ya u nan anyom imôngo. Kwagh la lu u tesen ikyurior la ér uma ka icighankwagh sha ishigh ki Yehova. Or yange nana lu a mnenge u Yehova sha kwagh u uma yô, nan nenge sha ikyavmbitomov mbi nan tsembelee, nahan nan yar tom a mbi a u vihin or iyol shio.—Num. 35:25; Dut. 19:4-6.

 Yehova pase ken imba atindi ne wang ér un soo ér ior nav ve wa ikyo u eren kwagh sha gbenda u kuran ayol a ve hen uya vev kua hanma ijiir igen i ve lu cii. Mba ve na ior mbagenev zua a ku shin iyolvihin yô, a lu abur abur kpa, i ôr ve ijir. Mhen u Yehova gema sha kwagh u kuran uma u or ga. (Mal. 3:6) Zan zan hegen kpa a soo ér ior ve palegh iyolvihin sha ayol a ve kua mbagenev kpaa. Man hemba kan sha mi u eren nahan shighe u se lu maan shin sôron ajiir a i tsegh sha ci u mcivir u mimi yô.

Iyolkuran Hen Ijiir i Maan Kwagh

Se mba nengen ityom i maan man i sôron Ayou a Tartor man Ayou a Mkohol man iyaagh ki branci ser ka kwagh u civirigh kpishi. Shi kape se  nengen ityom i nan mba aahe a er ve iwasen la kpaa je la. Doo u hanma shighe yô, se eren ityom yase tsembelee, shi ityom i kiriki je kpa aluer se mba eren teregh sha i yô, kwaghvihin una tser se kua mbagenev kpaa. (Orpa. 10:9) Sha kpôô yô, aluer se hen u eren kwagh kuran iyol yase yô, se fatyô u palegh iyolvihin.

Bibilo kaa ér: “Icivir i ikyaior ka agee a ve je, hwe u mbabeenyol yô, ka ivu.” (Anz. 20:29) Ka agumaior ka i gba u aa yar tom a tahav vev u eren ityom i ageegh ye. Kpa mbatomov mbabeenyol mba ve tse ken tom u maan kwagh kpishi la ka ve eren ityom i kuren kwaghmaan, i ka i mase eren vindi vindi la sha ave a ve man sha ikyav vev mbi tomov. Mbatomov mba ve seer been iyol hegen ne, shighe ngu u yange ve yar tom a tahav vev sha ayange a ve lu iyev la sha u eren ityom i taver yô. Wea lu or u ú sember nan iyol you yô, nenge er mba ve er tom ica i gbe la ka ve er tom ve yô, nahan dondo kwaghwan ve. Aluer u soo u henen tom yô, anmgbianev mba ve fe tom u maan kwagh tsor tsor la vea tese u akaa kpishi. Vea tese u er u er tom a ikyav mbi maan kwagh mbi mbia fatyô u vihin or iyol la, man shi er u fatyô u kôron ikyav mbi yuhwan kenden a mi sha kpaa yô. Kwagh ne una wase uu eren tom tsembelee shi kuran iyol you, man a saan we iyol kpaa.

Gba u mbatomov mba ve yar hen ijiir i maan kwagh cii vea luun tsevaa hanma shighe. Akaa ka a geman hen ijiirtom fele fele. Ijiir igen ia  lu vaanaa je kpa, a teman ga yô, ihungwa ia gba her. Alaghga mbamaankwagh kpela gogo, gayô ve menger kon, shin vea daa bokoti u penta. Aluer ishima dan u yô, u vihi iyol fese je a ngôôr ga. Kera je, tindi tese ér mbatomov mba ve yar hen ijiir i maan kwagh cii ve luun a ikyavmbitomov vev mbi yangen iyolvihin. Ambaakaa er ajingi a gbondomoo man idyer i gbondomoo kua akôv a i er sha ci eren imba tom la cii yô aa fatyô u yangen we iyolvihin hen ijiir i maan kwagh. Kpa ikyav mbin mbia fatyô u gban wasen we ga, saa u ver ishima sha mbi tsembelee shi u huan mbi iyol kpaa.

Shin er ka i lu inja er ikyavmbitomov kpishi mbi ican u eren tom a mbi ga nahan kpa, gba u ú hen u yaren tom a mbi ve a hoghol we a mbi shi mbia vihi u iyol ga ye. Aluer u vande fan u yaren tom a ikyagh ki tomough ki i gbe u ú er tom a mi ga yô, ôr anmgbian u nan nengen sha tom shon la. Nahan nana tese u er i eren tom a ki yô. Doo u ú hide a iyol ijime shi u fa pe mfe wou a kighir la. Kwagh u i soo yô ér, aluer u fatyô yô, palegh u vihin iyol shi vihin mbagenev kpaa iyol zum u ú yar hen ijiir i maan kwagh yô.—Anz. 11:2.

Gbeev mbu hembe vihin ior iyol hen ape i yar kwaghmaan ye. Cii man u̱ unde sha daa u tilen sha mi maan kwagh shin gogo yô, nenge wer i wa akaa ne atônkô u a sue a tsembelee shi a taver iyol kpaa yô. Aluer gba u ú er tom sha daa u tilen sha mi maan kwagh shin sha toryough yô, alaghga tindi a tese ér we u ta kor ken iwenge u zer mape sha er u osough u gba ga yô, gayô i̱ kase kwagh u kôron ave ker sha kurugh ku iyough sha. Pine ortamen u nan nengen sha tom la aluer u ngu a fa er i eren tom sha ajiir a taven sha ga yô. *

Er mbacivir Yehova ve lu seer a seer ingyegh sha tar cii nahan, kape i gbe u a maa Ayou a Tartor kua ajiir agen a eren mcivir u mimi je la. Mbatamen mba nengen sha tom hen ajiir a i maan Ayou a Tartor shin i eren ityom imba la nahan cii ka ve kuran mba ve lu iyôngo i Yehova i i gbe un kwagh la, ve tesen ve kwagh u vea er hen ijiirtom la yô. (Yes. 32:1, 2) Aluer i na u ian i civirigh ér u hemen anmgbianev ou mba nomso man mbakasev hen ijiir i maan kwagh yô, mayange i de hungur we ér u kuran iyol la i lu kwagh u hange hange ga. Nenge wer ijiirtom ngi wang, akaa a vela vela a nan iyolvihin cii nga her ga. Mbatomov mba i gbe u ú pase ve atindi a eren tom a iyolvihin shio la, lam a ve sha imo i legh legh, kpa gema ôr taver taver. De ne mba ve fe kwagh u tom i kom ve ga la ian wer ve er tom sha ajiir a or a fatyô u vihin iyol fele la ga. Vande nengen a kwagh u una fatyô u vihin mbatomov iyol la tsuaa, nahan wa ve agoyol sha er vea er tom vea kura ayol a ve yô. Umbur wer, awashima wase yô, ka u eren tom u i we ave la been a iyolvihin shio.

Dooshima Mgbeghan Mbatomov u Kuran Ayol a Ve

Tom u maan Ayou a Tartor kua a ayou agen a eren mcivir u mimi ker la ka tom ú iyolvihin ia fatyô u duen ker yô. Sha nahan yô, gba kpee u mba ve eren tom ne cii vea wa ikyo sha ayol a ve. Aluer u ngu dondon akaawan a Bibilo kua atindi a kuran iyol sha ci u tom la shi u ngu eren kwagh sha kwagh fan yô, ú palegh iyolvihin, shi mba ve eren tom a we imôngo mbara kpa kwaghvihin una tser ve ga.

Kanyi i lu ityôkyaa i vesen i ka i na ve se wa ikyo sha kwagh u kuran iyol yase tsung yumu? Ka dooshima. Mdoo u Yehova a doo se ishima la ngu a mgbegha se u wan uma ikyo, er un kpa a we uma ikyo nahan. Shi mdoo u ior ve doo se ishima la kpa ngu a yange se u gaase eren kwagh u una na ve iyolvihin la. (Mat. 22:37-39) Sha nahan yô, se nôngo nen sha afatyô wase cii sha er mba ve eren ityom yase i maan kwagh la vea vihi iyol ga, vea lu “dedoo” yô.

[Ngeren u shin kpe]

[Ngeren u kiriki/Foto u sha peeji 30 la]

Er U Palegh Iyolvihin sha Gogo Yô

Ken inyom i i sember karen ne, mbatomov mba osough sha gogo gban vihin iyol kuma 160,000 ken tar u Amerika. U seer sha mi yô, mba gban nahan kpen kuma iorov 150. Hanma ijiir i u lu shi u eren tom cii, akaawan aa se nger shin heen ne aa fatyô u wasen we u palegh u osough sha gogo gban.

◇ De yaren tom a gogo u a lu yeke yeke shin a vihi ga, shi de sôron imba gogo la kpaa ga. Ta un kera.

◇ Hanma gogo ngu a myohom ma i er un ér a tôôn jighilii yô. Nenge wer myohom ou kua ma ikyavmbitomov mbi u eren tom a mi la hemba myohom ma i gbe u gogo u ú eren tom a mi la una tôô la ken inya ga.

◇ Ver gogo hen ijiir i i lu vaanaa shi inya i taver yô. De pendan gogo sha kwagh u daase, er daa u tilen sha mi maan kwagh shin sha ubokoti shin sha mbaakwati nahan ga.

◇ Hanma shighe u ú lu hungwan sha gogo shin u lu unden sha mi yô, kenger sha mi.

◇ Gogo môm kpa, de tem shin tilen sha ityelan na i tan angahar unden, i ihiar i masen sha ityough nagh la ga.

◇ Aluer gba u ú unde sha tor shin ú hungwa shin inya sha gogo yô, ver un sha er ityelan i pendan angahar sha mi la ia kar toryough shin kwagh u ú soo u pendan un sha mi la a kuma angahar atar nahan yô. Kange angahar a gogo shin inya hen ape i ver un la, gayô mande kon ken hemen na sha er una dolough ga yô. Aluer u kanshio u veren gogo sha imba igbenda la nahan yô, kaa ôr nan kôr zum u ú unde sha mi u lu eren tom yô. Ta kor sha ityough nagh zer mape sha er una menger ga yô.

◇ De pelegh ikpande sha ityelan i gogo, nahan tilen sha mi eren tom ga.

◇ Aluer u ngu nalegh ave kua angahar ken ica shighe u lu eren tom sha gogo sha Aôndo yô, u fatyô u nan gogo la una hingir u kpegher. Palegh iyolvihin sha u nalegh karen ikyaa inya nahan la. Kporom a gogo a luun ikyua a we hanma shighe cii, er u lu eren tom yemen la.

◇ Aluer gba u ú er tom sha gogo u i ver un sha hunda u i wuhu yô, ver ikyav i tan icin sha hunda shon shi gesa u. Aluer fatyô u gesan hunda shon ga yô, ver orkuran her u nana taan mba ve soo u nyôron sha u la icin yô.

◇ I lu or môm tseegh nana unde sha gogo ye, saa di u i er un ér mbatomov uhar ve unde sha mi yô. *

[Ngeren u shin kpe]

[Foto u sha peeji 29 la]

Tindi u Mose la yange tese ér or a maa iyou yô, nana wa igyar sha haav mbu i sha i ningir i tser